თვის განმავლობაში ჩატარდა იურისტის ჯგუფური და ინდივიდუალური შეხვედრები წყალტუბოს, სენაკის, ხონის, ფოთის და ხურჩა/კოკის (ზუგდიდის მუნიციპალიტეტი) ქალთა მხარდაჭერის ცენტრებში. შეხვედრების თემა იყო კანონი ქალთა მიმართ/ოჯახში ძალადობის შესახებ. საუბარი შეეხო მსხვერპლის დაცვის მექანიზმებს (დამცავი და შემაკავებელი ორდერები), უწყებათშორის საბჭოს, ბავშვთა უფლებებს და დაგროვებითი პენსიის საკითხს. შეხვედრების მონაწილეებმა მიიღეს პასუხები იმ კითხვებზე, რომლებიც აწუხებთ და აინტერესებთ.
ქალთა სოლიდარობა – ასეთი იყო ფსიქოლოგთან ჯგუფური შეხვედრების თემა ხონის, სენაკის, ფოთის, წყალტუბოს, ხურჩა/კოკის (ზუგდიდის მუნიციპალიტეტი) ქალთა მხარდაჭერის ცენტრებში. ესწრებოდა 26-დან 65 წლამდე 48 ქალი. განსაკუთრებული აქცენტი გაკეთდა რძალ-დედამთილის ურთიერთობაზე. ქალებმა მიიღეს რჩევები კონფლიქტური სიტუაციების თავიდან ასაცილებლად.
ამასთანავე გაგრძელდა ოჯახური წყვილებისა და კრიზისული ოჯახის წევრების ფსიქოთერაპიული კონსულტაციები. მსურველებმა გაიარეს ინდივიდუალური კონსულტაციები (მაგალითისთვის, სამ მოზარდთან ჩატარდა მუშაობა ტრავმატიზმის პრობლემაზე - მშობლების განქორწინების შემდეგ).
თერჯოლის ქალთა მხარდაჭერის ცენტრის მცირე პროექტის ფარგლებში მარტში ჩატარდა შეხვედრების ციკლი:
საინფორმაციო შეხვედრა მედიცინის მუშაკებთან თერჯოლაში თემაზე „ოჯახური კონფლიქტები - ბავშვი, მსხვერპლი, მოძალადე“.
საინფორმაციო შეხვედრა-დისკუსია პედიატრის ჩართულობით მცირეწლოვანი ბავშვების დედებთან თემაზე „მშობლის მიერ თანამედროვე ტექნოლოგიების გამოყენება, როგორც გასართობი სათამაშო და მისი მავნე შედეგები“.
დისკუსია ნახშირღელეში თემაზე „ძალადობა - საზოგადოების პასუხისმგებლობა, მოქალაქეობრივი ვალდებულება“.
შეხვედრების ფორმატმა და თემატიკამ მონაწილეებში დიდი ინტერესი გამოიწვია. ითქვა, რომ ეს თემები მეტი ინტენსივობით უნდა განიხილებოდეს საზოგადოების სხვადასხვა სპექტრის წარმომადგენელთა ჩართულობით. ეს წინ გადადგმული ნაბიჯი იქნება ძალადობის პრევენციის კუთხით.
სენაკში გრძელდება მუშაობა ქალთა მხარდაჭერის ცენტრის მცირე პროექტში „ჯანსაღი ახალგაზრდები - უკეთესი მომავლისათვის“. მარტში ჩატარდა საინფორმაციო შეხვედრა თეკლათის გამგებელთან და ვორკშოპი თეკლათის სკოლის უფროსკლასელებთან ალკოჰოლის მავნე ზეგავლენის თემაზე.
შეხვედრამ ახალგაზრდების აქტიური ჩართულობის ფონზე ჩაიარა. მათ დააფიქსირეს ჯანსაღი ცხოვრების პროპაგანდის მნიშვნელობა. ჩამოყალიბდა საინიციატივო ჯგუფი, რომელიც პროექტის ფარგლებში დაგეგმილ აქტივობებში მიიღებს მონაწილეობას.
ახალგაზრდებმა დაუნის სინდრომის საერთაშორისო დღესთან დაკავშირებით მცირედი აქციაც მოაწყვეს.
დასახული აქტივობების გაცნობის და ერთობლივი მუშაობის დაგეგმვის მიზნით ფოთის ქალთა მხარდაჭერის ცენტრის მცირე პროექტის ხელმძღვანელი შეხვდა ბაღების გაერთიანების ფსიქოლოგს, საქალაქო სამმართველოს უბნის ინსპექტორს, სოციალური სააგენტოს იურისტს და სოციალურ მუშაკს, თვითმმართველობის წარმომადგენლებს. მათი მხრიდან დაფიქსირდა საპროექტო აქტივობებში ჩართვის მზადყოფნა. აღინიშნა, რომ მსგავსი შეხვედრები მნიშვნელოვანია კოორდინირებული მუშაობისთვის და ხელს შეუწყობს ძალადობის პრევენციას.
„ოჯახში ძალადობის ტიპები, ნიშნები, რეფერირების გზები და მექანიზმები“ - ამ თემაზე ჩატარდა ტრენინგი ოზურგეთის მერის წარმომადგენლებთან მუნიციპალიტეტის სოფლებში (ნატანები, ბოხვაური, გურიანთა, მთისპირი, მელექედური, ოზურგეთი, ნაგომარი). ტრენინგს ასევე ესწრებოდნენ მერის თანაშემწეები და თემის აქტივისტები. მათ დააფიქსირეს, რომ აუცილებელია მუშაობა ძალადობის პრევენციის კუთხით და მზად არიან, თემში შექმნან ძალადობის ფაქტების გამოვლენასა და რეაგირებაზე პასუხისმგებელი ჯგუფები.
მუშაობა მიმდინარეობს ოზურგეთის ქალთა მხარდაჭერის ცენტრის მცირე პროექტის ფარგლებში.
ლანჩხუთის ქალთა მხარდაჭერის ცენტრმა მედიცინის მუშაკებთან დაიწყო მუშაობა. მცირე პროექტის ფარგლებში ჩატარდა ტრენინგი „სამედიცინო პერსონალის როლი ძალადობის პრევენციაში“. ტრენინგს ესწრებოდნენ სამედიცინო სფეროს, სოციალური სააგენტოს, მუნიციპალიტეტის ადმინისტრაციული ერთეულის წარმომადგენლები და საკრებულოს გენდერული თანასწორობის საბჭოს თავმჯდომარე. მონაწილეებმა ძალადობასთან დაკავშირებული აქტუალური საკითხები განიხილეს და აღნიშნეს, რომ აქტიური საინფორმაციო მუშაობა შესაძლებელს გახდის ძალადობაზე დროული რეაგირების სისტემის დანერგვას.
აქტიურ ეტაპზეა წყალტუბოს ქალთა მხარდაჭერის ცენტრის მცირე პროექტი „გენდერული ცნობიერება ახალგაზრდებში.“ მეორე საჯარო სკოლაში ჩატარდა ვორკშოპი ახალგაზრდებთან და საინფორმაციო შეხვედრა სკოლის დირექციასთან.
შეხვედრის თემა იყო - გენდერის არსი, გენდერული პოლიტიკის მნიშვნელობა. მუშობაში აქტიურად ჩაერთნენ წყალტუბოს გენდერული თანასწორობის საბჭოს მდივანი მზია კიკალიშვილი და გენდერულ საკითხებზე პასუხისმგებელი პირი ლელა ბერძენიშვილი.
მონაწილეთა დაინტერესება გამოიწვია მუნიციპალური გენდერული პოლიტიკის კუთხით მიმდინარე ცვლილებებმა. ბავშვებმა და პედაგოგებმა აღნიშნეს, რომ გენდერული თემატიკა დღითიდღე აქტუალური ხდება. ასეთი სახის შეხვედრები ხელს უწყობს მოსწავლეების, პედაგოგებისა და მშობლების ურთიერთობების გამყარებას, რაც საზოგადოებაში ჯანსაღი კლიმატის ჩამოყალიბების ერთ-ერთი ფაქტორია.
ქალთა მხარდაჭერის ცენტრების სამობილიზაციო შეხვედრების თემა მარტში ქალთა სოლიდარობის საერთაშორისო დღეს ეხებოდა - დაარსების ისტორიას, შრომის უფლებებს. შეხვედრების მონაწილეებმა ინფორმაცია მიიღეს იმაზე, თუ რატომ უკავშირდება რვა მარტი ქალებს. სულ ჩატარდა 27 შეხვედრა 9 მუნიციპალიტეტში. ისაუბრეს აგრეთვე მუნიციპალიტეტებში არსებულ სერვისებზე. აქტიურად იყო გამოყენებული ფსიქოლოგისა და იურისტის რესურსი. მობილიზატორებმა შეარჩიეს საკითხები სამომავლო ადვოკატირებისათვის.
მარტში სამ კრიზისულ წყვილთან გაიმართა ფსიქოლოგისა და კონფლიქტოლოგის შეხვედრა/კონსულტაცია. კონფლიქტების გამომწვევი მიზეზები სხვადასხვაა: სოციალური საკითხები, ფსიქოლოგიური დაძაბულობა, შეუთანხმებლობა.
წყვილები ცდილობენ შექმნილი სიტუაციის გაანალიზებას, მოსალოდნელი რისკების განსაზღვრას და ფიქრობენ გამოსავალზე. კონსულტაციის შემდეგ მხარეებმა ინდივიდუალურად მიიღეს რჩევები კრიზისის დასაძლევად.