ქალთა მხარდაჭერის ცენტრები (533)
ქალთა მხარდაჭერის ცენტრი – ეს არის ფონდი „სოხუმის“ ფილიალები ქუთაისში, წყალტუბოში, ხონში, თერჯოლაში, სენაკში, ფოთში, ხურჩა/კოკში (ზუგდიდის მუნიციპალიტეტი), ლანჩხუთში, ოზურგეთში - შეიქმნა 2009 წლიდან. ცენტრების დანიშნულებაა ქალთა გაძლიერება, სოციალური, ფსიქოლოგიური, იურიდიული დახმარების გაწევა ძალადობის მსხვერპლი ქალებისთვის და კრიზისული ოჯახებისათვის, რომლებიც რთულ ცხოვრებისეულ მდგომარეობაში აღმოჩნდნენ. ქალთა მხარდაჭერის ცენტრები ხელს უწყობს ქალთა უფლებების დაცვას და მათ სოციალურ-ფსიქოლოგიურ რეაბილიტაციას.
რეგიონალური ნარკოლოგიური ცენტრის ხელმძღვანელებთან გაიმართა შეხვედრა ფოთის ქალთა მხარდაჭერის ცენტრის მცირე პროექტის ფარგლებში. ნარკომანიის და ალკოჰოლიზმის მავნებლობაზე საუბრისას ითქვა, რომ ეს პრობლემები მთელ საზოგადოებას მოიცავს, იწვევს ჯანმრთელობის გაუარესებას და ძალადობის საფრთხეს წარმოადგენს. სპეციალისტებმა აღნიშნეს, რომ საჭიროა საზოგადოების ინფორმირება და პრევენციული ზომების გატარება - ექსპერტების, ფსიქიატრების, ნარკოლოგების, უფლებადამცველების, სასულიერო პირების, სამთავრობო და არასამათავრობო სექტორის წარმომადგენლთა აქტიური ჩართულობითა და კოორდინირებული მუშაობით.
პროექტის „არაძალადობრივი გარემო მომავალი თაობისთვის“ ფარგლებში გაიმართა ტრენინგი საბავშვო ბაღების მშობლებთან თემაზე „ოჯახში ძალადობა, რეაგირების გზები და მექანიზმები“. მართალია, ფორმატი ონლაინ იყო, მაგრამ მუშაობა საკმაოდ აქტიურად წარიმართა.
საინტერესო დინამიკა ჰქონდა პროექტის „მომავალი ბულინგის გარეშე“ ფარგლებში შექმნილი ახალგაზრდული ჯგუფის აქტივობებს. აქტივისტებმა უმცროსკლასელებთან ჩაატარეს შეხვედრები ბულინგის მავნე ზეგავლენაზე. შეხვედრებში ჩართული იყვნენ პედაგოგებიც.
პანდემიასთან დაკავშირებული რთული სიტუაციის მიუხედავად, სენაკის ქალთა მხარდაჭერის ცენტრის საპროექტო ღონისძიებები გეგმის მიხედვით ხორციელდება.
ონლაინ ფორმატში ჩატარდა მობილიზატორების საერთო კრება, რომელშიც მონაწილეობა მიიღო 11 ქალთა მხარდაჭერის ცენტრის მობილიზატორმა და მცირე პროექტების მოდერატორმა. დასაწყისში შეჯამდა მიმდინარე მუშაობა, განხილულ იქნა ეპიდსიტუაციასთან დაკავშირებული პრობლემები.
შეხვედრაზე აქცენტი გაკეთდა ქალთა მიმართ ძალადობის წინააღმდეგ 16-დღიან კამპანიაზე. მონაწილეებმა წარმოადგინეს თავიანთი გეგმები, თუ რა აქტივობებით ჩაერთვება თითოეული მუნიციპალიტეტი კამპანიაში. აღინიშნა, რომ მსგავსი შეხვედრები მნიშვნელოვანია გამოცდილების გაზიარების კუთხით, მით უმეტეს - ასეთ სტრესულ სიტუაციაში მუშაობის დროს.
ქუთაისის, ხონის, წყალტუბოსა და ოზურგეთის ქალთა მხარდაჭერის ცენტრებმა ჩაატარეს სამობილიზაციო შეხვედრები. ბენეფიციარებს მიეწოდათ ინფორმაცია, კორონავირუსის პრევენციისთვის რა უნდა გააკეთონ, რა მექანიზმები არსებობს, როგორ უნდა მოიქცნენ კონკრეტულ შემთხვევებზე რეაგირებისათვის. ასევე ისაუბრეს მუნიციპალურ სერვისებზე, განსაკუთრებით ძალადობის პრევენციის და მსხვერპლის დაცვის კუთხით. შეხვედრებზე გამოიკვეთა საკითხები ადვოკატირებისათვის, რომლებზეც მუშაობა დაიწყო ადვოკატირების ჯგუფებმა.
„ქალის - უფლება თავის - უფლება“ - გრძელდება აქტივობები ფოთის ქალთა მხარდაჭერის ცენტრის პროექტის ფარგლებში. ამჯერად გაიმართა შეხვედრა ფოთის მუნიციპალიტეტის ჯანმრთელობისა და სოციალური დაცვის სამსახურის ხელმძღვანელ პირებთან. განსაკუთრებული აქცენტი გაკეთდა სამოქალაქო სექტორსა და ადგილობრივ მთავრობას შორის თანამშრომლობის გაძლიერებაზე ძალადობის პრევენციის კუთხით. აღინიშნა, რომ მზარდია ქალთა მიმართ ძალადობის სტატისტიკა და სამიზნე ჯგუფები საჭიროებენ ინფორმირებას, სახელმწიფო სერვისებზე წვდომას. პრევენციული ზომების გატარება შესაძლებელია სამთავრობო და არასამთავრობო სტრუქტურების წარმომადგენლთა კოორდინირებული მუშაობით. შეხვედრის დასასრულს, მონაწილეებს გადაეცა გაზეთები, სადაც ფოთის ქალთა კლუბის აქტივობებია ასახული.
პანდემიის გამო ონლაინ გაგრძელდა ქობულეთის ქალთა მხარდაჭერის ცენტრის მცირე პროექტი „ჰარმონიული გარემო პატარებისთვის“. ონლაინ საინფორმაციო შეხვედრები ჩატარდა სამიზნე ბაღების აღსაზრდელთა მშობლებთან. შეხვედრებში ჩაერთნენ ფონდი „სოხუმის“ იურისტი და ფსიქოლოგი. მათ მონაწილეებს მიაწოდეს ინფორმაცია ოჯახში ძალადობის თემაზე, რეაგირების მექანიზმებსა და იმ გავლენაზე, რაც ასეთ სიტუაციაში ყოფნამ შეიძლება მოუტანოს პატარას. შეხვედრამ აქტიური კითხვა-პასუხის რეჟიმში ჩაიარა. მონაწილეებმა ასევე მიიღეს ინფორმაცია COVID-19-თან დაკავშირებულ რეგულაციებზე და რთულ სიტუაციაში სტრესის მართვაზე.
„ჯანსაღი თაობისთვის“ - ფახულანის (წალენჯიხის მუნიციპალიტეტი) ქალთა მხარდაჭერის ცენტრის ეს პროექტი ოჯახში ძალადობისა და ბულინგის პრობლემას ეხება. პროექტის მიხედვით, ჩატარდა ონლაინ საინფორმაციო შეხვედრა სკოლის პედაგოგებთან. შეხვედრაში ჩაერთნენ იურისტი და ფსიქოლოგი. ისინი მონაწილეებს ესაუბრნენ მოზარდებზე, რომლებიც რთულ სიტუაციაში იმყოფებიან. აღინიშნა, რამდენად მნიშვნელოვანია ფაქტების გამოვლენა და დროული რეაგირება, რომ ძალადობამ ბავშვის ფსიქიკაზე გამოუსწორებელი კვალი არ დატოვოს. მონაწილეებს მიეწოდათ ინფორმაცია ადგილობრივ ბიუჯეტში გაწერილ მუნიციპალურ სერვისებზე და ასევე - COVID-19-ის პრევენციის კუთხით შემუშავებულ რეგულაციებზე.
ორ პროექტზე მუშაობს ხურჩა/კოკის ქალთა მხარდაჭერის ცენტრი.
კოკში პროექტის „დავიცვათ თავი ბულინგისგან“ ფარგლებში ჩატარდა ონლაინ შეხვედრა იურისტისა და ფსიქოლოგის ჩართულობით. შეხვედრის მონაწილე მშობლებმა და პედაგოგებმა მიიღეს ინფორმაცია, თუ რა მავნე გავლენა აქვს მოზარდის ფსიქიკაზე ბულინგს. დიდი აქცენტი გაკეთდა კიბერბულინგზე და მისი გამოვლენის მნიშვნელობაზე, იმ მექანიზმებზე, რომლებიც კონკრეტულ ფაქტებზე რეაგირებაში დაეხმარებათ.
მეორე მცირე პროექტი „დაარღვიე დუმილი, დაამარცხე ძალადობა“ ხურჩაში ხორციელდება. პროექტის მიხედვით, ჩატარდა საინფორმაციო შეხვედრა ბენეციფიარებთან და მონაწილეებს მიეწოდათ ინფორმაცია მექანიზმებზე, რომელთა მეშვეობითაც მათ შეეძლებათ ოჯახში ძალადობის ფაქტების გამოვლენა და დროული პრევენცია.
სენაკის ქალთა მხარდაჭერის ცენტრში ორი პროექტი ხორციელდება. ჩატარდა ონლაინ საინფორმაციო შეხვედრები სამიზნე საბავშვო ბაღების აღსაზრდელების მშობლებთან. ფონდი „სოხუმის“ იურისტი მათ ესაუბრა რეაგირებაზე ოჯახში ძალადობის ფაქტებზე, COVID-19-თან დაკავშირებულ რეგულაციებზე. ფსიქოლოგმა მისცა რჩევები სტრესის მართვის მექანიზმებზე.
ფსიქოლოგის ჩართულობით ჩატარდა შეხვედრა სოფელ ნოსირის სკოლის მოსწავლეებთან ბულინგის თემაზე, საუბარი შეეხო ბულინგის გავლენას მოზარდებზე, რეაგირების გზებს. პროექტის ფარგლებში შეიქმნა ახალგაზრდული ჯგუფი, რომლის ერთ-ერთმა აქტივისტმა უმცროსკლასელებთან ჩაატარა შეხვედრა ბულინგთან დაკავშირებულ საკითხებზე.
საოფისე კომპიუტერული პროგრამები, საჩვენებელი პრეზენტაციების შექმნა და გაშვება, ინტერნეტში მუშაობა, ინფორმაციის ძებნა, ელფოსტასთან კვალიფიციური მუშაობა - ამ საკითხებს შეისწავლიდა ქალების ერთი ჯგუფი ფონდი „სოხუმის“ დღის ცენტრში.
კომპიუტერის შემსწავლელი კურსის დასასრულს მონაწილეებმა აღნიშნეს, რომ ეს იყო პრაქტიკული და საჭირო მუშაობა, რომელიც დაეხმარება მათ დასაქმების მხრივ. კურსების ერთ-ერთი მიზანიც ეს არის.