სენაკი, თერჯოლა, ქობულეთი, სამტრედია, დიდი ნეძი (ზუგდიდის მუნიციპალიტეტი) – ფსიქოლოგის შეხვედრების ადგილები, სადაც ინდივიდუალურ და ჯგუფურ სეანსებზე მონაწილეობა მიიღო 35-მა ბენეფიციარმა. ონლაინ ფსიქოთერაპიული სესიები გაიარა 10-მა ბენეფიციარმა, ხოლო ქუთაისში, ჩვენს ოფისში ფსიქოთერაპიული მუშაობა ჩატარდა 17 ადამიანთან (მათგან სამი ახალია).
მუშაობის შედეგები:
ბენეფიციართა ერთმა ნაწილმა გადალახა ძველი ტრავმები, მეორემ - აღიდგინა სულიერი წონასწორობა. კრიზისულმა ოჯახმა კონფლიქტის მოგვარებაზე დაიწყო მუშაობა. გამოვლინდა ძალადობის სამი მსხვერპლი, რომლებთანაც სეანსები გაგრძელდება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
- საზოგადოებას უნდა ჰქონდეს ინფორმაცია, როგორ მოიქცეს ძალადობის შემთხვევაში, როგორ დაეხმაროს მსხვერპლს. რაც მეტი ადამიანი იქნება ინფორმირებული, მით უფრო ეფექტიანი იქნება რეაგირებაც, - ასეთია შეხვედრების მონაწილეთა საერთო შეხედულება.
ქალთა მხარდაჭერის ცენტრების საქმიანობაში მნიშვნელოვანი სეგმენტია ინფორმირება, რომლის საფუძველზეც ხდება პრობლემის იდენტიფიცირება და შემდგომი რეაგირება. თერჯოლის, ქობულეთის და სამტრედიის ქალთა მხარდაჭერის ცენტრებში ამ კუთხით გამართულმა შეხვედრებმა უკვე მოიტანა შედეგები: ქალები ცენტრების მობილიზატორებთან ერთად მუშაობენ საკუთარი უფლებების დასაცავად და არსებული სერვისების მისაღებად.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
გასაკვირია, მაგრამ ფონდ „სოხუმს“ სამი თეატრი აქვს: ფორუმ-თეატრი, ჩრდილების თეატრი და თოჯინების თეატრი.
ამ თვეში თოჯინების თეატრი გააქტიურდა, დაიწყო რეპეტიციები და წარმოდგენებიც გამართა.
1 ივნისს, ბავშვთა დაცვის საერთაშორისო დღეს, სარეაბილიტაციო ცენტრში მყოფი პატარებისთვის ჩატარდა წარმოდგენა „გვრიტი“. ბავშვებს ძალიან მოეწონათ სპექტაკლი. მათთვის საყვარელი პერსონაჟები გასაგებ ენაზე საუბრობდნენ მეგობრობასა და სიყვარულზე.
20 ივნისს, დევნილთა/ლტოლვილთა საერთაშორისო დღეს კი ახალგაზრდა მსახიობები მაყურებლის წინაშე გამოვიდნენ ქუთაისში, „სიყვარულის სკვერში“. თოჯინების სიტყვებით გაჟღერებული ტოლერანტობის თემა საინტერესო აღმოჩნდა დამსწრეთათვის.
იყო აღტაცებული შეძახილები, ტაში, ფოტოგადაღებები...
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ახალგაზრდობის გაძლიერების ცენტრებში ივნისი დაეთმო კონფლიქტის ესკალაციის და გენდერული თანასწორობის საკითხებს, რაც მოზარდთა ინტერესის ბადეში ერთ-ერთ მნიშვნელოვან ადგილს იკავებს.
სატრენინგო კურსი ჩატარდა თერჯოლაში, ჩოხატაურში, ტყიბულში.
ცოცხალი მაგალითები, როლური თამაშები, ანიმაციური ფილმები ახალგაზრდებთან წარმატებული მუშაობის ყველაზე კარგი მეთოდებია ინფორმირებულობისა და უნარ-ჩვევების განვითარებისთვის.
მოზარდები ქალთა ფონდი „სოხუმის“ ტრენერებთან ერთად მსჯელობენ აქტუალურ პრობლემებზე და გეგმავენ ახალ-ახალ ინიცირებულ ღონისძიებებს, რათა სხვებს გადასცენ სასარგებლო ინფორმაციები და ხელი შეუწყონ ჩართულობას კონფლიქტების პრევენციის კუთხით.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ტყიბულში მრგვალ მაგიდაზე შეიკრიბნენ ადგილობრივი რეფერირების სუბიექტები: საკრებულოს გენდერული თანასწორობის საბჭოს წევრები, ადგილობრივი თვითმმართველობის, პოლიციის და საგანმანათლებლო რესურსცენტრის წარმომადგენლები, სკოლის პედაგოგები, სამედიცინო პერსონალი.
შეხვედრაზე ჩატარდა მსხვერპლთათვის არსებული სერვისების და ბავშვთა მოვლის სერვისების კუთხით ფონდის მიერ ჩატარებული კვლევების პრეზენტაცია. საუბარი შეეხო მნიშვნელოვან საკითხებს: მუნიციპალიტეტის მასშტაბით შემაკავებელი ორდერების, პრობლემების იდენტიფიკაციის და მსხვერპლის დახმარების კუთხით არსებული სტატისტიკა.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა მხარდაჭერის ცენტრები აქტიურად მუშაობენ რეგიონებში იმისთვის, რომ რაც შეიძლება მეტი ადამიანი ფლობდეს ინფორმაციას ძალადობის საკითხებსა და რეაგირების მექანიზმებზე.
სენაკის, ვანის და ბაღდათის ქალთა მხარდაჭერის ცენტრების მუშაობის შედეგად ახალი ქეისები გაჩნდა. ქალები ითხოვენ დახმარებას. დახმარების მექანიზმებიც მათი მოთხოვნებიდან გამომდინარე იქმნება. თითოეული ქეისის უკან კონკრეტული ქალები დგანან, რომლებიც განსაკუთრებულ მიდგომას საჭიროებენ.
თვის განმავლობაში გამოვლინდა ათამდე ქეისი, რომელთა შორის არიან რისკის ჯგუფის ოჯახებიც. მათთან მუშაობა აქტიურად გრძელდება, რათა პრევენციული მოქმედებით შესაძლებელი გახდეს ოჯახური ძალადობის თავიდან აცილება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
მეორედ გაიმართა აქცია-პერფორმანსი „სოხუმური ყავის არომატი ქუთაისში“.
თეთრ ხიდთან, რიონის სანაპიროზე შეკრებილებისთვის ბევრი რამ იყო საინტერესო:
ქვიშაზე მოდუღებული ყავა, ტკბილეული საზღვაო ქალაქის სიმბოლიკით, სიმბოლური ფოტოსესია „სოხუმის სანაპიროზე“, პოლიმერულ თიხაზე მუშაობის არტ/მასტერკლასი, ფონდი „სოხუმის“ თოჯინების თეატრის წარმოდგენა „გვრიტი“, მეწარმე ქალების ნამუშევრების გამოფენა, ქუთაისში მყოფი უკრაინელი ლტოლვილების მობრძანება...
განსაკუთრებული სიახლე იყო სიმბოლური საჩუქრები „მადლობა მეგობრობისთვის“.
ღონისძიება ლტოლვილთა/დევნილთა საერთაშორისო დღეს მიეძღვნა და ფართოდ გააშუქა სხვადასხვა მედიასაშუალებამ.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
„მტკიცებულებებზე დაფუძნებული ადვოკატირების პრაქტიკა GREWS სისტემის გამოყენებით“- ამ თემაზე 18-19 ივნისს ქობულეთში ქალთა მხარდაჭერის ცენტრების მობილიზატორებისთვის ტრენინგი ჩატარდა.
მონაწილეები გაეცნენ გენდერზე ორიენტირებული სისტემის (GREWS) მნიშვნელობას და შესაძლებლობებს; ჯგუფური სავარჯიშოების და იმიტირებული სცენების მეშვეობით წარმატებული და წარუმატებელი ქეისები გააანალიზეს; ადვოკატირების სტრატეგიულ ნაბიჯებზე ისაუბრეს; ერთმანეთს გაუზიარეს ძალადობის შემთხვევებზე რეაგირების კუთხით მიღებული შედეგები; დააფიქსირეს გამოწვევები და სამომავლო სტრატეგიებზე გააკეთეს აქცენტი.
უკუკავშირიდან:
„ჩემთვის ეს ტრენინგი მნიშვნელოვანი იყო, დამეხმარება მეტი შედეგის მიღწევაში.“
„ერთმანეთის მუშაობის სტილს და მეთოდებს გავეცანით, შევაფასეთ არსებული სიტუაცია.“
„მიგვაქვს სიახლეები და ერთმანეთის გამოცდილება, რასაც ადგილებზე დავნერგავთ.“
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ძალადობის შემთხვევების განხილვა, კონკრეტული ქეისების გაანალიზება აქტუალობას სძენს სამობილიზაციო შეხვედრებს. ინფორმაციების გაცვლისას ახალი ქეისების იდენტიფიცირებაც ხდება.
აქტივისტი ქალები ქალთა მხარდაჭერის ცენტრების მობილიზატორებთან ერთად ცდილობენ, დაეხმარონ ყველას, ვისაც ჯერ კიდევ არ ჰყოფნის გაბედულება და ძალადობის გავლენის ქვეშ იმყოფება. ეძებენ გზებს მათთან თანამშრომლობის გასაგრძელებლად. ხოლო მათ, ვინც მობილიზატორებს დასახმარებლადმიმართავს, სხვადასხვა სახის სერვისებს სთავაზობენ.
ასეთი შეხვედრები უკვე ჩაატარეს სენაკის, წალენჯიხის, ხურჩის (ზუგდიდის მუნიციპალიტეტი) ქალთა მხარდაჭერის ცენტრებში. იდენტიფიცირებული შემთხვევების საპასუხოდ ფსიქოლოგი სამ ქალთან სისტემატურად მუშაობს. ორი ოჯახი გადამისამართდა ქალთა ფონდი „სოხუმის“ სარეაბილიტაციო ცენტრში, სადაც ქალები რეაბილიტაციას შვილებთან ერთად გაივლიან.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ფონდი „სოხუმის“ სარეაბილიტაციო ცენტრში ჩატარდა კომპლექსური რეაბილიტაცია ოჯახში ძალადობის ორ მსხვერპლთან. მათთან ასევე იყო 5 ბავშვი. ქალებთან აქტიურად მუშაობდნენ სოციალური მუშაკი, იურისტი და ფსიქოლოგი, ბავშვებთან კი - პედაგოგი.
რეაბილიტაციის ბოლოს ქალებმა აღნიშნეს:
კ., 34 წლის: „ახალი ძალები გამიჩნდა. ვიგრძენი, რომ მარტო არ ვარ, მაქვს მხარდაჭერა, უფრო თავდაჯერებული უნდა გავხდე. მადლობას ვუხდი ყველას სიკეთისა და საჭირო დახმარებისთვის. ასე კომფორტულად არასოდეს მიგრძვნია თავი.“
ი., 31 წლის: „აქ რომ მოვედი, ვიყავი ჩაკეტილი, აფორიაქებული და უიმედო. ბევრი პოზიტივი მივიღე მორალურადაც და ფიზიკურადაც. მივხვდი, რომ უნდა გავხდე აქტიური, ძლიერი და კიდევ მომიწევს მუშაობა თვითშეფასების ამაღლებისთვის“.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)