ქალთა მხარდაჭერის ცენტრები (533)
ქალთა მხარდაჭერის ცენტრი – ეს არის ფონდი „სოხუმის“ ფილიალები ქუთაისში, წყალტუბოში, ხონში, თერჯოლაში, სენაკში, ფოთში, ხურჩა/კოკში (ზუგდიდის მუნიციპალიტეტი), ლანჩხუთში, ოზურგეთში - შეიქმნა 2009 წლიდან. ცენტრების დანიშნულებაა ქალთა გაძლიერება, სოციალური, ფსიქოლოგიური, იურიდიული დახმარების გაწევა ძალადობის მსხვერპლი ქალებისთვის და კრიზისული ოჯახებისათვის, რომლებიც რთულ ცხოვრებისეულ მდგომარეობაში აღმოჩნდნენ. ქალთა მხარდაჭერის ცენტრები ხელს უწყობს ქალთა უფლებების დაცვას და მათ სოციალურ-ფსიქოლოგიურ რეაბილიტაციას.
ხონის ქალთა მხარდაჭერის ცენტრმა და „კარიტასი საქართველომ“ საქველმოქმედო აქცია გამართეს ხონში მცხოვრები სოციალურად დაუცველი, ოჯახური ძალადობის მსხვერპლი ოჯახის მხარდასაჭერად. შეგროვდა ტანსაცმელი, ფეხსაცმელი, საოჯახო ნივთები. მსხვერპლ ქალს შესთავაზეს ფონდი „სოხუმის“ უფასო სერვისები - იურიდიული კონსულტაციები და ფსიქორეაბილიტაცია.
- რთულია, მაგრამ მაქსიმალურად ვცდილობთ, გავითვალისწინოთ რჩევები, რომელთაც ვიღებთ. ამით ჩვენი ურთიერთობა იცვლება, სხვა ეტაპზე გადავდივართ და ვინარჩუნებთ სტაბილურობას, - აღნიშნა ერთ-ერთმა წყვილმა.
თვის განმავლობაში სამ ოჯახურ წყვილთან გაიმართა მუშაობა ფოთის, ხონისა და წყალტუბოს ქალთა მხარდაჭერის ცენტრში. მათ შორის ერთი ახალი წყვილია. სიტუაციიდან გამომდინარე, კომპლექსური მუშაობა კიდევ გაგრძელდება ფსიქოლოგის, იურისტის და კონფლიქტოლოგის ჩართულობით.
სტატისტიკა ასეთია:
10 ოჯახურ წყვილს შეხვდა ფსიქოლოგი ქუთაისის, ხურჩა/კოკის, ხონის, სენაკის, ფოთის, წყალტუბოს ქალთა მხარდაჭერის ცენტრში.
9 ინდივიდუალური კონსულტაცია გაიმართა.
3 ფსიქოლოგიური პორტრეტი დაიწერა.
33 ადამიანი ესწრებოდა შეხვედრებს.
22 ქალი და 11 მამაკაცი.
ასეთია სექტემბერში ფონდი „სოხუმის“ ფსიქოლოგის მუშაობის სურათი. პრობლემა სხვადასხვა იყო: დეპრესია და შიში, მოზარდებთან ურთიერთობის სირთულეები... ყველასთვის საჭირო და სასარგებლო იყო ფსიქოთერაპიული საკონსულტაციო სესია თუ შეხვედრა. ზოგიერთი განაგრძობს მუშაობას ფსიქოლოგთან, ზოგის პრობლემა კი მოგვარდა და უკვე სხვას აძლევს რეკომენდაციას, შეხვდეს ფსიქოლოგს და გამოიყენოს ეს შესაძლებლობა.
სექტემბერში აქტიურად წარიმართა მუშაობა ფოთის ქალთა მხარდაჭერის ცენტრის მცირე პროექტის „ჰარმონიული გარემო პატარებისთვის“ ფარგლებში. გაიმართა რამდენიმე საინფორმაციო შეხვედრა: მე-3 ბაგა-ბაღის გამგესთან, პედაგოგებთან, მშობლებთან, სკოლამდელი გაერთიანების სამსახურში, მერიის სოციალური და ჯანდაცვის სამსახურის უფროსთან. შეხვედრების მთავარი მიზანი იყო ინფორმაციის მიწოდება დაგეგმილი ღონისძიებების შესახებ - კერძოდ, ჩატარდება შეხვედრები პედაგოგებთან, მშობლებთან, ფსიქოლოგთან ბულინგის და ბავშვთა მიმართ ძალადობის საკითხებზე. პროექტი ხელს შეუწყობს სხვადასხვა ჯგუფის ინფორმირებას და პატარებისთვის ჰარმონიული გარემოს შექმნას.
ფონდი „სოხუმის“ ქალთა მხარდაჭერის ცენტრების მობილიზატორებმა 27 საინფორმაციო შეხვედრა ჩაატარეს. შეხვედრების მთავარი თემა იყო - მშვიდობის საერთაშორისო დღე და მშვიდობასთან დაკავშირებული საკითხები.
შეხვედრები 9 მუნიციპალიტეტში (ქუთაისი, წყალტუბო, ხონი, თერჯოლა, სენაკი, ფოთი, ზუგდიდი, ოზურგეთი, ლანჩხუთი) გაიმართა - ქალაქებსა და სოფლებში. შეკრებილებმა ისაუბრეს მშვიდობის აუცილებლობაზე, თითოეული ადამიანის წვლილზე სამშვიდობო საქმეში. განსაკუთრებით ამაღელვებელი იყო შეხვედრები დევნილთა დასახლებებში და კონფლიქტის ზონასთან ახლომდებარე სოფლებში. მონაწილეები აღნიშნავდნენ:
„მშვიდობის ფასი ჩვენ კარგად ვიცით...“
„ჩვენ ერთად უნდა ვაშენოთ მშვიდობა...“
„სამშვიდობო აღზრდა ბავშვობიდან უნდა დაიწყოს...“
„ადამიანები უნდა დაფიქრდნენ და იზრუნონ კონფლიქტების მშვიდობიან მოგვარებაზე.“
ქუთაისის, წყალტუბოს, ხონის, თერჯოლის, სენაკის, ფოთის, ლანჩხუთის, ოზურგეთის, ხურჩა/კოკის (ზუგდიდის მუნიციპალიტეტი) ქალთა მხარდაჭერის ცენტრების მობილიზატორებმა სექტემბერში საინფორმაციო შეხვედრებზე იდენტიფიცირება მოახდინეს ძალადობის 11 ქეისზე და შეავსეს ანკეტები.
ანკეტებში დაფიქსირებულია ძალადობის შემთხვევები - ოჯახის წევრების მხრიდან ბავშვთა და ქალთა მიმართ. ოთხმა დაზარალებულმა უკვე მიმართა ფსიქოლოგს, სამმა კი გაიარა იურისტის კონსულტაცია.
ფონდი „სოხუმის“ იურისტებთან შეხვედრებზე მონაწილეებმა ისაუბრეს ოჯახში ძალადობის აღკვეთის მიზნით შექმნილი კანონის იმ მუხლებზე, რომლებიც მათ პრობლემებს ეხება. ორი ინდივიდუალური კონსულტაცია გაიმართა ქუთაისში. იურისტებს მიმართეს ასევე დახმარებისთვის ხონში, სენაკში, ფოთსა და ოზურგეთში. მათ შორის იყვნენ ოჯახური წყვილები, რომლებიც ერთად ეძებენ გამოსავალს თავიანთი პრობლემებიდან.
18 სექტემბერს იურისტმა წყალტუბოს ქალთა მხარდაჭერის ცენტრში ჩაატარა ჯგუფური საინფორმაციო-საკონსულტაციო შეხვედრა, სადაც 13 ადამიანმა მიიღო საჭირო სამართლებრივი ინფორმაცია.
აქტიურ ფაზაშია ხონის ქალთა მხარდაჭერის ცენტრის მცირე პროექტი „ახალგაზრდები ძალადობის წინაღმდეგ“. სექტემბერში ჩატარდა საინფორმაციო შეხვედრები საკრებულოს იურიდიული განყოფილების უფროსთან და საორგანიზაციო განყოფილების უფროს სპეციალისტთან (პროექტის მოკლე პრეზენტაცია და მათი მხარდაჭერა კონკრეტულ საორგანიზაციო საკითხებში).
ღია ცის ქვეშ ნაჩვენები იყო ფონდი „სოხუმის“ ერთ-ერთი პროექტის ფარგლებში გოგონების მიერ გადაღებული ფილმები აქტუალურ პრობლემებზე „ვიწრო დერეფანი“, „ერთ ჩვეულებრივ დღეს“, „ჩემოდანი“, „სავარძელი“, „საფეხურები“. შემდეგ გაიმართა დისკუსია. ახალგაზრდებმა და მათმა მშობლებმა აღნიშნეს, რომ ფილმები გამოხატავს რეალობას და მნიშვნელოვანია მათი ჩვენება სხვადასხვა ჯგუფთან, რათა მეტად დაფიქრდნენ და ეძებონ გამოსავალი.
დევნილთა დასახლებაში გაიმართა ვორკშოპი ჯგუფთან, რომელიც ოქტომბერში დამოუკიდებლად ჩაატარებს დიკუსიებს ფილმების ჩვენების შემდეგ.
პროექტი მიმართულია პოზიტიური კომუნიკაციის უნარების გაღრმავებისკენ, რაც ხელს შეუწყობს კონფლიქტური სიტუაციების დარეგულირებას.
წყალტუბოს ქალთა მხარდაჭერის ცენტრის მცირე პროექტის ფარგლებში ჩატარდა საინფორმაციო შეხვედრები ადგილობრივი თვითმმართველობის წარმომადგენლებთან - კერძოდ, მერის მოადგილესთან, საკრებულოს სოფლის დეპუტატებთან, მერიის სოციალური და ჯანდაცვის განყოფილებაში. ადგილობრივი თვითმმართველობის წარმომადგენლები გაეცნენ პროექტის აქტივობებს. დაიგეგმა ტრენინგი, სადაც მონაწილეობას მიიღებენ: მერის წარმომადგენლები სოფლებში, სოფლის ექიმები, სკოლის პედაგოგები, საბავშვო ბაღის პედაგოგები და აღმზრდელები. ტრენინგზე განხილული იქნება შემდეგი თემები: კანონი ოჯახში ძალადობის წინააღმდეგ, დამცავი მექანიზმები, რეფერირების სისტემა და ა.შ. მიღებული ინფორმაცია და გამოცდილება დაეხმარება ტრენინგის მონაწილეებს, აქტიურად ჩაერთონ ძალადობის პრევენციის პროცესში.
- კრიზისული სიტუაციების მართვა, ურთიერთობის გაუმჯობესება წყვილებში ინდივიდუალური სქემის გამოყენებით - ფონდი „სოხუმის“ ფსიქოლოგმა და კონფლიქტოლოგმა ამგვარად კონსულტაცია სამ წყვილთან ჩაატარეს.
მუშაობის სპეციფიკიდან გამომდინარე, შეხვედრიდან შეხვედრამდე წყვილებთან ურთიერთობა ონლაინ გაგრძელდება.