კონფლიქტის გამომწვევი მიზეზები განიხილეს მოსწავლეებთან გამართულ ვორკშოპებზე ფოთში - თამარ ფაჩულიას საავტორო სკოლა-გიმნაზიაში, სენაკის მე-3 და ქუთაისის მე-11 საჯარო სკოლებში. ვორკშოპებს სკოლების დირექტორები და პედაგოგებიც ესწრებოდნენ. როგორც ითქვა, ისინიც საუბრობენ ამ თემებზე, მაგრამ ბავშვები კონფლიქტოლოგთან უფრო თავისუფლად გრძნობენ თავს და მუშაობასაც მეტი ეფექტი აქვს. ეს უკუკავშირშიც ჩანს:
„ასეთი მიზეზები მართლაც არის ცხოვრებაში და ვორკშოპზე მიღებული რჩევები გამოსადეგია.“
„სახალისო სავარჯიშოებით ვისიამოვნეთ და ბევრიც ვისწავლეთ.“
„ვორკშოპი მდიდარი იყო სხვადასხვა დავალებით. სხვა დროსაც სიამოვნებით დავესწრები.“
სამივე სკოლის მოსწავლეები დაელოდებიან შემდეგ შეხვედრას.
არდადეგები დასრულდა და ისევ დაიწყო ვორკშოპები დასავლეთ საქართველოს 9 მუნიციპალიტეტის სკოლებში. 17, 18 და 20 სექტემბერს კონფლიქტის თემაზე ვორკშოპები გაიმართა ზედა სიმონეთში (თერჯოლის მუნიციპალიტეტი), განმუხურში (ზუგდიდის მუნიციპალიტეტი) და სენაკის მე-3 საჯარო სკოლაში.
მოსწავლეები აქტიურად ჩაერთნენ პროცესში. საინტერესოა მათი შეფასება:
„კმაყოფილი ვარ ჩემი თავით. უკვე ვიცი, როგორ გამოვიდე რთული სიტუაციიდან.“
„ეს იყო ინფორმაციით სავსე დღე, ბევრი ახალი და საჭირო რამ ვისწავლე.“
„გავაანალიზეთ, რას ნიშნავს კონფლიქტი და რა არის მშვიდობა. ძალიან მომეწონა მეგობრებთან ერთად მუშაობა.“
ახალ სასწავლო წელს განახლდა ახალგაზრდული კლუბების მუშაობა დასავლეთ საქართველოს რეგიონებში. ნახევარწლიანი თანამშრომლობისთვის შეირჩა ახალი სკოლები - სიმონეთში (თერჯოლის მუნიციპალიტეტი), თეკლათში (სენაკის მუნიციპალიტეტი), ორსანტიაში (ზუგდიდის მუნიციპალიტეტი).
უკვე ჩატარდა პირველი შეხვედრები. ინტერესი დიდია არა მარტო მოსწავლეების, არამედ სკოლის ხელმძღვანელების, პედაგოგების მხრიდან. სამომავლო გეგმებიც გაჩნდა: სხვადასხვა აქტივობა, გაცვლითი შეხვედრები.
უჩვეულო ხალხმრავლობა იყო დღეს ფონდი „სოხუმის“ ოფისში.
შეიკრიბა 9 მუნიციპალიტეტის (ქუთაისი, ხონი, წყალტუბო, თერჯოლა, ლანჩხუთი, ოზურგეთი, სენაკი, ფოთი, ზუგდიდი) წარმომადგენელი 19 ახალგაზრდა, რამდენიმე მშობელი და პედაგოგი.
და ჩატარდა ახალგაზრდული კლუბების შემაჯამებელი შეხვედრა - განსხვავებული ფორმატით. ხალისიანი, საინტერესო, გამორჩეული...
ისაუბრეს იმაზე, რაც გაკეთდა ძალადობის პრევენციის კუთხით, ერთმანეთს გამოცდილება გაუზიარეს, წინადადები და გეგმები შეიმუშავეს სასკოლო პროცესში მეტი ღონისძიების ჩართვისთვის.
უკუკავშირი კი ბაგრატის ტაძრის ეზოში გაიმართა. ბევრი თბილი სიტყვა ისმოდა - მადლობის, სიყვარულის, სიხარულის... რაც მთავარია, შეიკრა გუნდი, ახალი სამეგობრო, რომელიც ახალი სასწავლო წლიდან ბევრ კარგ აქტივობას აპირებს.
ქუთაისში, ფონდი „სოხუმის“ ოფისში შემაჯამებელი შეხვედრით დასრულდა 5-თვიანი ვორკშოპების ციკლი თემაზე „კონფლიქტების მართვის სწავლება სკოლებში“.
შეხვედრაზე მოწვეული იყვნენ ახალგაზრდა კონფლიქტოლოგები - 9 მუნიციპალიტეტის 9 სკოლაში ჩატარებული ვორკშოპების აქტიური მონაწილეები, აგრეთვე მშობლები და პედაგოგები - სულ 26 ადამიანი.
მონაწილეებმა შეაჯამეს მიღებული ცოდნა, ისაუბრეს იმ ცვლილებებსა და გავლენაზე, რაც საკუთარ თავზე გამოსცადეს. აღნიშნეს, რომ ასეთი შეხვედრები ყველა სკოლაში და ხშირად უნდა ჩატარდეს, რათა ბავშვებმა ადრეულ ასაკში ისწავლონ კონფლიქტების მართვა და მშვიდობიანად მოგვარება.
საკუთარი მოსაზრებები მშობლებმაც დააფიქსირეს:
„დღე საოცრება, დღე პოზიტივი“. „უღრმესი მადლობა, რომ ზრუნავთ ჩვენს შვილებზე.“ „პირველად ვესწრები და აღფრთოვანებული ვარ.“ „ჩანს, ნაყოფიერი მუშაობა გაგიწევიათ.“
როგორც ერთ-ერთმა პედაგოგმა აღნიშნა, „შეიძლება მთელი წელი იმუშაო და ვერაფერს ვერ მიაღწიო, აქ კი 5 თვის განმავლობაში ასეთ შედეგამდე მისვლა ტრენერის დიდი დამსახურებაა, რომელიც ასე აქტიურად თანამშრომლობს მოსწავლეებთან“...
შეხვედრის ბოლოს მოსწავლეებს გადაეცათ სერტიფიკატები. ღონისძიება დასრულდა ექსკურსიით ბაგრატის ტაძარში.
ვაჟების ჯგუფებთან შემაჯამებელი შეხვედრები გაიმართა ხონის (3 ივნისი), ლანჩხუთის (4 ივნისი), წყალტუბოს (5 ივნისი), ზუგდიდის (6 ივნისი), ფოთის (7 ივნისი), სენაკის (10 ივნისი), თერჯოლის (11 ივნისი), ქუთაისის (12 ივნისი), ოზურგეთის 14 (ივნისი) მუნიციპალიტეტებში. ყველა ჯგუფიდან გამოიყო ერთი-ორი ლიდერი ბიჭი, რომელმაც თანატოლების წინაშე გააკეთა პრეზენტაცია მამაკაცის როლზე ოჯახსა და საზოგადოებაში. დისკუსიის დროს ისინი საუბრობდნენ ძალადობის მავნებლობაზე, განსაკუთრებულ ყურადღებას ამახვილებდნენ თავიანთ როლზე პრობლემის მოგვარებაში. აღინიშნა, თუ რა მნიშვნელოვანია მსგავსი შეხვედრების ჩატარება. და ისიც, რომ მზად არიან გააგრძელონ მუშაობა, გაავრცელონ მიწოდებული ინფორმაციები.
ახალგაზრდული კლუბის საინფორმაციო შეხვედრები გაიმართა ქუთაისის 33-ე სკოლაში, ხაჯალიასა (ლანჩხუთის მუნიციპალიტეტი) და ზედა სიმონეთში (თერჯოლის მუნიციპალიტეტი). ამით დასრულდა დაგეგმილი ცხრა შეხვედრა ეთიკის და ესთეტიკის, ჯანსაღი ცხოვრების წესის და სქესობრივი აღზრდის საკითხებზე.
როგორც სხვა კლუბებში, აქაც დიდი იყო ახალგაზრდების ინტერესი, ჩართულობა. გამოიკვეთა არაერთი პრობლემა: ნარკოტიკები, ნაადრევი ქორწინება, მიგრაცია, გაუცხოება ოჯახურ ურთიერთობებში…
- საინტერესოა მსგავსი თემების განხილვა. შეხვედრებზე ჩვენ ბოლომდე ვიხსნებით და ვთავისუფლდებით. ვიღებთ შენიშვნებს, რჩევებს. ჩვენ გვისმენენ, რაც იშვიათობაა, - აღნიშნა ერთ-ერთმა მონაწილემ.
კონფლიქტოლოგიის თემაზე ხუთთვიანი მუშაობა შეჯამდა ვორკშოპებზე, რომლებიც ჩატარდა სოფელ ქვედა სიმონეთის (თერჯოლის მუნიციპალიტეტი), სოფელ ნიგვზიანის (ლანჩხუთის მუნიციპალიტეტი) და ქუთაისის №15 საჯარო სკოლებში.
მოსწავლეებმა სინანულით აღნიშნეს ვორკშოპების დასრულების შესახებ, პედაგოგებმა კი თანამშრომლობის გაგრძელების იმედი დაიტოვეს. მათი თქმით, მოსწავლეები ძალიან დაინტერესდნენ თემით, ბევრი რამ ისწავლეს კონფლიქტების მართვის კუთხით, სიხარულით და ინტერესით ელოდნენ ყოველ მომდევნო შეხვედრას. ამიტომ ისინი მიიჩნევენ, რომ მუშაობა უნდა გაგრძელდეს.
სოფელ ერგეტაში (ზუგდიდის მუნიციპალიტეტი), ფოთის კერძო სკოლაში და სოფელ თეკლათში (სენაკის მუნიციპალიტეტი) ჩატარდა ახალგაზრდული კლუბის შეხვედრები თემაზე: ეთიკისა და ესთეთიკის ნორმები, ჯანსაღი ცხოვრების წესი და სქესობრივი ცხოვრების წესი - იარაღი ძალადობის პრევენციისთვის.
ახალგაზრდებმა ბევრ პრობლემაზე გაამახვილეს ყურადღება, მათ შორის ნაადრევ ქორწინებაზე, რაც აფერხებს ახალგაზრდების განვითარებას, დამოუკიდებლობას და
შეხვედრების მონაწილეების აზრით, ასეთი გულახდილი საუბრები და კომპეტენტური რჩევები ხელს შეუწყობს პრობლემების მოგვარებას, კონფლიქტებისა და ძალადობის პრევენციას.
ივნისის პირველი სამი შეხვედრა ჩატარდა ნახახულევის (ხონის მუნიციპალიტეტი), გურიანთას (ოზურგეთის მუნიციპალიტეტი) საჯარო სკოლების და წყალტუბოს კერძო სკოლა „ოცნებას“ ახალგაზრდულ კლუბებში. შეხვედრების თემა იყო: ეთიკისა და ესთეტიკის, ჯანსაღი ცხოვრების, სქესობრივი აღზრდის ნორმები.
მონაწილეები მაქსიმალურად ჩაერთნენ მუშაობაში, ისაუბრეს ინფორმაციის დეფიციტზე, ასეთი სწავლების აუცილებლობაზე. იყო დისკუსიები, აზრთა დაფიქსირება, ანალიზი. განსაკუთრებით საინტერესოდ გამოჩნდა მოზარდების თვალით დანახული პრობლემები და მათი სურვილი, მოაგვარონ, იპოვონ გამოსავალი, უკეთესი გახადონ ცხოვრება...