ქუთაისში, დევნილთა კომპაქტური ჩასახლების ადგილებში ოქტომბრის განმავლობაში გაიმართა 12 ფსიქოლოგიური ჯგუფური და 3 ინდივიდუალური კონსულტაცია. შეხვედრებში მონაწილეობა მიიღო 82 ქალმა 20-დან 65 წლამდე. პირველად მონაწილეობდა 9 ქალი. საუბრის თემა იყო - რატომაა ქალებისთვის აუცილებელი საკუთარი ღირსების განცდა.
ღირსებას რამდენიმე შემადგენელი აქვს: საკუთარი თავის მიმართ სიყვარული, თავდაჯერებულობა და საკუთარი თავის მიღება ისეთად, როგორიც ხარ. შეხვედრები გულახდილი, საინტერესო და პრაქტიკული გამოვიდა.
ივნისში ჩატარდა 12 შეხვედრა ფონდი „სოხუმის“ იურისტთან ქუთაისის სხვადასხვა კოლექტიურ ცენტრში. მონაწილეებს მიეწოდათ ინფორმაცია სიტყვის და გამოხატვის თავისუფლების კანონზე და „საქართველოს ოკუპირებული ტერიტორიებიდან იძულებით გადაადგილებულ პირთა-დევნილთა“ შესახებ კანონზე.
გაიცა ინდივიდუალური კონსულტაციები სპეციალური განცხადების მოსამზადებლად და ალტერნატიული საცხოვრებელი ფართის მისაღებად.
სექტემბერში გაიმართა 12 შეხვედრა აფხაზეთიდან იძულებით გადაადგილებულ პირებთან. შეხვედრებს ესწრებოდა 82 ქალი. მათ მიეწოდათ ინფორმაცია შემდეგ საკითხზე: კონფლიქტის მოგვარება მედიაციის გზით. ასევე გაიცა ორი ინდივიდუალური კონსულტაცია - ერთ-ერთ მონაწილეს დეიდის გადაყვანა სურს მოხუცთა თავშესაფარში. მეორე კი ხელშეკრულების პირობების დარღვევით გამოწვეული ზიანის ანაზღაურებისათვის გადამისამართდა საიაში.
მონიტორინგის შედეგად გაირკვა, რომ უკვე დაკმაყოფილდა მოთხოვნა ერთ-ერთი ბენეფიციარისა, რომელსაც წინა თვეებში გაეწია კონსულტაცია.
ქუთაისში, დევნილთა კომპაქტური ჩასახლების ადგილებში მაისში ჩატარდა 12 ჯგუფური ფსიქოლოგიური შეხვედრა 84 ქალბატონის მონაწილეობით. აგრეთვე გაიმართა ინდივიდუალური კონსულტაციები საოჯახო ურთიერთობების პრობლემებთან დაკავშირებით.
საუბრების ძირითადი თემა იყო საოჯახო კომუნიკაციის მოდელები და ფორმები. ხალხური სიბრძნე ამბობს: „ვინც გაფრთხილებულია, ის შეიარაღებულია“. რაც მეტი გვეცოდინება ოჯახურ ურთიერთობებზე, მით ნაკლებ შეცდომას დავუშვებთ ცხოვრებაში. კონსულტაციებს სწორედ ეს მიზანი ჰქონდა.
ნოემბერში ჩატარდა 12 იურიდიული საკონსულტაციო-საინფორმაციო შეხვედრა ადგილობრივ და დევნილ მოსახლეობასთან. შეხვედრის მონაწილეებმა გაიგეს 16-დღიანი კამპანიის შესახებ. მათ ასევე მიეწოდათ ინფორმაციები სამართლებრივ საკითხებზე. იყო ინდივიდუალური კონსულტაციებიც. დაიწერა განცხადება და გაიგზავნა კიდეც ქუთაისის მერის სახელზე. მონიტორინგი ამ საკითხზე გაგრძელდება მომავალში.
დეკემბრის განმავლობაში ქუთაისში ჩატარდა 12 იურიდიული საინფორმაციო-საკონსულტაციო შეხვედრა ადგილობრივ და დევნილ მოსახლეობასთან. შეხვედრებს ესწრებოდა 73 ქალი. მათ მიეწოდათ ინფორმაცია ოჯახში ძალადობის წინააღმდეგ მიმართულ კანონზე და მასში სამომავლოდ შესატან ცვლილებებზე. გაიცა ერთი ინდივიდუალური კონსულტაცია ალიმენტის შესახებ კანონზე და ადვოკატირებისთვის ბენეფიციარის გადამისამართება მოხდა საიაში.
მონიტორინგის შედეგად ფონდი „სოხუმის“ იურისტმა გაიგო, რომ ორმა ოჯახმა განსახლებასთან დაკავშირებით გაგზავნილ განცხადებაზე მიიღო დადებითი პასუხი და მოხდა მათი ალტერნატიული ფართით დაკმაყოფილება.
„კონფლიქტების ადრეული გაფრთხილება, გენდერზე ორიენტირებული სისტემით“ - რატომ შეირჩა მაინცდამაინც ეს მიმართულება, რა იყო მთავარი მიზანი, რა მოგცათ პროექტმა, შვედეთის ქალთა ფონდთან Kvinna till Kvinna-სთან ურთიერთობამ, რა არის საქმიანობის ძირითადი მიღწევა, რამდენად ეფექტური იყო მუშაობა პარალელურად აფხაზ პარტნიორებთან, რა იყო ყველაზე მთავარი სირთულე მუშაობის პროცესში, რა მიმართულებით გააგრძელებდით მუშაობას.
ამ საკითხებზე გაიმართა საუბარი შეფასებით ვორკშოპზე, რომელიც დონორი ორგანიზაციის ინიციატივით გაიმართა ონლაიფორმატით 14-15 დეკემბერს. პირველ დღეს ქართულმა და აფხაზურმა ჯგუფებმა ცალ-ცალკე შეაფასეს თავიანთი მუშაობა, მეორე დღეს კი ჩატარდა გაერთიანებული შეხვედრა, მოხდა ინფორმაციების გაცვლა, შეფასდა მიღწეული და გაკეთდა აქცენტი სამომავლო პერსპექტივებზე.
ფონდი „სოხუმის“ ქალთა საინიციატივო ჯგუფები აქტიურად მუშაობენ იმ პრობლემებზე, რომლებიც აქტუალურია აფხაზეთის კონფლიქტის გამყოფი ხაზის სოფლებში. კოვიდპანდემიის პირობებში ახალი პრობლემებიც გაჩნდა, მათ შორის ზოგი ინდივიდუალურია, ზოგიც - საერთო. აქტივისტი ქალებმა მსჯელობენ, აანალიზებენ, როგორ უნდა მოგვარდეს ეს პრობლემები, როგორ გაგრძელდეს ადვოკატირების პროცესი. საინიციატივო ჯგუფების მუშაობა თვითმმართველობებთან თანამშრომლობით გრძელდება პრობლემათა საბოლოო მოგვარებამდე.
ქალთა საინიციატივო ჯგუფები კონფლიქტის გამყოფ ხაზთან მდებარე სოფლებში აგრძელებენ შეხვედრებს და მსჯელობენ თემში არსებულ პრობლემებზე, რომლებიც კოვიდპანდემიამ განსაკუთრებით გაამძაფრა.
პანდემიის შიში, ფსიქოლოგიური საჭიროებები, სამუშაოს დაკარგვა, მედიკამენტებზე ხელმიუწვდომლობა, უტრანსპორტობა და გადაადგილების შეზღუდვა - ეს იმ პრიორიტეტულ პრობლემათა ჩამონათვალია, რომლებიც ქალთა საინიციატივო ჯგუფების ადვოკატირების გეგმაში გაიწერა. ადვოკატირება ადგილობრივ თვითმმართველობებთან ერთად გაგრძელდება.