ქალთა ფონდმა „სოხუმმა“ მრგვალი მაგიდის ფორმატის შეხვედრა გამართა ადგილობრივი რეფერირების სუბიექტების მონაწილეობით თერჯოლის საკრებულოს სხდომათა დარბაზში.
შეხვედრას ესწრებოდნენ საკრებულოს გენდერული თანასწორობის საბჭოს წევრები, მერიისა და სოციალური სამსახურების, პოლიციის სამმართველოს წარმომადგენლები. შეკრებილებმა ისაუბრეს ოჯახში ძალადობის პრევენციასა და მსხვერპლთა დაცვაზე, სოციალურ პარტნიორობაზე. ჩატარდა კვლევის „მსხვერპლთათვის არსებული სერვისების მონიტორინგი“ პრეზენტაცია. აქცენტი გაკეთდა ოჯახში ძალადობის პრობლემაზე და ადგილობრივ სტრუქტურებთან თანამშრომლობის პერსპექტივაზე.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქობულეთის ქალთა მხარდაჭერის ცენტრმა საინფორმაციო შეხვედრები სოფლის დასახლებაში ჩაატარა. მონაწილეებმა პერიფერიებში ინფორმაციის გავრცელების აუცილებლობაზე გააკეთეს აქცენტი.
სოციალური პრობლემები, ქალთა საჭიროებები, ოჯახური კონფლიქტების გახშირება - ამ თემებზე საუბრისას ახალი ძალადობის შემთხვევების იდენტიფიცირება მოხდა ზუგდიდის მუნიციპალიტეტის სოფლებში - ხურჩაში, კოკში, კახათში გამართულ შეხვედრებზე.
საბავშვო ბაღები ოჯახური კონფლიქტების იდენტიფიცირების წყარო უნდა გახდეს, მანამდე ამ რგოლის სრულად ინფორმირება უნდა მოხდეს, - ასეთი მოსაზრება ჰქონდათ სამტრედიის ქალთა მხარდაჭერის მიერ გამართულ შეხვედრაზე, რომელსაც საბავშვო ბაღის აღმზრდელები და პედაგოგები ესწრებოდნენ.
ქალთა მხარდაჭერის ცენტრების მუშაობა მიზნად ისახავს ოჯახური ძალადობის შემთხვევების პრევენციას და იდენტიფიცირებული ქეისების ეფექტიან მართვას.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
რა ინფორმაციას ვაწვდით მოზარდებს? როგორი ხედვა უყალიბდებათ მათ? რა შეიძლება დაეხმაროს მათი ცნობიერების ამაღლებაში?
სწორედ მოზარდთა ჯანსაღი აზროვნების ჩამოყალიბებას უწყობს ხელს ახალგაზრდობის გაძლიერების ცენტრები, რომლებიც დასავლეთ საქართველოს 10 მუნიციპალიტეტში მოქმედებს.
ივლისის პირველი დღეებიდან დაიწყო სატრენინგო კურსი ახალგაზრდებთან და პირველი ხუთი ტრენინგიც ჩატარდა სამტრედიაში, ბაღდათში, ზუგდიდში, ჩოხატაურსა და თერჯოლაში.
შეხვედრებზე განიხილეს ნაადრევი ქორწინების პრობლემა და კონფლიქტის მოგვარების გზები.
ერთმანეთისგან განსხვავებული იყო ხუთივე ტრენინგი, რომელშიც 97 მოზარდი მონაწილეობდა: აქტიური დისკუსიები, საინტერესო ქეისების განხილვა, გულახდილი უკუკავშირი.
ქალთა ფონდი „სოხუმი“ ცდილობს, მისცეს ახალგაზრდებს შესაძლებლობა, იაზროვნონ დროსთან შეფარდებით, ღირებულებებზე მორგებულად, მომავლის საკეთილდღეოდ.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
საგანმანათლებლო დაწესებულების მანდატურის სამსახურის ფსიქოსოციალური მომსახურების ცენტრმა საქართველოში მოქმედ საერთაშორისო, პროფილური სახელმწიფო და არასამთავრობო ორგანიზაციების წარმომადგენლებს ბოლო 6 თვეში განხორციელებული საქმიანობის შედეგები და მიმდინარე პროექტები გააცნო.
ღონისძიებას ჩვენი წარმომადგენელი - ლინდა ჩიხლაძეც ეწრებოდა, რომელმაც მონაწილეებს ქალთა ფონდი „სოხუმის“ დასავლეთ საქართველოს 100-მდე სკოლასთან მუშაობის გამოცდილება გაუზიარა ძალადობის პრევენციის, გენდერული თანასწორობის და ტოლერატული გარემოს დამკვიდრების მიმართულებით. ასევე, პირადი სიმპათია გამოხატა სასკოლო მედიაციის პილოტირების მიმართ და საკუთარი გამოცდილებით, ყურადღება გაამახვილა Peer Mediation-ის საჭიროებასა და დროულობაზე ზოგადსაგანმანათლებლო სკოლებში.
ნინო ჭანიშვილი დღეს ოზურგეთის საკრებულოს თავმჯდომარის მოადგილე და გენდერული თანასწორობის საბჭოს თავმჯდომარეა. თუმცა აქამდე მან საკმაოდ რთული და საინტერესო გზა გაიარა. ის ოზურგეთის ერთ პატარა რაიონში ცხოვრობს, სადაც გადაადგილების საშუალებად მამის „მარშრუტას“ იყენებდა და ამგვარად, ირგვლიმყოფების გაოცებას იწვევდა. მოგვიანებით კი იდეა გაუჩნდა, საკუთარი ავტოსკოლა დაეფუძნებინა და შეძლო კიდეც მიუხედავად იმისა, რომ საზოგადოების მხრიდან მრავალ გამოწვევას აწყდებოდა ამ სფეროში თავისი სქესის გამო. მან შეძლო და დაამსხვრია ყველა წინაღობა, სტერეოტიპი, რაც მიზნის მიღწევაში ეღობებოდა, გახდა ავტომანქანის მართვის წარმატებული პედაგოგი, არის აქტიური ქალი პოლიტიკოსი, რომელიც ხელმძღვანელობს ადგილობრივ თვითმმართველობაში გენდერული პოლიტიკის გატარებას და ამასთან ერთად არის მცირეწლოვანი შვილის დედაც.
Injicio ლათინური სიტყვაა და გამოწვევას ნიშნავს. ინიცირება ქიმიური პროცესია, როცა ჯაჭვური რეაქცია იწყება რაიმე ზემოქმედებით...
რომ არ დაგაბნიოთ, ეს ინიციატივის გამოჩენაა.
ახალგაზრდებზე გიამბობთ და ჩვენი ჩანაფიქრიც ეს არის - აქტიურმა ახალგაზრდებმა ინიციატივები გამოავლინონ.
ქალთა ფონდი „სოხუმი“ 10 მუნიციპალიტეტში მუშაობს - სამტრედია, თერჯოლა, ბაღდათი, ვანი, ტყიბული, სენაკი, ზუგდიდი, წალენჯიხა, ჩოხატაური, ქობულეთი. ადრე ქალაქის/სოფლის ცალკეულ სკოლებში ყალიბდებოდა ახალგაზრდული კლუბები, ტარდებოდა შეხვედრები. ახლა კი მუნიციპალიტეტში იქმნება ახალგაზრდობის გაძლიერების ცენტრი, რომელშიც სხვადასხვა სკოლის წარმომადგენლები არიან გაერთიანებულნი.
6-თვიანი სატრენინგო კურსის დროს მონაწილეები ეცნობიან სხვადასხვა თემას, შეხვედრის ჩატარების ტექნიკას. და უკვე პირველი თვის შემდეგ ატარებენ აქტივობებს თავიანთ სკოლებში. სრული კურსის დასრულების შემდეგ კი ყველაზე აქტიურებს ტრენერის წოდება ენიჭება.
ვერცერთ სკოლას ვერ გამოარჩევ, ინიცირებული ღონისძიებები ყველგან ტარდება. ბავშვები პრაქტიკულად ახორციელებენ იმას, რაც ისწავლეს და ეს ძალიან მოსწონთ.
რას ატარებენ? ეს არის: საინფორმაციო შეხვედრა, ფილმის ჩვენება, როლური თამაში, გამოკითხვა, ვიდეორგოლის მომზადება, აქცია...
ივნისის მეორე ნახევარში ქალთა ფონდი „სოხუმის“ სარეაბილიტაციო ცენტრში ერთ-ერთი ქალთა მხარდაჭერის ცენტრის რეკომენდაციით კიდევ ორი ქალი ჩამოიყვანეს ბავშვებთან ერთად. სულ შვიდნი იყვნენ. რეაბილიტაციის პროცესში თავისი როლი განეკუთვნება იურისტს, ფსიქოლოგს, სოციალურ მუშაკს, რომლებიც კომპლექსურად მუშაობენ. განსაკუთრებით მნიშვნელოვანია პედაგოგის საქმე, რომელიც ცდილობს, ცენტრში გატარებული დღეები საინტერესო გახადოს ბავშვებისთვის.
როცა ბავშვები ერთობიან, დედებიც მშვიდად გრძნობენ თავს. კმაყოფილება იგრძნობა მათ სიტყვებში:
- უღრმესი მადლობა ყველას სითბოსა და სიმყუდროვისთვის, გემრიელი კერძებისთვის. ჩვენი შვილების ღიმილისთვის. იმისთვის, რომ ძალას გვაძლევთ...
- ამ დღეებში მშვიდად მძინავს, თავი არ მტკივა. ბევრ პოზიტივს და სასარგებლო ინფორმაციას ვიღებ. მადლობა ყველას, ვინც ეს კომფორტი შეგვიქმნა…
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
მარინა სტეპანენკო ამ გაზაფხულზე ქუთაისში აპირებდა ჩამოსვლას. მეგობარი ეპატიჟებოდა და, რახანია, უნდოდა ენახა აქაურობა.
უფრო ადრე მოხვდა, ვიდრე ელოდა. უკრაინის ომის გამო. შვილებთან ერთად 8 მარტს ჩამოფრინდა პოლონეთიდან.
მისი ფეისბუქგვერდის პოსტიდან:
„საქართველო. თბილი, საყვარელი, მყუდრო. აეროპორტში გამოსვლისას იწერენ ჩამოსულების კონტაქტებს, სთავაზობენ საცხოვრებელს და უფასო სადილს. იძლევიან ნომერს საგანგებო სიტუაციაში დაკავშირებისთვის. ბავშვებთან ერთად სტუმრად ვარ. კრაკოვიდან გამოვფრინდით“.
ფონდი „სოხუმის“ წარმომადგენლები პირველივე დღეებში ვესტუმრეთ მარინას ოჯახს. გავიზიარეთ მისი დარდი ოჯახის, კიევში დარჩენილი მეუღლის და მშობლების გამო. სურსათი მივუტანეთ, სათამაშოები, ტანსაცმელი. მაშინ გავიგეთ, რომ ფსიქოლოგია. მივხვდით, რომ მას ყველაზე უკეთ შეეძლო თანაკუთხელების დახმარება.
მარინა აღნიშნავს:
კარგი სიახლე გვაქვს: ქუთაისის მერიაში მხარი დაუჭირეს ჩვენს წინადადებას - უკრაინელებისთვის საქალაქო ტრანსპორტში უფასო მგზავრობის თაობაზე. ასევე გაიცემა 100-ლარიანი სასურსათო ვაუჩერები და კვლავინდებურად ხდება ბინების დაქირავება.
122 ადამიანი – ასეთია ჩვენი საკონტაქტო ბაზა. ეს უკრაინელი ლტოლვილები ამჟამად საქართველოში იმყოფებიან და ჩვენ გვიკავშირდებიან.
ივნისში 16 ოჯახს გაეწია დახმარება, ზოგიერთს მეორედ, ერთ ოჯახს კი მესამედ, რადგან ჩვენი ორგანიზაციის გარდა მას არავინ ეხმარება.
ივსება მოხალისეთა სია: გვწერენ ადამიანები, რომელთაც უნდათ განსაცდელში ჩავარდნილი ადამიანების დახმარება. ზოგიერთს თანხა გადაურიცხეს, ზოგს საყოფაცხოვრებო ნივთები შეუძინეს. ვიპოვეთ ეტლი ახალშობილისთვის, გავაგზავნეთ რუსთავში ბავშვისთვის საჭირო სხვა ნივთებთან ერთად.
ჩვენი ძვირფასი უკრაინელები მონაწილეობდნენ ქალთა ფონდი „სოხუმის“ ორგანიზებულ ორ ღონისძიებაში:
1 ივნისს, ბავშვთა დაცვის საერთაშორისო დღეს, ოფისში მოვიწვიეთ უკრაინელი ქალები და ბავშვები. მათთვის მოეწყო ჩვენი თანამშრომლების მომზადებული გემრიელი ქართული კერძების პრეზენტაცია. მათ ასევე სამახსოვრო საჩუქრები გადავეცით. სტუმრებმა თავიანთი ამბები გვიამბეს. ბევრი სახალისო და სევდიანი მომენტი იყო.
„ყოველი ახალი თვე ახალი შესაძლებლობაა, გაიზარდო სამოქალაქო განათლების თვალსაზრისით, მიხარია თქვენთან ურთიერთობა, რადგან იმ თემებზე ვსაუბრობთ, რომლებიც დღეს ყველაზე დიდი გამოწვეევა ჩვენი თაობისთვის.“
„პანდემიამ მოგვიტანა ჩაკეტილობა, გაუცხოება... ეს ტრენინგები კი გულახდილი საუბრის, აზრების გაცვლის და საკუთარი როლის განსაზღვრის შესაძლებლობას გვაძლევს“.
ეს ტრენინგის მონაწილეთა სიტყვებია.
ქალთა ფონდმა „სოხუმმა“ ივნისის ბოლო ტრენინგები გამართა სენაკის, სამტრედიის და ქობულეთის მუნიციპალიტეტების ახალგაზრდობის გაძლიერების ცენტრებში.
10 მუნიციპალიტეტში დასრულდა აქტიური სატრენინგო კურსი კონფლიქტის ესკალაციის და გენდერული თანასწორობის თემებზე.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)