ქალთა მხარდაჭერის ცენტრების მობილიზატორები ფონდ „სოხუმში“ შეიკრიბნენ, ორდღიან ტრენინგზე. 26-27 თებერვალს ისინი მუშაობდნენ პროექტის წერასა და დიზაინზე.
ტრენინგის პირველი დღე დაეთმო პროექტის წერის პრინციპებს - პროექტის სახელი, მიზნების აღწერა, პრობლემის აღწერა, რისკების განსაზღვრა, ღონისძიებების ჩამონათვალი.
მეორე დღეს კი იყო პრაქტიკული მუშაობა - მობილიზატორებმა მცირე პროექტები შეიმუშავეს ქალთა მხარდაჭერის ექვსივე ცენტრისთვის (ქუთაისი, წყალტუბო, ხონი, სენაკი, ფოთი, ხურჩა).
ორგანიზაციის პოტენციალის გაძლიერების სტრატეგიული გეგმის ფარგლებში, 15-16 მაისს ფონდი „სოხუმის“ ქალთა მხარდაჭერის ცენტრის მობილიზატორებისათვის ბათუმში ჩატარდა ტრენინგი თემაზე „პროექტის დიზაინი და მართვა“. ტრენინგი აიგო პრაქტიკულ მუშაობაზე, რომლის მიზანი იყო მონაწილეთა მიერ საკუთარი რეგიონის, თემის დონეზე პრობლემების იდენტიფიცირება და საპროექტო წინადადებების მომზადება.
პროექტის „ქალთა შესაძლებლობების გაფართოება ახალი მიდგომების გამოსამუშავებლად" ფარგლებში ქუთაისში, სასტუმრო „დისქავერში“, სამდღიანი ტრენინგი გაიმართა. ტრენინგის თემატიკა მოიცავდა შემდეგ საკითხებს: ქართულ-აფხაზური კონფლიქტის ტრანსფორმაცია, ქალთა სამშვიდობო ინიციატივები, ჟენევის მოლაპარაკების ფორმატის გამოყენება.
ტრენინგის ფორმატიდან გამომდინარე, ორი დღის განმავლობაში ახალგაზრდების და ქალთა ჯგუფები ცალ-ცალკე მუშაობდნენ, ხოლო მესამე დღეს ორივე ჯგუფმა გაერთიანებულად იმუშავა.
ჯგუფური თუ როლური სავარჯიშოების, იმიტირებული წარმოდგენების მეშვეობით მონაწილეები შეეცადნენ ეფიქრათ კონფლიქტის ტრანსფორმაციის შესაძლო ვერსიებზე, ახალ მიდგომებზე.
მათი მოსაზრებით, ქალთა სამშვიდობო რესურსები ამოუწურავია და მიღებული ინფორმაციები გაზრდის მათ მოტივაციას, მეტი აქტიურობით იმუშაონ ქართულ-აფხაზური კონფლიქტის ტრანსფორმაციაზე.
პროექტი ხორციელდება შვეიცარიის საგარეო საქმეთა ფედერალური დეპარტამენტის მხარდაჭერით
16-17 იანვარს ფონდ „სოხუმში“ ჩატარდა ტრენინგი თემაზე „ფონდების მოძიების (ფანდრაიზინგის) სტრატეგიის შემუშავება“. მასში მონაწილეობა მიიღო ფანდრაიზინგის ჯგუფმა და ქალთა მხარდაჭერის ექვსივე ცენტრის მობილიზატორმა.
ტრენინგის მსვლელობისას გამახვილდა ყურადღება შემდეგ საკითხებზე: როგორ უნდა მოხდეს ფონდების მოძიება, ფონდების მოძიების დაგეგმარება, ძირითადი ეტაპები ფონდების მოძიებისათვის, SWOT ანალიზი და ა.შ.
მობილიზატორები აქტიურად ჩაერთნენ მუშაობაში. მათ აქვთ პროექტების დამოუკიდებლად განხორციელების პრაქტიკა და ამ ეტაპზე მათთვის მნიშვნელოვანია დონორი ორგანიზაციების, ფონდების მოძიებაც. ტრენინგმა სწორედ ეს უნარ-ჩვევები და გამოცდილება შესძინა მათ.
- რა კავშირშია გენდერული თანასწორობა ქალთა მიმართ ძალადობის პრობლემასთან. როგორ პასუხობს გენდერულ პოლიტიკას ადგილობრივი მუნიციპალური პროგრამები, რა უფლებამოსილებას აკისრებს კანონი ადგილობრივ თვითმმართველობებს ოჯახურ ძალადობასთან მიმართებაში, - ამ საკითხებზე მიმდინარეობდა მუშაობა ფონდი „სოხუმის“ ორგანიზებით გამართულ ტრენინგზე ბორჯომში.
ტრენინგს ესწრებოდნენ დასავლეთ საქართველოს 9 მუნიციპალიტეტის (ქუთაისი, წყალტუბო, ხონი, სენაკი, ზუგდიდი, ფოთი, ოზურგეთი, ლანჩხუთი, თერჯოლა) წარმომადგენლები. სამდღიანი მუშაობის ბოლოს ცალკეულმა მუნიციპალიტეტებმა ჯგუფურად შეიმუშავეს ძალადობის მსხვერპლთა დახმარების სამოქმედო სტრატეგია, რომლის დანერგვასაც ადგილობრივ ბიუჯეტში შეეცდებიან.
მონაწილეთა შეფასებით, ტრენინგმა მისცა მათ შესაძლებლობა, 9 მუნიციპალიტეტის გამოცდილებას გაცნობოდნენ გენდერული პოლიტიკის დანერგვისა და მსხვერპლთა დახმარების კუთხით. ეს გამოცდილება მათ საქმიანობაში ჰპოვებს ასახვას.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
23 სექტემბერს, ბათუმში ჩატარდა ტრენინგი ამომრჩეველ ქალთა კლუბის წევრთათვის. ტრენინგის თემატიკამ მონაწილეები დააინტერესა, გამომდინარე იქედან, რომ მათთვის მნიშვნელოვანია გენდერის თემა და ქალთა აქტიურობა. გამოიკვეთა არჩევნებთან დაკავშირებული საკითხების მიმართ ინტერესიც, რადგან თავად მონაწილეები აქტიურად არიან ჩართულები ამ პროცესში. შეხვედრაზე ხაზგასმულ იქნა ქალი-კანდიდატების მხარდაჭერის აუცილებლობა.
პროექტი ხორციელდება აშშ საელჩოს მხარდაჭერით
პროექტის „ახალგაზრდების პროფესიული განვითარების ხელშეწყობა წყალტუბოში“ ფარგლებში ჩატარდა ტრენინგი თემაზე „ახალგაზრდების პროფესიული ორიენტაცია და თვითპრეზენტაცია“ .
ტრენინგში მონაწილეობას ღებულობდნენ უფროსკლასელები, რომელთაც მიეწოდათ ინფორმაცია იმის შესახებ, თუ როგორ უნდა აირჩიონ სწორად პროფესია და რა მნიშვნელობა აქვს კარიერის დაგეგმვას.
ახალგაზრდებმა ისწავლეს, როგორ უნდა შეადგინონ რეზიუმე, როგორ დაწერონ სამოტივაციო წერილი და რა უნარებია საჭირო იმისთვის, რომ წარმატებით გაიარონ ინტერვიუ დამსაქმებელთან.
ტრენინგი აქტიური დისკუსიების და მონაწილეთა მაქსიმალური ჩართულობის ფონზე ჩატარდა. შეხვედრის ბოლოს აღინიშნა, რომ მსგავსი ტრენინგები აუცილებელია ამ ასაკის მოზარდებისთვის, რადგან მათ სხვა თვალით დაინახეს თავიანთი მომავალი კარიერა, ჩამოყალიბდნენ, რა პროფესიაზე გააკეთონ არჩევანი.
20 სექტემბერს ზუგდიდში ჩატარდა ტრენინგი ამომრჩეველ ქალთა კლუბის წევრებისთვის შემდეგ თემებზე: არჩევნები დემოკრატიის საფუძველი. საქართველოს საარჩევნო კოდექსი. საქართველოშო მოქმედი პოლიტიკური სისტემა. პოლიტიკური პარტიების პროგრამები, სტრუქტურა, როლი და მნიშვნელობა. გენდერი და გენდერული თანასწორობა. გადაწყვეტილების მიღების პროცესში ქალთა მონაწილეობის მნიშვნელობა. ქალი-კანდიდატების მხარდაჭერა.
თითოეულმა საკითხმა მონაწილეთა დიდი ინტერესი გამოიწვია. კლუბის წევრებმა აღნიშნეს, რომ არჩევნების წინ ამ თემების განხილვა დროული და სასარგებლო იყო.
პროექტი ხორციელდება აშშ საელჩოს მხარდაჭერით
31 მარტიდან 3 აპრილის ჩათვლით ჩატარდა ტრენინგი ბორჯომში, სადაც ესწრებოდნენ 8 ქალაქის - ქუთაისის, ხონის, წყალტუბოს, სენაკის, ფოთის, ზუგდიდის, ოზურგეთის და ბათუმის - ადგილობრივი თვითმმართველობის წარმომადგენლები. ტრენინგის თემა - „ოჯახში ძალადობის პრევენცია და ძალადობის მსხვერპლის დახმარება; თვითმმართველობის კომპეტენციას მიკუთვნებული საკითხები.“
ტრენინგზე განხილული იყო შემდეგი თემები: გენდერი და გენდერული ძალადობა; ოჯახში ძალადობის ფაქტებზე სამართლებრივი რეაგირების მექანიზმები; ოჯახში ძალადობის წინააღმდეგ გასატარებელ ღონისძიებებში მონაწილე სახელმწიფო ორგანოები და მათი კომპეტენციები; ოჯახში ძალადობის წინააღმდეგ მიმართულ ღონისძიებებში ადგილობრივი თვითმმართველობის ორგანოების მონაწილეობა; ოჯახში ძალადობის მსხვერპლთა უფლებები; მათი სოციალური და სამართლებრივი დაცვის გარანტიები.
ტრენინგის ბოლოს რეგიონების მიხედვით შემუშავდა გენდერული სამოქმედო გეგმები, დაიგეგმა შესაბამისი ღონისძიებები, განისაზღვრა ამოცანები, ინდიკატორები, პასუხისმგებელი პირები.