დეკემბერში აქტიურად იმუშავა ფონდი „სოხუმის“ ფსიქოლოგმა ხურჩაში (ზუგდიდის მუნიციპალიტეტი), ხონში, სენაკში, ფოთში, წყალტუბოში, ქუთაისში. ამ რეგიონებში ფსიქოთერაპიული კონსულტაცია გაიარა 18-მა ოჯახურმა წყვილმა, მათ შორის კრიზისულ ურთიერთობებში მყოფმა წყვილებმა. ქალთა მხარდაჭერის ცენტრებში 5 ინდივიდუალური კონსულტაცია ჩატარდა.
ფსიქოლოგის კონსულტაციების შედეგად ბევრი პრობლემა გვარდება და ოჯახური ურთიერთობები ლაგდება.
დასავლეთ საქართველოს 9 მუნიციპალიტეტში მოქმედ ქალთა მხარდაჭერის ცენტრებში ყოველთვიურად ტარდება ძალადობის მონიტორინგი.
დეკემბერში იდენტიფიცირებული იყო ძალადობის 7 ქეისი და შეივსო შესაბამისი ანკეტები. ქეისების უმეტესობა ფსიქოლოგიურ, ფიზიკურ და ეკონომიკურ ძალადობას ეხებოდა. ერთ ქალზე მომზადდა შესაბამისი დოკუმენტები მსხვერპლის სტატუსის იდენტიფიკაციის ჯგუფში გასაგზავნად. იურისტებმა კონსულტაცია გაუწიეს ძალადობის მსხვერპლ 3 ქალს ქუთაისში, ოზურგეთსა და წყალტუბოში, ორმა ქალმა კი მიიღო ფსიქოლოგიური კონსულტაცია.
9 მუნიციპალიტეტის ადგილობრივ თვითმმართველობში ჩაატარეს საინფორმაციო შეხვედრები ფონდი „სოხუმის“ ქალთა მხარდაჭერის ცენტრების მობილიზატორებმა. თვითმმართველობების წარმოადგენლებმა ისაუბრეს მსხვერპლთა დაცვის და დახმარების პროგრამების შესახებ.
შეხვედრების თემა საერთო იყო - საერთაშორისო კამპანია „16 აქტიური დღე ქალთა მიმართ ძალადობის წინააღმდეგ“. დარიგდა კამპანიისთვის მომზადებული საინფორმაციო ფურცლები, თეთრი ბაფთები.
10 ოჯახური წყვილი განაგრძობს ფსიქოთერაპიულ საკონსულტაციო სესიას ზუგდიდის, სენაკის, ხონის, წყალტუბოს, ქუთაისის, ფ
ოთის მუნიციპალიტეტებში. ქალთა მხარდაჭერის ცენტრებში 7 ბენეფიციართან იმუშავა ფსიქოლოგმა ინდივიდუალურად დეპრესიის და ტრავმის დაძლევის კუთხით, მოზარდებთან კონსულტაციის დროს კი გამოიკვეთა კონფლიქტები მშობლებთან.
ფსიქოლოგთან ჯგუფური თუ ინდივიდუალური კონსულტაციები ხელს უწყობს კონფლიქტების მართვას, ურთიერთობების მოწესრიგებას, პრობლემების მოგვარებას.
კოკი/ხურჩის (ზუგდიდის მუნიციპალიტეტი) ქალთა მხარდაჭერის ცენტრის მცირე პროექტის დასასრულს, დეკემბერში ჩატარდა შეხვედრა ქალებთან თემაზე „ოჯახში ძალადობა, ქალთა მიმართ ძალადობის ფორმები და გამომწვევი მიზეზები“. ასევე გაიმართა მრგვალი მაგიდა - შეჯამდა მუშაობა და მიღწეული შედეგები. მრგვალ მაგიდაზე მოწვეულნი იყვნენ პროექტის ფარგლებში ჩატარებული აქტივობების მონაწილეები.
ერთ-ერთმა მონაწილემ აღნიშნა: „სოფელში ვცხოვრობ, არ ვმუშაობ და ჩემთვის ძალიან მნიშვნელოვანი იყო პროექტში ჩართვა - ბევრი საჭირო ინფორმაცია გავიგე და ერთგვარი განტვირთვაც მივიღე“.
ტრენინგით დასრულდა წყალტუბოს ქალთა მხარდაჭერის ცენტრის მცირე პროექტი „ოჯახი ძალადობის გარეშე“.
ტრენინგი ჩატარდა საერთაშორისო კამპანიის „16 აქტიური დღე ქალთა მიმართ ძალადობის წინააღმდეგ“, ამიტომ საუბარი შეეხო კამპანიის მნიშვნელობას, წლევანდელ სლოგანს: „შევაჩეროთ ძალადობა ქალთა მიმართ შრომის სამყაროში“.
ძალადობის შესახებ არსებული მითებისა და ფაქტების მეშვეობით კარგად გამოჩნდა სტერეოტიპული დამოკიდებულება პრობლემის მიმართ. ტრენინგის მონაწილეები მიიჩნევენ, რომ პრევენციულ ღონისძიებებში მათი აქტიური ჩართვა შედეგიანი იქნება. ისინი განსაკუთრებულ მნიშვნელობას ანიჭებენ თანამშრომლობას არასამთავრობო ორგანიზაციებთან, რომელთაც ამ კუთხით მუშაობის მეტი გამოცდილება აქვთ.
დასრულდა ფოთის ქალთა მხარდაჭერის ცენტრის მცირე პროექტი „ჰარმონიული გარემო პატარებისათვის“. მის ფარგლებში გაიმართა საინფორმაციო შეხვედრები და ორი ტრენინგი. 13 დეკემბერს საკრებულოს დარბაზში ჩატარდა მეორე ტრენინგი საბავშვო ბაღის მენეჯერებისა და აღმზრდელებისთვის თემაზე „გენდერის არსი, გენდერული ძალადობა, ოჯახში ძალადობის ტიპები, ნიშნები, რეფერირების გზები და მექანიზმები“.
ტრენინგზე აქცენტი გაკეთდა ბულინგის პრობლემაზე. მონაწილეების თქმით, აუცილებელია ყველა პედაგოგს ჰქონდეს ინფორმაცია ძალადობის ფორმების, კანონის, დამცავი მექანიზმების შესახებ.
ფონდი „სოხუმის“ ქალთა მხარდაჭერის ცენტრები გამოირჩეოდნენ საერთაშორისო კამპანიაში „16 აქტიური დღე ქალთა მიმართ ძალადობის წინააღმდეგ.“
ქუთაისის, ხონის, წყალტუბოს, თერჯოლის, სენაკის, ფოთის, ზუგდიდის, ლანჩხუთის და ოზურგეთის ქალთა მხარდაჭერის ცენტრების მობილიზატორებმა 25 ნოემბრიდან 10 დეკემბრამდე ჩაატარეს 30-მდე საინფორმაციო შეხვედრა ქალაქებსა და სოფლებში, სხვადასხვა ჯგუფში - ქალებთან, მამაკაცებთან, დევნილებთან, ახალგაზრდებთან, პედაგოგებთან.
საინფორმაციო შეხვედრებზე მოწვეულნი იყვნენ ადგილობრივი თვითმმართველობის წარმომადგენლები, რომელთაც ქალთა ჯგუფებს გააცნეს მუნიციპალიტეტების 2019 წლის ბიუჯეტის პროექტის სოციალური მიმართულება.
თერჯოლის ქალთა მხარდაჭერის ცენტრის მობილიზატორის ინიციატივით ჩატარდა სამდღიანი სემინარი მოზარდებთან და მათ მშობლებთან „თერჯოლა მედის“ მხარდაჭერით. ფსიქოლოგთან, ფსიქიატრთან ერთად სემინარზე განხილულ იქნა ძალადობის მიზეზები, მოზარდებისა და მშობლების ურთიერთობები.
შეხვედრებზე ყველა მონაწილე გაეცნო 16-დღიანი კამპანიის ისტორიას. მათ დაგმეს ძალადობა და სოლიდარობა გამოხატეს კამპანიის მიმართ.
ხონის ქალთა მხარდაჭერის ცენტრის მცირე პროექტის მიმდინარეობა დაემთხვა საინფორმაციო კამპანიას „16 აქტიური დღე ქალთა მიმართ ძალადობის წინააღმდეგ“, ამიტომაც შეხვედრების მონაწილეებს მიეწოდათ ინფორმაცია კამპანიის შესახებ.
სოფელ მათხოჯში პროექტის ახალგაზრდა მონაწილემ მაყურებელებს წარუდგინა ფონდი „სოხუმის“ აქტივისტი გოგონების გადაღებული მოკლემეტრაჟიანი ფილმები „ვიწრო დერეფანი“, „ერთ ჩვეულებრივ დღეს“, „ჩემოდანი“, „სავარძელი“, „საფეხურები“. შემდეგ გაიმართა მსჯელობა ფილმში დასმული პრობლემების შესახებ.
3 დეკემბერს კი საკრებულოს სხდომათა დარბაზში ჩატარდა მრგვალი მაგიდა, რომელშიც მონაწილეობა მიიღეს პროექტის აქტივობებში ჩართულმა ახალგაზრდებმა და თვითმმართველობის წარმომადგენლებმა. შეხვედრაზე ყურადღება გამახვილდა პროექტის ფარგლებში ჩატარებულ მუშაობასა და მიღებულ შედეგებზე.
ფონდი „სოხუმის“ ქალთა მხარდაჭერის 9 ცენტრის მობილიზატორებმა 27 საინფორმაციო შეხვედრა ჩაატარეს სხვადასხვა ჯგუფთან ქალაქებსა და სოფლებში, დევნილთა კოლექტიურ ცენტრებში. შეხვედრების თემა იყო ოჯახში ძალადობა და სტამბოლის კონვენცია. დამსწრეები ინტერესით გაეცნენ სტამბოლის კონვენციას, რომელიც იცავს ქალთა უფლებებს.
თერჯოლაში 24-25 ნოემბერს კლინიკა „თერჯოლა მედის“ მხარდაჭერით ჩატარდა საინფორმაციო შეხვედრა და კონსულტაცია მოზარდებთან. შემდეგ შედგა მოზარდებისა და მათი მშობლების ერთობლივი შეხვედრა, სადაც ფსიქოლოგთან ერთად უამრავ აქტუალურ საკითხზე ისაუბრეს.