დასავლეთ საქართველოს 9 მუნიციპალიტეტში მოქმედ ქალთა მხარდაჭერის ცენტრებში ყოველთვიურად ტარდება ძალადობის მონიტორინგი. შემდგომ ხდება მიღებული ინფორმაციის გადამისამართება ფონდი „სოხუმის“ იურისტთან და ფსიქოლოგთან.
აპრილში იდენტიფიცირებული იყო ძალადობის 11 ქეისი - ძირითადად, ფსიქოლოგიური და ეკონომიკური ძალადობა, აგრეთვე ფიზიკური ძალადობის 2 შემთხვევა. 1 ქალს მიენიჭა ოჯახში ძალადობის მსხვერპლის სტატუსი, სამმა ქალმა მუშაობა განაგრძო ფსიქოლოგთან და ამდენივემ - იურისტთან.
ფონდი „სოხუმის“ ქალთა მხარდაჭერის ცენტრის იურიდიული მომსახურებით აპრილში სამმა ადამიანმა ისარგებლა. ერთმა ოზურგეთში და ორმა - ქუთაისში.
მომართვა იყო ოჯახურ დავებსა და ოჯახური ძალადობის შემთხვევებზე. იურისტ კონსულტანტებმა მოამზადეს შესაბამისი დოკუმენტები და გაუწიეს კონსულტაციები. ისინი რეგულარულ მონიტორინგს აწარმოებენ ყველა შემთხვევაზე.
კრიზისულ ოჯახებთან თანამშრომლობა კომპლექსურია და ფსიქოლოგთან ერთად კონფლიქტოლოგიც ერთვება. თვის განმავლობაში სამ ოჯახთან წარიმართა მუშაობა. მიზეზი სხვადასხვა: ალკოჰოლი, უშვილობა, ხასიათის შეუთავსებლობა... თითოეული შეხვედრის შემდეგ იქმნება ინდივიდუალური გრაფიკი კრიზისული სიტუაციის დასაძლევად.
სიტუაციის ანალიზიდან გამომდინარე, სეანსი შესაძლოა, რამდენიმე თვე გაგრძელდეს.
შეხვედრიდან შეხვედრამდე წყვილებს საშუალება აქვთ, ონლაინ-კონსულტაციით ისარგებლონ. აღსანიშნავია, რომ მამაკაცები მზად არიან ითანამშრომლონ ფსიქოლოგთან და დაძლიონ კრიზისი.
აპრილი აქტიური თვე იყო ფონდი „სოხუმის“ ფსიქოლოგის მუშაობაში. სხვადასხვა პრობლემაზე ინდივიდუალური ფსიქოთერაპიული კონსულტირება მიიღო ექვმა ადამიანმა, ხოლო 14-მა – ტელეფონითა და სკაიპით. ფსიქოთერაპია გაიარეს ოჯახურმა წყვილებმა, იყო ასევე მუშაობა ტრავმებთან დაკავშირებით.
ფოთის ქალთა მხარდაჭერის ცენტრმა მცირე პროექტის „ჯანსაღი ცხოვრების წესის კულტურის დანერგვა მოსწავლე ახალგაზრდებში“ ფარგლებში ჩატარდა საინფორმაციო შეხვედრა მე-7 საჯარო სკოლის მოსწავლეებთან თემაზე: მავნე ჩვევები და მისი დაძლევის მექანიზმები.
- ალკოჰოლიზმი, ნარკომანია, აზარტული თამაშები, სიგარეტზე დამოკიდებულება - აქტუალური მავნე ჩვევები. როგორია საზოგადოების დამოკიდებულება და რა მექანიზმები არსებობს მათ წინააღმდეგ - დისკუსია, ძირითადად, ამ საკითხებზე გაიმართა.
შეხვედრას მოსწავლეები და პედაგოგები ესწრებოდნენ. მათი აზრით, ახალგაზრდებს უნდა ჰქონდეთ ინფორმაცია მავნე ჩვევებსა და მათ ნეგატიურ შედეგებზე, რაც პრობლემის პრევენციისთვის მნიშვნელოვანია.
სოფელ ნახახულევში (ხონის მუნიციპალიტეტი) ვორკშოპი გაიმართა. ეს ქალთა მხარდაჭერის ცენტრის მცირე პროექტით „არაძალადობრივი მომავალი თაობა“ იყო დაგეგმილი. ვორკშოპი მიეძღვნა ბულინგს, როგორც ძალადობის ერთ-ერთ სახეს. შეხვედრას ესწრებოდნენ სკოლის მოსწავლეები, საბავშვო ბაღის გამგე, ლოგოპედი, ბიბლიოთეკარი. განხილულ იქნა ბულინგის არსი და სახეები: სიტყვიერი, ემოციური, ფიზიკური, კიბერბულინგი. მონაწილეებმა ბევრი აუცილებელი ინფორმაცია შეიტყვეს.
„ჰარმონიული გარემო პატარებისათვის“ - ასე ჰქვია წყალტუბოს ქალთა მხარდაჭერის ცენტრის მცირე პროექტს, რომელიც ფონდი „სოხუმის“ და წყალტუბოს მუნიციპალიტეტის გენდერული თანასწორობის საბჭოს მხარდაჭერით ხორციელდება. 24 აპრილს პროექტით დაგეგმილი მესამე ტრენინგი ჩატარდა. მასში მონაწილეობდნენ წყალტუბოს მუნიციპალიტეტის საყულიის, გეგუთის, პატრიკეთის, ტყაჩირის, ოფშკვითის, ახალი საყულიის, გუმბრინის, ოფურჩხეთის, რიონისა და ცხუნკურის საბავშვო ბაღების მენეჯერები და პედაგოგები. ისინი გაეცნენ ინფორმაციებს გენდერზე, ძალადობაზე, ბულინგზე, გენდერულ სტერეოტიპებზე, პრევენციულ მექანიზმებზე. და, როგორც აღნიშნეს, ეს ცვლილებების დასაწყისია მათ აზროვნებაში, მიდგომებში, მოქმედებაში…
ფონდი „სოხუმის“ ქალთა მხარდაჭერის ცხრა ცენტრმა (ქუთაისი, წყალტუბო, ხონი, თერჯოლა, სენაკი, ფოთი, ზუგდიდი, ოზურგეთი, ლანჩხუთი) თავის მუნიციპალიტეტში ჩაატარა საინფორმაციო შეხვედრები ქალაქებისა და სოფლების მოსახლეობასთან, ქალებთან და ახალგაზრდებთან, დევნილთა კოლექტიურ ცენტრებში, საბავშვო ბაღის და სკოლის პედაგოგებთან, ადგილობრივი თვითმმართველობის წარმომადგენლებთან და გენდერული თანასწორობის საბჭოს წევრებთან.
შეხვედრებზე განხილული იყო შემდეგი თემები: კანონი ქალთა მიმართ/ოჯახში ძალადობის წინააღმდეგ; შემაკავებელი ორდერი, როგორც დამცავი მექანიზმი; ეროვნული სამოქმედო გეგმა; ძალადობის გავლენა ბავშვის ფსიქოემოციურ მდგომარეობაზე; პრევენციული ღონისძიებების აუცილებლობა.
ასეთი შეხვედრების შედეგად იზრდება მიმართვიანობა ქალთა მხარდაჭერის ცენტრებში და მოთხოვნა ფონდი „სოხუმის“ უფასო სერვისებზე - ძალადობის მსხვერპლის მხარდაჭერის კუთხით.
სენაკის ქალთა მხარდაჭერის ცენტრის მცირე პროექტის ფარგლებში სოფელ ხორშში ჩატარდა ვორკშოპი თემაზე „ქალთა და ოჯახში ძალადობა და მისი გავლენა მომავალ თაობაზე“. ვორკშოპის დროს ისაუბრეს კანონზე, დამცავ მექანიზმებზე. მუშაობაში ჩაერთო სოფლის რწმუნებული, მაჟორიტარი დეპუტატი, სხვადასხვა ასაკის 15-მდე ქალი.
შემდეგ ვორკშოპის მონაწილემ სოფელ ქვედა ხორშში, თავის თემში საინფორმაციო შეხვედრა ჩაატარა. შეხვედრის მონაწილეებმა ინტერესით მოისმინეს ინფორმაციები ძალადობის საკითხებზე.
ხურჩა/კოკის (ზუგდიდის მუნიციპალიტეტი) ქალთა მხარდაჭერის ცენტრის მცირე პროექტის ფარგლებში სოფელ ორსანტიაში ჩატარდა მრგვალი მაგიდა თემაზე „ქალთა მიმართ ძალადობა და პრევენციული ნაბიჯები“. გაიმართა დისკუსია ძალადობის და მენტალიტეტის გავლენაზე ბავშვთა და მოზარდთა ფსიქოემოციურ მდგომარეობაზე, ისაუბრეს მსხვერპლის მხარდაჭერის პროგრამებზე.
ეს იყო ერთ-ერთი აქტივობა ხურჩა/კოკის ქალთა მხარდაჭერის ცენტრის პროექტში „უთხარი არა ძალადობას - იყავი აქტიური!“