გენდერული თანასწორობის მუდმივმოქმედი საპარლამენტო საბჭომ, თემატური მოკვლევის - „ქალების წვდომა ფინანსურ რესურსებზე“ ფარგლებში, სამოქალაქო საზოგადოების წარმომადგენლებთან ზეპირი მოსმენა გამართა. შეხვედრის მიზანი იყო ქალებისთვის ფინანსურ რესურსებზე წვდომის ბარიერების შესწავლა და არსებულ მონაცემებზე დაყრდნობით პარლამენტისთვის და სხვა სახელმწიფო ინსტიტუტებისთვის პოლიტიკის ინსტრუმენტების შემუშავების ხელშეწყობა.
თემატური მოკვლევის სამუშაო ჯგუფის შეხვედრაში ქალთა ფონდი „სოხუმის“ წარმომადგენელი - ეკატერინე გამახარიაც იღებდა მონაწილეობას. მან თავის მოხსენებაში ფოკუსი დევნილ და კონფლიქტით დაზარალებულ ქალებზე გააკეთა და ხაზი გაუსვა, რომ ფინანსურ რესურსებზე ქალების ხელმისაწვდომობის უზრუნველყოფა წარმოადგენს არა მხოლოდ ქვეყნის განვითარების, სიღარიბესთან და ქალთა მიმართ ძალადობასთან ბრძოლის უმნიშვნელოვანეს ფაქტორს, არამედ მას ქვეყანაში მშვიდობის მშენებლობის და ნდობის აღდგენის საქმეში უდიდესი დატვირთვა აქვს.
„დღეს არა საუბრების, არამედ კონკრეტული მოქმედებების დროა! რადგან ვიდრე ჩვენ პრობლემებზე ვსაუბრობთ და ვბჭობთ, ქალების დიდი ნაწილი უშუალოდ უპირისპირდება უთანასწორობას, ძალადობას, დრომოჭმულ სტერეოტიპებს და ეკონომიკური დამოკიდებულების მთელ სიმწარეს... ბევრ მათგანს უწევს სამკვდრო-სასიცოცხლო ბრძოლა გადარჩენისთვის... მხოლოდ ეკონომიკურად ძლიერ ქალებს შეუძლიათ საზოგადოებრივ კეთილდღეობაზე ზრუნვა, ქვეყნის განვითარებაში წვლილის შეტანა, ძალადობასთან ბრძოლა, და მდგრადი და ხანგრძლივი მშვიდობის შენება“... - განაცხადა ეკატერინე გამახარიამ.
შეხვედრის მსვლელობისას მონაწილეებმა იმსჯელეს პრობლემების დაძლევის კონკრეტულ გზებზე და ერთმანეთს საკუთარი მიგნებები და რეკომენდაციები გაუზიარეს.
მარინამ ლამაზი და ტკბილი უკრაინული დესერტი მოამზადა - ლვოვის „სირნიკები“, ანიამ კი - კატლეტები კიევურად. მარინა და ანია უკრაინელი ფსიქოლოგები არიან, ჩვენს ორგანიზაციაში მუშაობენ და ორივე, სხვა ქალებთან ერთად, მონაწილეობდა ქალთა ფონდ „სოხუმში“ უკრაინული სამხარეულოს დღის მოწყობაში 15 სექტემბერს. მათ აღნიშნეს, რომ საინტერესო, სასიამოვნო და სარებილიტაციო ღონისძიება გამოვიდა.
მათ პროფესიული კუთხითაც აქტიურად იმუშავეს სექტემბერში.
ანია შალიმოვა ამბობს, რომ შეხვდა ოთხ ახალ ოჯახს და ერთ ოჯახს - განმეორებით, ჩაატარა 12 ინდივიდუალური კონსულტაცია. იყვნენ მუდმივი კლიენტებიც და ახლებიც. ამასთანავე კონსულტაცია გაუწია ბავშვებს და მათ მშობლებს.
„უკრაინელებს დადებითად განაწყობთ ის, რომ მეც უკრაინიდან ვარ“, - ამბობს ანია. - ისინი ინტერესდებიან, რომელი ქალაქიდან ვარ და როგორ გადავიტანე ომი. თუ ჩემი მშობლიური ქალაქიდან არიან, მაშინ ვარკვევთ, ვინ რომელ უბანში ცხოვრობდა“ (სწორედ ამიტომაც მოვიწვიეთ ორი უკრაინელი ფსიქოლოგი უკრაინელ ლტოლვილებთან სამუშაოდ).
მარინე 28 წლისაა. დეპრესიაში იყო მეუღლის გარდაცვალების შემდეგ: „ყველაფერი გაჩერდა. არ ვიცოდი, როგორ მეცხოვრა. ჩემთან ერთად ტიროდა დედაჩემიც. ერთხელ ასე თვალცრემლიანებს დედის მეგობარი შემოგვესწრო და მირჩია, დახმარებისთვის ფონდი „სოხუმის“ ფსიქოლოგთან მივსულიყავი. თითქმის რვა თვე ვსწავლობდი, ახლებურად შემეხედა ჩემი თავისთვის. ნელ-ნელა მიჩნდებოდა იმედი. არ ვიცი, როგორ გამოვხატო მადლიერება არა მარტო ჩემი ღიმილისთვის, არამედ იმ სხივისთვის, ჩემი დედის თვალებში რომ არის ახლა“...
მარინე ერთ-ერთია ფსიქოლოგის მადლიერ ბენეფიციართაგან. ასეთი უამრავია დასავლეთ საქართველოს მუნიციპალიტეტებში.
სექტემბერში ფსიქოლოგის შეხვედრები გაიმართა ვანის, ჩოხატაურის, სენაკის და ხურჩის (ზუგდიდის მუნიციპალიტეტი) ქალთა მხარდაჭერის ცენტრებში, აგრეთვე ქობულეთში – ოღონდ ონლაინ. ჯგუფურ და ინდივიდუალურ შეხვედრებში მონაწილეობა მიიღო 23-მა ბენეფიციარმა.
19 სექტემბრიდან თვის ბოლომდე კომპლექსური სარეაბილიტაციო სამუშაო ტარდებოდა ძალადობის მსხვერპლ სამ ქალთან. ისინი ქალთა ფონდი „სოხუმის“ სარეაბილიტაციო ცენტრში შვილებთან ერთად იმყოფებოდნენ - სულ 6 ბენეფიციარი. ყოველდღიურ აქტიურ მუშაობაში ჩართულები იყვნენ პედაგოგი, სოციალური მუშაკი, იურისტი და ფსიქოლოგი.
სარეაბილიტაციო კურსის დასრულების შემდეგ ერთ-ერთმა ბენეფიციარმა (ის 26 წლისაა) აღნიშნა, რომ იგრძნო დიდი მხარდაჭერა. უკვე იცის, რომ მარტო არ არის. აქ გატარებულმა დღეებმა გააძლიერა სამივე ქალი და ისიც გააცნობიერეს, რომ მეტი უნდა იმუშაონ საკუთარ სისუსტეებზე. მიიღეს ბევრი საჭირო ინფორმაცია, პოზიტივი, სასარგებლო რჩევები და გადაწყვიტეს, ახალი ძალებით გადაფურცლონ თავიანთი ცხოვრების ახალი გვერდი.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
მონაწილეთა შეფასებით, ძალიან საინტერესო და მნიშვნელოვანი გამოდგა ინფორმაციის გაცვლის შეხვედრა (თემა - „ბავშვთა უფლებების დაცვა ტყიბულის მუნიციპალიტეტში და ადგილობრივი თანამშრომლობა სოციალური სერვისების გაუმჯობესების კუთხით“), რომელიც ქალთა ფონდი „სოხუმის“ ინიციატივით და ტყიბულის ბავშვთა უფლებების დაცვისა და მხარდაჭერის სამსახურის ორგანიზებით, მუნიციპალიტეტის განახლებულ საკონფერენციო დარბაზში გაიმართა.
მონაწილეებს გააცნეს ფონდი „სოხუმის“ მიერ ჩატარებული კვლევის მიგნებები, ბავშვთა უფლებების დაცვის და მხარდაჭერის სამსახურის საქმიანობა და არსებული გამოწვევები.
საკუთარი მოსაზრებები გაცვალეს მუნიციპალიტეტის მესვეურებმა, მუნიციპალური სერვისების მიმწოდებლებმა, მოქალაქეებმა. გამოიკვეთა მთავარი გამოწვევა - რესურსების სიმცირე სერვისების გასამართად; უფრო მოქნილი საკანონმდებლო რეგულაციების საჭიროება.
მაღალი შეფასება მიეცა მჭიდრო თანამშრომლობას სამოქალაქო სექტორთან და რესურსების გამთლიანებას ბენეფიციარების დასახმარებლად.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
კოვალენკოების ოჯახი ხარკოვიდან ჩამოვიდა. რამდენიმე თვე იცხოვრეს სამტრედიაში. ბევრი სიძნელე გადაიტანეს. ბავშვი ორჯერ მოხვდა საავადმყოფოში. ჩვენი ფონდი დაეხმარა მათ საბუთების თარგმნაში უფასო მკურნალობისთვის, ეხმარებოდა სურსათით, ჰიგიენის საშუალებებით. შემდეგ მათ უკრაინაში გამგზავრება გადაწყვიტეს. მაგრამ საამისო ფული არ ჰქონდათ.
სოფი წირღვავამ (ასისტენტი, რომელიც უკრაინელ ლტოლვილებთან მუშაობს) გადაწყვიტა, თანხის შეგროვება მოესინჯა, თუმცა თვითონაც დიდად არ სჯეროდა, რომ გამოვიდოდა. მან სოციალურ ქსელში დაწერა თხოვნა, დახმარებოდნენ კოვალენკოების ოჯახს. იყვნენ ადამიანები, რომელთაც სოლიდური თანხა გადარიცხეს. იყვნენ ისეთებიც, რომელთაც მითითებულ ანგარიშზე 3 და 5 ლარი ჩარიცხეს. გაკვირვებულები იყვნენ კოვალენკოები, ტიროდნენ, ამბობდნენ, ადამიანებს თვითონ უჭირთ და ჩვენ გვეხმარებიანო…
ორ დღეში 3600 ლარზე მეტი შეგროვდა.
ბაღდათის მერიაში გაიმართა ქალთა მიმართ ძალადობის აღკვეთის უწყებათაშორისი კომისიის შეხვედრა. მრგვალი მაგიდის ფორმატის შეხვედრას კომისიის წევრების გარდა ესწრებოდნენ ქალთა ფონდი „სოხუმის“ წარმომადგენლები, პოლიციის თანამშრომლები, პედაგოგები, საკრებულოს კომისიის და ბავშვთა უფლებების დაცვის განყოფილების წევრები.
შეხვედრაზე განიხილეს კონკრეტული ქეისები, ამ ქეისებთან მუშაობა და შემდგომი რეაგირება. იმსჯელეს ძალადობის პრევენციაზე, მსხვერპლთა დაცვაზე და ადგილობრივ სახელმწიფო სტრუქტურებთან თანამშრომლობის პერსპექტივაზე.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა მხარდაჭერის ცენტრების მიერ ინიცირებულ ღონისძიებებში მონაწილეებმა ფემიციდის საკითხები განიხილეს. ძალადობის თემაზე შექმნილი მოკლემეტრაჟიანი ვიდეოფილმების ჩვენებამ დისკუსიისთვის კარგი სივრცე შექმნა.
- როგორ გავარღვიოთ ძალადობის წრე, სად რომელ რგოლშია გასაძლიერებელი რეაგირების მექანიზმები - დისკუსიები ამ საკითხებზე გაგრძელდა.
მონაწილეებმა აღნიშნეს, რომ ქალი არ არის დაცული, ქალი დღემდე მავნე სტერეოტიპების მსხვერპლია. განსაკუთრებული აქცენტით ისაუბრეს ბაღების, სკოლის როლის გაძლიერებაზე.
სტერეოტიპების მსხვრევას თუ ხელი არ შევუწყვეთ, თუ ცნობიერება არ შეიცვალა, სურათი არ შეიცვლება, - ითქვა შეხვედრებზე.
ქალთა მხარდაჭერის ცენტრები გააგრძელებენ საინფორმაციო კამპანიას, რათა მოქალაქეები, ქალები კარგად იყვნენ ინფორმირებულნი და საჭიროების დროს შეძლონ სწორი რეაგირება.
შეხვედრები ჩატარდა სენაკის, ქობულეთის, ბაღდათის, ტყიბულის და ჩოხატაურის ქალთა მხარდაჭერის ცენტრებში.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
სენაკის მუნიციპალიტეტის სოფელ ახალსოფელში ჩატარდა შეხვედრა, რომელსაც ესწრებოდნენ სკოლის დირექციის წარმომადგენლები, პედაგოგები და მშობლები. შეხვედრაზე მოწვეული იყვნენ მერიის ბავშვთა უფლებებისა და მხარდაჭერის განყოფილების კოორდინატორი და ამავე განყოფილების სოციალური მუშაკი.
შეხვედრის მონაწილეები გაეცნენ განყოფილების სტრუქტურას, მიიღეს ინფორმაცია არსებულ პროგრამებზე, გამოწვევებსა და საჭიროებებზე. მათი აზრით, მეტი ყურადღება უნდა მიექცეს საზოგადოების ინფორმირებულობას, მოწყვლადი ჯგუფების საჭიროებებს, კრიზისული ოჯახების მხარდაჭერას.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ფონდი „სოხუმის“ ადვოკატირების ჯგუფმა ზედა ვანის (ვანის მუნიციპალიტეტი) საჯარო სკოლაში ჩაატარა საინფორმაციო შეხვედრა, რომელსაც ესწრებოდნენ სკოლის პედაგოგები, უფროსკლასელები, მერიის ბავშვთა უფლებებისა და მხარდაჭერის განყოფილების თანამშრომლები და გენდერული თანასწორობის საბჭოს მდივანი.
მონაწილეები გაეცნენ განყოფილების სტრუქტურას, აგრეთვე იმ მიგნებებს, რომლებიც ამ განყოფილების მუშაობის მონიტორინგის შედეგად გამოვლინდა. მათ აღნიშნეს, რომ ასეთ სიღრმისეულ ინფორმაციას არ ფლობდნენ და უკვე იციან, რა დროს უნდა მიმართონ მათ. აქცენტი გაკეთდა სკოლებისა და განყოფილების თანამშრომლობის აუცილებლობაზე, რაც გააუმჯობესებს მოწყვლადი მოზარდების მდგომარეობას.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)