ფორუმ-თეატრის პირველი ვიზიტი ყოველთვის განსაკუთრებულია. ასე იყო იანვრის ორივე შეხვედრის დროს - ხაჯალიას (ლანჩხუთის მუნიციპალიტეტი) და ანასეულის (ოზურგეთის მუნიციპალიტეტი) საჯარო სკოლებში.
წარმოდგენებმა (ოჯახური ძალადობის სცენა, ურთიერთობები მშობლებსა და შვილებს შორის) მოსწავლეებსა და მასწავლებლებში დიდი ვნებათაღელვა გამოიწვია. განსაკუთრებით ემოციური იყო სცენა - დედის დაბრუნება ათწლიანი ემიგრაციიდან და პრობლემა, შვილებმა რომ არ მიიღეს. განსაკუთრებით განიცადეს მათ, ვისი ახლობლებიც საზღვარგარეთ მუშაობენ.
შეხვედრებზე ყველაფერი იყო: გაოცება, ინტერესი, დისკუსია, აქტიური ჩართულობა, ტაში... ხაჯალიას სკოლის დირექტორმა სურვილი გამოხატა, წარმოდგენები სოფლის კლუბში ჩატარდეს. ეს ფორუმ-თეატრის აქტუალური მუშაობის ერთ-ერთი მნიშვნელოვანი შედეგია.
ფონდი „სოხუმის“ ფორუმ-თეატრის მუშაობით დაინტერესდა საინფორმაციო პორტალი „ქუთაისიპოსტი“. ჟურნალისტები ახალგაზრდა მსახიობებთან ერთად სოფელ ხაჯალიაში გაემგზავრნენ, წარმოდგენები გადაიღეს, ინტერვიუები ჩაწერეს...
ფორუმ-თეატრის წარმოდგენებს ესწრებოდნენ მოსწავლეები და პედაგოგები. გამოსვლები გაიმართა ხონსა და წყალტუბოში. განსაკუთრებით საინტერესო იყო სამი ახალი სცენა: ემიგრაციიდან დაბრუნებული დედა, რომელიც შვილებს არ უნდათ. მამა, რომელიც საყვარლის გულისთვის სახლს ჩადებს ბანკში. ოჯახი, რომლის ერთადერთი შვილი ნარკომანია. ამ სცენებმა და მათში განვითარებულმა კონფლიქტებმა ააღელვა მაყურებლები. მათ საკუთარი ისტორიებიც გაუზიარეს სხვებს და აქტიურად ჩაერთნენ დისკუსიაში.
ფონდი „სოხუმის“ ჩრდილების თეატრი ნოემბერში ხონის მუნიციპალიტეტს ესტუმრა და პატარები გაახარა.
თეატრის წარმოდგენა „თალგამი“ ჩატარდა ორ სოფლის - კუხის და ნახახულევის საბავშვო ბაღებში. პედაგოგებმა კმაყოფილება გამოხატეს, რადგანაც არ არიან განებივრებულები უფასო საბავშვო სპექტაკლებით.
ბავშვები კიდევ უფრო კმაყოფილები იყვნენ. კუხში 34 მაყურებელი იყო, დარბაზში კი სამარისებური სიჩუმე იდგა. პატარები ყურადღებით ადევნებდნენ თვალს - მსგავსი რამ იშვიათია, რადგან ბავშვების რაოდენობა ყოველთვის იწვევს ხმაურს.
ამ წარმოდგენებით ბავშვებმა გაიგეს, რომ ყველა თანასწორია და პრობლემა ერთად, მეგობრულად უნდა მოაგვარონ. სწორედ ეს არის სპექტაკლის მიზანი.
განმუხურსა (ზუგდიდის მუნიციპალიტეტი) და ოზურგეთში პირველად ჩატარდა ფორუმ-თეატრის წარმოდგენების ჩვენება, ამიტომ მაყურებლის პირველი ემოცია იყო გაკვირვება.
წარმოდგენებს ესწრებოდნენ სკოლების ხელმძღვანელები და პედაგოგები. ნაჩვენები იყო ოჯახური ძალადობის და დედა-შვილის ურთიერთობის სცენები.
მაყურებელმა კარგად მიიღო გამოხატვის ეს ფორმა, იყო აქტიური ჩართულობა სცენებში, გამოსავლის ძიება ძალადობის თავიდან ასაცილებლად. ორივეგან გაიმართა დისკუსიები და გაჩნდა სურვილი, კიდევ უმასპინძლონ ფონდი „სოხუმის“ ახალგაზრდა მსახიობებს.
სულ რამდენიმე თვეა, ფონდ „სოხუმის“ ჩრდილების თეატრის რეპერტუარში გაჩნდა სპექტაკლი „თალგამი“. „თალგამი“, ისევე როგორც წინა წარმოდგენა „პირიმზე“ - არის სიკეთეზე, მეგობრობაზე, თანასწორობაზე, თანადგომაზე. პატარა მაყურებელს ორივე წარმოდგენა ძალიან მოსწონს.
სექტემბერში ფონდის ოფისში ორჯერ გაიმართა „თალგამის“ ჩვენება. მოწვეულმა ბავშვებმა ძალიან იხალისეს - მოეწონათ უჩვეულო და ახალი გარემო, მუსიკა, კეთილი ფინალი.
წარმოდგენის დამთავრების შემდეგ მსახიობები ბავშვებს ესაუბრნენ ზღაპრის პერსონაჟებზე, მეგობრობაზე და იმაზე, რომ ერთად ყოფნით ყველა პრობლემის მოგვარება შეიძლება.
ფონდი „სოხუმის“ ფორუმ-თეატრმა ორი წარმოდგენა გამართა აგვისტოში. პირველ წარმოდგენას წყალტუბოს ცენტრალურ პარკში ადგილობრივი მოსახლეობა და დამსვენებლები დაესწრნენ. ნაჩვენები ხუთი სცენიდან ყველაზე შთამბეჭდავი აღმოჩნდა ოჯახური (ცოლ-ქმარი, დედა-შვილი) ძალადობის სცენები. საინტერესო იყო ჩართულობა მაყურებლებისა, რომელთაც შეძლეს კონფლიქტური სიტუაციების დარეგულირება.
ოზურგეთის ქალაქის ცენტრში ფორუმ-თეატრი პირველად გამოვიდა, ამიტომ გაჩნდა ბევრი შეკითხვა. გათამაშდა 6 სცენა. პირველმა სცენამ ცოტათი დააფრთხო მაყურებელი, მეორე სცენის შემდეგ კი აქტიური დისკუსიები დაიწყო. იყო აზრთა სხვადასხვაობა, თუმცა ყველა მიიჩნევს, რომ ნებისმიერი სახის ძალადობა დაუშვებელია.
ფორუმ-თეატრი და ჩრდილების თეატრი ფონდი „სოხუმის“ სავიზიტო ბარათს წარმოადგენს.
ახალგაზრდა მსახიობებს რეპერტუარში აქვთ ფორუმ-თეატრის ათობით წარმოდგენა კონფლიქტების და ძალადობის აქცენტით და ჩრდილების თეატრის ორი სპექტაკლი თანასწორობის თემაზე. პირველი სპექტაკლი „პირიმზე“ რამდენიმე წლის წინ შეიქმნა ქუთაისის გენდერული საკონსულტაციო საბჭოს ერთ-ერთი პროექტის ფარგლებში (რეჟისორი - ლევან გაბრიჭიძე). მისი პრეზენტაცია ქუთაისის თოჯინების თეატრში გაიმართა და მან წარმატებით მოიარა დასავლეთ საქართველოს სკოლები და საბავშვო ბაღები.
21 ივნისს კი ქუთაისში, ფონდი „სოხუმის“ ოფისში ჩატარდა ჩრდილების თეატრის „თალგამის“ საპრემიერო ჩვენება.
ფონდი „სოხუმის“ ფორუმ-თეატრის რეჟისორის მაგდა ჩიხლაძის და ფორუმ-თეატრის სამსახიობო ჯგუფის ორთვიანი აქტიური მუშაობა, ჩაწერები, მუსიკალური გაფორმებები, რეპეტიციები ქუთაისის ლადო მესხიშვილის სახელობის თეატრში დასრულდა პრემიერით. „თალგამი“, ისევე როგორც წინა წარმოდგენა „პირიმზე“ პატარა მაყურებელს უჩვენებს საერთო ძალისხმევას კეთილი საქმისთვის, თანადგომას, თანასწორობას, სიკეთის გამარჯვებას.
ჩრდილების თეატრმა ორი წარმოდგენა გამართა ხონში - საბავშვო ბაღში და დევნილთა კოლექტიურ ცენტრში.
ბავშვებს ძალიან მოეწონათ წარმოდგენა, სიმღერები, თოჯინები. პედაგოგებმა და მშობლებმა მადლობა გადაუხადეს ფონდი „სოხუმის“ ახალგაზრდა მსახიობებს. ბაღის აღმზრდელებმა გამოხატეს სურვილი, სექტემბერშიც აჩვენონ წარმოდგენა ბავშვების ახალ ჯგუფში.
მაისში ფორუმ-თეატრი ქუთაისელ და სენაკელ მაყურებლებს შეხვდა.
ქუთაისში, პარკში გამართულ ჩვენებას, ძირითადად, უფროსი თაობის წარმომადგენლები დაესწრნენ. ისინი აქტიურად ჩაერთნენ დისკუსიაში, ზოგი სცენა მოეწონათ, ზოგს არ დაეთანხმნენ... კადრში მოხვედრაც არ ისურვეს...
სენაკში კი ფორუმ-თეატრის წარმოდგენები სკოლაში ჩატარდა. მოსწავლეები და მასწავლებლები აღფრთოვანებულნი დარჩნენ, შვიდივე სცენაში ჩაერთნენ და ახალი შეხვედრების სურვილი გაუჩნდათ.
ჩრდილების თეატრის წარმოდგენა ჩატარდა ქუთაისის მე-2 საჯარო სკოლაში და მე-20 საბავშვო ბაღში.
ნაჩვენები იყო „პირიზმის თავგადასავალი“. ჩვენებამ ძალიან გაახალისა პატარები. მათ დაინახეს, რომ ყველა თანასწორი უნდა იყოს და სწორედ მაშინ იმარჯვებს სიკეთე...