ივნისში ახალგაზრდების ჯგუფთან ვორკშოპები გაიმართა თემაზე „ბულინგი - ძალადობა მოზარდებში“. ბულინგის მნიშვნელობა ბევრისთვის ახალი აღმოჩნდა, თუმცა განმარტების მიღების შემდეგ, შეხვედრების მონაწილეებმა სენაკში, ქუთაისსა და ხონში გაიხსენეს - რომ ხშირად დაცინვის საგანი ხდება თმის ვარცხნილობა, ჩაცმულობა, წითური ფერი, სათვალე...  

ვორკშოპები მხოლოდ კონკრეტული მაგალითების გარჩევით არ დამთავრებულა, ახალგაზრდებმა იმსჯელეს მიზეზებზე, რომლებიც ხელს უწყობს მოზარდებში აგრესიის ჩამოყალიბებას. პარალელი გაავლეს ოჯახურ  კონფლიქტებთან, გამოითქვა მოსაზრება, რომ ხშირად რთული ოჯახებიდან გამოსული ბავშვებისათვის არის დამახასიათებელი სხვისი დაცინვა, მასხრად აგდება. ან პირიქით - ასეთი ბავშვები თვითონვე ხდებიან  ძალადობის მსხვერპლნი.

საუბარს გამოსავლის გზების ძიება მოჰყვა: ახალგაზრდების ინფორმირება; მეტი კომუნიკაცია მშობლებთან, პედაგოგებთან, ფსიქოლოგის საუბრები.

 

პროექტი ხორციელდება  ორგანიზაცია Brot für die Welt – Evangelischer

Entwicklunsdienst მხარდაჭერით (გერმანია)

ქუთაისში, ხონსა და წყალტუბოშ გაიმართა ვორკშოპები ქალებთან  აქტუალურ საკითხებზე - რა კავშირშია გენდერული თანასწორობა ქალთა მიმართ ძალადობასთან; იწვევს თუ არა ოჯახში ფუნქციათა არათანაბარი განაწილება კონფლიქტს; რა სტერეოტიპები ამყარებს ჩვენს საზოგადოებაში უთანასწორობის  მოდელს. 

მონაწილეები მიიჩნევენ, რომ ტრადიციული ქართული ოჯახი, თავისი დაუწერელი კანონებით, ქალის დისკრიმინაციას ეწევა. ქალების უმრავლესობა ამას მორჩილად ეგუება, ხოლო ის, ვინც ცდილობს სტერეოტიპების დამსხვრევას, ხშირად  ძალადობის მსხვერპლი ხდება.  

ქალებთან გამართული დისკუსიების დროს გამოიკვეთა მოსაზრებები, რამდენად არის შესაძლებელი გენდერული თანასწორობის შექმნა ოჯახებში. საერთო მოსაზრებით, თანასწორობის არსი სწორად უნდა ესმოდეს საზოგადოებას, ამისთვის კი აუცილებელია ამ თემებზე ხშირად გაიმართოს დისკუსიები.  

 

პროექტი ხორციელდება  ორგანიზაცია Brot für die Welt – Evangelischer

Entwicklunsdienst მხარდაჭერით (გერმანია)

გენდერული თანასწორობის თემა ახალგაზრდებმა განსაკუთრებული ინტერესით განიხილეს წყალტუბოში, სენაკსა და ხონში. აზრთა სხვადასხვაობა გამოიკვეთა შემდეგ საკითხში: როგორ უნდა განაწილდეს როლები  ოჯახში თანაბრად. ახალგაზრდების ერთი ნაწილი მიიჩნევს, რომ ქართველი ქალი, ტრადიციულად, ქმრის მორჩილია, მამაკაცი კი მეპატრონეა. როცა ეს „ბალანსი“ ირღვევა, იწყება წინააღმდეგობა.

ახალგაზრდებმა პრობლემის მოგვარების მექანიზმებზეც ისაუბრეს. მათი აზრით: იქ, სადაც თანასწორობა დარღვეულია, მსხვერპლიც არის და მოძალადეც, ამიტომ ოჯახური კონფლიქტების მოგვარების გასაღებს გენდერული თანასწორობის დამკვიდრებაში ხედავენ.

დისკუსიის მონაწილეები აღნიშნავდნენ, რომ სტერეოტიპების მსხვრევა ერთ დღეში არ ხდება  და ამისთვის ერთჯერადი ღონისძიებებიც არ არის საკმარისი. ყველამ უნდა გაითავისოს, რომ გენდერული თანასწორობის დამკვიდრება შეამცირებს ოჯახური ძალადობის რისკს და ამ პროცესში მთელი საზოგადოება აქტიურად უნდა იყოს ჩართული.

 

 

პროექტი ხორციელდება  ორგანიზაცია Brot für die Welt – Evangelischer

Entwicklunsdienst მხარდაჭერით (გერმანია)

სენაკში, ხონსა და კოკში (ზუგდიდის მუნიციპალიტეტი) სხვადასხვა ასაკის ქალების მონაწილეობით გაიმართა ვორკშოპები კონფლიქტოლოგიაში. მათ მიიღეს ინფორმაცია ეფექტურ კომუნიკაციაზე, ვერბალურ და არავერბალურ მხარეებზე. გაიმართა დისკუსია.

განსაკუთრებით საინტერესო გამოდგა სოფელ კოკში ჩატარებული ვორკშოპი.  მონაწილეებმა  საკუთარი ცხოვრებისეული მაგალითები გააანალიზეს  და ისაუბრეს იმ ძირითად ფაქტორებზე, რომლებიც კომუნიკაციის დამყარებას უშლის ხელს, ან პირიქით - ეხმარება.

ვორკშოპის მონაწილე ქალების აზრით, დისკუსიები ამ საკითხზე უნდა გაგრძელდეს, რადგან კომუნიკაციის როლი კონფლიქტების მართვაში მნიშვნელოვანია. რაც უფრო მეტი ადამიანი გაეცნობა კომუნიკაციის წარმართვის ტექნიკას, მით უფრო შემცირდება  ოჯახური კონფლიქტების განვითარების რისკი.