სენაკში, დევნილთა დასახლებაში გაიმართა ტრენინგი თემაზე „ქალთა ლიდერობა, პრეზენტაცია, საჯარო გამოსვლა.“
ტრენინგს ესწრებოდნენ ლიდერი, აქტივისტი ქალები 15 სხვადასხვა კოლექტიური თემიდან. მონაწილეებს მიეწოდათ ინფორმაცია ლიდერობის მახასიათებლებზე და ლიდერისთვის საჭირო მნიშვნელოვან უნარებზე.
კიდევ უფრო საინტერესო იყო მეორე ნაწილი - თვითპრეზენტაციის და საჯარო გამოსვლების შესახებ.
მონაწილეები საკუთარი ისტორიებით, პრაქტიკული მაგალითებით აქტიურად ჩაერთნენ თემის განხილვაში. მათი შეფასებით, ტრენინგი სასარგებლო იყო და მიღებული ცოდნა მათ პრაქტიკულ საქმიანობაში ჰპოვებს ასახვას.
მუშაობა მიმდინარეობს ცენტრ „აფხაზეთთან“ პარტნიორობით, პროექტის „კონფლიქტების ტრანსფორმაციის მხარდაჭერა სამხრეთ კავკასიაში და მოლდოვაში“ ფარგლებში.
„ლიდერობა, პრეზენტაცია, საჯარო გამოსვლები“ - ამ თემას მიეძღვნა წყალტუბოს ინოვაციების ცენტრში ჩატარებული ტრენინგი.
ტრენინგში მონაწილეობდნენ დევნილთა თემში მცხოვრები ამხანაგობების წარმომადგენელი ლიდერი ქალები. თეორიულ მასალას ამყარებდა პრაქტიკული სავარჯიშოები, თემატური ვიდეორგოლები, სავარჯიშოები.
მონაწილეებმა აღნიშნეს, რომ ასეთი ტიპის ტრენინგები მნიშვნელოვანია, რადგან ანვითარებს მათ უნარებს და კომპეტენტურობას.
ტრენინგზე დამსწრეებს ჰქონდათ შესაძლებლობა, მოესმინათ ცენტრი „აფხაზეთის" წარმომადგენლებისთვის და მიეღოთ საჭირო ინფორმაცია იმ სერვისებზე, რომელთაც ისინი სთავაზობენ დევნილებს.
მუშაობა მიმდინარეობს ცენტრ „აფხაზეთთან“ პარტნიორობით, პროექტის „კონფლიქტების ტრანსფორმაციის მხარდაჭერა სამხრეთ კავკასიაში და მოლდოვაში“ ფარგლებში.
საქველმოქმედო-პუმანიტარულ ცენტრ „აფხაზეთთან“ პარტნიორობით ქალთა ფონდი „სოხუმი“ ახორციელებს პროექტს, რომელიც მიზნად ისახავს დევნილთა თემებში ლიდერი აქტიური ქალების გამოკვეთას და მათ მომზადებას სათანადო უნარებით.
პროექტის ფარგლებში დასავლეთ საქართველოს ხუთ მუნიციპალიტეტში: ქუთაისში, წყალტუბოში, ხონში, სენაკსა და ზუგდიდში ჩატარდა საინფორმაციო შეხვედრები, რის შედეგადაც თითოეულ მუნიციპალიტეტში შეირჩა 15-15 ლიდერი ქალი, რომელთაც ჩაუტარდებათ ტრენინგები ქალთა ლიდერობის და ადვოკატირების საკითხებზე.
წალენჯიხის მუნიციპალიტეტის გენდერული თანასწორობის საბჭოსთან თანამშრომლობით ქალთა ფონდმა „სოხუმმა“ ჩაატარა საინფორმაციო შეხვედრების ციკლი ქალებთან. შეხვედრები გაიმართა ქალაქ ჯვარში და სოფლებში: ნაკიფუ, ლია, ფახულანი, საჩინო, ჯგალი.
მონაწილეებს მიეწოდათ ინფორმაცია მსოფლიოში მიმდინარე კამპანიაზე „16 აქტიური დღე ქალთა მიმართ ძალადობის წინააღმდეგ“, დარიგდა საგანგებოდ მომზადებული საინფორმაციო ფურცლები. ნარინჯისფერი ბაფთებით შეხვედრების მონაწილეებმა კამპანიის მხარდაჭერა გამოხატეს.
უკრაინელების თქმით, ჩვენ ვრჩებით ერთადერთ ორგანიზაციად, რომელიც მათ მუდმივად ეხმარება ბევრ საკითხში.
ჩვენს მონაცემთა ბაზაში 387 ადამიანია, დეკემბერში 17 ახალი დაგვემატა. ვაუჩერებით დახმარება გაეწია 39 ოჯახს. ასევე იყო სხვა სახის მხარდაჭერა: 4 ოჯახს გადავუხადეთ კომუნალური გადასახადები, 6 ოჯახს - ბინის ქირა, ხოლო ერთ ადამიანს - ტელეფონის ხარჯები.
11 უკრაინელი ქალი მონაწილეობდა ქალთა ფონდი „სოხუმის“ ღონისძიებაში, რომელიც მიეძღვნა კამპანიის „16 აქტიური დღე ქალთა მიმართ ძალადობის წინააღმდეგ“ დასრულებას. სამმა მათგანმა მადლობა გადაუხადა და მაღალი შეფასება მისცა ფონდის მუშაობას, ფსიქოლოგისა და იურისტის კონსულტაციებს, რომლებიც სხვადასხვა ეტაპზე უწევდნენ და აგრძელებენ მათ დახმარებას. ამ შეხვედრაზე ქალებმა ერთმანეთი გაიცნეს და რეგულარული კომუნიკაცია გადაწყვიტეს. იულია რეზვანმა განსაკუთრებული მადლობა გადაიხადა იმისთვის, რომ ამ შეხვედრისთვის ეკლერები შეუკვეთეს (ის ნამცხვრებს აცხობს). ეს მისთვის დიდი დახმარებაა და მოხარულია, რომ „ამ რთულ პერიოდში ჩვენ ყველანაირად მხარს ვუჭერთ უკრაინელ ქალებს“.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
კარზეა მომდგარი ახალი წელი და ქალთა ფონდი „სოხუმის“ სარეაბილიტაციო ცენტრში მასპინძლებმა და სტუმრებმა ლამაზი საახალწლო გარემო შექმნეს.
დეკემბერში აქ იმყოფებოდა ძალადობის მსხვერპლთა კიდევ ერთი ჯგუფი - ორი ქალი ბავშვებთან ერთად, სულ 6 ადამიანი. ორი კვირის განმავლობაში მათ გაიარეს კომპლექსური მუშაობა ფსიქოლოგთან, იურისტთან და სოციალურ მუშაკთან. ბავშვები საინტერესოდ და კრეატიულად ატარებდნენ დროს პედაგოგთან ერთად.
2023 წელს შვილებიანად 30-ზე მეტმა ქალმა მიიღო ჩვენი მხარდაჭერა.
ფსიქოლოგმა მანანა გოცირიძემ ერთ-ერთი ქალის ისტორია გაგვიზიარა. ნანი (პირობითი სახელი) 45 წლისაა. ის ჩვენი ერთ-ერთი სამიზნე მუნიციპალიტეტიდან ჩამოიყვანეს ორ შვილთან ერთად.
ნანი რამდენჯერმე წავიდა სახლიდან და მოლაპარაკებების და ხვეწნა-მუდარის შემდეგ ისევ დაბრუნდა. სამი წლის წინ პოლიციაც კი გამოიძახა, მაგრამ შემდეგ განცხადება გამოითხოვა.
„ჩემზე ახლაც ამბობენ, ეს ის ქალია, ქმრის ჩასმა რომ უნდოდაო ციხეში. დედაჩემმა ყველაფერი გააკეთა, რომ ქმართან დავრჩენილიყავი - არ არის კარგი, განქორწინებულს რომ დაგიძახებენ, მოითმინე, დაგეხმარებით, სად დაბრუნდები, შენი რძალია სახლში და შენი ადგილი აქ არ არის, უკვე სტუმარი ხარო. გათხოვების შემდეგ დავიკარგე და დღემდე ვერ ვპოულობ ჩემს თავს. მხოლოდ ბავშვები მაძლევენ სტიმულს, მაგრამ უკვე არ მინდა, ამ გარემოში მყავდეს ბავშვები. მანამდე კარების სრულად გამოხურვა ვერ მოვახერხე. იმედი მაქვს, რომ ამჯერად შევძლებ.“
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
16-დღიანი გლობალური კამპანიის ფარგლებში დაიწყო და დეკემბრის ბოლომდე გრძელდება ახალგაზრდების აქტივობები.
10 მუნიციპალიტეტში დღემდე 1000-მდე ახალგაზრდამ მიიღო მონაწილეობა თემატურ დისკუსიებში, ტრენინგებში, გამოფენებში, ქუჩის აქციებსა და პერფორმანსებში, რომლებიც ძალადობის წინააღმდეგ ბრძოლას და პრევენციას ეხებოდა.
„უმთავრესი, რაც წელს გამოიკვეთა, არის ადგილობრივი თვითმმართველობების, განათლების რესურსცენტრების, ახალგაზრდული დეპარტამენტების, სკოლის დირექციების, პედაგოგების და მშობლების განსაკუთრებული პარტნიორობა ჩვენს კამპანიაში. ჩვენმა კონსტრუქციულმა და შედეგიანმა ნაბიჯებმა განაპირობა მთავარი - ნდობა: რომ ყველაფერი, რასაც ვაკეთებთ, ახალგაზრდების სწორ განათლებას ემსახურება,“ - აღნიშნა ახალგაზრდებთან მუშაობის ასისტენტმა ნინო ჭაბუკიანმა.
კამპანიაში ახალგაზრდების მნიშვნელოვან წვლილზე საუბრობენ ტრენერები, რომლებიც 10 მუნიციპალიტეტის ახალგაზრდობის გაძლიერების ცენტრებში ატარებენ ტრენინგებს:
სატრენინგო კურსი აქტიურად გრძელდება ახალგაზრდობის გაძლიერების ცენტრებში. ახალგაზრდები ინტერესით ეცნობიან ახალ თემებს, ეჩვევიან ინდივიდუალურ თუ ჯგუფურ მუშაობას, სწავლობენ დისკუსიების კულტურას.
დეკემბრის ტრენინგები დაემთხვა საინფორმაციო კამპანიას „16 აქტიური დღე ქალთა მიმართ ძალადობის წინააღმდეგ“. ამიტომ გადაწყდა, რომ ათივე ცენტრი (სამტრედია, თერჯოლა, ვანი, ბაღდათი, სენაკი, ზუგდიდი, წალენჯიხა, ხობი, ქობულეთი, ჩოხატაური) ჩართულიყო კამპანიაში.
ახალგაზრდებმა ნოემბრიდან დაიწყეს მზადება და ყველა დაგეგმილი ინიცირებული აქტივობა დროულად ჩაატარეს: კრეატიული ღონისძიებები, ინტერვიუები, გამოფენები, აქციები... ყველაფრის ავტორები და შემსრულებლები თვითონ იყვნენ. ორგანიზებაში მაქსიმალურად ჩაერთნენ პედაგოგები და სკოლის ადმინისტრაციის წარმომადგენლები.
ახალგაზრდობის გაძლიერების ცენტრების ახალგაზრდებმა დიდი გამოცდილება მიიღეს წლევანდელ კამპანიაში აქტიური ჩართულობით.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
საშა შვიდი წლისაა, კირილი - რვის, არტიომი - 15-ის, დედით უკრაინელი და მამით ქართველი ლევანი კი - ათის.
ეს ბავშვები დედებთან ერთად ხშირად მოდიან ფსიქოლოგ მანანა გოცირიძესთან. იმიტომ რომ დახმარება სჭირდებათ - ომმა შეცვალა მათი ცხოვრების სტილი, ხასიათი...
მარტოობის შიში, ადაპტაციის სირთულე, ჰიპერაქტიურობა, ჩაკეტილობა - ამ პრობლემებზე მუშაობს ფსიქოლოგი უკრაინიდან ჩამოსულ ბავშვებთან.
ბავშვების პარალელურად, მიმდინარეობს კონსულტაციები ზრდასრულებთან ნეგატიური ემოციების „ვენტილაციაზე.“
დეკემბერში ფსიქოლოგი 14 უკრაინელ ლტოლვილს შეხვდა. მათთვის განსაკუთრებულად ძვირფასი და საჭიროა ეს შეხვედრები, ფსიქოლოგის უფასო კონსულტაციები, სასარგებლო რჩევები და დახმარება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ფონდი „სოხუმის“ მიერ დასავლეთ საქართველოში მოქმედი ქალთა სამოქალაქო სექტორის წარმომადგენლებისთვის პრაქტიკული ტრენინგი ჩატარდა. ტრენინგი ეძღვნებოდა თემას: „გენდერული ნიშნით ძალადობის პრევენცია და მასზე რეაგირება საომარ და ომის შემდგომ გარემოში.“ ტრენინგს ფონდი „სოხუმის“ თბილისის ოფისის ხელმძღვანელი - ეკატერინე გამახარია უძღვებოდა.
ტრენინგზე მონაწილეები გაეცნენ ომისა და კონფლიქტების დროს გენდერული ძალადობის ტიპიურ ფორმებს და იმსჯელეს ქალებსა და გოგონებზე და სხვა მოწყვლად ჯგუფებზე, შეიარაღებული/ძალადობრივი კონფლიქტების პირდაპირ და არაპირდაპირ ზეგავლენაზე. ტრენინგის მსვლელობისას მონაწილეები აქტიურად უზიარებდნენ ერთმანეთს ომის შემდგომი პერიოდის პირად გამოცდილებას და მსჯელობდნენ იმ სტრატეგიებზე, რომლებიც მნიშვნელოვანია ქალების ძალადობისგან ეფექტიანი დაცვისთვის.
ტრენინგი გაიმართა WAVE ქსელში გაერთიანებული ქალთა ორგანიზაციების: სექსუალური ძალადობის მსხვერპლთა კრიზისული ცენტრი“ (ერევანი, სომხეთი), ქალთა ფონდი „სოხუმი“ (ქუთაისი და თბილისი, საქართველო); გაერთიანებულ ქალთა ფონდი „ბანია ლუკა“ (ბანია ლუკა, ბოსნია და ჰერცეგოვინა) შემუშავებული ტრენინგ მოდულის გამოყენებით, რომელიც დაეყრდნო 2022 წელს გამოცემულ გზამკვლევს „გენდერული ნიშნით ძალადობის პრევენცია და მასზე რეაგირება საომარ და ომის შემდგომ გარემოში: ქალთა არასამთავრობო ორგანიზაციების გამოცდილება და რეკომენდაციები“.
გზამკვლევი ხელმისაწვდომია შემდეგ ბმულზე - https://wave-network.org/wp-content/uploads/Toolkit-Georgian.pdf?fbclid=IwAR3BARq16d_osbFVok5ogeTVDevjYSeVIkdY2zTYzR6zg0sJWSSH6wO9sa8