„16 აქტიური დღე ქალთა მიმართ ძალადობის წინააღმდეგ“ - კამპანიის დღეებში   თერჯოლის ქალთა მხარდაჭერის ცენტრმა მოაწყო დისკუსია სოციალურ ქსელში - „მსხვერპლიც ვარ და მოძალადეც“. აქცენტი გაკეთდა ფსიქოლოგიურ ძალადობაზე, რომელიც დასჯადია, თუმცა მის გამო იშვითად ისჯება ვინმე. სოციალურ ქსელში ჩანს, რომ მხოლოდ მსხვერპლნი არ ვართ, ვართ მოძალადეებიც. გაცნობიერებულად თუ გაუცნობიერებლად. სწორედ ამ თემაზე წარიმართა გულახდილი დისკუსია, რომელიც ასე საჭიროა საზოგადოების ინფორმირებისთვის.

ცენტრმა ჩაატარა შოურუმი „არ გამოგვეპაროს სამშობლოში დაბრუნების დრო“. ეს იყო ონლაინ შეხვედრა ემიგრაციის რთულ თემაზე. ნაჩვენები იყო ქალთა მხარდაჭერის ცენტრის გადაღებული ფილმი „შინ“, რომელიც ემიგრანტების ტკივილს ეხება. კამპანიას მიეძღვნა ასევე ნახატების გამოფენა „ჩემი ოჯახი“, რომელშიც აქტიურად ჩაერთნენ ახალგაზრდები სხვადასხვა სკოლიდან.

ქობულეთის ქალთა მხარდაჭერის ცენტრმა მცირე პროექტის აქტივობები 16-დღიან კამპანიას მიუძღვნა. ჩატარდა აქცია, იურისტისა და ფსიქოლოგის ონლაინ კონსულტაციები, ტრენინგი საბავშვო ბაღების მშობლებთან და აღმზრდელებთან ოჯახში ძალადობისა და რეფერირების საკითხებზე. ამას გარდა, დარიგდა ფლაერები, სოციალურად დაუცველ ადამიანებს გადაეცა პირბადეები, გაიმართა მოეწყო ქუჩის გამოკითხვა: როგორ ესმით მოქალაქეებს ძალადობა. ღონისიძებებში აქტიურად იყო ჩართული საკრებულოს გენდერული თანასწორობის საბჭოს ხელმძღვანელი. კამპანიის შესახებ აღინიშნა ტელეკომპანია „აჭარის“ სიუჟეტში.

16-დღიანი გლობალური კამპანიის ფარგლებში ფონდი „სოხუმის“ თბილისის წარმომადგენლობამ მოამზადა ვიდეორგოლი, რომელშიც ასახულია საზოგადოების დამოკიდებულება ქალთა მიმართ ძალადობის პრობლემისადმი. აქ გაჟღერდა ძალადობის მსხვერპლის რეალური ისტორია ფონდი „სოხუმის“ პუბლიკაციიდან/მონიტორინგის ანგარიშიდან „COVID-19-ის გავლენა ოჯახში ძალადობაზე, მსხვერპლი ქალების მდგომარეობასა და სერვისებისადმი ხელმისაწვდომობაზე“.

რესპონდენტების თქმით, ქალს აქვს უფლება, იცხოვროს ძალადობის გარეშე და იყოს ბედნიერი.  

„კონფლიქტის შესაძლო შედეგები და კონფლიქტურ სიტუაციაში ქცევის სტილები“ – ამ თემაზე ჩატარდა ონლაინ ვორკშოპები ხაჯალიას (ლანჩხუთის  მუნიციპალიტეტი),  ლიის (წალენჯიხის მუნიციპალიტეტის) №2 და ქობულეთის №5 საჯარო სკოლის კონფლიქტის მართვის ჯგუფის წევრებთან.

მონაწილეებმა გაიგეს, რას ნიშნავს მოგება-მოგება, მოგება-წაგება და წაგება-წაგება, რომელ სიტუაციაში რომელი სტილია უფრო მისაღები, როდის უნდა აარიდო თავი კონფლიქტურ სიტუაციას, როდის უნდა წახვიდე კომპრომისსა თუ თანაშრომლობაზე.

მათ აღნიშნეს, რომ ეს საკითხები მათთვის სიახლე იყო და ყველაფერი გასაგებად აუხსნათ კონფლიქტოლოგმა. მონაწილეები დიდი ინტერესით დაელოდებიან მომდევნო ონლაინ ჩართვას, რომ კიდევ უფრო მეტი გაიგონ ამ აქტუალურ თემაზე.

„როგორ დავარეგისტრიროთ სამოქალაქო საზოგადოების ორგანიზაცია“ - ამ თემაზე გაიმართა ონლაინ ტრენინგი პროექტის სამიზნე მუნიციპალიტეტებში გამოვლენილი დაინტერესებული ჯგუფებისათვის, რომელთაც სამოქალაქო საზოგადოების ორგანიზაციის დარეგისტირირება სურთ.

მონაწილეებს მიეწოდათ დეტალური ინფორმაცია შემდეგ საკითხებზე - იურიდიული პირი, რეგისტრირებული და არარეგისტრირებული იურიდიული პირები; არასამეწარმეო არაკომერციული იურიდიული პირის სახელწოდება, ხელმძღვანელობა, წარმომადგენლობა, საქმიანობის სახელმწიფო კონტროლი; რეგისტრაციის წესი, რეგისტრაციისათვის საჭირო დოკუმენტაცია, სავალდებულო მოთხოვნები; რეორგანიზაცია, ლიკვიდაცია.

ტრენინგი ჩატარდა პროექტის „გურიის, იმერეთისა და რაჭა-ლეჩხუმის სამოქალაქო საზოგადოების ორგანიზაციების საერთო ფორუმი საჯარო მმართველობის რეფორმის საგზაო რუკის მონიტორინგის მიზნით“ ფარგლებში.

Covid-19-ით ინფიცირებულთა სტიგმა ძალადობის ახალი ფორმაა. ასეთი ადამიანი ბევრია ჩვენს ირგვლივ და მათ რთულ პირობებში უწევთ ცხოვრება.

ფონდი „სოხუმის“ თბილისის წარმომადგენლობამ ვიდეორგოლი მოამზადა ამ პრობლემასთან დაკავშირებით (კამპანიის „16 აქტიური დღე ქალთა მიმართ ძალადობის წინააღმდეგ“ ფარგლებში).

ვიდეორგოლში არის იმ ქალების მონოლოგები, რომლებმაც დაამარცხეს ვირუსი და გაისმის მოწოდებები: გავთავისუფლდეთ სტიგმისგან! გამოვიჩინოთ თანაგრძნობა და მხარდაჭერა!

ლობირების თემაზე გამართულ ტრენინგში მონაწილეობა მიიღეს სამოქალაო საზოგადოების ფორუმისა და სამუშაო ჯგუფების წარმომადგენლებმა.

ტრენინგი ჩატარდა პროექტის „გურიის, იმერეთისა და რაჭა-ლეჩხუმის სამოქალაქო საზოგადოების ორგანიზაციების საერთო ფორუმი საჯარო მმართველობის რეფორმის საგზაო რუკის მონიტორინგის მიზნით“ ფარგლებში. ელისაბედ სოფრომაძემ, რომელმაც ონლაინ რეჟიმში ჩაატარა ტრენინგი, მნიშვნელოვანი ყურადღება დაუთმო ლობისტური საქმიანობის რეგულირებისა და საქართველოში არსებული პრაქტიკის საკითხებს. ტრენინგი ინტერაქტიურ ხასიათს ატარებდა. მონაწილეებმა სასარგებლო ცოდნა შეიძინეს ლობირების მიზნებისა და ფორმების შესახებ, რაც გამოყენებული იქნება პროექტის მიზნების მისაღწევად. ონლაინ ტრენინგს ორგანიზება გაუკეთა პროექტის ერთ-ერთმა პარტნიორმა, იმერეთის მხარის მეცნიერთა კავშირმა „სპექტრი“.

სამოქალაქო საზოგადოების ორგანიზაციების ფორუმის მორიგ შეხვედრას ესწრებოდნენ  პროექტის პარტნიორი ორგანიზაციების და სამიზნე მუნიციპალიტეტებში შექმნილი სამუშაო ჯგუფების წევრები. განხილულ იქნა სამუშაო ჯგუფების საქმიანობის საკითხი. სამუშაო ჯგუფების ხელმძღვანელებმა გააკეთეს პრეზენტაციები, ისაუბრეს მიღწეულ შედეგებსა და სამომავლოდ დაგეგმილ ღონისძიებებზე. აღსანიშნავია ერთობლივი ძალისხმევა და თანამშრომლობა, რომელსაც არ იშურებენ ადგილობრივი თვითმმართველობებისა და სამოქალაქო საზოგადოების ორგანიზაციების წარმომადგენლები საჯარო მმართველობის განვითარებისათვის ყველა იმ მუნიციპალიტეტში, სადაც  პროექტი ხორციელდება.

ფორუმის შეხვედრა ონლაინ რეჟიმში, Zoom პლატფორმაზე გაიმართა. ორგანიზატორი: პროექტის ერთ-ერთი პარტნიორი - იმერეთის მხარის მეცნიერთა კავშირი „სპექტრი“.

მუშაობა მიმდინარეობს პროექტის „გურიის, იმერეთისა და რაჭა-ლეჩხუმის სამოქალაქო საზოგადოების ორგანიზაციების საერთო ფორუმი საჯარო მმართველობის რეფორმის საგზაო რუკის მონიტორინგის მიზნით“ ფარგლებში.

ნოემბერში ფონდი „სოხუმის“ ფსიქოლოგის ტელეფონზე ქუთაისიდან და რეგიონებიდან  63 ზარი შემოვიდა. ის ეხმაურებოდა ადამიანების ემოციურ მდგომარეობას და ისინიც იღებდნენ ფსიქოლოგიურ მხარდაჭერას. ჩატარდა ხუთი ჯგუფური დისტანციური  ფსიქოლოგიური შეხვედრა, რომლებიც გაიმართა სენაკის, წყალტუბოს, ხონის, ხურჩა/კოკის (ზუგდიდის მუნიციპალიტეტი) ქალთა მხარდაჭერის ცენტრების ორგანიზებით. ფსიქოთერაპიულ კონსულტაციებს გადიან აგრეთვე ოჯახური წყვილები და კრიზისული ოჯახების წარმომადგენლები.

- პანდემიის და კორონავირუსით გამოწვეული პრობლემების პირობებში ეს საკმაოდ მნიშვნელოვანი მხარდაჭერაა, – აღნიშნავენ შეხვედრების მონაწილეები.

ფონდი „სოხუმის“ ინიციატივით Zoom-ის პლატფორმაზე მრგვალი მაგიდის ფორმატით შეხვედრა გაიმართა თემაზე „კონფლქიტების ადრეული გაფრთხილების სისტემის დანერგვა კოვიდ-19 პანდემიით გამოწვეულ კრიზისზე საპასუხოდ - სათემო ლიდერების როლი კრიზისზე რეაგირების პროცესში". 

შეხვედრაში მონაწილეობდნენ დასავლეთ საქართველოს 11 მუნიციპალიტეტის (ქუთაისი, წყალტუბო, თერჯოლა, ხონი, სენაკი, ფოთი, ზუგდიდი,  წალენჯიხა, ოზურგეთი, ლანჩხუთი, ქობულეთი) ადგილობრივი თვითმმართველობის  წარმომადგენლები: ვიცემერები, ჯანდაცვისა და სოციალური სამსახურის და ადმინისტრაციული სამსახურების ხელმძღვანელები, გენდერული თანასწორობის საბჭოს წევრები, ასევე თემის ლიდერები, ფონდი „სოხუმის“ მოდერატორები.

- რა გამოწვევები შეიქმნა პანდემიის შედეგად, როგორ პასუხობს ადგილობრივი  თვითმმართველობა, რეაგირების რა მექანიზმები არსებობს ადგილობრივ დონეზე და რამდენად იცნობენ მოქალაქეები ამ პროგრამებს - ფოკუსირება, ძირითადად, ამ საკითხებზე გაკეთდა. შეხვედრის დასაწყისში მონაწილეებმა მოისმინეს ინფორმაცია ფონდი „სოხუმის“ ჩატარებული კვლევის შედეგებზე და ტენდენციებზე. მუნიციპალიტეტებს შორის ინფორმაციის გაცვლამ საინტერესო გარემო შექმნა დებატებისთვის. გამოიკვეთა მოქალაქეთა ინფორმირების მიზნით  სათემო ლიდერების  გააქტიურების აუცილებლობა.

მრგვალი მაგიდა გაიმართა პროექტის „კონფლიქტების ადრეული გაფრთხილების სისტემა - თეორია და პრაქტიკა “ ფარგლებში და ამ აქტივობით მონაწილეთა ჯგუფი შეუერთდა კამპანიას „16 აქტიური დღე ქალთა მიმართ ძალადობის წინააღმდეგ“.