გადაცემაზე გამოიკვეთა, რა როლი შეასრულა ბათუმის გენდერულმა საკონსულტაციო საბჭომ, როგორც ადგილობრივმა საზოგადოებრივმა  რგოლმა გენდერული პერსპექტივების ხელშეწყობისათვის და როგორც შუამავალმა ადგილობრივ სამოქალაქო საზოგადოებასა და თვითმმართველობას შორის. რამდენად შეძლო მან, ეთქვა თავისი სიტყვა, როგორც გენდერული იდეების „გამტარმა“ და რა შეიცვალა არსებულ მიდგომებსა, პოლიტიკასა და პრაქტიკაში. როგორი პროგნოზები შეიძლება გაკეთდეს სამომავლოდ - რამდენად სიცოცხლისუნარიანი იქნება და როგორ  გაგრძელდება დაწყებული საქმიანობა...

გადაცემის სტუმრებმა - გენდერული საბჭოს წევრებმა ისაუბრეს მიღწეულ შედეგებსა და სამომავლო პერსპექტივებზე, დასახელდა კონკრეტული მიღწევები, მათ შორის - მერიის მიერ მხარდაჭერილი პროექტები, რომლებიც საბჭოს მიერ იყო ინიცირებული, გათვალისწინებული კონკრეტული რეკომენდაციები. საუბარი შეეხო  ძირითად გამოწვევებს.

როგორც გადაცემაზე გაცხადდა, პროექტის დასრულების მიუხედავად, საბჭო აგრძელებს აქტიურ საქმიანობას ადგილობრივი გენდერული პერსპექტივების ხელშეწყობისათვის.

 

 

პროექტი ხორციელდება აშშ  სახელმწიფო დეპარტამენტის  მხარდაჭერით

 

რას ნიშნავს თვითშეფასება და რა კავშირშია ოჯახური კონფლიქტების განვითარებასთან. როგორ უნდა ვმართოთ კონფლიქტები, რომ ძალადობა თავიდან ავიცილოთ - ამ მიმართულებით წარიმართა დისკუსიები ქალების ჯგუფთან ხონში, ქუთაისში, ხურჩაში (ზუგდიდი) გამართულ  კონფლიქტოლოგიის ვორკშოპებზე.

-კონფლიქტების მართვა შეუძლებელია  თვითშეფასების გარეშე. წლების განმავლობაში მე ვიყავი ოჯახური ძალადობის მსხვერპლი. ასე მეგონა, რადგან შვილი არ მიჩნდებოდა,  ყველაფერი უნდა მომეთმინა. როცა შეხვედრებს დავესწარი, მხოლოდ მაშინ აღმოვაჩინე, რომ საკუთარი თავი მსხვერპლად ვაქციე. ახლა სულ სხვა ადამიანი ვარ, ოჯახში კონფლიქტიც არ არსებობს,  მეტი პატივისცემით მექცევიან, - მსგავსი რეალური ისტორიების გარჩევის ფონზე არაერთი საინტერესო მოსაზრება დაფიქსირდა.  

მონაწილეები მიიჩნევენ, რომ მოთმენა, თავის დახრა ყოველთვის არ არის სწორი სტრატეგია და ვერც კონფლიქტებს არეგულირებს, კონფლიქტების მართვაში ერთ-ერთი სერიოზული კომპონენტია სწორი თვითშეფასება. ფონდი „სოხუმის“ ვორკშოპი  სწორედ ამას უწყობს ხელს.

 

პროექტი ხორციელდება  ორგანიზაცია Brot für die Welt – Evangelischer

Entwicklunsdienst მხარდაჭერით (გერმანია)

     

3, 4 და 11 სექტემბერს ჩატარდა ფსიქოლოგის ჯგუფური შეხვედრები და ინდივიდუალური კონსულტაციები წყალტუბოს, ფოთისა და ხონის ქალთა მხარდაჭერის ცენტრებში. ბენეფიციართა საერთო რაოდენობა შეადგენდა 24-ს.

წინასწარ შემუშავებული გეგმის მიხედვით მონაწილეებმა იმუშავეს თემებზე: პრობლემის გადაჭრა, გადაწყვეტილების მიღების ფსიქოლოგია.

თემა ფსიქოლოგიური კუთხით გაანალიზდა: რთულ პრობლემათა გადაჭრისა და გადაწყვეტილების მიღების ეტაპების მექანიზმში ქალთა ინფორმირებულობა და უნარ- ჩვევების გამომუშავება მნიშვნელოვანი პროცესია მათი უფლებების დაცვის კუთხით. ადამიანები იყენებენ სხვადასხვა სტრატეგიას პრობლემის გადასაჭრელად. ყველაზე მარტივია ცდისა და შეცდომის მეთოდი, როდესაც ადამიანი გამოცდის პრობლემის გადასაჭრელ მრავალგზას, სანამ სწორს არ მიაგნებს.

ამ მექანიზმების გაცნობა დაეხმარება ბევრ მათგანს, არ გაექცეს პასუხისმგებლობას და დამოუკიდებლად შეძლოს პრობლემის მოგვარება.

 

პროექტი ხორციელდება  ორგანიზაცია Brot für die Welt – Evangelischer

Entwicklunsdienst მხარდაჭერით (გერმანია)

 

ქუთაისის ქალთა მხარდაჭერის ცენტრში ჩატარდა შეხვედრა იურისტთან და ფსიქოლოგთან. შეხვედრას ესწრებოდა 10  ქალი, მათ შორის 5 დევნილი.  ფსიქოლოგის თემას წარმოადგენდა აგრესიული სტრესი. მონაწილეებმა აღნიშნეს, რომ  თემა იყო ძალიან სასარგებლო და საინტერესო. იმიტომ რომ არსებობს ბევრი სტრესოგენული ფაქტორი. ეს დაადასტურა ინდივიდუალურმა მუშაობამ სოციალური ადაპტაციის შკალასთან, რომელშიც ყველას ჰქონდა მაღალი ციფრები, რადგან სტრესოგენულ მდგომარეობაში იმყოფებიან. ქალები გაეცნენ მედიტირების საფუძვლებს.

იურისტმა დამსწრეებს მიაწოდა ინფორმაცია, თუ როგორ ენიჭება ძალადობის მსხვერპლს სტატუსი, ოჯახში ძალადობის მსხვერპლთა დაცვისა და დახმარების შესახებ კანონის თანახმად. მათ მიიღეს ინფორმაცია მსხვერპლის იდენტიფიცირების ჯგუფის შესახებ. ასევე გაიცა იურიდიული კონსულტაციები სხვადასხვა საკითხზე.

 

პროექტი ხორციელდება  ორგანიზაცია Brot für die Welt – Evangelischer

Entwicklunsdienst მხარდაჭერით (გერმანია)

 

ადგილობრივი თვითმმართველობისა და ფონდი „სოხუმის“ თანადაფინანსებით ბათუმში კიდევ ერთი პროექტი დაიწყო, რომელსაც ბათუმის გენდერულ საკონსულტაციო საბჭოსთან პარტნიორობით ახალგაზრდული ორგანიზაცია - „საზოგადოებრივი განვითარების აკადემია“ ახორციელებს.

პროექტის ავტორების აზრით, სკოლამდელი გენდერული განათლების სერვისის მათ მიერ არჩეული შტრიხები საკმაოდ ინოვაციურია საქართველოში და განვითარების ადრეულ პერიოდს გადის. პროექტის იდეა წარმოიშვა საბჭოს მიერ ჩატარებული კვლევებისა და დაკვირვებების საფუძველზე, რადგან თვალშისაცემია შემეცნებით-აღმზრდელობით პროცესში პედაგოგებისა და მშობლების თანამშრომლობის დეფიციტი, აღზრდის პროცესისგან ოჯახის მამაკაცების გაუცხოება.

ამ ეტაპზე მიდის სისტემატიური კონსულტაციები „ბაღების გაერთიანებასთან“, რომელიც მიესალმება პროექტს და მიიჩნევს, რომ ბაღის პერსონალისა და მშობლებისთვის ჩატარებული ტრენინგებით პროექტი მნიშვნელოვან წვლილს შეიტანს სკოლამდელი გენდერული განათლების სერვისის განვითარებაში.    

პროექტი მოიაზრებს სამუშაო პროცესში ადგილობრივი კვალიფიციური კადრების ჩართვას. ყოველ მათგანს აქვს შესაბამისი განათლება და სფეროში მუშაობის მრავალწლიანი გამოცდილება. პროექტი ამ მხრივაც  მნიშვნელოვანია, რადგან ის უზრუნველყოფს ადგილობრივი კადრების დასაქმებას და პროფესიონალთა სამუშაო გუნდის შექმნას.

 

პროექტი ხორციელდება აშშ  სახელმწიფო დეპარტამენტის  მხარდაჭერით

  

სექტემბერში ახალგაზრდული კლუბების პირველი სამი  შეხვედრა ჩატარდა წყალტუბოში, ქუთაისსა და ხონში. ბევრი პირველად მონაწილეობდა შეხვედრაში.

თემები: გენდერული საზოგადოების შექმნა, კანონი და რეალობა. სიტუაცია საქართველოში გენდერული ძალადობის კუთხით.

ახალგაზრდები საუბრობდნენ მათთვის ნაცნობ საკითხებზე, განსაკუთრებით - ტრადიციების მნიშვნელობაზე... მათი აზრით, ზოგიერთი მავნე ტრადიცია  ხელს უწყობს ოჯახის ნგრევას, გენდერულ ძალადობას.

შეხვედრებზე საინტერესო, აქტიური დისკუსიები გაიმართა. იყო თემების მიმართ ინტერესი და თავისუფალი გარემო, რომელიც პოზიტიურ გავლენას ახდენს ახალგაზრდების განვითარებაზე. სწორედ ეს არის ფონდი „სოხუმის“ მუშაობის შედეგი.

 

  პროექტი ხორციელდება  ორგანიზაცია Brot für die Welt – Evangelischer

Entwicklunsdienst მხარდაჭერით (გერმანია)

;

 

ოზურგეთელი, სენაკელი და ქუთაისელი ჟურნალისტებისთვის, ფონდ „სოხუმთან“ აქტიური თანამშრომლობის შედეგად,  გენდერული თემა მშობლიურად იქცა. მაგრამ, როგორც თავად ამბობენ, ჯერ კიდევ ბევრი რამ აქვთ სასწავლი ამ კუთხით.

8 სექტემბერს ოზურგეთის გენდერის მედიაცენტრის ინიციატივით ჩატარდა ტრენინგი  გენდერულ ბიუჯეტთან დაკავშირებულ საკითხებზე. მასში მონაწილეობა მიიღეს ადგილობრივმა და ქუთაისელმა ჟურნალისტებმა.

ტრენინგს უძღვებოდნენ საქართველოს დემოკრატიული კავშირის წარმომადგენლები ლევან ხინთიბიძე და ირაკლი პაპავა. ყურადღება გამახვილდა საქართველოს საბიუჯეტო სისტემაზე, პროგრამული და მათ შორის გენდერული ბიუჯეტის მოთხოვნებზე, თვითმმართველობის განხორციელებაში მოქალაქეთა მონაწილეობაზე და მედიის როლზე გენდერული ბიუჯეტის ფორმირებაში.

ტრენინგის შემდეგ გენდერის მედია ცენტრის ხელმძღვანელის, გიორგი გირკელიძის „სიურპრიზი“ - ქუთაისის მედიის წარმომადგენლებმა დაათვალიერეს შემოქმედის სამონასტრო კომპლექსი და ექსკლუზიურად მათთვის ჩაირთო სოფელ შემოქმედის ცენტრში, სკვერში მოწყობილი შადრევანი, რომლის გახსნა თვის ბოლოსთვის იგეგმება.

 

  

 

პროექტი ხორციელდება გაეროს  ქალთა  ორგანიზაციის

გენდერული  თანასწორობის ფონდის მხარდაჭერით

 

5 სექტემბერს ჩატარდა ფონდი „სოხუმის“ იურისტის საინფორმაციო შეხვედრა ქუთაისის ერთ-ერთ კოლექტიურ ცენტრში 10 დევნილი ქალის მონაწილეობით. მათ მთავარ პრობლემას წარმოადგენს განსახლება. განხილული იყო საერთო საკითხები, მათ შორის: დევნილთა განსახლების კრიტერიუმები, ინვალიდობის პენსიის  მოთხოვნის გზები და საშუალებები, დევნილ ბავშვზე მშობლების საზღვარგარეთ ყოფნის შემთხვევაში დევნილის სტატუსის და  შემწეობის დანიშვნა, დევნილის შემწეობის შეჩერება. მონაწილეებმა მიიღეს კომპეტენტური პასუხი მათთვის საინტერესო საკითხებზე.

 

პროექტი ხორციელდება გაეროს  ქალთა  ორგანიზაციის

გენდერული  თანასწორობის ფონდის მხარდაჭერით

ფონდი „სოხუმის“ წარმომადგენლები სასტუმრო „ხვამლის“ კოლექტიურ ცენტრში მცხოვრებ დევნილებს შეხვდნენ და მათ პრობლემებს გაეცნენ. ისინი ამბობენ, რომ შენობა საცხოვრებლად უვარგისია. მათი მთავარი პრობლემა განსახლებაა, რომელზეც სრული ინფორმაცია არ გააჩნიათ.

გასულ შეხვედრაზე დევნილებმა შენობის ვარგისიანობის დასადგენად განცხადებით მიმართეს დევნილთა და განსახლების სამინისტროს. სპეციალურმა კომისიამ დაათვალიერა შენობა, თუმცა ექსპერტიზის პასუხი ჯერაც არ არის.

 

პროექტი ხორციელდება გაეროს  ქალთა  ორგანიზაციის

გენდერული  თანასწორობის ფონდის მხარდაჭერით

3 სექტემბერს ხონის ქალთა მხარდაჭერის ცენტრში ჩატარდა საინფორმაციო საკონსულტაციო შეხვედრა. შეხვედრის მონაწილე 8 ქალმა მოისმინა საუბარი თემაზე - საჯარო  ინფორმაციის მიღების და გამოთხოვის  თავისებურებანი. ინფორმაციები, რომლებზეც წვდომა და მოთხოვნის უფლება გვაქვს. 

გაიცა კონსულტაცია მცირეწლოვანი ბავშვის ინვალიდობის პენსიის დანიშვნის და მისთვის საჭირო დოკუმენტაციის შესახებ.  

 

პროექტი ხორციელდება  ორგანიზაცია Brot für die Welt – Evangelischer 

Entwicklunsdienst მხარდაჭერით (გერმანია)