ივნისში ისევ ონლაინ მუშაობა ჩატარდა ვაჟებთან. აქტივობებში ჩართულნი იყვნენ ჯგუფები თერჯოლის, ზუგდიდის, წალენჯიხის, ქუთაისის, სენაკის, ფოთის, ლანჩხუთის მუნიციპალიტეტების საჯარო სკოლებიდან. იყო საინტერესო განხილვები, ვიდეორგოლების ჩვენება, შემაჯამებელი შეხვედრის დაგეგმვა...
გაგრძელდა ჩართვები პედაგოგებთან - ისინი საუბრობდნენ თავიანთ გამოცდილებაზე, თუ რა გზები იპოვეს ონლაინ მუშაობის გასაუმჯობესებლად. მათი გამოცდილებით, ვიდეორგოლების გამოყენება ერთი საუკეთესო ხერხია ბიჭების დასაინტერესებლად.
იყო კიდევ ერთი სიახლე - დებატების კონკურსი. კონკურსში 8 ბიჭი მონაწილეობდა, იყვნენ გამოცდილი მსაჯები. 27 ივნისს გაიმართა ფინალი და გამოვლინდა დებატების კონკურსის გამარჯვებული დავით გეგუჩაძე, სამტრედიიდან.
ასე საინტერესოდ ჩაიარა ივნისმა...
ჰარმონიული ურთიერთობა ოჯახის წევრებს შორის ძალადობის პრევენციისთვის - ამ თემას მიეძღვნა ონლაინ ჩართვები ფოთის 21-ე საჯარო სკოლის, მენჯის (სენაკის მუნიციპალიტეტი) და ლიას (წალენჯიხის მუნიციპალიტეტი) საჯარო სკოლების ახალგაზრდულ კლუბებთან.
სადისკუსიო თემა იმდენად აქტუალურია, რომ ახალგაზრდები დიდი ინტერესით ჩაერთნენ განხილვაში. ისინი საუბრობდნენ პრობლემებზე, რომლებიც განსაკუთრებული სიმწვავით დადგა პანდემიის პირობებში. მათი თქმით, ოჯახი ყველაზე დიდი საყრდენია... ერთ-ერთ შეხვედრაზე მოზარდებმა სიყვარული „აუხსნეს“ ოჯახის წევრებს, ხმამაღლა ამბობდნენ, როგორ უყვართ დედა, მამა, და, ძმა.. ეს ძალიან შთამბეჭდავი იყო. და როგორც თავად აღნიშნეს, ეს დღე დაუვიწყარი იქნება მათთვის.
კიდევ სამი ონლაინ შეხვედრა მოეწყო - ამჯერად ფახულანის მეორე საჯარო სკოლის (წალენჯიხის მუნიციპალიტეტი), ძევრის (თერჯოლის მუნიციპალიტეტი) და დვაბზუს (ოზურგეთის მუნიციპალიტეტი) საჯარო სკოლების კონფლიქტის მართვის ჯგუფის წევრებთან.
მოსწავლეებთან ერთად განხილულ იქნა ვიდეოგაკვეთილი თემაზე „კონფლიქტის მშვიდობიანად მოგვარების უნარები“, კონფლიქტურ სიტუაციაში ქცევის წესები...
მოსწავლეებს მიეცათ დავალება - დაწერონ, რა გავლენა იქონია მათზე პროექტმა, კონფლიქტოლოგიის გაკვეთილებმა. კონფლიქტის მართვის ჯგუფის წევრების აქტივობა გამოჩნდება ფონდი „სოხუმის“ ფეისბუქგვერდზე https://www.facebook.com/fsokhumi/
კონფლიქტოლოგმა რამდენიმე ონლაინ შეხვედრა ჩაატარა პროექტის მონაწილეების დედებთან. გაირკვა, რომ მათ მოსწონთ პროექტი „კონფლიქტების მართვის სწავლება სკოლებში“. აღნიშნავენ პრობლემის აქტუალობას. მიაჩნიათ, რომ აქტუალურ თემებზე საუბარი აუცილებელია ყველა კლასის მოსწავლესთან, რათა მათ იცოდნენ კონფლიქტების მშვიდობიანად მოგვარების გზები.
დედების თქმით, ფონდი „სოხუმი“ სერიოზული, კვალიფიციური არასამთავრობო ორგანიზაციაა და დარწმუნებულები არიან, რომ ფონდთან თანამშრომლობა ბევრს აძლევს მოზარდებს - საჭირო ინფორმაციას, განვითარებას, კარგ უნარ-ჩვევებს, თავდაჯერებულობას...
შეხვედრები ისევ დისტანციურად გაიმართა სუფსის (ლანჩხუთის მუნიციპალიტეტი), ფოთის შპს „გიმნაზიის“ და ქუთაისის მეცამეტე სკოლის კონფლიქტის მართვის ჯგუფის წევრებთან.
„კონფლიქტის მშვიდობიანად მოგვარების უნარები“ - ასეთი იყო ივნისის თემა. ონლაინ ჩართვებს აქტიური დისკუსია მოჰყვა. მოსწავლეებს მიეცათ რეკომენდაცია, მოუსმინონ ფონდი „სოხუმის“ ფეისბუქგვერდზე განთავსებულ ვიდეოგაკვეთილს და გამოხატონ კომენტარები. მათ საშინაო დავალებაც მიიღეს და უკვე დაიწყეს შესრულება. ზოგმა ვიდეომიმართვა ჩაწერა, ზოგმა საინტერესო ნახატი დახატა, ზოგმა ესე დაწერა და ზოგმა კიდევ - „წერილი სანდო ადამიანს“.
სამუშაო ციკლის ბოლოს კონფლიქტის მართვის ჯგუფის წევრები თავიანთ ფიდბეკსაც გაუზიარებენ კონფლიქტოლოგს. მოზარდების აქტიურობა კარგად ჩანს ფონდი „სოხუმის“ ფეისბუქგვერდზე https://www.facebook.com/fsokhumi/
ოჯახი, ოჯახის წევრებს შორის ჰარმონიული ურთიერთობა - ამ თემაზე გაიმართა ონლაინ ჩართვები ლანჩხუთის, ოზურგეთის და სოფელ ნაბაკევის (სამტრედიის მუნიციპალიტეტი) ახალგაზრდული კლუბების წევრებთან.
თაობათა ურთიერთობა, ოჯახი როგორც მთავარი ღირებულება, ოჯახი სახელმწიფოს მინიმოდელი - ამ საკითხებზე გაიმართა გულახდილი საუბარი ახალგაზრდებთან. დაფიქსირდა მათი ხედვა ოჯახის ფენომენთან დაკავშირებით, საინტერესო ისტორიები საკუთარი ცხოვრებიდან. ახალგაზრდების თქმით, ოჯახში ფსიქოლოგიური და ეკონომიკური ჰარმონიის მისაღწევად მნიშვნელოვანია პასუხისმგებლობის თანაბარი განაწილება.
თერჯოლის, ზუგდიდის, ქუთაისის ახალგაზრდულ კლუბებთან ონლაინ ჩართვები გაიმართა საინტერესო საკითხზე - ჰარმონიული ურთიერთობა ოჯახის წევრებს შორის ძალადობის პრევენციისთვის.
თემის განხილვამ გამოიწვია მონაწილეთა მაქსიმალური ჩართვა. ისინი საუბრობდნენ, რამდენად მნიშვნელოვანია მათთვის ოჯახური იდილია, მშობლების თანადგომა. ახალგაზრდები შეეხნენ ტრადიციებს, მშობლების ჩართულობას პროფესიის არჩევაში.
კლუბის ერთ-ერთმა წევრმა თქვა, რომ ამ თემაზე საუბარმა შეცვალა მისი დამოკიდებულება ოჯახის მიმართ, სიყვარულით აავსო და, როცა სიყვარულზე ფიქრობ, უფრო კეთილი ხდებიო.
2, 3 და 5 ივნისს ჩატარდა ონლაინ შეხვედრები ანაკლიის (ზუგდიდის მუნიციპალიტეტი), თეკლათის (სენაკის მუნიციპალიტეტი) და კულაშის (სამტრედიის მუნიციპალიტეტი) საჯარო სკოლების კონფლიქტის მართვის ჯგუფის წევრებთან.
მოსწავლეები გაეცნენ ივნისის თემას „კონფლიქტის მშვიდობიანად მოგვარების უნარები“. მოგვიანებით ფონდი „სოხუმის“ ფეისბუქგვერდზე აიტვირთა ეს ვიდეოგაკვეთილი.
შეხვედრების შემდეგ მოსწავლეებმა დაიწყეს დავალებების მომზადება - ვიდეომიმართვები, ესეები, ნახატები და უკუკავშირი - თუ რა გავლენა იქონია საპროექტო მუშაობამ მათზე.
გრძელდება „საუბარი დედებთან“. ივნისის პირველი შეხვედრა უკვე შედგა და ამის შესახებ ინფორმაციაც დაიბეჭდა ფეისბუქგვერდზე.
მაისში ვაჟებთან ონლაინ შეხვედრების თემა იყო „ტოლერანტობა“. ფონდი „სოხუმის“ ტრენერი დაუკავშირდა თერჯოლის, ზუგდიდის, წალენჯიხის, ქუთაისის, სენაკის, ფოთის, ლანჩხუთის მუნიციპალიტეტების საჯარო სკოლებს. ჩართვა მოხდა ჯგუფურადაც და ინდივიდუალურადაც. ვაჟები აღნიშნავენ, რომ ეს სიტყვა მათთვის უცხო არ არის, ხშირად ესმით, თუმცა მის შინაარსზე არასდროს უმსჯელიათ. ამიტომაც პირველი, რაც შეხვედრების დროს კეთდებოდა - იყო „ტოლერანტობის“ განმარტება. დიდი დრო დაეთმო იმაზე საუბარს, შეიძლება თუ არა ისწავლო ტოლერანტობა და რა მნიშვნელოვანია, ცხოვრობდე ტოლერანტულ საზოგადოებაში.
მუშაობაში იყო სიახლეც - ტრენერი ესაუბრა რამდენიმე მასწავლებელს, მათი გამოცდილების გასაზიარებლად. მასწავლებლების თქმით, ისინი მოსწავლეებთან მუშაობის დროს იყენებენ ვიდეორგოლებს, მულტფილმებს, პრეზენტაციებს, თანდათან პოზიტიური ნაბიჯები იდგმება ონლაინ სწავლების მხრივაც.
მაისის დასაწყისში სამი ონლაინ შეხვედრა ჩატარდა ახალგაზრდული კლუბის წევრებთან. ამჯერად ლანჩხუთის, ქუთაისის და სოფელ ნაბაკევის (სამტრედიის მუნიციპალიტეტი) სკოლების მოსწავლეები ჩაერთნენ. შეხვედრებზე განხილული იყო ძალადობის პრობლემა მოზარდებში, სკოლისა და ოჯახის როლი, დაცვის მექანიზმები. შეხვედრების მონაწილეებმა გულრფელად ისაუბრეს ძალადობის მიზეზებზე, მშობლებთან და მასწავლებელებთან ურთიერთობების პრობლემებზე, მოიყვანეს მაგალითები. აქცენტი გაკეთდა პანდემიის პირობებში გაზრდილ შემთხვევებზე და გამოსავალზე.