„ძალადობის პრევენცია და ძალადობის მსხვერპლის დაცვა“ - ამ თემაზე ქალთა ფონდმა „სოხუმმა“ ჩოხატაურში სამუშაო შეხვედრა გამართა.
შეხვედრას ესწრებოდნენ მერის პირველი მოადგილე, ქალთა მიმართ ძალადობის ან/და ოჯახში ძალადობის აღკვეთის, ძალადობის მსხვერპლთა დაცვისა და დახმარების უწყებათაშორისი კომისიის წევრები, გენდერული თანასწორობის საბჭოს, სამართალდამცავი უწყების, სკოლამდელი საგანმანათლებლო-სააღმზრდელო დაწესებულების, საგანმანათლებლო რესურსცენტრისა და საზოგადოებრივი ჯანდაცვის ცენტრის წარმომადგენლები.
შეხვედრის მიზანს წარმოადგენდა მუნიციპალიტეტში ოჯახში ძალადობის კუთხით არსებული სიტუაციის ანალიზი და სოციალური თანამშრომლობის პერსპექტივების განსაზღვრა.
პროექტი ხორციელდება გენდერული თანასწორობის ფონდის მხარდაჭერით (კანადა)
საახალწლო არდადეგების შემდეგ ახალგაზრდულმა თეატრმა მუშაობა განაახლა.
იანვარში თოჯინების თეატრმაც გამართა წარმოდგენა და ფორუმ-თეატრმაც.
ქუთაისის მე-2 საჯარო სკოლაში თოჯინების თეატრის წარმოდგენა გაიმართა. დაწყებითი კლასების მოსწავლეებს მოეწონათ სპექტაკლი და დისკუსიაშიც ხალისიანად ჩაერთნენ. ისაუბრეს საყვარელ გმირებზე, მეგობრობაზე, ერთმანეთის დახმარებაზე.
ფორუმ-თეატრმა ქალაქის ცენტრში წარმოადგინა სცენა ემიგრაციაზე. რამდენიმე მაყურებელი გაღიზიანდა, რადგან მათი ოჯახის წევრებიც ემიგრაციაში არიან, თუმცა აღნიშნეს, რომ ეს აქტუალური პრობლემაა და ახალგაზრდებს სწორი ხედვა აქვთ...
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
წალენჯიხის მუნიციპალიტეტის გენდერული თანასწორობის საბჭოს დაკვეთით ქალთა ფონდმა „სოხუმმა“ ჩაატარა ქალთა გენდერული საჭიროებების კვლევა წალენჯიხის მუნიციპალიტეტში და გამოსცა კვლევის ანგარიში. კვლევა მიზნად ისახავს მტკიცებულებებზე დაფუძნებული ინფორმაციის შეგროვებას მუნიციპალიტეტში მცხოვრებ ქალთა სხვადასხვა ჯგუფის საჭიროებებზე. მოპოვებული ინფორმაცია საფუძვლად დაედება მუნიციპალიტეტის სოციალური პოლიტიკის უფრო ეფექტიანი განხორციელების ღონისძიებებს, რომლებშიც გათვალისწინებული იქნება პირდაპირი სამიზნე ჯგუფების საჭიროებები, ხედვები და პერსპექტივები. კვლევის დასკვნებზე დაყრდნობით გაკეთდა რეკომენდაციები.
ქალთა ფონდი „სოხუმი“ ქუთაისის მუნიციპალიტეტში პროექტის „იძულებით გადაადგილებული ქალები და გოგონები - საჭიროებაზე ორიენტირებული ადგილობრივი პოლიტიკის შემუშავების აქტორები ქუთაისში“ განხორციელებას იწყებს.
პირველი საინფორმაციო შეხვედრა - ახალი პროექტის პრეზენტაცია ონლაინ გაიმართა. მასში მონაწილეობდნენ USAID-ის ადგილობრივი თვითმმართველობის პროგრამის, ქუთაისის ადგილობრივი თვითმმართველობის და სამოქალაქო სექტორის წარმომადგენლები, პარტნიორები და ბენეფიციარები.
ქუთაისის ადგილობრივი თვითმმართველობის წარმომადგენლებმა პროექტის ფარგლებში აქტიური თანამშრომლობის მზადყოფნა გამოხატეს.
პროექტი ხორციელდება USAID-ის მხარდაჭერით
2023 წლის საანგარიშო შეხვედრა ქალთა ფონდი „სოხუმის“ დამფუძნებელმა ალლა გამახარიამ იმ წლების და წარსულის გახსენებით დაიწყო, რომელმაც 26 წლის მანძილზე, ჩვენი მოღვაწეობის წარმატება განაპირობა
დღეს ქალთა ფონდი ,,სოხუმი" ერთ-ერთი ავტორიტეტული ორგანიზაციაა არასამთავრობო სექტორში. ის მუშაობს 10 მუნიციპალიტეტში და აქვს წარმომადგენლობა თბილისში.
შემაჯამებელ შეხვედრაზე წლის მანძილზე სხვადასხვა მიმართულებით გაწეული საქმიანობის ანგარიში წარმოადგინეს: ეკატერინე გამახარიამ, ლელა ჯალაღონიამ, ნინო ჭაბუკიანმა, ხათუნა გოგუამ, თეა თორინავამ, ემა კამკიამ, თეა გოლეთიანმა, მერი გელაშვილმა, გურანდა გვანცელაძემ, ლალი გახარიამ და თამარ კუხალაშვილმა.
ამ გამოსვლებმა კიდევ ერთხელ დაგვარწმუნა, როგორი ნაყოფიერი და შედეგიანია ჩვენი აქტიური მუშაობა ქალებთან, ახალგაზრდებთან, სხვადასხვა უწყებასთან...
სასწავლო პროექტები ქალთა ფონდი „სოხუმის“ განსაკუთრებული ხელწერაა. ქუთაისის ყოფილი მუსიკალური სკოლა-ინტერნატის შენობაში მცხოვრები დევნილი ქალები ახალ უნარებს დაეუფლნენ.
მათ მიიღეს კომპიუტერული უნარების (Windows, Ms. Word, Ms. Excel, Ms. PowerPoint, Internet Explorer, Skype, E-mail) საბაზისო ცოდნა და კურსის ბოლოს სერთიფიკატები გადაეცათ. კომპიუტერული კურსი ხელს შეუწყობს ბენეფიციარებს კომუნიკაციაში, დასაქმებასა და თვითრეალიზებაში.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
დღის სარეაბილიტაციო ცენტრის ქუთაისის ჯგუფისთვის ფონდი „სოხუმის“ ოფისში გაიმართა ორდღიანი ტრენინგი ბიზნესის და მეწარმეობის, ბიზნეს იდეის და ბიზნესის დაგეგმვის შესახებ. მონაწილეებმა მოისმინეს კვალიფიციური რჩევები პროდუქციის/სერვისის მახასიათებლებსა და ფასწარმოებაზე, რაც აუცილებელი ინფორმაციაა საკუთარი ბიზნესის განვითარებისათვის.
საინტერესოა ტრენინგის მონაწილეთა უკუკავშირი:
„მივიღე ცოდნა ბიზნეს გეგმის შედგენაში, რომ მერე დამოუკიდებლად შევძლო წინსვლა.“
„შემაქეს და განცდა მაქვს, რომ ჩემი იდეა გაიმარჯვებს, რადგან ახალია საზოგადოებისთვის.“
„ვისწავლე, როგორ განვსაზღვრო სწორად ბიუჯეტი. როგორი რეკლამა გავაკეთო გაყიდვებში წარმატების მისაღწევად.“
ტრენინგი არის კარგი მხარდაჭერა საკუთარი ბიზნესის დაწყებაში და დაეხმარება მონაწილეებს, უკეთ მოემზადონ ქალთა ფონდი „სოხუმის“ საგრანტო კონკურსისთვის.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
წარმოგიდგენთ ქალთა ფონდი „სოხუმის“ ახალი მონიტორინგის ანგარიშს: „ქალთა მიმართ ძალადობის რისკების კვლევა“, რომლის მიზანია ორგანიზაციის 10 სამიზნე მუნიციპალიტეტში ოჯახში და ქალთა მიმართ ძალადობის რისკების განსაზღვრა და შეფასება, შემთხვევებზე დროული რეაგირებისა და რელევანტური ადვოკატირებისთვის.
კვლევის მონაცემებით ნათლად გამოიკვეთა ქალების ცხოვრებაში პირად უსაფრთხოებასთან დაკავშირებული გამოწვევები, რაც მეტწილად განპირობებულია უმუშევრობისა და სიღარიბის მაღალი დონით, ოჯახში ძალადობის ფაქტებით. სამწუხაროდ, კვლავ არასახარბიელოა ქალთა ინფორმირება და ხელმისაწვდომობა ძალადობის მსხვერპლთა მომსახურებებზე. კვლევის თანახმად, ქალებმა საკუთარი უსაფრთხოების განცდა საშუალოდ შეაფასეს და ხაზი გაუსვეს სიცოცხლისთვის, ჯანმრთელობის, საკუთრებისა და სიტყვის თავისუფლებისთვის საფრთხის შემქმნელ ქმედებებს მათ ცხოვრებაში.
კვლევის მიგნებების საფუძველზე შემუშავებული რეკომენდაციები მოიცავს: ქალთა ეკონომიკური გაძლიერების პროგრამებს, ცნობიერების ამაღლების კამპანიებს, მუნიციპალიტეტების როლის გაზრდას, რეფერალური მექანიზმის სუბიექტებს შორის თანამშრომლობასა და კოორდინაციას, განხორციელებული ღონისძიებების მონიტორინგისა და შეფასების ქმედითი სისტემის დანერგვას, რელევანტური სპეციალისტების უწყვეტ გადამზადებას.
ხონის ახალგაზრდული კლუბის დეკემბრის თვის ტრადიციულ შეხვედრაზე წევრებმა ძალადობის წინააღმდეგ 16 დღიანი კამპანიის ფარგლებში ჩატარებული აქტივობები განიხილეს და სამომავლოდ განსახორციელებელი ღონისძიებები დაგეგმეს. ხონის ქალთა საინიციატივო პირველი ჯგუფის წევრებს სსიპ სახელმწიფო ზრუნვისა და ტრეფიკინგის მსხვერპლთა დაზარალებულთა დახმარების სააგენტოს ქუთაისის ძალადობის მსხვერპლთა მომსახურების დაწესებულების ხელმძღვანელი შეხვდა. შეხვედრას ქალბატონებთან ერთად მერიისა და საკრებულოს წარმომადგენლები და გენდერული საბჭოს წევრები ესწრებოდნენ. ნინო ხონელიძემ აუდიტორიას ძალადობის მსხვერპლთა თავშესაფრებისა და კრიზისული ცენტრების არსებობის, მათი ფუნქციონირების, დაყოვნების წესებისა და ზოგადად, ძალადობის მსხვერპლთა პრობლემების შესახებ ინფორმაცია მიაწოდა. რაც შეეხება ხონის ქალთა საინიციატივო მეორე ჯგუფს, მათ ძალადობის წინააღმდეგ 16 დღიანი კამპანიის ფარგლებში ჩატარებული აქტივობები განიხილეს და განსახორციელებელი ღონისძიებები დაგეგმეს.
ვორკშოპები სხვადასხვა სამიზნე ჯგუფთან, ძალადობის თემის განხილვა და დისკუსია - ამ ტიპის აქტივობებით წყალტუბოს ქალთა საინიციატივო ჯგუფი ქალთა მიმართ ძალადობის 16 დღიან კამპანიაში ჩაერთო.
კამპანიას მრავალფეროვანი ღონისძებით შეუერთდნენ ახალგაზრდული საინიციატივო ჯგუფის წევრებიც. მათ პრიორიტეტული საკითხები წამოსწიეს- ქალთა უფლებები, ნააადრევი ქორწინება, გენდერული ძალადობა, შშმ პირთა უფლებები, მოაწყვეს ნახატების გამოფენაც .
ახალგაზრდების მიერ მომზადებულ პრეზენტაციებსა და დისკუსიებში ქალთა მიმართ ძალადობის წინააღმდეგპროტესტი გამოიკვეთა .