სეანსის ბოლოს ნანამ (პირობითი სახელი) მადლობა გადაუხადა ფსიქოლოგს. თვალცრემლიანმა უთხრა, რომ დამშვიდდა, ძველებურად არ შფოთავს, ოჯახშიც დალაგდა ურთიერთობები...
ის ერთ-ერთია იმ ქალებისგან, ვინც ჩვენს საკონსულტაციო-სარეაბილიტაციო სერვისს იღებს, თავის პრობლემებს აგვარებს და პოზიტიურად იცვლება...
ფსიქოლოგი და იურისტი სისტემატურ მუშაობას ატარებენ რეგიონებში. იანვარში მათ 6 ჯგუფური შეხვედრა ჩაატარეს სამტრედიის, ქობულეთის, ჩოხატაურის, ტყიბულის და ხურჩის (ზუგდიდის მუნიციპალიტეტი) ქალთა მხარდაჭერის ცენტრების ბენეფიციარებთან.
ფსიქოლოგმა და იურისტმა ინტენსიურად იმუშავეს ფონდი „სოხუმის“ სარეაბილიტაციო ცენტრის ბენეფიციარებთან, ონლაინ - კრიზისულ ოჯახებთან. 20-ზე მეტი ბენეფიციარი განაგრძობს ინდივიდუალურ ფსიქოთერაპიას.
აქტიური მუშაობის კიდევ ერთი შედეგი: უწყებათშორისმა კომისიამ ოჯახში ძალადობის მსხვერპლის სტატუსი მიანიჭა ერთ ქალს - ფონდი „სოხუმის“ მიერ შეკრებილი ინფორმაციისა და მომზადებული დოკუმენტების საფუძველზე.
ერთ ოჯახს სახლი გადაუთოვლეს, მეორეს შეშა მისცეს, ერთგან შიდა გზა გაწმინდეს - ეს ჩვენი მუშაობის შედეგებია.
სამობილიზაციო შეხვედრები ხელს უწყობს იმ პრობლემების გამოვლენას, რომლებიც სხვადასხვა თემში მცხოვრებ ქალებს აწუხებთ. ქალთა მხარდაჭერის ცენტრების მობილიზატორები აქტიურად რეაგირებენ გამოვლენილ პრობლემებზე. ადვოკატირების პროცესი ადგილობრივი სტრუქტურების ჩართულობით მიმდინარეობს, რაც გამოვლენილ ქეისებს დასრულებულ სახეს აძლევს.
საინფორმაციო შეხვედრები უკვე ჩატარდა წალენჯიხის, სენაკის და ქობულეთის ქალთა მხარდაჭერის ცენტრებში. მოგვარებულ პრობლემათა ჩამონათვალში მოხვდა სოციალური და ინფრასტრუქტურული პრობლემები, რომლებიც დროულად გადაიჭრა.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
დათოვლილ ქუთაისს უხდება წარმოდგენები. ფორუმ-თეატრი ცენტრალურ პარკებში მართავს ჩვენებას. ეს ახალი სცენებია, უკვე გამოცდილ მსახიობებთან ერთად აქტიურად მუშაობენ მოხალისეები. რეჟისორი მაგდა ჩიხლაძე ჩვეული რუდუნებით ატარებს რეპეტიციებს.
ფორუმ-თეატრი მიჩვეულია ხალხმრავლობას. ახლა მაყურებელი ცოტაა, მაგრამ მსახიობები მაინც სულითა და გულით ასრულებენ თავიანთ როლებს. ახალი სცენები ძალადობას და მიგრაციას ეხება. როგორც ყოველთვის - აქტუალურ თემებს.
ფორუმ-თეატრს იმედი აქვს, რომ მალე დაუბრუნდება ბევრი მაყურებელი და აქტიური დიალოგი გაიმართება აუდიტორიასთან.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
აქტიურად გაგრძელდა სატრენინგო კურსი კიდევ ხუთ მუნიციპალიტეტში. თერჯოლის, ჩოხატაურის, ზუგდიდის, წალენჯიხის და სენაკის ახალგაზრდების გაძლიერების ცენტრებში ტრენინგები ჩატარდა ერთსა და იმავე თემაზე: გენდერული თანასწორობა, ტრადიციები და სტერეოტიპები ძალადობის პრევენციისთვის. კონფლიქტის გადაჭრის გზები.
ყველა ტრენინგი თითქოს ერთმანეთს ჰგავს, მაგრამ განსხვავდება მონაწილეთა ჩართულობით. ახალგაზრდულ ჯგუფებზე აისახება ლიდერების აქტიურობა, ტრენინგების დასრულების შემდეგ იწყება ინიცირებული ღონისძიებები, რაც ჩვენი მუშაობის თვალსაჩინო შედეგია.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
საერთოდ არ იცოდნენ კერვა სოფიო გვილავამ და სოფიო გვასალიამ. ელემენტარულს აკეთებდნენ დარიკო ჯინჯოლავა, გურანდა ძაძუა და ჟანა არქანია. მაკა სარიას დედა კერავდა და ისიც ინდომებდა. სწავლის სურვილი ყველას ჰქონდა, მაგრამ სურვილად რჩებოდა... ეს ახალგაზრდა ქალები წყოუშში (წალენჯიხის მუნიციპალიტეტის ფახულანის თემი) ცხოვრობენ, არცერთი არ მუშაობს, ოჯახს, შვილებს უვლიან.
ექვსივე ფონდი „სოხუმის“ ქალთა მხარდაჭერის ცენტრის აქტივისტი იყო. ესწრებოდნენ საინფორმაციო და საკონსულტაციო შეხვედრებს. ფახულანის ქალთა მხარდაჭერის ცენტრი აქ, კონფლიქტის გამყოფ ხაზთან, წლების განმავლობაში იყო. მობილიზატორმა მარიკა მეგრელიძემ ბევრი ქალი შემოიკრიბა და არაერთი პრობლემის მოგვარება შეძლო. როცა ფონდმა „სოხუმმა“ მუნიციპალიტეტში საჭიროებების კვლევა ჩაატარა, გაირკვა, რომ აქ არ იყო სამკერვალო.
სანამ სხვა გზა გამოჩნდება, ფონდმა წყოუშში დღის სარეაბილიტაციო ცენტრი გახსნა. ცენტრს შენობის ნაწილი დაუთმო მაღაზიის მეპატრონემ. ქუთაისიდან ჩაიტანეს საკერავი მანქანები, ნაჭრები, ძაფები.
გაიარა ყველა ის ეტაპი, რაც ოჯახურ ძალადობას ახლავს. გაიარა ყველა იმ განცდით, რომელიც დასაწყისში პროტესტის გრძნობას აღძრავს, შემდეგ - დანაშაულს და საბოლოოდ ყოველდღიურობის ნაწილი ხდება.
დეტალებს არ ყვება. ამბობს, რომ ამბის მოყოლაც ამძიმებს და ტკივილს უახლებს. თუმცა ყველაფერი ახსოვს. უბრალოდ ხაზს უსვამს, რომ იმ პერიოდში მის ცხოვრებაში ძალიან დიდი დოზით იყო უიმედობა და სასოწარკვეთა, რადგან იცოდა, რომ ორი პატარა შვილით კიდევ უფრო გაუჭირდებოდა, ყველასთვის ზედმეტი ტვირთი იქნებოდა. ამ ტვირთმა განსაკუთრებით დაამძიმა. ვერავის დაეყრდნო...
ეს სალომეა (სახელი პირობითია) ქობულეთიდან. მისი ისტორია ძალიან ნაცნობია. თითქოს სადღაც წაგვიკითხავს, ან ვიღაცისგან მოგვისმენია. ეს ისტორია გზავნილია, კიდევ ერთი გზავნილი იმ ადამიანების მხრიდან, რომლებიც საჭირო დროს საჭირო ადამიანებისგან ითხოვენ მხარდაჭერას და ხშირად ვერ იღებენ...
სალომემ შეძლო ცვლილება - ცხოვრების ყველაზე მძიმე ისტორიის ფურცლები საბოლოოდ ჩაკეცა და ახალი ცხოვრება დაიწყო:
აქტიური სამუშაო პერიოდი აქვთ კოკის და დიდი ნეძის (ზუგდიდის მუნიიპალიტეტი) ქალთა საინიციატივო ჯგუფებს. ჯგუფის წევრები კვლევაში არიან ჩართულნი: ფოკუს-ჯგუფებსა და ჩაღრმავებულ ინტერვიუებს ატარებენ. კვლევის მიზანია იმ ბარიერების გამოვლენა, რომლებიც ხელს უშლის ქალთა ჩართულობას საზოგადოებრივ-პოლიტიკურ და ეკონომიკურ საქმიანობაში.
კოკის ახალგაზრდული საინიციატივო ჯგუფს კი სხვა დღის წესრიგი აქვს. მორიგ შეხვედრაზე ფონდი „სოხუმის“ იურისტი ახალგაზრდებს ესაუბრა თემაზე „ნაადრევი ქორწინება“. არასრულწლოვანთა ქორწინება საქართველოში კვლავაც პრობლემას წარმოადგენს. გარდა იმისა, რომ ნაადრევი ქორწინება ადამიანის უფლებების დარღვევაა, მას ფიზიკური და ფსიქიკური ჯანმრთელობის უარყოფითი შედეგები ახლავს.
შეხვედრის ბოლოს ჯგუფის წევრების უკუკავშირი იყო ასეთი:
- შეხვედრა იყო ცოდნის მომცემი, საინტერესო და დამაფიქრებელი.
- გავიგე ნაადრევი ქორწინების შემდგომ რისკებზე და დასჯის მეთოდებზე.
- აუცილებელია მსგავსი შეხვედრების ჩატარება მოზარდებთან.
პროექტი ხორციელდება USAID-ის მხარდაჭერით
შეხვედრების ფორმატით გათვალისწინებულია მონაწილეებისთვის ინფორმაციის მიწოდება ვებგვერდზე „ძალადობის მსხვერპლთა სერვისების ციფრული რესურცენტრი“: რა მიზნით შეიქმნა, რა მასალებია განთავსებული, როგორ დაეხმარება მოწყვლად ჯგუფებს. მონაწილეები ასევე ეცნობიან ინტერნეტსივრცის გამოყენებას.
ასეთი შეხვედრები სისტემატურად ტარდება ქალთა ჯგუფებთან. მორიგი ონლაინ საინფორმაციო შეხვედრები გაიმართა ქობულეთის, ბაღდათის, ზუგდიდისა და ტყიბულის მუნიციპალიტეტებში მცხოვრებ ქალებთან.
შეხვედრებში აქტიურად ჩაერთნენ ბენეფიციარები, რომლებმაც პროექტის ფარგლებში სხვადასხვა სერვისით ისარგებლეს. დიდი გამოხმაურება მოჰყვა ტექნიკური საშუალებებით ბენეფიციარების დახმარების აქციას. ითქვა, რომ მათთვის ეს არის დიდი იმედი, რომ მარტო არ არიან და მათზე ზრუნავენ. საუბარი ასევე შეეხო ორგანიზაციის სარეაბილიტაციო ცენტრს - ცენტრში ძალადობის მსხვერპლები ფსიქოლოგიურ რეაბილიტაციას გადიან, რაც მათთვის დიდი ფუფუნებაა.
პროექტი ხორციელდება გენდერული თანასწორობის ფონდის მხარდაჭერით (კანადა)
10 იანვრიდან განახლდა მუშაობა ახალგაზრდებთან. დაიწყო ტრენინგების ციკლი - ჩატარდა 5 შეხვედრა-ტრენინგი.
თვის პირველი ხუთეული: ვანის, ბაღდათის, სამტრედიის, ქობულეთის და ტყიბულის მუნიციპალიტეტებში მოქმედი ახალგაზრდების გაძლიერების ცენტრები.
ტრენინგის თემები: გენდერული თანასწორობა, ტრადიციები და სტერეოტიპები ძალადობის პრევენციისთვის. კონფლიქტის გადაჭრის გზები.
შეხვედრების მონაწილე მოსწავლეები აქტიურად ჩაერთნენ სამუშაო პროცესში, ონლაინ ფორმატის მიუხედავად. სამტრედიასა და ტყიბულში აქტიური მონაწილეობა მიიღეს პედაგოგებმაც. როგორც აღინიშნა, ეს მუშაობა ზრდის ლიდერულ უნარ-ჩვევებს ახალგაზრდებში და მეტის გაკეთების მოტივაციას აძლევს მათ. ცენტრების წევრებმა უკვე ინიცირებული ღონისძიებების ჩატარების გრაფიკი შეადგინეს - როგორ გამოიყენებენ მიღებულ ცოდნას. ისინი დამოუკიდებელი მუშაობის სხვადასხვა ფორმას არჩევენ (შეხვედრა თანატოლებთან, ვიდეორგოლის მომზადება, ესეს დაწერა და ა.შ.).
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
„ინფორმაცია ყველაზე ძლიერი ინსტრუმენტია ნებისმიერი პრობლემის მოსაგვარებლად, განსაკუთრებით მაშინ, თუ პრობლემა ოჯახში ძალადობას ეხება“; „ყველასთვის მნიშვნელოვანია ის ინფორმაციები, რომლებიც მოვისმინეთ. გავავრცელებთ ყველგან, რადგან ყველა ქალმა უნდა იცოდეს, რა მექანიზმები არსებობს ქალთა მხარდაჭერის კუთხით“, - ასეთი მოსაზრებები ჰქონდათ საინფორმაციო შეხვედრის მონაწილეებს ზუგდიდში, ვანსა და ბაღდათში გამართულ შეხვედრებზე.
მონაწილეთა თქმით, ინფორმირებულობა ხელს უწყობს ძალადობის შემთხვევების გამოვლენას ადრეულ სტადიაში და დროულ რეაგირებას. შეხვედრების შედეგად გამოიკვეთა კონკრეტული ქეისები და ძალადობის რისკის ქვეშ მყოფი ქალები გადამისამართდნენ ფსიქოლოგთან.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)