ქალთა ფონდმა „სოხუმმა“ უკრაინელ ლტოლვილებს უმასპინძლა. უკრაინელმა ფსიქოლოგებმა მარინა სტეპანენკომ და ანა შალიმოვამ ჩაატარეს ტრენინგი თემაზე „სტრესთან ბრძოლის რესურსული მდგომარეობის ძიება“.
ტრენინგში 10 ქალი მონაწილეობდა. ეს იყო მონაწილეების ინფორმირება თემაზე, რა არის სტრესი და როგორ ვლინდება იგი, სავარჯიშოები სტრესის აღმოსაჩენად და ინდივიდუალური რესურსის მოსაძებნად.
მონაწილეთა შეფასებით, ტრენინგი მშობლიურ ენაზე კომუნიკაციით, სწორად არჩეული თემებით და ერთმანეთთან როლური თამაშების თერაპიით, ქალთა ფონდის საუკეთესო ინიციატივაა მათი მხარდაჭერისთვის.
„არაფერი ისე არ გვაბედნიერებს, როგორც ფონდი „სოხუმის“ ოფისში მოსვლა. თქვენ გესმით ჩვენი ტკივილი და იცით, როგორ დაგვეხმაროთ. გვინდა, მსგავსი შეხვედრები და სწავლება უფრო ინტენსიური იყოს,“ - განაცხადა ტრენინგის ერთ-ერთმა მონაწილემ.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ფორუმ-თეატრის განახლებული შემადგენლობა აგრძელებს ამ უჩვეულო თეატრის ტრადიციებს.
იანვარში ახალგაზრდა მსახიობები ზუგდიდის მუნიციპალიტეტს სტუმრობდნენ. წარმოდგენები ჩატარდა ორ სოფელში: კოკსა და დიდ ნეძში. სკოლებში შეკრებილმა მაყურებლებმა ნახეს რამდენიმე სცენა: შეყვარებულებზე, ოჯახური ძალადობის თემაზე, დედა-შვილის ურთიერთობის შესახებ. ყველა სცენა რეალური ცხოვრებიდან არის აღებული. სწორედ ამიტომ მაყურებელთა გარკვეულმა ნაწილმა საკუთარი თავი დაინახა როგორც დადებით, ასევე უარყოფით როლებში.
მაყურებელი იმდენად აქტიური იყო, რომ ყველა სცენაში მოხდა ჩართულობა, შემდგომ კი დისკუსიები გაიმართა.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
უკრაინელი ფსიქოლოგები თავად გვიამბობენ იანვარში გაწეულ მუშაობაზე.
მარინა სტეპანენკო:
„უკრაინელი ლტოლვილები მუდმივად იღებენ ფსიქოლოგიურ დახმარებას ქალთა ფონდ „სოხუმში“. იმ ადამიანების რიცხვი, ვინც ფსიქოლოგის კაბინეტში იპოვა მხარდაჭერა და დახმარება, არ კლებულობს, არამედ მხოლოდ იზრდება. ლტოლვილები მოდიან სხვადასხვა თხოვნით, მაგრამ უსაფრთხოება და ნდობის ატმოსფერო ყველასთვის მნიშვნელოვანია. ყველას უნდა, რომ გაუგონ და მოუსმინონ. ფსიქოლოგიური დახმარების გაწევის პროცესზე დადებითად აისახება ის ფაქტი, რომ ფსიქოლოგიც უკრაინიდანაა და იძულებით გადაადგილებულია.“
ანა შალიმოვა: ამ თვეში გაგრძელდა მუდმივ კლიენტებთან მუშაობა. ერთ-ერთი იყო ბიჭი, რომელსაც ადამიანებთან ურთიერთობისას პირადი საზღვრების აგება უნდოდა. განვიხილეთ მისი აგრესიული რეაქციის მიზეზები სხვების ხუმრობებზე. ვისწავლეთ, კონსტრუქციულად როგორ ვუთხრათ ადამიანებს, რომელი ხუმრობა არ არის სასიამოვნო და რა ჟღერს შეურაცხყოფად. ავირჩიეთ ქცევის ჯანსაღი მოდელი ადამიანებთან ურთიერთობისთვის.
- ქალთა მხარდაჭერის ცენტრების მუშაობის შედეგად არაერთმა ქალმა შეცვალა თავისი ცხოვრება, რადგან ინფორმაციის მიღების შემდეგ ისინი უფრო აქტიურები ხდებიან, - ეს ცენტრების მობილიზატორების შეფასებაა.
ჩოხატაურის, ქობულეთის, ბაღდათის, სენაკის და თერჯოლის ქალთა მხარდაჭერის ცენტრებში იანვარში ექვსი კრიზისული ოჯახის იდენტიფიცირება მოხდა. კონფლიქტების გამომწვევი რისკების აღმოფხვრა და პრობლემების დარეგულირება იდენტიფიცირების შემდგომი პროცესია. ამ პროცესის მთავარი აქტორები - მობილიზატორები მზად არიან, ყველა ქალს მხარდაჭერა აღმოუჩინონ.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
„ჩემს ცხოვრებაში ბევრი უსიამოვნო და საშინელი რამ იყო. ფსიქოლოგთან პირველი შეხვედრიდან ექვსი თვე გავიდა და იმდენი ცვლილება მოხდა, რომ ვერ ვუყრი თავს. დიაგნოსტიკამ დაფიქრების საფუძველი მომცა, რეკომენდაციები ქმედებებად იქცა, ემოციურად უკეთ ვიგრძენი თავი და ახალი მიზნების მიღწევის ძალაც გამიჩნდა. ბევრი რამ აღმოვაჩინე ჩემში. დიდი მადლობა მანანა გოცირიძეს“, - ეს სიტყვები დაწერა ახალგაზრდა ქალმა, რომელიც ქალთა ფონდი „სოხუმის“ ფსიქოლოგის ერთ-ერთი კლიენტია.
იანვარში ფსიქოლოგმა ჯგუფური და, მოთხოვნის შესაბამისად, ინდივიდუალური ფსიქოლოგიური შეხვედრები ჩაატარა ქობულეთის, თერჯოლის, ჩოხატაურის, ხურჩის (ზუგდიდის მუნიციპალიტეტი) და ფახულანის (წალენჯიხის მუნიციპალიტეტი) ქალთა მხარდაჭერის ცენტრებში. შეხვედრებმა მოიცვა 45 ბენეფიციარი. კლიენტების ერთმა ნაწილმა - 16 ადამიანმა - თერაპიული სამუშაოები ქუთაისში, ორგანიზაციის სათაო ოფისში გაიარა. ყველა მათგანს აქვს დადებითი შედეგები, რაც თვიდან თვემდე უმჯობესდება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
მივდივართ და სითბოთი სავსე მოგონებები მიგვაქვსო, ამბობდნენ დიდებიც და პატარებიც... იმედიანად წავიდა ქალთა ფონდი „სოხუმის“ სარეაბილიტაციო ცენტრის იანვრის ყველა ბინადარი - ორი ქალი და 6 ბავშვი.
მათთან კომპლექსური მუშაობა ჩატარდა: სოციალური მუშაკი თავის საკეთებელს აკეთებდა, ფსიქოლოგი - თავისას. ცალკე მიდიოდა მუშაობა ბავშვებთან.
ფსიქოლოგი მანანა გოცირიძე: „რთული ცხოვრება აქვთ გამოვლილი და ჩვენი ვალია, დავეხმაროთ უკეთესი გზის პოვნაში. ეს დღეები ვმუშაობდით იმაზე, როგორ დაალაგონ ურთიერთობები, როგორ მოახერხონ სოციუმში ადაპტაცია, დაძლიონ ემოციური და ყოველდღიური პრობლემები.“
ბავშვებთან მუშაობის ასისტენტი ანა ლომიძე: „პირველ დღეს ბავშვები ფრთხილები არიან. მეორე დღიდან მათი გონება გათავისუფლებულია ზედმეტი საყოფაცხოვრებო ფიქრისგან. სავარჯიშოებით, დავალებებით აცნობიერებენ, რა უფლება-მოვალეობები აქვთ. იწყებენ საუბარს ოჯახზე, პრობლემებზე. ერთ-ერთმა თქვა: ,,აქედან რომ გავალ, ბაბუას და მამას სარკის წინ დავუდგები და ვეტყვი, რომ ცუდად იქცევიან და არ დავანებებ, რომ დედა და ბებია ატირონ“. სარეაბილიტაციო ცენტრში ქალებთან ერთად ბავშვებიც ძლიერდებიან. ისინი ზრუნავენ დედებზე, ჩვენ ერთად ვამზადებთ დედიკოებისთვის სიმბოლურ საჩუქრებს“....
ახალგაზრდობის გაძლიერების ცენტრებში სატრენინგო მუშაობა აქტიურად გრძელდება. კიდევ ხუთი ტრენინგი ჩატარდა ბაღდათის, ვანის, ტყიბულის, სენაკის და ჩოხატაურის მუნიციპალიტეტებში. შეხვედრებში მონაწილეობდა 97 ადამიანი.
ახალგაზრდები აქტიურად ჩაერთნენ სამუშაო პროცესში - საინტერესო და სახალისო სავარჯიშოებში. ტრენინგები განსხვავდება ერთმანეთისაგან, მაგრამ მათ აერთიანებთ ის, რომ მონაწილეები საკმაოდ მოტივირებული არიან, უნდათ მეტი ინფორმაციის მიღება, მეტი სამოქალაქო განათლება და ეს იგრძნობა მათ დამოკიდებულებაში.
ყველა ახალგაზრდულ ჯგუფში გამოიკვეთა ლიდერები, რომლებიც თებერვალში პრეზენტაციებს გააკეთებენ შემაჯამებელ შეხვედრებზე.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
პატარა ბიჭუნა დედასთან ერთად შემოვიდა. აქ ხშირად მოჰყავთ ბავშვები, ამიტომ ფსიქოლოგ მანანა გოცირიძის ოთახში ბევრი სათამაშოა. თაროზე უწყინრად იდო კურდღელიც. უკრაინელმა ბიჭუნამ უცებ იყვირა: ბაჭია! მერე ფსიქოლოგს ჰკითხა: შეიძლება ხელში ავიყვანო? რა თქმა უნდა, მისცეს. ეხუტებოდა, ეფერებოდა... მიხვდა მანანა გოცირიძე - რატომაც და უთხრა, თუ გინდა, გაჩუქებო. დედა უხერხულ მდგომარეობაში ჩავარდა - ასეთი ჰქონდა სახლში და ძალიან უყვარდაო...
ბედნიერი წავიდა პატარა ბიჭუნა.
ყველა კმაყოფილი რჩება ქალთა ფონდი „სოხუმის“ ფსიქოლოგთან შეხვედრის შემდეგ. ზოგს ნაკლები პრობლემა აქვს და უფრო მალე სრულდება რეაბილიტაციის პროცესი, ზოგს მეტი ვიზიტი სჭირდება.
უკრაინელ ლტოლვილებთან შეხვედრები მანანა გოცირიძის მუშაობის ერთ-ერთი მნიშვნელოვანი მიმართულებაა. იანვარში ის 6 ოჯახს შეხვდა - 17 ადამიანს. ჩატარდა პირველადი კონსულტაცია, ანამნეზის შეგროვება და მათ შესთავაზეს უფასო ფსიქოთერაპიის გაგრძელება. ოჯახებს ასევე გადაეცათ საჭირო პროდუქტები, საყოფაცხოვრებო და ჰიგიენის საშუალებები, თბილი ტანსაცმელი.
კიდევ ერთი გამოშვება ქალთა ფონდი „სოხუმის“ დღის სარეაბილიტაციო ცენტრში. უამრავი ლამაზი ნაკეთობა. კიდევ ერთი ჯგუფი, რომელმაც ისწავლა პოლიმერულ თიხასთან მუშაობა და პატარა საოცრებების შექმნა.
ტრადიციულად, ორთვიანი კურსის ბოლოს მოეწყო შემაჯამებელი ღონისძიება. მონაწილეებმა წარმოადგინეს სწავლების განმავლობაში შექმნილი ნამუშევრები, ისაუბრეს თავიანთ თავზე... პრეზენტაცია შთამბეჭდავი იყო და ქალთა ფონდი „სოხუმის“ წარმომადგენლების მოწონება დაიმსახურა.
კურსდამთავრებულებს სერტიფიკატები გადაეცათ. მათ აღნიშნეს, რომ ეს პერიოდი საკმაოდ ნაყოფიერი იყო პროფესიული განვითარების და პირადი ურთიერთობების კუთხით და ისინი წარმატებით გამოიყენებენ ცოდნას პრაქტიკაში.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ვანის მუნიციპალიტეტში აქტიური მუშაობა მიმდინარეობს ქალთა მიმართ ძალადობის ან/და ოჯახში ძალადობის აღკვეთის, ძალადობის მსხვერპლთა დაცვისა და დახმარების უწყებათაშორისი კომისია შექმნისთვის. მორიგი საკონსულტაციო შეხვედრა ჩატარდა ვანის მერთან.
შეხვედრაზე განხილულ იქნა უწყებათაშორისი კომისიის შექმნის დეტალები - თუ ვინ უხელმძღვანელებს კომისიას და რა შემადგენლობით უნდა იყოს ის წარმოდგენილი. ამ ეტაპზე აქტიურად მიმდინარეობს კომისიის დამტკიცებისთვის საჭირო დოკუმენტების შემუშავება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)