ქალთა მხარდაჭერის ცენტრები (533)
ქალთა მხარდაჭერის ცენტრი – ეს არის ფონდი „სოხუმის“ ფილიალები ქუთაისში, წყალტუბოში, ხონში, თერჯოლაში, სენაკში, ფოთში, ხურჩა/კოკში (ზუგდიდის მუნიციპალიტეტი), ლანჩხუთში, ოზურგეთში - შეიქმნა 2009 წლიდან. ცენტრების დანიშნულებაა ქალთა გაძლიერება, სოციალური, ფსიქოლოგიური, იურიდიული დახმარების გაწევა ძალადობის მსხვერპლი ქალებისთვის და კრიზისული ოჯახებისათვის, რომლებიც რთულ ცხოვრებისეულ მდგომარეობაში აღმოჩნდნენ. ქალთა მხარდაჭერის ცენტრები ხელს უწყობს ქალთა უფლებების დაცვას და მათ სოციალურ-ფსიქოლოგიურ რეაბილიტაციას.
საინტერესო მინი-პროექტი განახორციელა ხონის ქალთა მხარდაჭერის ცენტრმა სამ სოფელში: გოჩა ჯიხაიშში, დიდ კუხსა და ნახახულევში. პროექტი „სანიტარულ-ჰიგიენური კულტურა - ჰარმონიული ოჯახის საწინდარი“ მიეძღვნა საერთაშორისო კამპანიას „16 აქტიური დღე ქალთა მიმართ ძალადობის წინააღმდეგ“. პროექტის ფარგლებში დაიბეჭდა საინფორმაციო ფურცლები, ჩატარდა საინფორმაციო შეხვედრები ექიმთან. შეხვედრებს ესწრებოდნენ მხოლოდ ქალები (25 წლიდან), რადგან სანიტარულ-ჰიგიენური ნორმების აუცილებლობისა და სეზონური პრობლემების (გაციება, გრიპი) გარდა აქცენტი გაკეთდა სკრინინგის პოპულარიზაციაზე (საშვილოსნოს ყელის და ძუძუს), რადგან ბევრმა არ იცის, რომ უფასოა და თან ასე ახლოს, ქუთაისში.
სოფლად მცხოვრებ ქალებს არა აქვთ მსგავსი შეხვედრების ფუფუნება და მათი აზრით, ეს იყო გამორჩეული პროექტი, ექიმის მიერ მოწოდებული საინტერესო თემებით.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
ფონდი „სოხუმის“ ხონის ქალთა მხარდაჭერის ცენტრმა დაიწყო მცირე პროექტის განხორციელება. პროექტი ითვალისწინებს მუშაობას ხონის მუნიციპალიტეტის ორ სოფელში, ნახახულევსა და მათხოჯში - მოსწავლეების ინფორმირებულობის დონის ამაღლება, უნარ-ჩვევების ჩამოყალიბება კონფლიქტის მოგვარების კუთხით და ჩართვა ბულინგის პრევენციაში.
თებერვალში ჩატარდა საინფორმაციო შეხვედრები სოფლების რწმუნებულებთან და სკოლების დირექტორებთან.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
ასერტულობის თემაზე გაიმართა ფსიქოლოგიური ჯგუფური საინფორმაციო-საკონსულტაციო შეხვედრა 10 ქალთან წყალტუბოს ერთ-ერთ კოლექტიურ ცენტრში. ეს არის თემა ეფექტური ურთიერთობისა, რომელიც გამორიცხავს აგრესიას, ძალდატანებას. ეს არის პარტნიორული, თანაბარი დამოკიდებულება ერთმანეთთან. მონაწილეები გაეცნენ ასერტული ურთიერთობების წესებს, იმუშავეს ასერტული ქცევის ბარათზე. ეს საჭირო თემა იყო მათთვის, რაც აღნიშნეს კიდეც უკუკავშირის დროს.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
„ცოდნით - ძალადობის წინააღმდეგ“ - ასე ჰქვია მინი-პროექტს, რომელიც წყალტუბოს ქალთა მხარდაჭერის ცენტრმა განახორციელა.
პროექტის მიხედვით, საინფორმაციო შეხვედრები ჩატარდა წყალტუბოს მუნიციპალიტეტის თვითმმართველ ერთეულებში და ადგილობრივი თვითმმართველობის წარმომადგენლებთან. შეხვედრების თემა იყო ადგილობრივი თვითმმართველობის როლის გაზრდა ძალადობის პრევენციის და მსხვერპლთა დაცვის კუთხით. შეკრებილებმა ასევე მიიღეს ინფორმაცია ფონდი „სოხუმის“ და მისი ერთ-ერთი რგოლის - წყალტუბოს ქალთა მხარდაჭერის ცენტრის საქმიანობის შესახებ. დაურიგდათ საინფორმაციო მასალები.
5 დეკემბერს კი წყალტუბოს მერიის სააქტო დარბაზში თვითმმართველობის წარმომადგენლებისთვის ჩატარდა დასკვნითი ტრენინგი ძალადობის პრევენციის საკითხებზე. მონაწილეებმა შეიმუშავეს რეკომენდაციები, რომელთაც უახლოეს მომავალში განახორციელებენ სხვადასხვა სოფელში. ტრენინგის შესახებ მომზადდა და ტელეკომპანია ,,რიონის“ ეთერით გადაიცა ტელესიუჟეტი.
პროექტი ხორციელდება ორგანიზაცია Brot für die Welt –
Evangelischer Entwicklunsdienst მხარდაჭერით (გერმანია)
მაისში ქუთაისის, წყალტუბოს, ხონის, სენაკის, ფოთის, ხურჩა/კოკის (ზუგდიდის მუნიციპალიტეტი) ქალთა მხარდაჭერის ცენტრების მობილიზატორებმა შეავსეს მსხვერპლთა 11 ანკეტა. ამ რეალურ შემთხვევებში მოთხრობილია ძალადობის შესახებ ქმრის თუ ოჯახის სხვა წევრების მხრიდან.
10 შემთხვევაში ძალადობის მსხვერპლი ქალია, ერთ შემთხვევაში - ხანდაზმული მამაკაცი. მათგან მხოლოდ სამმა მიიღო ფსიქოლოგის კონსულტაცია, ამდენივე ადამიანი შეხვდა იურისტს.
ფონდი „სოხუმი“ ყოველთვიურად ატარებს ძალადობის მონიტორინგს. ქუთაისის, წყალტუბოს, ხონის, სენაკის, ფოთის, ხურჩა/კოკის (ზუგდიდის მუნიციპალიტეტი) ქალთა მხარდაჭერის ცენტრების მობილიზატორებმა აპრილში შეავსეს მსხვერპლ ქალთა 15 ანკეტა. ანკეტებში აღწერილია ძალადობის რეალური შემთხვევები - ქმრის, დის თუ ოჯახის სხვა წევრების მხრიდან.
ყველა 15 შემთხვევა დაფიქსირებულია, ძალადობის ობიექტებს ეცნობა ფოდნის სერვისების შესახებ და მიმდინარეობს დაკვირვება რეაგირების დინამიკაზე.
დაზარალებული ქალებიდან მხოლოდ სამი მივიდა ფსიქოლოგთან კონსულტაციაზე, ორმა მათგანმა გაიარა იურიდიული კონსულტაცია და მათ მიეცა მიმართულება შესაბამის სტრუქტურებში.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
ცხოვრებისეული სიძნელეები არის წინააღმდეგობა მიზნის მიღწევის გზაზე და საჭიროა დიდი ძალისხმევა მათი დაძლევისათვის. ფონდი „სოხუმის“ ფსიქოლოგმა ამ აქტუალურ საკითხებზე ჩაატარა საკონსულტაციო შეხვედრები ქუთაისის, წყალტუბოს, ხონის, ფოთის, ხონის, სენაკის და ხურჩის (ზუგდიდის მუნიციპალიტეტი) ქალთა მხარდაჭერის ცენტრებში. შეხვედრებს ესწრებოდნენ 26-დან 65 წლამდე ასაკის ქალები.
მათ გაიგეს, რომ სიძნელეები უჩვეულო გარემოებებში ჩნდება, როდესაც მოსაგვარებელია არასტანდარტული და ამიტომაც რთული ამოცანები, რომელთაც ხშირად პრობლემებს ვეძახით. ფსიქოლოგმა რჩევები მისცა ქალებს და მათგან ერთ-ერთი ყველაზე მთავარია: დარწმუნებული იყავით, რომ ეს დროებითი მოვლენაა. არაფერი გრძელდება მუდმივად, მათ შორის - სიძნელეები.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
ქალაქ ქუთაისის დევნილთა კოლექტიურ ცენტრებში ჩატარდა 6 საინფორმაციო-საკონსულტაციო ფსიქოლოგიური შეხვედრა, რომელთაც ესწრებოდა 47 ქალი 20-დან 65 წლამდე, მათ შორის 9 - პირველად.
ფონდი „სოხუმის“ ფსიქოლოგმა მანანა გოცირიძემ ჩაატარა კონსულტაციები ქუთაისის, სენაკის და ხურჩის ქალთა მხარდაჭერის ცენტრებში. სულ ესწრებოდა 42 ქალი.
