ქალთა მხარდაჭერის ცენტრები (533)
ქალთა მხარდაჭერის ცენტრი – ეს არის ფონდი „სოხუმის“ ფილიალები ქუთაისში, წყალტუბოში, ხონში, თერჯოლაში, სენაკში, ფოთში, ხურჩა/კოკში (ზუგდიდის მუნიციპალიტეტი), ლანჩხუთში, ოზურგეთში - შეიქმნა 2009 წლიდან. ცენტრების დანიშნულებაა ქალთა გაძლიერება, სოციალური, ფსიქოლოგიური, იურიდიული დახმარების გაწევა ძალადობის მსხვერპლი ქალებისთვის და კრიზისული ოჯახებისათვის, რომლებიც რთულ ცხოვრებისეულ მდგომარეობაში აღმოჩნდნენ. ქალთა მხარდაჭერის ცენტრები ხელს უწყობს ქალთა უფლებების დაცვას და მათ სოციალურ-ფსიქოლოგიურ რეაბილიტაციას.
- როგორია ძალადობის მასშტაბები სოფლებში, საზოგადოება რამდენად არის გახსნილი ამ თემებზე სასაუბროდ, როგორია სოფლის ხელმძღვანელების როლი მსხვერპლთა დახმარების საქმეში - ამ საკითხებს მიეძღვნა ტრენინგი ოზურგეთში. ქალთა მხარდაჭერის ცენტრის მცირე პროექტის ფარგლებში მიმდინარე მუშაობაში აქტიურად ჩაერთნენ მერის წარმომადგენლები სოფლებში.
პრობლემის პრევენციული მექანიზმების განხილვისას გამოიკვეთა, რომ მათი ჩართულობა მინიმალურია. აღინიშნა, რომ სოფლის ხელმძღვანელი ყველაზე კარგად იცნობს კონფლიქტურ ოჯახებს, ამიტომ მათი ჩართულობა თემში კონფლიქტების მოგვარების მიზნით უნდა გაიზარდოს.
აქტიურად წარიმართა ფსიქოლოგის საკონსულტაციო შეხვედრები და სესიები ხონის, სენაკის, ფოთის, წყალტუბოს, ოზურგეთის და ხურჩა/კოკის (ზუგდიდის მუნიციპალიტეტი) ქალთა მხარდაჭერის ცენტრებში. მუშაობა მიმდინარეობდა 41 ბენეფიციართან, მათგან 11 მამაკაცია. რეგიონში ფსიქოლოგი 10 ოჯახურ წყვილთან მუშაობდა, რომელთაგან სამი ახალია. ოზურგეთსა და კოკში ჯგუფური შეხვედრები გაიმართა ბულინგის და სკოლამდელი ასაკის ბავშვების ფსიქოლოგიური განვითარების თემაზე.
შეხვედრები მიმდინარეობდა ქუთაისშიც. აქ ფსიქოთერაპიულ კონსულტაციებს იღებს 10 ბენეფიციარი, 7-თან კი ჩატარდა ინდივიდუალური კონსულტაციები. მთელი ეს მუშაობა ხელს უწყობს შეხვედრების მონაწილეთა ოჯახური კლიმატის გაუმჯობესებას.
ლანჩხუთის ქალთა მხარდაჭერის ცენტრის მცირე პროექტის „მედპერსონალი ძალადობის წინააღმდეგ“ ფარგლებში ჩატარდა საინფორმაციო შეხვედრები რეფერალური მექანიზმის სუბიექტებთან. შეხვედრების მიზანი იყო სუბიექტებს შორის კოორდინაციის გაუმჯობესება, ინფორმაციის გაცვლის ხელშეწყობა. ამის შედეგად ისინი დაინახავენ, რეალურად რა ნაბიჯებია გადასადგმელი იმისთვის, რომ ძალადობის პრობლემის პრევენციაში აქტიურად იყვნენ ჩართული. მონაწილეთა მხრიდან დაფიქსირდა, რომ მსგავსი შეხვედრების პრაქტიკა არ არსებობს და ეს მეტად მნიშვნელოვანია.
ფონდი „სოხუმის“ ოფისში გაიმართა ვორკშოპი 9 მუნიციპალიტეტის ქალთა მხარდაჭერის ცენტრების მობილიზატორებთან. შეხვედრაზე შეჯამდა მიმდინარე მუშაობა. ასევე გამოვლინდა მუნიციპალიტეტებში არსებული პრობლემები. გამოიკვეთა პრიორიტეტული პრობლემები, რომლებზეც სამომავლო საპროექტო იდეები შემუშავდება.
აღინიშნა, რომ მსგავსი შეხვედრები მნიშვნელოვანია ინფორმაციის გაცვლის მიზნით.
მაისში ქალთა მხარდაჭერის ცენტრებში 27 სამობილიზაციო შეხვედრა გაიმართა და მათი თემა იყო ოჯახის საერთაშორისო დღე. შეკრებილებმა განიხილეს აქტუალური საკითხები: ოჯახის ინსტიტუტის მნიშვნელობა, გენდერული როლები, შიდა და გარე ფაქტორები...
შეხვედრებმა აქტიური დისკუსიების ფონზე ჩაიარა. აღინიშნა, რომ მსგავს თემაზე საუბარი განსაკუთრებით კარგია ახალგაზრდებთან, რათა მათ გაიაზრონ ოჯახის შექმნის პასუხისმგებლობა. ბენეფიცარებმა ბევრ მნიშვნელოვან კითხვაზე მიიღეს ინფორმაცია, მათ შორის მუნიციპალიტეტში არსებულ სერვისებზე. ყოველივე ეს ხელს უწყობს ოჯახების მდგომარეობის გაუმჯობესებას.
წყალტუბოს ქალთა მხარდაჭერის ცენტრის მცირე პროექტის ფარგლებში მაისში ჩატარდა საინფორმაციო შეხვედრა მშობლებთან და სკოლის დირექციასთან. შეხვედრაზე საუბარი იყო ოჯახში ძალადობაზე, მწვავე შედეგებზე.
მონაწილეთა მხრიდან დაფიქსირდა, რომ მსგავსი ტიპის შეხვედრები მნიშვნელოვანია იმის გასააზრებლად, თუ რა სერიოზულ გავლენას ახდენს ძალდობრივი გარემო მოზარდის განვითარებაზე და ხელს უშლის ჯანსაღი საზოგადოების ჩამოყალიბებას.
- ურთიერთობის დაბალანსება ოჯახში, სწორი და ეფექტური კომუნიკაცია, ემოციების კონტროლი და მართვა, თანამშრომლობა ოჯახის წევრებს შორის - ამ საკითხებზე გაიმართა ფსიქოლოგისა და კონფლიქტოლოგის საუბარი ოჯახურ წყვილებთან წყალტუბოს, ხონის და ფოთის ქალთა მხარდაჭერის ცენტრებში. შეხვედრების მიზანია ოჯახური კონფლიქტების მართვა ადრეულ სტადიაში.
აქტიურ ეტაპზეა ოზურგეთის ქალთა მხარდაჭერის ცენტრის მცირე პროექტი. მაისში ჩატარდა ტრენინგი მერის წარმომადგენლებთან შვიდ სოფელში და აქტივისტებთან. ისინი გაეცნენ მექანიზმებს, რომლებიც ძალადობის ფაქტებზე რეაგირებაში დაეხმარებათ. ოზურგეთის საბავშვო ბაღების პედაგოგებთან გაიმართა იურისტისა და ფსიქოლოგის შეხვედრა. საუბარი მიეძღვნა ბავშვთა მიმართ ძალადობას - თუ როგორ გამოავლინონ ძალადობის მსხვერპლი ბავშვი და ვის მიმართონ რეაგირებისთვის.
ასევე გაგრძელდა შეხვედრები პროექტის ფარგლებში შექმნილი ძალადობის ფაქტების გამოვლენასა და რეაგირებაზე პასუხისმგებელი ჯგუფის წევრებთან.
გოჩა ჯიხაიშსა და ნახახულევში (ხონის მუნიციპალიტეტი) ჩატარდა ვორკშოპები ახალგაზრდებთან ოჯახში ძალადობის თემაზე. შეხვედრების ორგანიზება გააკეთეს ხონის ქალთა მხარდაჭერის მცირე პროექტის ფარგლებში შექმნილი ახალგაზრდული საინიციატივო ჯგუფის აქტივისტებმა.
თემა მონაწილეებისთვის აქტუალური იყო და მათი აქტიური ჩართულობის ფონზე ჩაიარა. აღინიშნა, რომ ამ კუთხით არაფორმალური განათლების მიღებას მოზარდებში ძალიან დიდი მნიშვნელობა აქვს და აუცილებელია, ისინი აქედანვე შეურიგებლები იყვნენ ყველა სახის ძალადობის მიმართ.
ფოთის ქალთა მხარდაჭერის ცენტრის მინი-პროექტის ფარგლებში ჩატარდა ტრენინგი თემაზე „ძალადობის პრევენციული მექანიზმები“. ტრენინგს ესწრებოდნენ საბავშვო ბაღების გამგეები, პედაგოგები, მშობლები.
- რა პასუხისმგებლობები აკისრია საბავშვო ბაღის პედაგოგებს ძალადობის პრობლემის პრევენციაში, რას ნიშნავს ბავშვის გენდერული აღზრდა, რა უნდა გაკეთდეს პრევენციის თვალსაზრისით - ტრენინგზე, ძირითადად, ამ საკითხებზე გაკეთდა ფოკუსირება და მუშაობა რეალური ქეისების ანალიზით წარიმართა.
პროექტის მიხედვით, გაიმართა აგრეთვე შეხვედრა ბავშვთა ფსიქოლოგისა და სოციალური აგენტის ჩართულობით. მონაწილეებმა აღნიშნეს, რომ ინფორმაციის მიღების კუთხით ტრენინგი და შეხვედრა მათთვის მნიშვნელოვანი იყო.