ქალთა მხარდაჭერის ცენტრები (533)
ქალთა მხარდაჭერის ცენტრი – ეს არის ფონდი „სოხუმის“ ფილიალები ქუთაისში, წყალტუბოში, ხონში, თერჯოლაში, სენაკში, ფოთში, ხურჩა/კოკში (ზუგდიდის მუნიციპალიტეტი), ლანჩხუთში, ოზურგეთში - შეიქმნა 2009 წლიდან. ცენტრების დანიშნულებაა ქალთა გაძლიერება, სოციალური, ფსიქოლოგიური, იურიდიული დახმარების გაწევა ძალადობის მსხვერპლი ქალებისთვის და კრიზისული ოჯახებისათვის, რომლებიც რთულ ცხოვრებისეულ მდგომარეობაში აღმოჩნდნენ. ქალთა მხარდაჭერის ცენტრები ხელს უწყობს ქალთა უფლებების დაცვას და მათ სოციალურ-ფსიქოლოგიურ რეაბილიტაციას.
- ქალთა მიგრაციის თემაზე საზოგადოებაში არაერთგვაროვანი დამოკიდებულებაა. უმეტესობის აზრით, ქალი არ უნდა წავიდეს, არ უნდა დატოვოს შვილები. იმაზე ნაკლებად საუბრობენ, რომ ქალი სწორედ ოჯახის და შვილების გამო იღებს ამ გადაწყვეტილებას.
- თუ ოჯახში კონფლიქტია, ხშირად მიგრაცია საუკეთესო გამოსავალია. ამიტომ მნიშვნელოვანია, საზოგადოებას სწორი დამოკიდებულება ჰქონდეს ქალთა მიგრაციის მიმართ. თუ ქალის წასვლით ოჯახში კონფლიქტი იქმნება, ეს მხოლოდ ქალის კია არა, ოჯახის დანარჩენი წევრების დანაშაულიც არის.
ასეთი მოსაზრებები გამოითქვა ქალების ჯგუფთან გამართულ ვორკშოპებზე ფოთის, სენაკის და ქუთაისის ქალთა მხარდაჭერის ცენტრებში.
პიროვნული ფასეულობები და მათი კავშირი ოჯახურ კონფლიქტებთან - ამ თემის ირგვლივ გაიმართა დისკუსია ახალგაზრდებთან გამართულ ვორკშოპებზე ხონში, ფოთსა და კოკში.
ახალგაზრდების მოსაზრებები ასეთი იყო:
- პიროვნული ფასეულობები ყოველთვის განსხვავებულია ადამიანებში. რაც არ უნდა ძველმოდური იყოს, ოჯახური ტრადიციები ჩემთვის მნიშვნელოვანია, ასევე მნიშვნელოვანია, ჩემი საცოლე როგორი ოჯახიდან არის. მე ასეთი ვარ და ასეთად დავრჩები.
- არ მომწონს, როცა გოგონები რეგიონებიდან თბილისში ჩადიან და, ვითომ „თავისუფლები“, საკუთარ მეს ივიწყებენ და ბოიფრენდებს იჩენენ. საკუთარი იდენტობა ყველგან უნდა შევინარჩუნოთ.
- ოჯახში თუ ერთმანეთის ფასეულობებს პატივს არ სცემენ, მუდამ იქნება კონფლიქტი.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
ტელევიზიების უმრავლესობა პოლიტიზებულია და ძალადობის თემა მათთვის არ არის პრიორიტეტული.
- ძალადობის პრევენციაში მასმედიის რესურსი სათანადოდ არ არის გამოყენებული, ჟურნალისტებსაც სპეციალური ტრენინგები სჭირდებათ, რათა სწორად მიაწოდონ ინფორმაცია საზოგადოებას, - ასეთი მოსაზრებები ჰქონდათ ვორკშოპების მონაწილე ახალგაზრდებს ფოთში, ხონსა და განმუხურში (ზუგდიდის მუნიციპალიტეტი).
მათ აღნიშნეს, რომ სოციალურ ქსელებში, ინტერნეტ-სივრცეში მხოლოდ ნეგატიური ინფორმაციებია და აუცილებელია პოზიტიური მაგალითების გავრცელება, რაც საზოგადოებაში აგრესიას შეამცირებს.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
2018 წლის 10 იანვრიდან დაიწყო ფონდი „სოხუმის“ ახალი პროექტი „ქალთა უფლებების გაძლიერება დასავლეთ საქართველოში“. ეს არის ქალთა უფლებების კუთხით ფონდის მრავალწლიანი მუშაობის გაგრძელება.
ბოლო 6 წლის განმავლობაში საქმიანობა აქტიურად მიმდინარეობდა დასავლეთ საქართველოს ქალთა მხარდაჭერის 6 ქალაქში (ქუთაისი, წყალტუბო, ხონი, სენაკი, ფოთი, ზუგდიდი).
იანვრიდან მათ დაემატა კიდევ სამი ქალაქი - თერჯოლა, ოზურგეთი, ლანჩხუთი, სადაც შეიქმნება ქალთა მხარდაჭერის ცენტრები.
დაგეგმილია სხვადასხვა აქტივობა ძალადობის მსხვერპლთა და კრიზისული ოჯახების მხარდაჭერისა და რეაბილიტაციისათვის, გაგრძელდება აქტიური თანამშრომლობა თვითმმართველობებთან.
პროექტის უმნიშვნელოვანესი კომპონენტია სარეაბილიტაციო ცენტრის გახსნა და ძალადობის მსხვერპლთა განთავსება (კრიზისული პერიოდის განმავლობაში). ცენტრში ჩატარდება სხვადასხვა ტრენინგ-სემინარი ძალადობის მსხვერპლთათვის და კრიზისული ოჯახების წარმომადგენლებისათვის; შეთავაზებული იქნება პროფესიული კურსები; მოხდება მათი დასაქმების ხელშეწყობა.
პროექტის ფარგლებში ასევე იმუშავებს ოჯახში ძალადობის კანონის მონიტორინგის ჯგუფი, რომელიც რეფერალური მექანიზმის სუბიექტებთან ჩატარებული ფოკუს-ჯგუფების, ჩაღრმავებული ინტერვიუების და ანკეტირების მეშვეობით მოამზადებს რეკომენდაციათა პაკეტს.
პროექტი მნიშვნელოვნად შეუწყობს ხელს ქალთა უფლებების გაძლიერებას და გენდერული ძალადობის პრევენციას დასავლეთ საქართველოს 9 მუნიციპალიტეტში.
პროექტიხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
10 ივნისს ჩატარდა იურისტის საინფორმაციო-საკონსულტაციო შეხვედრა ქუთაისში, ხარებავას ქუჩაზე მცხოვრებ დევნილებთან. შეხვედრის ათი მონაწილე გაეცნო სხვადასხვა სახის ინფორმაციას, რომელიც პრობლემათა სამართლებრივ რეგულაციას ეხება. ამ კორპუსში ისინი 10 წლის წინ ჩაასახლეს, თუმცა ამბობდნენ, რომ შენობა ავარიული და საცხოვრებლად უვარგისი იყო.
დასრულდა კვლევა, რომელიც გენდერული საკონსულტაციო საბჭოს მიერ განხორციელდა ადგილობრივი გენდერული საჭიროებების გამოვლენის მიზნით. ამ ეტაპზე კვლევამ მოიცვა ოზურგეთის მუნიციპალიტეტის სოფლები.
ფოთის ქალთა მხარდაჭერის ცენტრში შედგა ფსიქოლოგიური ჯგუფური შეხვედრა, რომელსაც დაესწრო 12 ბენეფიციარი 26-დან 69 წლამდე. შეხვედრის მონაწილეები საუბრობდნენ, როგორ მოვიცილოთ ნეგატიური გრძნობები და ემოციები ოჯახური ურთიერთობებისა და ძალადობის პრევენციისთვის.
თვითდადანაშაულება, საკუთარი თავით უკმაყოფილება - მთავარი თემები იყო მსჯელობისთვის. ამისკენ მიდრეკილები არიანისინი, ვისაც არასტაბილური თვითშეფასება აქვს და ნებისმიერ წარუმატებლობას თავის თავზე იღებს და ეშინიათ მარცხის. შინაგანი კრიტიკოსი თრგუნავს მის სურვილებს, მისწრაფებებს, ამუხრუჭებს გეგმებს. ასეთი ადამიანი იკეტება თავის თავში და არ უნდა რაიმეს შეცვლა ცხოვრებაში. ამიტომ პრობლემას ორივე მხრიდან უნდა შეხედოთ, ემოციური და თავისუფალი აზროვნების ჩართვით, - ასეთი იყო ფსიქოლოგის რჩევები.
სოფელ განმუხურში (ზუგდიდის მუნიციპალიტეტი) ფონდი „სოხუმი“ პირველად ჩავიდა. შეხვედრა გაცნობითი ხასიათის იყო - შეკრებილებმა გაიგეს ფონდის საინფორმაციო-საკონსულტაციო მუშაობაზე. ითქვა, რომ ეს სოფელი კონფლიქტის ახლოს მდებარეობს და აქ მეტია სტრესოგენური ფაქტორი, ამიტომაც მათთვის აუცილებელია ფსიქოლოგიური მხარდაჭერა. აქვთ ინკლუზიურ ბავშვებთან მუშაობის სურვილი.
ხურჩა/კოკის ქალთა მხარდაჭერის ცენტრი პერიოდულად დაგეგმავს შეხვედრას განმუხურში, რათა აქ მცხოვრებმა ადამიანებმაც იგრძნონ ჯგუფური თუ ინდივიდუალური კონსულტაციების სიკეთე.
როგორ ვმართოთ კონფლიქტები ოჯახში, როგორ ავარიდოთ მოზარდები აგრესიას - ამ საკითხებზე გააკეთეს აქცენტი ახალგაზრდებმა ხონში, ფოთსა და კოკში ჩატარებულ (ზუგდიდის მუნიციპალიტეტი) ვორკშოპებზე. ისინი თვლიან, რომ სკოლები ოჯახური ძალადობის შემთხვევაში ერიდებიან პასუხისმგებლობას. რადგან ხშირ შემთხვევაში არ იციან, რა აქტივობები უნდა ჩაატარონ ძალადობის პრევენციისათვის.
სამართლებრივად ვის ევალება მუშაობა ძალადობის პრევენციისთვის, ვინ არიან რეფერალური მექანიზმის სუბიექტები - ახალგაზრდებმა ინტერესით მოისმინეს ინფორმაცია ამ თემაზე. მათი მოსაზრებით, საზოგადოებამ უნდა გაიგოს, რომ პრობლემის დაფარვა და იგნორირება არ არის გამოსავალი, პირიქით, რაც შეიძლება მეტი უნდა ვილაპარაკოთ ძალადობის მასშტაბებზე, რომ ყველამ გააცნობიეროს მისი ნეგატიური შედეგები.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)