ქალთა მიგრაცია პირდაპირ კავშირშია ოჯახურ კონფლიქტებთან - ეს საკითხი წინა პლანზე წამოსწიეს მონაწილეებმა კონფლიქტოლოგიის ვორკშოპებზე, რომლებიც ჩატარდა ახალგაზრდების ჯგუფებთან ფოთში, კოკში (ზუგდიდის მუნიციპალიტეტი), ქუთაისში.
მონაწილეთა აზრით, ძალადობა ასოციაციას იწვევს ქალთა მიგრაციასთან, რადგან საქართველოში, სოციალური მდგომარეობიდან გამომდინარე, ყოველი მეათე ქალი, ამ ტიპის ძალადობის პოტენციური მსხვერპლია.
აღინიშნა, რომ საკითხი ყველასთვის მტკივნეულია, გამოსავალი ძალიან რთულია, რადგან მიზეზების გადაწყვეტა უახლოეს დროში შეუძლებელია. ამიტომ ქალს პირველ რიგში ოჯახის წევრების მხარდაჭერა სჭირდება, რათა თავიდან იქნას აცილებული ის ფსიქოლოგიური პრობლემები, რომლებიც გაუცხოებას ახლავს.
პიროვნული ღირებულებები, მენტალიტეტი და მისი გავლენა ოჯახურ კონფლიქტებზე - ამ საკითხის გარჩევამ ცხარე დისკუსიები გამოიწვია ახალგაზრდებთან გამართულ კონფლიქტოლოგიის ვორკშოპებზე. მოსაზრებები, ძირითადად, ორ ნაწილად გაიყო. ერთი ნაწილი მიიჩნევს, რომ ხშირად ქართული მენტალიტეტი ხელს უწყობს ოჯახებში ძალადობის განვითარებას. არგუმენტად დასახელდა ის, რომ ოჯახის უფროსობა მენტალიტეტით მამაკაცს აკისრია და ამ უფლების დაკნინებას ის ვერ ეგუება - ეს შიში იმდენად ძლიერია, რომ ძალადობის ყველა ფორმის გამოყენება ხდება.
კომუნიკაცია და კონფლიქტები - ამ თემაზე ჩატარდა ვორკშოპები ახალგაზრდების ჯგუფთან წყალტუბოში, ქუთაისსა და ხონში. მონაწილეები გაეცნენ კომუნიკაციის სახეებს. ხაზი გაესვა ვერბალური და არავერბალური ურთიერთობის მნიშვნელობას კონფლიქტების მართვისას.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
რამდენად მნიშვნელოვანია სოლიდარობა ქალთა უფლებების დასაცავად, ხშირად რატომ არ თანაუგრძნობენ ქალები ძალადობის მსხვერპლს - ამ საკითხებზე გაიმართა დისკუსიები ახალგაზრდებთან წყალტუბოში, ფოთსა და ხონში ჩატარებულ ვორკშოპებზე.
გამოყენებული იყო იმიტირებული წარმოდგენები ოჯახური კონფლიქტების თემაზე, რამაც მონაწილეებს გაუადვილა ანალიზი განსახილველ საკითხზე.
- სოლიდარობის დეფიციტი ნამდვილად არსებობს. ძალიან ხშირად ოჯახური კონფლიქტების დროს ქალები არათუ გამოხატავენ მხარდაჭერას დაზარალებულის მიმართ - პირიქით, ნებისმიერ შემთხვევაში ქალში ეძებენ დამნაშავეს.
მიზეზებზე საუბრისას მონაწილეებმა აქცენტი ქართულ მენტალიტეტზე და არასწორ აღზრდაზე გააკეთეს. მათი თქმით, მეტი ინფორმაცია სჭირდება ქალებს, რათა კარგად დაინახონ ქალთა სოლიდარობის მნიშვნელობა ძალადობის პრევენციაში.
კონფლიქტოლოგიის ვორკშოპებზე ახალგაზრდებმა მოისმინეს ინფორმაციები. როგორ ხდება კონფლიქტის ანალიზი, რისთვის არის საჭირო.
სენაკში მონაწილეებს „ხახვის“ მეთოდი დაამახსოვრდათ. განსაკუთრებით საინტერესო დისკუსიები გაიმართა ფოთის ჯგუფში. იხსენებდნენ რეალურ ისტორიებს, რომლის საფუძველზეც ხდებოდა ანალიზი.
- კონფლიქტის ანალიზი გეხმარება იმაში, რომ საკუთარი შეცდომები დაინახო. ეს ძალიან მნიშვნელოვანია, რადგან ყოველთვის, როცა დაპირისპირებაა, ორივე მხარეს მიაჩნია, რომ მხოლოდ ის არის მართალი.
წყალტუბოში ახალგაზრდებმა ჩათვალეს, რომ „ხახვის“ მეთოდით ანალიზი მათთვის უფრო გასაგები იყო, ამიტომ კარგია, ამ ინფორმაციებს ადრეული ასაკიდან გაეცნონ მოზარდები.
მონაწილეთა მოსაზრებით, საკუთარი პოზიციების, ინტერესებისა და საჭიროებების გაანალიზების შემდეგ უფრო ადვილია ოჯახური კონფლიქტების მართვა. ნაკლები კონფლიქტები კი იმას ნიშნავს, რომ ნაკლები იქნება ძალადობის ფაქტები.
ქალთა მიმართ ძალადობის პრობლემას ახალგაზრდები განსაკუთრებით მწვავედ აღიქვამენ. მათი აზრით, თუ ამ პრობლემის მოგვარება გვსურს, პირველ რიგში, კონფლიქტების მართვაზე უნდა ვიფიქროთ, რომლებიც ოჯახებში ზოგჯერ ფარულად, ზოგჯერ ღიად მიმდინარეობს.
- ჩვენ ვქმნით საზოგადოებას, ამიტომ ისევ ჩვენზეა დამოკიდებული, საზოგადოება რა ზომებს მიიღებს მსხვერპლთა დასახმარებლად. ნებისმიერ ოჯახურ კონფლიქტში უნდა ჩავერიოთ, სანამ პრობლემის მოგვარება შესაძლებელია, - ასეთი იყო მონაწილეთა საერთო მოსაზრება.
ახალგაზრდების აზრით, მოძალადეს უნდა ეშინოდეს საზოგადოების სოლიდარობის. უნდა იცოდეს, მისგან წასულ მსხვერპლს მარტო არ დატოვებს. ეს ძალიან მნიშვნელოვანია პრობლემის პრევენციაში.
ქუთაისში, ხურჩაში და სენაკში კონფლიქტოლოგიის ვორკშოპებს 30-დან 60 წლამდე ასაკის ქალები ესწრებოდნენ.
- როგორ გვზრდიდნენ ჩვენი მშობლები, რატომ ვუშვებთ იგივე შეცდომებს საკუთარ შვილებთან ურთიერთობისას, რატომ იქმნება კონფლიქტები თაობებს შორის - ამ საკითხებზე საინტერესო დისკუსიები გაიმართა.
- ჩვენ ხშირად გვესმოდა ჩვენი მშობლებისგან, რომ ამ თაობას არაფერი ესმის, ცუდად იქცევა და ასე შემდეგ. როცა ჩვენ გავხდით მშობლები, ამ ფრაზას უკვე ჩვენ ვიმეორებთ.
- ოჯახში განვითარებული კონფლიქტები, არასწორი აღზრდის ბრალია. ბიჭებს არ უნდა ვზრდიდეთ ოჯახის მმართველებად, გოგონებს არ უნდა ვასწავლიდეთ მუდმივ მორჩილებას.
- ყოველთვის მეჩვენებოდა, რომ დედა ძალიან მკაცრი იყო, ხშირად ვკამათობდით ისეთ საკითხებზე, როგორიც იყო დაბადების დღეზე წასვლა, მეგობრებთან სეირნობა. ჩემს შვილთან ურთიერთობაში იგივე გავიმეორე, სამწუხაროდ, გვიან მივხვდი, რომ დედა ყოველთვის მართალი იყო. ალბათ, ჩემი შვილებიც გვიან მიხვდებიან.
დისკუსიის ბოლოს მონაწილეებმა ფსიქოლოგის კომენტარები მოისმინეს და შესაბამისი რჩევებიც მიიღეს.
- ბულინგი ძალიან მტკივნეული საკითხია. უმრავლესობამ არც კი იცის, რა შედეგები შეიძლება მოჰყვეს მოზარდთა შორის განვითარებულ კონფლიქტს. ყველას ერთნაირი ფსიქიკა არ აქვს, შესაძლოა საქმე სუიციდამდე მივიდეს. ამიტომ პედაგოგებმა უფრო მეტი ყურადღება უნდა მიაქციონ ამ საკითხს.
- მშობლები ხშირად ხელს უწყობენ ბულინგის განვითარებას. მაგალითად, საკუთარ შვილებს წინასწარ აპროგრამებენ, ვისთან იმეგობრონ, ვის მიანიჭონ უპირატესობა, რაც არასწორია.
ასეთი პოზიციები ჰქონდათ ვორკშოპის მონაწილე ქალებს ფოთში, სენაკსა და ქუთაისში.
დისკუსიისას აღინიშნა, რომ ბულინგის თემა პირდაპირ კავშირშია ოჯახურ კონფლიქტებთან. ბავშვები, რომლებიც კრიზისულ ოჯახებში იზრდებიან, ხშირად აგრესიას ავლენენ თანატოლების მიმართ, შეურაცხმყოფელი სიტყვებით მიმართავენ მათ და ასე ცდილობენ ნეგატიური ემოციებისგან გათავისუფლებას. ან პირიქით, არასრულფასოვნების შეგრძნება აწუხებთ და თავად ხდებიან ბულინგის მსხვერპლნი.
ვორკშოპების დროს ქალებმა მიიღეს რჩევები, როგორ გამოიცნონ ბულინგი, როგორ დაეხმარონ ბავშვს, თუკი ის ბულინგის ობიექტი ხდება, ან თავად იწყებს ძალადობას.