ქალთა მხარდაჭერის ცენტრები (533)
ქალთა მხარდაჭერის ცენტრი – ეს არის ფონდი „სოხუმის“ ფილიალები ქუთაისში, წყალტუბოში, ხონში, თერჯოლაში, სენაკში, ფოთში, ხურჩა/კოკში (ზუგდიდის მუნიციპალიტეტი), ლანჩხუთში, ოზურგეთში - შეიქმნა 2009 წლიდან. ცენტრების დანიშნულებაა ქალთა გაძლიერება, სოციალური, ფსიქოლოგიური, იურიდიული დახმარების გაწევა ძალადობის მსხვერპლი ქალებისთვის და კრიზისული ოჯახებისათვის, რომლებიც რთულ ცხოვრებისეულ მდგომარეობაში აღმოჩნდნენ. ქალთა მხარდაჭერის ცენტრები ხელს უწყობს ქალთა უფლებების დაცვას და მათ სოციალურ-ფსიქოლოგიურ რეაბილიტაციას.
ფონდი „სოხუმის“ ფსიქოლოგები ივნისში სხვადასხვა მეთოდით მუშაობდნენ: სატელეფონო კონსულტაცია – 7 ზარი, კონსულტაცია სკაიპით – ფოთსა და ხურჩაში (ზუგდიდის მუნიციპალიტეტი).
მეტი იყო ინდივიდუალური თერაპია. აი რამდენიმე მაგალითი:
35 წლის ქალი - დეპრესია, მუშაობა წარიმართა არტთერაპიით, კონსულტაციისთვის გაიგზავნა ფსიქიატრთან.
30 წლის ქალი - ძველი წყენა და შიშები. მუშაობდნენ ასოციაციური ბარათებით, არტთერაპიის გამოყენებით ემოციების კონტროლისა და რესურსების მოძიებისთვის
24 წლის ქალი - სწავლობდნენ დედამთილთან ურთიერთობას, ქცევის სოციალურ როლებს, ემოციების კონტროლს.
მუშაობა მიმდინარეობდა ქუთაისელ, ფოთელ, ოზურგეთელ და ხურჩელ (ზუგდიდის მუნიციპალიტეტი) ბენეფიციარებთან, ხოლო სოფელ ორსანტიაში გაიმართა ჯგუფური შეხვედრა ქალებთან - ხურჩა/კოკის ქალთა მხარდაჭერის ცენტრის (ზუგდიდის მუნიციპალიტეტი) მცირე პროექტის მონაწილეებთან.
მომზადდა ძალადობის მონიტორინგის ოთხთვიანი (თებერვალი-ივნისი) ანგარიში.
შეივსო 52 ანკეტა. მათგან 31 ანკეტა შეავსეს ქალთა მხარდაჭერის ცენტრებში (ქუთაისში - 4, წყალტუბოში - 4, ხონში - 3, ფოთში - 4, სენაკში - 3, ხურჩა-კოკში - 4, თერჯოლაში - 3, ოზურგეთში - 3, ლანჩხუთში - 3). ფსიქოლოგებმა და იურისტებმა შეავსეს 21 ანკეტა.
შემთხვევები, ძირითადად, ეხება ქალთა მიმართ ძალადობას - ქმრის, დედამთილის, ვაჟიშვილის, რძლის მხრიდან.
ძალადობის ფორმები: ფიზიკური, ფსიქოლოგიური, ეკონომიკური.
ძირითადად, მსხვერპლები არიან 35-55 წლის ასაკის ქალები. გამოვლინდა მამაკაცთა და ხანდაზმულთა მიმართ ძალადობის რამდენიმე ფაქტიც.
ბენეფიციარებმა გამოიყენეს ქალთა მხარდაჭერის ცენტრების სერვისები: იურისტებს მიმართა 16 ადამიანმა, ფსიქოლოგებს - 29-მ. ფსიქოლოგის, იურისტის და კონფლიქტოლოგის ერთობლივი კონსულტაცია გაიარა 7-მა ოჯახურმა წყვილმა. იყო მუშაობა ტრავმებთან და მოზარდებთან - სამ-სამი შემთხვევა.
4 თვის განმავლობაში ფონდი „სოხუმის“ დახმარებით ორ ქალს მიენიჭა ძალადობის მსხვერპლის სტატუსი. ქალთა მხარდაჭერის ცენტრების იურისტ-კონსულტანტების და მობილიზატორების ჩართვით გამოწერილ იქნა ორი დამცავი ორდერი.
ფონდი „სოხუმის“ იურისტებმა ივნისში საკონსულტაციო-საინფორმაციო შეხვედრები ჩაატარეს ქუთაისში, ოზურგეთში, ორსანტიაში (ზუგდიდის მუნიციპალიტეტი).
ინდივიდუალურ შეხვედრებზე სხვადასხვა პრობლემა დაისვა: უკანონო მიშენება, სასამართლოში მოწმედ გამოძახება, ოჯახში ძალადობა, შემაკავებელი და დამცავი ორდერები. მონაწილეებს მიეცათ ინფორმაცია იმის შესახებ, რომ შეიძლება მობილურ ტელეფონებში „112 SOS“ პროგრამის ჩამოტვირთვა, რის საშუალებითაც ყოველგვარი დარეკვის გარეშე დაუკავშირდებიან პოლიციას.
შეხვედრების მონაწილეები კმაყოფილები რჩებიან, რადგან პროფესიონალებისგან საჭირო ინფორმაციას იღებენ.
გრძელდება ყოველთვიური შეხვედრები კრიზისულ ოჯახებთან. ივნისის განმავლობაში 6 შეხვედრა ჩატარდა. მათ შორის ორი ახალი წყვილია. კონფლიქტური სიტუაცია სხვადასხვა მიზეზით არის გამოწვეული. მუშაობის ხანგრძლივობა დამოკიდებულია იმაზე, რამდენად ეფექტურად შეძლებენ მხარეები კრიზისული სიტუაციების მართვას.
დანარჩენ წყვილებთან კონსულტაციები რამდენიმე თვეა მიმდინარეობს. იკვეთება სტაბილურობის ელემენტები, თუმცა კრიზისის დასაძლევად მუშაობის გაგრძელება აუცილებელია. კონფლიქტოლოგისა და ფსიქოლოგის კონსულტაციები, ძირითადად, ქცევების კორექციას და ემოციების მართვას შეეხო.
წყალტუბოს ქალთა მხარდაჭერის ცენტრის მცირე პროექტი დასრულდა: ჩატარდა 4 ტრენინგი მუნიციპალიტეტის საბავშვო ბაღების პედაგოგებისა და მენეჯერებისათვის თემაზე „გენდერი, გენდერული ძალადობა და ბულინგი“. პროექტის ბოლოს ჩატარდა ფსიქოლოგის საინფორმაციო შეხვედრა #2 ბაღის პედაგოგებთან. 25 ივნისს კი საკრებულოში გაიმართა ფინალური ღონისძიება - მრგვალი მაგიდა, რომელზეც შეჯამდა პროექტის აქტივობები და მიღებული შედეგები.
პროექტი განხორციელდა ფონდი „სოხუმის“ და წყალტუბოს მუნიციპალიტეტის გენდერული თანასწორობის საბჭოს მხარდაჭერით.
ფონდი „სოხუმის“ ქალთა მხარდაჭერის ცენტრებმა 27 საინფორმაციო-სამობილიზაციო შეხვედრა ჩაატარეს დასავლეთ საქართველოს 9 მუნიციპალიტეტში (ქუთაისი, ხონი, წყალტუბო, თერჯოლა, სენაკი, ფოთი, ზუგდიდი, ოზურგეთი, ლანჩხუთი). შეხვედრებზე განხილული თემებიდან უმთავრესი იყო ქალთა მიმართ/ოჯახში ძალადობა და მისი შედეგები. ამასთან ერთად მობილიზატორებმა შეკრებილებთან ისაუბრეს ერთჯერადი დახმარების პროგრამებზე დევნილთათვის, აფხაზეთის მთავრობის სოციალური და ჯანდაცვის პროგრამებსა და მუნიციპალურ სოციალურ პროგრამებზე. ამ ინფორმაციების გაცნობა თავიანთი პრობლემების მოგვარებაში უწყობს ხელს ქალაქებსა და სოფლებში მცხოვრებ ადამიანებს.
ხურჩა/კოკის ქალთა მხარდაჭერის ცენტრის მცირე პროექტი დასასრულს მიუახლოვდა. პროექტის ბოლო აქტივობები ივნისში გაიმართა - საინფორმაციო შეხვედრა ორსანტიის (ზუგდიდის მუნიციპალიტეტი) საზოგადოებრივ ცენტრში, სოფელ კოკში, ხურჩასა და ორსანტიაში მცხოვრები ქალების მონაწილეობით თემაზე „ოჯახური ძალადობა და პრევენციული მექანიზმები“. პროექტის ფარგლებში ასევე ჩატარდა იურისტის და ფსიქოლოგის კონსულტაციები. პროექტის დამაგვირგვინებელი ღონისძიება იყო - ქალთა მიმართ და ოჯახში ძალადობის თემაზე მცირე ვიდეორგოლების კონკურსი მონაწილე ახალგაზრდების დაჯილდოება.
ხურჩა/კოკის ქალთა მხარდაჭერის ცენტრის მცირე პროექტი დასასრულს მიუახლოვდა. პროექტის ბოლო აქტივობები ივნისში გაიმართა - საინფორმაციო შეხვედრა ორსანტიის (ზუგდიდის მუნიციპალიტეტი) საზოგადოებრივ ცენტრში, სოფელ კოკში, ხურჩასა და ორსანტიაში მცხოვრები ქალების მონაწილეობით თემაზე „ოჯახური ძალადობა და პრევენციული მექანიზმები“. პროექტის ფარგლებში ასევე ჩატარდა იურისტის და ფსიქოლოგის კონსულტაციები. პროექტის დამაგვირგვინებელი ღონისძიება იყო - ქალთა მიმართ და ოჯახში ძალადობის თემაზე მცირე ვიდეორგოლების კონკურსი მონაწილე ახალგაზრდების დაჯილდოება.
საინტერესო შეჯიბრით დასრულდა ფოთის ქალთა მხარდაჭერის ცენტრის მცირე პროექტი. 8 ივნისს აფხაზეთის ავტონომიური რესპუბლიკის #21 სკოლაში გაიმართა შეჯიბრი ჭადრაკში და შაშის თამაში ამავე სკოლის უფროსკლასელებს შორის.
შეჯიბრის ჩატარება მიზნად ისახავდა ახალგაზრდებს შორის ჯანსაღი ცხოვრების წესის პოპულარიზაციას და ძალადობის შემცირებას. შეჯიბრის გამარჯვებულმა მონაწილეებმა სიმბოლური საჩუქრები მიიღეს.
16-17 ივნისს ქობულეთში ფონდი „სოხუმის“ ქალთა მხარდაჭერის ცენტრის მობილიზატორებს პროექტების წერის მეთოდოლოგიაზე ტრენინგი ჩაუტარდათ. განსაკუთრებული ყურადღება გამახვილდა საკითხებზე - „პრობლემათა ხის“ აგება, იდენტიფიცირებული პრობლემებიდან პრიორიტეტული პრობლემის გამოკვეთა და საპროექტო იდეის განსაზღვრა, პროექტის სტრატეგია, ცვლილებების თეორია, დაინტერესებულ მხარეთა ანალიზი, რისკების შეფასება და მართვა და სხვ. მუშაობის პროცესში გამოიკვეთა საინტერესო საკითხები, მიდგომები, რაც ქალთა მიმართ/ოჯახში ძალადობის შემცირების კუთხით უმნიშვნელოვანესია.
მონაწილეთა შეფასებით, ტრენინგმა მათ მისცა ახალი უნარები იმისთვის, რომ საპროექტო იდეები პროექტად აქციონ და შეძლონ ბენეფიციარების საჭიროებებზე მორგებული საქმიანობის წარმართვა.