ახალგაზრდული კლუბის საინფორმაციო შეხვედრები გაიმართა ქუთაისის 33-ე სკოლაში, ხაჯალიასა (ლანჩხუთის მუნიციპალიტეტი) და ზედა სიმონეთში (თერჯოლის მუნიციპალიტეტი). ამით დასრულდა დაგეგმილი ცხრა შეხვედრა ეთიკის და ესთეტიკის, ჯანსაღი ცხოვრების წესის და სქესობრივი აღზრდის საკითხებზე.
როგორც სხვა კლუბებში, აქაც დიდი იყო ახალგაზრდების ინტერესი, ჩართულობა. გამოიკვეთა არაერთი პრობლემა: ნარკოტიკები, ნაადრევი ქორწინება, მიგრაცია, გაუცხოება ოჯახურ ურთიერთობებში…
- საინტერესოა მსგავსი თემების განხილვა. შეხვედრებზე ჩვენ ბოლომდე ვიხსნებით და ვთავისუფლდებით. ვიღებთ შენიშვნებს, რჩევებს. ჩვენ გვისმენენ, რაც იშვიათობაა, - აღნიშნა ერთ-ერთმა მონაწილემ.
კონფლიქტოლოგიის თემაზე ხუთთვიანი მუშაობა შეჯამდა ვორკშოპებზე, რომლებიც ჩატარდა სოფელ ქვედა სიმონეთის (თერჯოლის მუნიციპალიტეტი), სოფელ ნიგვზიანის (ლანჩხუთის მუნიციპალიტეტი) და ქუთაისის №15 საჯარო სკოლებში.
მოსწავლეებმა სინანულით აღნიშნეს ვორკშოპების დასრულების შესახებ, პედაგოგებმა კი თანამშრომლობის გაგრძელების იმედი დაიტოვეს. მათი თქმით, მოსწავლეები ძალიან დაინტერესდნენ თემით, ბევრი რამ ისწავლეს კონფლიქტების მართვის კუთხით, სიხარულით და ინტერესით ელოდნენ ყოველ მომდევნო შეხვედრას. ამიტომ ისინი მიიჩნევენ, რომ მუშაობა უნდა გაგრძელდეს.
სოფელ ერგეტაში (ზუგდიდის მუნიციპალიტეტი), ფოთის კერძო სკოლაში და სოფელ თეკლათში (სენაკის მუნიციპალიტეტი) ჩატარდა ახალგაზრდული კლუბის შეხვედრები თემაზე: ეთიკისა და ესთეთიკის ნორმები, ჯანსაღი ცხოვრების წესი და სქესობრივი ცხოვრების წესი - იარაღი ძალადობის პრევენციისთვის.
ახალგაზრდებმა ბევრ პრობლემაზე გაამახვილეს ყურადღება, მათ შორის ნაადრევ ქორწინებაზე, რაც აფერხებს ახალგაზრდების განვითარებას, დამოუკიდებლობას და
შეხვედრების მონაწილეების აზრით, ასეთი გულახდილი საუბრები და კომპეტენტური რჩევები ხელს შეუწყობს პრობლემების მოგვარებას, კონფლიქტებისა და ძალადობის პრევენციას.
ივნისის პირველი სამი შეხვედრა ჩატარდა ნახახულევის (ხონის მუნიციპალიტეტი), გურიანთას (ოზურგეთის მუნიციპალიტეტი) საჯარო სკოლების და წყალტუბოს კერძო სკოლა „ოცნებას“ ახალგაზრდულ კლუბებში. შეხვედრების თემა იყო: ეთიკისა და ესთეტიკის, ჯანსაღი ცხოვრების, სქესობრივი აღზრდის ნორმები.
მონაწილეები მაქსიმალურად ჩაერთნენ მუშაობაში, ისაუბრეს ინფორმაციის დეფიციტზე, ასეთი სწავლების აუცილებლობაზე. იყო დისკუსიები, აზრთა დაფიქსირება, ანალიზი. განსაკუთრებით საინტერესოდ გამოჩნდა მოზარდების თვალით დანახული პრობლემები და მათი სურვილი, მოაგვარონ, იპოვონ გამოსავალი, უკეთესი გახადონ ცხოვრება...
დასრულდა ვორკშოპების ციკლი სენაკის კერძო სკოლა-ლიცეუმში, სოფელ ორულუს (ზუგდიდის მუნიციპალიტეტი) და ფოთის №1 საჯარო სკოლებში. მოსწავლეების თქმით, კონფლიქტოლოგიის საკითხებზე ჩატარებული ვორკშოპები საჭირო და აუცილებელია მათთვის. ხაზი გაუსვეს იმასაც, რომ ინფორმაცია მიწოდებული იყო მარტივ და გასაგებ ენაზე, მუშაობა საინტერესოდ და ხალისიანად მიმდინარეობდა.
ვორკშოპებს პედაგოგებიც ესწრებოდნენ. მათ აღნიშნეს, რომ არასამთავრობო ორგანიზაციები ხელს უწყობენ მოსწავლეთა ჯანსაღი ცნობიერების ჩამოყალიბებას, მათ ინფორმირებას და გააქტიურებას. ვორკშოპებიც ამის დასტურია და საუკეთესო შესაძლებლობა - ადრიდანვე ისწავლონ კონფლიქტების მართვა.
კონფლიქტოლოგიის საკითხებზე შემაჯამებელი ვორკშოპები ჩატარდა კონტუათის (ხონის მუნიციპალიტეტი), გვიშტიბის (წყალტუბოს მუნიციპალიტეტი) და ოზურგეთის მე-4 საჯარო სკოლებში. ვორკშოპებს მოსწავლეები, დირექტორები და პედაგოგები ესწრებოდნენ. აღინიშნა, რომ მსგავსი ტიპის შეხვედრები ძალიან საჭიროა, რადგან კონფლიქტების მართვა საკმაოდ აქტუალურია.
პედაგოგების თქმით, არასამთავრობო სექტორი სკოლებს ეხმარება, რომ ახალგაზრდებმა შეძლონ ემოციების მართვა და ადამიანებთან ურთიერთობა კონფლიქტების გარეშე. მათ აქვთ შესაძლებლობა, იყვნენ ლიდერები - უფრო განვითარებულები, თამამები, სამართლიანები - და იცხოვრონ არაძალადობრივ გარემოში.
სენაკის (სოფელ თეკლათში), ხონის (სოფელ ნახახულევში) და ფოთის ახალგაზრდულ კლუბებში გაიმართა შეხვედრები ტოლერანტობის თემაზე.
მონაწილეთა ინტერესი დიდი იყო. ეს გამოიხატა აქტიურ დისკუსიებში, როლურ თამაშებში. ყველას ჰქონდა საკუთარი აზრის გამოთქმის საშუალება. კლუბის წევრები ამ თემაზე შეხვედრების ჩატარებას აპირებენ თანატოლებთან.
ფონდი „სოხუმის“ კონფლიქტოლოგთან ერთად ჩატარებული ვორკშოპების შემდეგ „კონფლიქტის მართვის“ ჯგუფის წევრებმა დაიწყეს საინფორმაციო შეხვედრები თავიანთ სკოლებში.
ქალაქ ფოთის №1, სოფელ ნიგვზიანის (ლანჩხუთის მუნიციპალიტეტი) და სოფელ გვიშტიბის (წყალტუბოს მუნიციპალიტეტი) ჯგუფების წევრებმა უკვე ჩაატარეს რამდენიმე ასეთი შეხვედრა, რომელსაც დირექტორი და პედაგოგები ესწრებოდნენ.
მოსწავლეთა თქმით, ძალიან საინტერესოა წამყვანის როლში ყოფნა, ცოდნის გაზიარება, გამოცდილების შეძენა...
მამაკაცის როლი ოჯახსა და საზოგადოებაში - ეს იყო ძირითადი სასაუბრო თემა ვაჟებთან გამართულ მორიგ შეხვედრებზე. მოზარდები საზოგადოების ნაწილად მიიჩნევენ თავს და ყურადღებას ამახვილებენ საკუთარ როლზეც... მათი აზრით, მამაკაცმა ოჯახი უნდა დაიცვას, მონაწილეობა მიიღოს ყველა პროცესში, მათ შორის - შვილების აღზრდაში. ასევეა საზოგადოებაშიც - ქალები და მამაკაცები თანაბარი უფლებებით უნდა სარგებლობდნენ და ხელი შეუწყონ ჰარმონიულ ურთიერთობებს, არაძალადობრივი გარემოს შექმნას.
მაისში შეხვედრები გაიმართა სენაკის (1 მაისი), ხონის (2 მაისი), ლანჩხუთის (3 მაისი), წყალტუბოს (6 მაისი), ფოთის (7 მაისი), ზუგდიდის (8 მაისი,) თერჯოლის (10 მაისი), ოზურგეთის (14 მაისი), ქუთაისის (15 მაისი) მუნიციპალიტეტებში. მუშაობა აქტიურად მიმდინარეობს ჯგუფებში, სადაც მხოლოდ ბიჭები არიან...
სხვადასხვა მეთოდის გამოყენებით ჩატარდა ვორკშოპები ნიგვზიანის (ლანჩხუთის მუნიციპალიტეტი), ქვედა სიმონეთის (თერჯოლის მუნიციპალიტეტი) და ქუთაისის მე-15 საჯარო სკოლის მოსწავლეებთან.
მოსწავლეების შეფასებები ასეთია:
„შევიტყვე, როგორ მოვიქცე კონფლიქტურ სიტუაციებში“, „ხანდახან ბრაზი იმდენად მიტევს, რომ ვერ ვაკონტროლებ ემოციებს, მაგრამ ამ შეხვედრების შემდეგ უფრო მშვიდი გავხდი“, „გავიგე, რომ ცხელ გულზე არ მივიღო გადაწყვეტილება“, „ძალიან კარგია ასეთი სახის შეხვედრები. უკეთესია, უფრო ხშირად ვხვდებოდეთ ერთმანეთს“.