კიდევ სამი ვორკშოპი ჩატარდა ოქტომბერში - ზედა სიმონეთის (თერჯოლის მუნიციპალიტეტი), ლიის (წალენჯიხის მუნიციპალიტეტი), მელაურის (სამტრედიის მუნიციპალიტეტი) საჯარო სკოლებში. თემა - კონფლიქტის გაჩენა და გამომწვევი მიზეზები.
ფონდი „სოხუმის“ კონფლიქტოლოგთან ერთად მოსწავლეებმა კონკრეტული დავალებები და როლური თამაშები შეასრულეს. ისინი აქტიურად ერთვებიან დისკუსიაში, სწავლობენ გუნდში მუშაობას. მათ აინტერესებთ ვორკშოპები, რადგან ბევრ სიახლეს იგებენ და პრაქტიკულ რჩევებსაც იღებენ.
ახალგაზრდული კლუბების საინფორმაციო შეხვედრები გაიმართა კიდევ სამ სოფელში: ნიგვზიანი (ლანჩხუთის მუნიციპალიტეტი), ორსანტია (ზუგდიდის მუნიციპალიტეტი), ოზურგეთი (ოზურგეთის მუნიციპალიტეტი). ეს იყო მონაწილეთა აქტიური ჩართულობა, განსხვავებული ხედვების დაფიქსირება, როლური თამაშები, დისკუსიები...
ყოველივე ეს ხელს უწყობს მოსწავლეებში არაძალადობრივი, ტოლერანტული ბუნების ჩამოყალიბებას. უკუკავშირის დროს მათ აღნიშნეს, რომ თავისუფლი სივრცე, რომელიც კლუბებზე ეძლევათ, მნიშვნელოვანია მათი განვითარებისთვის.
10, 11 და 16 ოქტომბერს კონფლიქტის გამომწვევ მიზეზებზე ვორკშოპები ჩატარდა სოფელ ლესას (ლანჩხუთის მუნიციპალიტეტი), სოფელ განმუხურის (ზუგდიდის მუნიციპალიტეტი) და სოფელ გურიანთას (ოზურგეთის მუნიციპალიტეტი) საჯარო სკოლებში.
კონკრეტული სავარჯიშოების განხილვის შედეგად მოსწავლეებმა გაიგეს კონფლიქტის გამომწვევი მიზეზები: დამახინჯებული ინფორმაცია, განსხვავებული ღირებულებები და სხვა. ისინი აქტიურად იყვნენ ჩართულები პროცესში და როგორც ფიდბეკზე აღნიშნეს, ეს ცოდნა გამოადგებათ ყოველდღიურ ურთიერთობებში.
დამსწრე პედაგოგების თქმით, თემა აქტუალურია და ასეთი შეხვედრებიც აუცილებელია, რადგან ხელს უწყობს სასკოლო კლიმატის გაუმჯობესებას.
ქუთაისის 33-ე და ფოთის 21-ე საჯარო სკოლაში, აგრეთვე სოფელ ნოსირის (სენაკის მუნიციპალიტეტი) საჯარო სკოლაში ჩატარდა ახალგაზრდული კლუბის საინფორმაციო შეხვედრები ოჯახში ძალადობის პრევენციის თემაზე (მიზეზები, შედეგები, დაცვის მექანიზმები).
აქ იყო საინტერესო ჯგუფები, მონაწილეთა აქტიური ჩართულობა, როლური თამაშები. გამოიკვეთა პრობლემები. ერთ-ერთი მონაწილის თქმით, ზოგან არ შეცვლილა ქალთა მდგომარეობა. ახლაც ის პრობლემებია, რომლებიც ნაჩვენებია შესანიშნავ ქართულ ფილმში „ნატვრის ხე“ - როდესაც ადამიანების ბედს განსაზღვრავდა მახინჯი ტრადიცია, თემის სტერეოტიპული აზროვნება.
კონფლიქტის გამომწვევი მიზეზები განიხილეს მოსწავლეებთან გამართულ ვორკშოპებზე ფოთში - თამარ ფაჩულიას საავტორო სკოლა-გიმნაზიაში, სენაკის მე-3 და ქუთაისის მე-11 საჯარო სკოლებში. ვორკშოპებს სკოლების დირექტორები და პედაგოგებიც ესწრებოდნენ. როგორც ითქვა, ისინიც საუბრობენ ამ თემებზე, მაგრამ ბავშვები კონფლიქტოლოგთან უფრო თავისუფლად გრძნობენ თავს და მუშაობასაც მეტი ეფექტი აქვს. ეს უკუკავშირშიც ჩანს:
„ასეთი მიზეზები მართლაც არის ცხოვრებაში და ვორკშოპზე მიღებული რჩევები გამოსადეგია.“
„სახალისო სავარჯიშოებით ვისიამოვნეთ და ბევრიც ვისწავლეთ.“
„ვორკშოპი მდიდარი იყო სხვადასხვა დავალებით. სხვა დროსაც სიამოვნებით დავესწრები.“
სამივე სკოლის მოსწავლეები დაელოდებიან შემდეგ შეხვედრას.
არდადეგები დასრულდა და ისევ დაიწყო ვორკშოპები დასავლეთ საქართველოს 9 მუნიციპალიტეტის სკოლებში. 17, 18 და 20 სექტემბერს კონფლიქტის თემაზე ვორკშოპები გაიმართა ზედა სიმონეთში (თერჯოლის მუნიციპალიტეტი), განმუხურში (ზუგდიდის მუნიციპალიტეტი) და სენაკის მე-3 საჯარო სკოლაში.
მოსწავლეები აქტიურად ჩაერთნენ პროცესში. საინტერესოა მათი შეფასება:
„კმაყოფილი ვარ ჩემი თავით. უკვე ვიცი, როგორ გამოვიდე რთული სიტუაციიდან.“
„ეს იყო ინფორმაციით სავსე დღე, ბევრი ახალი და საჭირო რამ ვისწავლე.“
„გავაანალიზეთ, რას ნიშნავს კონფლიქტი და რა არის მშვიდობა. ძალიან მომეწონა მეგობრებთან ერთად მუშაობა.“
ახალ სასწავლო წელს განახლდა ახალგაზრდული კლუბების მუშაობა დასავლეთ საქართველოს რეგიონებში. ნახევარწლიანი თანამშრომლობისთვის შეირჩა ახალი სკოლები - სიმონეთში (თერჯოლის მუნიციპალიტეტი), თეკლათში (სენაკის მუნიციპალიტეტი), ორსანტიაში (ზუგდიდის მუნიციპალიტეტი).
უკვე ჩატარდა პირველი შეხვედრები. ინტერესი დიდია არა მარტო მოსწავლეების, არამედ სკოლის ხელმძღვანელების, პედაგოგების მხრიდან. სამომავლო გეგმებიც გაჩნდა: სხვადასხვა აქტივობა, გაცვლითი შეხვედრები.
უჩვეულო ხალხმრავლობა იყო დღეს ფონდი „სოხუმის“ ოფისში.
შეიკრიბა 9 მუნიციპალიტეტის (ქუთაისი, ხონი, წყალტუბო, თერჯოლა, ლანჩხუთი, ოზურგეთი, სენაკი, ფოთი, ზუგდიდი) წარმომადგენელი 19 ახალგაზრდა, რამდენიმე მშობელი და პედაგოგი.
და ჩატარდა ახალგაზრდული კლუბების შემაჯამებელი შეხვედრა - განსხვავებული ფორმატით. ხალისიანი, საინტერესო, გამორჩეული...
ისაუბრეს იმაზე, რაც გაკეთდა ძალადობის პრევენციის კუთხით, ერთმანეთს გამოცდილება გაუზიარეს, წინადადები და გეგმები შეიმუშავეს სასკოლო პროცესში მეტი ღონისძიების ჩართვისთვის.
უკუკავშირი კი ბაგრატის ტაძრის ეზოში გაიმართა. ბევრი თბილი სიტყვა ისმოდა - მადლობის, სიყვარულის, სიხარულის... რაც მთავარია, შეიკრა გუნდი, ახალი სამეგობრო, რომელიც ახალი სასწავლო წლიდან ბევრ კარგ აქტივობას აპირებს.
ქუთაისში, ფონდი „სოხუმის“ ოფისში შემაჯამებელი შეხვედრით დასრულდა 5-თვიანი ვორკშოპების ციკლი თემაზე „კონფლიქტების მართვის სწავლება სკოლებში“.
შეხვედრაზე მოწვეული იყვნენ ახალგაზრდა კონფლიქტოლოგები - 9 მუნიციპალიტეტის 9 სკოლაში ჩატარებული ვორკშოპების აქტიური მონაწილეები, აგრეთვე მშობლები და პედაგოგები - სულ 26 ადამიანი.
მონაწილეებმა შეაჯამეს მიღებული ცოდნა, ისაუბრეს იმ ცვლილებებსა და გავლენაზე, რაც საკუთარ თავზე გამოსცადეს. აღნიშნეს, რომ ასეთი შეხვედრები ყველა სკოლაში და ხშირად უნდა ჩატარდეს, რათა ბავშვებმა ადრეულ ასაკში ისწავლონ კონფლიქტების მართვა და მშვიდობიანად მოგვარება.
საკუთარი მოსაზრებები მშობლებმაც დააფიქსირეს:
„დღე საოცრება, დღე პოზიტივი“. „უღრმესი მადლობა, რომ ზრუნავთ ჩვენს შვილებზე.“ „პირველად ვესწრები და აღფრთოვანებული ვარ.“ „ჩანს, ნაყოფიერი მუშაობა გაგიწევიათ.“
როგორც ერთ-ერთმა პედაგოგმა აღნიშნა, „შეიძლება მთელი წელი იმუშაო და ვერაფერს ვერ მიაღწიო, აქ კი 5 თვის განმავლობაში ასეთ შედეგამდე მისვლა ტრენერის დიდი დამსახურებაა, რომელიც ასე აქტიურად თანამშრომლობს მოსწავლეებთან“...
შეხვედრის ბოლოს მოსწავლეებს გადაეცათ სერტიფიკატები. ღონისძიება დასრულდა ექსკურსიით ბაგრატის ტაძარში.
ვაჟების ჯგუფებთან შემაჯამებელი შეხვედრები გაიმართა ხონის (3 ივნისი), ლანჩხუთის (4 ივნისი), წყალტუბოს (5 ივნისი), ზუგდიდის (6 ივნისი), ფოთის (7 ივნისი), სენაკის (10 ივნისი), თერჯოლის (11 ივნისი), ქუთაისის (12 ივნისი), ოზურგეთის 14 (ივნისი) მუნიციპალიტეტებში. ყველა ჯგუფიდან გამოიყო ერთი-ორი ლიდერი ბიჭი, რომელმაც თანატოლების წინაშე გააკეთა პრეზენტაცია მამაკაცის როლზე ოჯახსა და საზოგადოებაში. დისკუსიის დროს ისინი საუბრობდნენ ძალადობის მავნებლობაზე, განსაკუთრებულ ყურადღებას ამახვილებდნენ თავიანთ როლზე პრობლემის მოგვარებაში. აღინიშნა, თუ რა მნიშვნელოვანია მსგავსი შეხვედრების ჩატარება. და ისიც, რომ მზად არიან გააგრძელონ მუშაობა, გაავრცელონ მიწოდებული ინფორმაციები.