ქალთა მხარდაჭერის ცენტრები (533)
ქალთა მხარდაჭერის ცენტრი – ეს არის ფონდი „სოხუმის“ ფილიალები ქუთაისში, წყალტუბოში, ხონში, თერჯოლაში, სენაკში, ფოთში, ხურჩა/კოკში (ზუგდიდის მუნიციპალიტეტი), ლანჩხუთში, ოზურგეთში - შეიქმნა 2009 წლიდან. ცენტრების დანიშნულებაა ქალთა გაძლიერება, სოციალური, ფსიქოლოგიური, იურიდიული დახმარების გაწევა ძალადობის მსხვერპლი ქალებისთვის და კრიზისული ოჯახებისათვის, რომლებიც რთულ ცხოვრებისეულ მდგომარეობაში აღმოჩნდნენ. ქალთა მხარდაჭერის ცენტრები ხელს უწყობს ქალთა უფლებების დაცვას და მათ სოციალურ-ფსიქოლოგიურ რეაბილიტაციას.
25 ნოემბრიდან - 10 დეკემბრამდე - ფონდი „სოხუმი“ უერთდება კამპანიას „16 აქტიური დღე ქალთა მიმართ ძალადობის წინააღმდეგ!“
კამპანია წელს იმართება მოწოდებით „შევაჩეროთ ძალადობა ქალთა მიმართ შრომის სამყაროში!“
მიუხედავად იმისა, რომ საქართველოს შრომის კოდექსი, ეროვნული კანონები, ქვეყნის მიერ რატიფიცირებული დოკუმენტები კრძალავს დისკრიმინაციას, მაინც ხშირია ქალთა უფლებების დარღვევა შრომის ბაზარზე.
სწორედ ამიტომ, კამპანიის ფარგლებში იგეგმება ათობით ღონისძიება საზოგადოების ყურადღების მოსაპყრობად: საინფორმაციო შეხვედრები, ფსიქოლოგიური და იურიდიული კონსულტაციები, მრგვალი მაგიდები ადგილობრივი თვითმმართველობის და სახელმწიფოს სტრუქტურების წარმომადგენლების მონაწილეობით. გავრცელდება საინფორმაციო მასალები.
ფონდმა „სოხუმმა“ პირველი დღე ფეისბუქკამპანიით დაიწყო.
https://www.facebook.com/fsokhumi/posts/2248868235345483?__tn__=C-R
ქუთაისის, ხონის, წყალტუბოს, ლანჩხუთის, სენაკის, ოზურგეთის, ხურჩა/კოკის (ზუგდიდის მუნიციპალიტეტი) ქალთა მხარდაჭერის ცენტრების მობილიზატორები ქუთაისში, ფონდი „სოხუმის“ ოფისში შეიკრიბნენ.
შეხვედრაზე გაკეთდა ჩატარებული სამთვიანი მუშაობის მოკლე ანგარიში. მობილიზატორებმა ისაუბრეს პრობლემებზე და მომავალ გეგმებზე. უახლოესი გეგმაა - აქტიური ჩართვა საერთაშორისო კამპანიაში „16 აქტიური დღე ქალთა მიმართ ძალადობის წინააღმდეგ“.
გრძელდება წყალტუბოს ქალთა მხარდაჭერის ცენტრის მცირე პროექტი. მუნიციპალიტეტის ხუთი სოფლის წარმომადგენლის, გენდერული თანასწორობის საბჭოს წევრების და აქტივისტი ქალების მონაწილეობით გაიმართა ტრენინგი თემაზე „გენდერი, გენდერული ძალადობა და ოჯახში ძალადობის მსხვერპლთა დახმარება“.
ტერიტორიული ერთეულების ხელმძღვანელები გულისტკივილით აღნიშნავენ ძალადობის შემთხვევების სიხშირეს. მათი თქმით, საჭიროა ყველას ჰქონდეს ამომწურავი ინფორმაცია ძალადობისგან დაცვის მექანიზმებზე და იცოდნენ, ვისთან ითანამშრომლონ, ვის შეუძლია მათი დახმარება. აღინიშნა ისიც, რომ საჭიროა მეტი საშუალება იყოს მსხვერპლების რეალური დახმარების აღმოსაჩენად.
ხურჩა/კოკის (ზუგდიდის მუნიციპალიტეტი) ქალთა მხარდაჭერის ცენტრის მცირე პროექტით, ჩატარდა საინფორმაციო შეხვედრა და ტრენინგი ქალებთან ორსანტიასა და კახათში.
ტრენინგზე განიხილეს ძალადობის გამომწვევი მიზეზები და შედეგები, ისაუბრეს კანონზე ქალთა მიმართ/ოჯახში ძალადობის წინააღმდეგ, დამცავ მექანიზმებზე, რეფერირების სუბიექტებზე,
მონაწილეებმა აღნიშნეს:
„ქალების უმეტესობა არ არის ინფორმირებული დაცვის მექანიზმებზე. უნდა ითქვას, რომ კანონის არსებობაც არ არის ყველასათვის ცნობილი.“
„ძალადობის მსხვერპლ ქალთა მხარდაჭერის პროგრამების ნაკლებობა ქმნის ქალს იძულებულს, რომ დაბრუნდეს მოძალადესთან და ითმინოს ძალადობა.“
ტრენინგმა მათ ბევრი საჭირო ინფორმაცია და ცოდნა მისცა.
გამორჩეულად ბევრი ღონისძიება ჩატარდა ნოემბერში ხონის ქალთა მხარდაჭერის ცენტრის მცირე პროექტის „ახალგაზრდები ძალადობის წინაღმდეგ“ ფარგლებში: საინფორმაციო შეხვედრები კუხსა და მათხოჯში მერის წარმომადგენლებთან, კუხის საბავშვო ბაღის გამგესთან, მე-4 საჯარო სკოლის მოსწავლეებთან თემაზე „კონფლიქტები და ბულინგი“.
კუხის და მათხოჯის საბავშვო ბაღებში გაიმართა ფონდი „სოხუმის“ ჩრდილების თეატრის წარმოდგენა, ნაჩვენები იყო სპექტაკლი „თალგამი“. სოფელ ნახახულევში კი პროექტის ახალგაზრდა მონაწილემ მოაწყო ფონდი „სოხუმის“ აქტივისტი გოგონების გადაღებული მოკლემეტრაჟიანი ფილმების „ვიწრო დერეფანი“, „ერთ ჩვეულებრივ დღეს“, „ჩემოდანი“, „სავარძელი“, „საფეხურები“ ჩვენება.
პროექტში სულ უფრო მეტი ადამიანი ერთვება და სწორედ ეს არის მისი მთავარი ამოცანა.
გრძელდება ფოთის ქალთა მხარდაჭერის ცენტრის მცირე პროექტი „ჰარმონიული გარემო პატარებისათვის“. ფოთის საკრებულოს დარბაზში საბავშვო ბაღის მენეჯერებისა და აღმზრდელთათვის ჩატარდა ტრენინგი თემაზე „გენდერის არსი, გენდერული ძალადობა, ოჯახში ძალადობის ტიპები, ნიშნები, რეფერირების გზები და მექანიზმები“.
ტრენინგი მონაწილეთა აქტიური ჩართულობის ფონზე მიმდინარეობდა. აღინიშნა, რომ მსგავსი ტრენინგები მნიშვნელოვანია ბაღების პედაგოგებისათვის, რადგანაც ახალ ინსტრუქციებში მითითებულია ამ კუთხით ჩართულობა. ტრენინგზე დიდი აქცენტი გაკეთდა ბულინგის თემაზე. მონაწილეთათვის საინტერესო აღმოჩნდა ბულინგის ფაქტების გამოკვეთის მეთოდები.
ბოლოს დაისახა სამომავლო მუშაობის გეგმები.
მონაწილეებმა განაცხადეს:
„მნიშვნელოვანია, ეს ინფორმაცია მაქსიმალურად მივიტანოთ ყველა პედაგოგთან და აღმზრდელთან“.
„საინფორმაციო შეხვედრას ჩავატარებ მშობლებთან და აღმზრდელებთან. მივხვდი, რომ აუცილებელია, მშობელმა იცოდეს, ჩვენ რაზე გვევალება რეაგირება, რომ მისთვის უცხო არ იყოს“.
სენაკში, თერჯოლაში, წყალტუბოში, ქუთაისსა და ხურჩაში (ზუგდიდის მუნიციპალიტეტი) გაიმართა ფსიქოთერაპიული საკონსულტაციო სესიები 6 ოჯახურ წყვილთან. ფსიქოლოგმა ჩაატარა 8 ინდივიდუალური კონსულტაცია ჰიპერაქტიურობის, წყენის, შიშის, აგრესიის თემებზე და გააკეთა 2 მოზარდის ფსიქოლოგიური პორტრეტი.
ოთხმა ოჯახურმა წყვილმა სკაიპით გაიარა კონსულტაცია.
სულ 40 ბენეფიციარს გაეწია ფსიქოთერაპიული დახმარება.
წყვილები მუშაობდნენ ურთიერთობების კორექციაზე, რათა მათ შეძლონ ქცევის არაძალადობრივი საშუალებების არჩევა.
ფოთის ქალთა მხარდაჭერის ცენტრის მცირე პროექტის „ჰარმონიული გარემო პატარებისთვის“ ფარგლებში ოქტომბერში გაიმართა საინფორმაციო შეხვედრები მე-16 და მე-6 ბაგა-ბაღის აღსაზრდელების მშობლებთან თემაზე: ოჯახური ძალადობა და მისი გავლენა ბავშვებზე. გამოვლინდა ფსიქოლოგთან შეხვედრის ჩატარების აუცილებლობა მშობლებთან და პედაგოგებთან, სადაც აქცენტი გაკეთდება მშობლებისა და ბავშვების ურთიერთობის სირთულეებზე და პედაგოგების კომუნიკაციის გაუმჯობესებაზე პატარებთან.
აიპი ბაღების გაერთიანების წარმომადგენელთან შეხვედრის დროს განიხილეს დაგეგმილი ტრენინგის საორგანიზაციო საკითხები.
ხონის ქალთა მხარდაჭერის ცენტრის მცირე პროექტის „ახალგაზრდები ძალადობის წინაღმდეგ“ კოორდინატორი შეხვდა საკრებულოს თავმჯდომარის მოადგილეს, აგრეთვე ნახახულევის და კუხის საბავშვო ბაღის გამგეებს. საუბარი შეეხო პროექტის ფარგლებში დაგეგმილ აქტივობებს.
მე-4 საჯარო სკოლაში მოეწყო ფონდი „სოხუმის“ აქტივისტი გოგონების გადაღებული მოკლემეტრაჟიანი ფილმების „ვიწრო დერეფანი“, „ერთ ჩვეულებრივ დღეს“, „ჩემოდანი“, „სავარძელი“, „საფეხურები“ ჩვენება. დისკუსიის დროს ახალგაზრდებმა აღნიშნეს, რომ ფილმებში ასახული პრობლემები დღესაც აქტუალურია: ინტეგრაცია, მიგრაცია ქვეყნის შიგნით, ოჯახში ძალადობა, კონფლიქტი მოზარდებს შორის, ბულინგი... და ერთობლივი ძალებით უნდა ვეძებოთ გამოსავალი და ვეცადოთ მათ მოგვარებას.
ფილმების ნახვა შეიძლება ამ ბმულზე:
ოტომბრის თვეში ჩატარდა ჯგუფური და ინდივიდუალური შეხვედრები იურისტთან სენაკის, ხურჩა/კოკის და წყალტუბოს ქალთა მხარდაჭერის ცენტრებში. შეხვედრების ძირითადი თემა - კანონი ოჯახში ძალადობის შესახებ, მსხვერპლის დაცვის მექანიზმები (შემაკავებელი და დამცავი ორდერები, უწყებათშორისი საბჭო). ამას გარდა - პირადი საკითხები, რომლებიც შეხვედრის მონაწილეებს აწუხებთ. ერთი კონსულტაცია ტელეფონით გაიცა. კონსულტაციები ბენეფიციარებს პრობლემების მოგვარებაში უწყობს ხელს.