მრგვალ მაგიდას სენაკის მერიაში ესწრებოდნენ მერიის ხელმძღვანელი პირები, ჯანმრთელობისა და სოციალური დაცვის სამსახურის, ბავშვთა უფლებების დაცვისა და მხარდაჭერის განყოფილების, სოციალური მომსახურების სააგენტოს და საგანმანათლებლო სექტორის წარმომადგენლები.
შეხვედრაზე ისაუბრეს ფემიციდის ფაქტების საგანგაშო მატების შესახებ. აქცენტი გაკეთდა ოჯახში ძალადობის პრობლემაზე და ადგილობრივ სტრუქტურებთან თანამშრომლობის პერსპექტივაზე.
აღინიშნა, რომ ადგილობრივი ხელისუფლება წარმოადგენს ძალადობისგან დაცვის სახელმწიფო რეფერალური მექანიზმის სუბიექტს - აქვს უფლებამოსილება და ვალდებულება, ჩაერთოს ძალადობის პრევენციის, შემთხვევების იდენტიფიცირების, მსხვერპლთა დახმარების საკითხებში, რასაც მუნიციპალიტეტი შესაბამისი პროგრამებით პასუხობს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
სენაკის მერიის სხდომათა დარბაზში ქალთა მიმართ ძალადობის აღკვეთის უწყებათაშორისი კომისიის შეხვედრა გაიმართა. შეხვედრას ესწრებოდნენ კომისიის წევრები, საკრებულოს, სკოლების და ქალთა ფონდი „სოხუმის“ წარმომადგენლები,.
კონკრეტული ქეისების განხილვის შემდეგ შეკრებილებმა იმსჯელეს ძალადობის პრევენციაზე, მსხვერპლთა დაცვაზე, ადგილობრივ სახელმწიფო სტრუქტურებთან თანამშრომლობაზე.
უწყებათაშორისმა კომისიამ მიიღო გადაწყვეტილება, შეუერთდეს ყოველწლიურ 16- დღიან საინფორმაციო კამპანიას გენდერული ძალადობის წინააღმდეგ.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ფონდი „სოხუმის“ თბილისის ოფისის წარმომადგენლებმა - ლინდა ჩიხლაძემ და ნინო კორინთელმა მონაწილეობა მიიღეს WWP EN-ის მიერ ორგანიზებულ ვებინარში მამაკაცების ჩართულობის მნიშვნელობაზე ბავშვის მოვლისა და ოჯახში ძალადობის შესახებ საუბრებში.
ღონისძიებაზე ჩვენმა წარმომადგენლებმა ისაუბრეს ქართულ საკანონმდებლო მოწესრიგებაზე და იმაზე, თუ რა მნიშვნელობისაა ოჯახში ძალადობის პრევენციისათვის მამაკაცების მონაწილეობა ბავშვის ზრუნვა/აღზრდაში.
„ბავშვთა უფლებების დაცვა და ადგილობრივი თანამშრომლობა სოციალური სერვისების გაუმჯობესების კუთხით“ - ამ თემაზე ინფორმაციის გაცვლის შეხვედრა ამჯერად ქობულეთის მუნიციპალიტეტის სკოლამდელი აღზრდის დასებულებების პერსონალთან ჩატარდა. ღონისძიებას ესწრებოდნენ მერიის ბავშვთა უფლებების დაცვის განყოფილების ხელმძღვანელი, მუნიციპალიტეტის გენდერული საბჭოს თავმჯდომარე, ქალთა ფონდი „სოხუმის“ წარმომადგენლები.
მონაწილეებს გააცნეს მუნიციპალიტეტისთვის შედარებით ახალი სტრუქტურის - ბავშვთა უფლებების დაცვის განყოფილების საქმიანობის სპეციფიკა; ადგილობრივი პროგრამები. გაჟღერდა ინფორმაცია ფონდის მიერ ჩატარებულ მონიტორინგზე, რომელმაც სხვადასხვა მუნიციპალიტეტში არსებული პოზიტიური პრაქტიკა და გამოწვევები გამოკვეთა.
აღინიშნა, რომ სკოლამდელი საგანმანათლებლო დაწესებულებების ზოგიერთ წარმომადგენელს ჯერ კიდევ არა აქვს ბოლომდე გააზრებული პასუხისმგებლობა, რასაც მას აკისრებს კანონი ბავშვთა ოჯახში ძალადობისგან დაცვის კუთხით. გამოიკვეთა საკითხები, როდისაა აუცილებელი კომუნიკაცია ბავშვთა უფლებების დაცვის განყოფილებასთან.
სკოლამდელი დაწესებულებების პედაგოგები შეეხნენ სპეციფიკური საჭიროებების მქონე ბავშვებთან დაკავშირებულ სხვადასხვა მტკივნეულ საკითხს, რომელიც ეხება. მოხდა შეთანხმება სამომავლო თანამშრომლობის თემებზე.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
6-9 ოქტომბერს გაიმართა ფემინისტური ფორუმი „სხეული და გარემო: ზრუნვის ორგანიზების, წინააღმდეგობის და სოლიდარობის ფემინისტური იდეები და პრაქტიკა”.
ოთხი დღის განმავლობაში, ქვიარ და ფემინისტ აქტივისტებთან, მკვლევრებთან და ფორუმის მონაწილეებთან ერთად, ქალთა ფონდი „სოხუმის“ წარმომადგენლები - ნინო კორინთელი და ლინდა ჩიხლაძე ჩართული იყვნენ უსაფრთხო სივრცის ინტერდისციპლინური, ადგილობრივი და რეგიონული ცოდნის და გამოცდილების გაცვლისა და მსჯელობის პროცესში.
WISG-ის გუნდთან ერთად ჩვენც ვიმედოვნებთ, რომ ეს შთამაგონებელი დღეები აუცილებლად დაედება საფუძვლად ფიქრის, შრომისა და თანამშრომლობის ახალ შესაძლებლობებს. მათ შორის, ფორუმის ტრადიციის გასაგრძელებლად, ქვიარ ფემინისტური წარმოსახვის, ცოდნისა და პრაქტიკის ახალი სივრცეების შექმნისა და ტრანსფორმაციისთვის.
გენდერული თანასწორობის მუდმივმოქმედი საპარლამენტო საბჭომ, თემატური მოკვლევის - „ქალების წვდომა ფინანსურ რესურსებზე“ ფარგლებში, სამოქალაქო საზოგადოების წარმომადგენლებთან ზეპირი მოსმენა გამართა. შეხვედრის მიზანი იყო ქალებისთვის ფინანსურ რესურსებზე წვდომის ბარიერების შესწავლა და არსებულ მონაცემებზე დაყრდნობით პარლამენტისთვის და სხვა სახელმწიფო ინსტიტუტებისთვის პოლიტიკის ინსტრუმენტების შემუშავების ხელშეწყობა.
თემატური მოკვლევის სამუშაო ჯგუფის შეხვედრაში ქალთა ფონდი „სოხუმის“ წარმომადგენელი - ეკატერინე გამახარიაც იღებდა მონაწილეობას. მან თავის მოხსენებაში ფოკუსი დევნილ და კონფლიქტით დაზარალებულ ქალებზე გააკეთა და ხაზი გაუსვა, რომ ფინანსურ რესურსებზე ქალების ხელმისაწვდომობის უზრუნველყოფა წარმოადგენს არა მხოლოდ ქვეყნის განვითარების, სიღარიბესთან და ქალთა მიმართ ძალადობასთან ბრძოლის უმნიშვნელოვანეს ფაქტორს, არამედ მას ქვეყანაში მშვიდობის მშენებლობის და ნდობის აღდგენის საქმეში უდიდესი დატვირთვა აქვს.
„დღეს არა საუბრების, არამედ კონკრეტული მოქმედებების დროა! რადგან ვიდრე ჩვენ პრობლემებზე ვსაუბრობთ და ვბჭობთ, ქალების დიდი ნაწილი უშუალოდ უპირისპირდება უთანასწორობას, ძალადობას, დრომოჭმულ სტერეოტიპებს და ეკონომიკური დამოკიდებულების მთელ სიმწარეს... ბევრ მათგანს უწევს სამკვდრო-სასიცოცხლო ბრძოლა გადარჩენისთვის... მხოლოდ ეკონომიკურად ძლიერ ქალებს შეუძლიათ საზოგადოებრივ კეთილდღეობაზე ზრუნვა, ქვეყნის განვითარებაში წვლილის შეტანა, ძალადობასთან ბრძოლა, და მდგრადი და ხანგრძლივი მშვიდობის შენება“... - განაცხადა ეკატერინე გამახარიამ.
შეხვედრის მსვლელობისას მონაწილეებმა იმსჯელეს პრობლემების დაძლევის კონკრეტულ გზებზე და ერთმანეთს საკუთარი მიგნებები და რეკომენდაციები გაუზიარეს.
მარინამ ლამაზი და ტკბილი უკრაინული დესერტი მოამზადა - ლვოვის „სირნიკები“, ანიამ კი - კატლეტები კიევურად. მარინა და ანია უკრაინელი ფსიქოლოგები არიან, ჩვენს ორგანიზაციაში მუშაობენ და ორივე, სხვა ქალებთან ერთად, მონაწილეობდა ქალთა ფონდ „სოხუმში“ უკრაინული სამხარეულოს დღის მოწყობაში 15 სექტემბერს. მათ აღნიშნეს, რომ საინტერესო, სასიამოვნო და სარებილიტაციო ღონისძიება გამოვიდა.
მათ პროფესიული კუთხითაც აქტიურად იმუშავეს სექტემბერში.
ანია შალიმოვა ამბობს, რომ შეხვდა ოთხ ახალ ოჯახს და ერთ ოჯახს - განმეორებით, ჩაატარა 12 ინდივიდუალური კონსულტაცია. იყვნენ მუდმივი კლიენტებიც და ახლებიც. ამასთანავე კონსულტაცია გაუწია ბავშვებს და მათ მშობლებს.
„უკრაინელებს დადებითად განაწყობთ ის, რომ მეც უკრაინიდან ვარ“, - ამბობს ანია. - ისინი ინტერესდებიან, რომელი ქალაქიდან ვარ და როგორ გადავიტანე ომი. თუ ჩემი მშობლიური ქალაქიდან არიან, მაშინ ვარკვევთ, ვინ რომელ უბანში ცხოვრობდა“ (სწორედ ამიტომაც მოვიწვიეთ ორი უკრაინელი ფსიქოლოგი უკრაინელ ლტოლვილებთან სამუშაოდ).
მარინე 28 წლისაა. დეპრესიაში იყო მეუღლის გარდაცვალების შემდეგ: „ყველაფერი გაჩერდა. არ ვიცოდი, როგორ მეცხოვრა. ჩემთან ერთად ტიროდა დედაჩემიც. ერთხელ ასე თვალცრემლიანებს დედის მეგობარი შემოგვესწრო და მირჩია, დახმარებისთვის ფონდი „სოხუმის“ ფსიქოლოგთან მივსულიყავი. თითქმის რვა თვე ვსწავლობდი, ახლებურად შემეხედა ჩემი თავისთვის. ნელ-ნელა მიჩნდებოდა იმედი. არ ვიცი, როგორ გამოვხატო მადლიერება არა მარტო ჩემი ღიმილისთვის, არამედ იმ სხივისთვის, ჩემი დედის თვალებში რომ არის ახლა“...
მარინე ერთ-ერთია ფსიქოლოგის მადლიერ ბენეფიციართაგან. ასეთი უამრავია დასავლეთ საქართველოს მუნიციპალიტეტებში.
სექტემბერში ფსიქოლოგის შეხვედრები გაიმართა ვანის, ჩოხატაურის, სენაკის და ხურჩის (ზუგდიდის მუნიციპალიტეტი) ქალთა მხარდაჭერის ცენტრებში, აგრეთვე ქობულეთში – ოღონდ ონლაინ. ჯგუფურ და ინდივიდუალურ შეხვედრებში მონაწილეობა მიიღო 23-მა ბენეფიციარმა.
19 სექტემბრიდან თვის ბოლომდე კომპლექსური სარეაბილიტაციო სამუშაო ტარდებოდა ძალადობის მსხვერპლ სამ ქალთან. ისინი ქალთა ფონდი „სოხუმის“ სარეაბილიტაციო ცენტრში შვილებთან ერთად იმყოფებოდნენ - სულ 6 ბენეფიციარი. ყოველდღიურ აქტიურ მუშაობაში ჩართულები იყვნენ პედაგოგი, სოციალური მუშაკი, იურისტი და ფსიქოლოგი.
სარეაბილიტაციო კურსის დასრულების შემდეგ ერთ-ერთმა ბენეფიციარმა (ის 26 წლისაა) აღნიშნა, რომ იგრძნო დიდი მხარდაჭერა. უკვე იცის, რომ მარტო არ არის. აქ გატარებულმა დღეებმა გააძლიერა სამივე ქალი და ისიც გააცნობიერეს, რომ მეტი უნდა იმუშაონ საკუთარ სისუსტეებზე. მიიღეს ბევრი საჭირო ინფორმაცია, პოზიტივი, სასარგებლო რჩევები და გადაწყვიტეს, ახალი ძალებით გადაფურცლონ თავიანთი ცხოვრების ახალი გვერდი.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
მონაწილეთა შეფასებით, ძალიან საინტერესო და მნიშვნელოვანი გამოდგა ინფორმაციის გაცვლის შეხვედრა (თემა - „ბავშვთა უფლებების დაცვა ტყიბულის მუნიციპალიტეტში და ადგილობრივი თანამშრომლობა სოციალური სერვისების გაუმჯობესების კუთხით“), რომელიც ქალთა ფონდი „სოხუმის“ ინიციატივით და ტყიბულის ბავშვთა უფლებების დაცვისა და მხარდაჭერის სამსახურის ორგანიზებით, მუნიციპალიტეტის განახლებულ საკონფერენციო დარბაზში გაიმართა.
მონაწილეებს გააცნეს ფონდი „სოხუმის“ მიერ ჩატარებული კვლევის მიგნებები, ბავშვთა უფლებების დაცვის და მხარდაჭერის სამსახურის საქმიანობა და არსებული გამოწვევები.
საკუთარი მოსაზრებები გაცვალეს მუნიციპალიტეტის მესვეურებმა, მუნიციპალური სერვისების მიმწოდებლებმა, მოქალაქეებმა. გამოიკვეთა მთავარი გამოწვევა - რესურსების სიმცირე სერვისების გასამართად; უფრო მოქნილი საკანონმდებლო რეგულაციების საჭიროება.
მაღალი შეფასება მიეცა მჭიდრო თანამშრომლობას სამოქალაქო სექტორთან და რესურსების გამთლიანებას ბენეფიციარების დასახმარებლად.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)