ხონის სათემო განათლების ცენტრში ტრენინგს თემაზე „ლიდერობა, პრეზენტაცია, საჯარო გამოსვლები“ ესწრებოდნენ დევნილთა დასახლების ამხანაგობების წარმომადგენელი ლიდერი ქალები.
ტრენინგზე ერთმანეთს ცვლიდა პრაქტიკული სავარჯიშო და თემატური ვიდეორგოლი, დისკუსია და ინდივიდუალური მუშაობა... ასე სხვადასხვა მეთოდის მეშვეობით მიიღეს მონაწილეებმა სასარგებლო ინფორმაცია ლიდერის მნიშვნელოვან უნარებზე, სწორ პრეზენტაციასა და საჯარო გამოსვლაზე.
ტრენინგის მონაწილეებმა აღნიშნეს, რომ მიღებული ცოდნა დაეხმარება მათ, რომ უფრო აქტიურად ჩაერთონ თავიანთი თემის პრობლემების მოგვარების პროცესში.
მუშაობა მიმდინარეობს ცენტრ „აფხაზეთთან“ პარტნიორობით, პროექტის „კონფლიქტების ტრანსფორმაციის მხარდაჭერა სამხრეთ კავკასიაში და მოლდოვაში“ ფარგლებში.
სატრენინგო კურსი აქტიურად გრძელდება ახალგაზრდობის გაძლიერების ცენტრებში. ახალგაზრდები ინტერესით ეცნობიან ახალ თემებს, ეჩვევიან ინდივიდუალურ თუ ჯგუფურ მუშაობას, სწავლობენ დისკუსიების კულტურას.
დეკემბრის ტრენინგები დაემთხვა საინფორმაციო კამპანიას „16 აქტიური დღე ქალთა მიმართ ძალადობის წინააღმდეგ“. ამიტომ გადაწყდა, რომ ათივე ცენტრი (სამტრედია, თერჯოლა, ვანი, ბაღდათი, სენაკი, ზუგდიდი, წალენჯიხა, ხობი, ქობულეთი, ჩოხატაური) ჩართულიყო კამპანიაში.
ახალგაზრდებმა ნოემბრიდან დაიწყეს მზადება და ყველა დაგეგმილი ინიცირებული აქტივობა დროულად ჩაატარეს: კრეატიული ღონისძიებები, ინტერვიუები, გამოფენები, აქციები... ყველაფრის ავტორები და შემსრულებლები თვითონ იყვნენ. ორგანიზებაში მაქსიმალურად ჩაერთნენ პედაგოგები და სკოლის ადმინისტრაციის წარმომადგენლები.
ახალგაზრდობის გაძლიერების ცენტრების ახალგაზრდებმა დიდი გამოცდილება მიიღეს წლევანდელ კამპანიაში აქტიური ჩართულობით.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
უკრაინელების თქმით, ჩვენ ვრჩებით ერთადერთ ორგანიზაციად, რომელიც მათ მუდმივად ეხმარება ბევრ საკითხში.
ჩვენს მონაცემთა ბაზაში 387 ადამიანია, დეკემბერში 17 ახალი დაგვემატა. ვაუჩერებით დახმარება გაეწია 39 ოჯახს. ასევე იყო სხვა სახის მხარდაჭერა: 4 ოჯახს გადავუხადეთ კომუნალური გადასახადები, 6 ოჯახს - ბინის ქირა, ხოლო ერთ ადამიანს - ტელეფონის ხარჯები.
11 უკრაინელი ქალი მონაწილეობდა ქალთა ფონდი „სოხუმის“ ღონისძიებაში, რომელიც მიეძღვნა კამპანიის „16 აქტიური დღე ქალთა მიმართ ძალადობის წინააღმდეგ“ დასრულებას. სამმა მათგანმა მადლობა გადაუხადა და მაღალი შეფასება მისცა ფონდის მუშაობას, ფსიქოლოგისა და იურისტის კონსულტაციებს, რომლებიც სხვადასხვა ეტაპზე უწევდნენ და აგრძელებენ მათ დახმარებას. ამ შეხვედრაზე ქალებმა ერთმანეთი გაიცნეს და რეგულარული კომუნიკაცია გადაწყვიტეს. იულია რეზვანმა განსაკუთრებული მადლობა გადაიხადა იმისთვის, რომ ამ შეხვედრისთვის ეკლერები შეუკვეთეს (ის ნამცხვრებს აცხობს). ეს მისთვის დიდი დახმარებაა და მოხარულია, რომ „ამ რთულ პერიოდში ჩვენ ყველანაირად მხარს ვუჭერთ უკრაინელ ქალებს“.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
16-დღიანი გლობალური კამპანიის ფარგლებში დაიწყო და დეკემბრის ბოლომდე გრძელდება ახალგაზრდების აქტივობები.
10 მუნიციპალიტეტში დღემდე 1000-მდე ახალგაზრდამ მიიღო მონაწილეობა თემატურ დისკუსიებში, ტრენინგებში, გამოფენებში, ქუჩის აქციებსა და პერფორმანსებში, რომლებიც ძალადობის წინააღმდეგ ბრძოლას და პრევენციას ეხებოდა.
„უმთავრესი, რაც წელს გამოიკვეთა, არის ადგილობრივი თვითმმართველობების, განათლების რესურსცენტრების, ახალგაზრდული დეპარტამენტების, სკოლის დირექციების, პედაგოგების და მშობლების განსაკუთრებული პარტნიორობა ჩვენს კამპანიაში. ჩვენმა კონსტრუქციულმა და შედეგიანმა ნაბიჯებმა განაპირობა მთავარი - ნდობა: რომ ყველაფერი, რასაც ვაკეთებთ, ახალგაზრდების სწორ განათლებას ემსახურება,“ - აღნიშნა ახალგაზრდებთან მუშაობის ასისტენტმა ნინო ჭაბუკიანმა.
კამპანიაში ახალგაზრდების მნიშვნელოვან წვლილზე საუბრობენ ტრენერები, რომლებიც 10 მუნიციპალიტეტის ახალგაზრდობის გაძლიერების ცენტრებში ატარებენ ტრენინგებს:
კარზეა მომდგარი ახალი წელი და ქალთა ფონდი „სოხუმის“ სარეაბილიტაციო ცენტრში მასპინძლებმა და სტუმრებმა ლამაზი საახალწლო გარემო შექმნეს.
დეკემბერში აქ იმყოფებოდა ძალადობის მსხვერპლთა კიდევ ერთი ჯგუფი - ორი ქალი ბავშვებთან ერთად, სულ 6 ადამიანი. ორი კვირის განმავლობაში მათ გაიარეს კომპლექსური მუშაობა ფსიქოლოგთან, იურისტთან და სოციალურ მუშაკთან. ბავშვები საინტერესოდ და კრეატიულად ატარებდნენ დროს პედაგოგთან ერთად.
2023 წელს შვილებიანად 30-ზე მეტმა ქალმა მიიღო ჩვენი მხარდაჭერა.
ფსიქოლოგმა მანანა გოცირიძემ ერთ-ერთი ქალის ისტორია გაგვიზიარა. ნანი (პირობითი სახელი) 45 წლისაა. ის ჩვენი ერთ-ერთი სამიზნე მუნიციპალიტეტიდან ჩამოიყვანეს ორ შვილთან ერთად.
ნანი რამდენჯერმე წავიდა სახლიდან და მოლაპარაკებების და ხვეწნა-მუდარის შემდეგ ისევ დაბრუნდა. სამი წლის წინ პოლიციაც კი გამოიძახა, მაგრამ შემდეგ განცხადება გამოითხოვა.
„ჩემზე ახლაც ამბობენ, ეს ის ქალია, ქმრის ჩასმა რომ უნდოდაო ციხეში. დედაჩემმა ყველაფერი გააკეთა, რომ ქმართან დავრჩენილიყავი - არ არის კარგი, განქორწინებულს რომ დაგიძახებენ, მოითმინე, დაგეხმარებით, სად დაბრუნდები, შენი რძალია სახლში და შენი ადგილი აქ არ არის, უკვე სტუმარი ხარო. გათხოვების შემდეგ დავიკარგე და დღემდე ვერ ვპოულობ ჩემს თავს. მხოლოდ ბავშვები მაძლევენ სტიმულს, მაგრამ უკვე არ მინდა, ამ გარემოში მყავდეს ბავშვები. მანამდე კარების სრულად გამოხურვა ვერ მოვახერხე. იმედი მაქვს, რომ ამჯერად შევძლებ.“
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ურთიერთდახმარების ჯგუფები ჩაერთნენ საერთაშორისო კამპანიაში „16 აქტიური დღე ქალთა მიმართ ძალადობის წინააღმდეგ“. ეს კამპანია აძლიერებს ქალებს და ადგილობრივ დონეზე მეტი მხარდამჭერის პოვნაში ეხმარება.
ყველა ჯგუფი ადგილობრივ თვითმმართველობასთან ერთად ცდილობს პრობლემების მოგვარებას. რამდენიმე შეხვედრას ესწრებოდა ქალთა ფონდი „სოხუმის“ ფსიქოლოგიც, რომელმაც მძიმე ქეისებზე დაიწყო მუშაობა.
ჯგუფის წევრები გახსნილად საუბრობენ პრობლემებზე. შეხვედრებს ესწრებოდნენ მერიის, სოციალური სამსახურის, გენდერული საბჭოს წარმომადგენლები, რომლებიც მზად არიან, ჩაერთონ პრობლემათა ადვოკატირების პროცესში და დაეხმარონ ქალებს თავიანთი მიზნების მიღწევაში.
დეკემბრის შეხვედრები გამორჩეული იყო იმით, რომ ჯგუფის წევრებს მადლობის სიგელები გადაეცათ ნდობისა და თანამშრომლობისთვის. ეს დიდი სტიმულია მათთვის.
პროექტი ხორციელდება გენდერული თანასწორობის ფონდის მხარდაჭერით (კანადა)
„ლიდერობა, პრეზენტაცია, საჯარო გამოსვლები“ - ამ თემას მიეძღვნა წყალტუბოს ინოვაციების ცენტრში ჩატარებული ტრენინგი.
ტრენინგში მონაწილეობდნენ დევნილთა თემში მცხოვრები ამხანაგობების წარმომადგენელი ლიდერი ქალები. თეორიულ მასალას ამყარებდა პრაქტიკული სავარჯიშოები, თემატური ვიდეორგოლები, სავარჯიშოები.
მონაწილეებმა აღნიშნეს, რომ ასეთი ტიპის ტრენინგები მნიშვნელოვანია, რადგან ანვითარებს მათ უნარებს და კომპეტენტურობას.
ტრენინგზე დამსწრეებს ჰქონდათ შესაძლებლობა, მოესმინათ ცენტრი „აფხაზეთის" წარმომადგენლებისთვის და მიეღოთ საჭირო ინფორმაცია იმ სერვისებზე, რომელთაც ისინი სთავაზობენ დევნილებს.
მუშაობა მიმდინარეობს ცენტრ „აფხაზეთთან“ პარტნიორობით, პროექტის „კონფლიქტების ტრანსფორმაციის მხარდაჭერა სამხრეთ კავკასიაში და მოლდოვაში“ ფარგლებში.
შეავსე კითხვარი! - ასეთი თხოვნა გამოჩნდა ჩვენს ვებგვერდზე.
შესავალში წერია:
მეორე წელია, ფუნქციონირებს ჩვენი ვებგვერდი „ძალადობის მსხვერპლთა ციფრული რესურსცენტრი“ - https://sosfsokhumi.ge/
მომხმარებელთა რიცხვიც ყოველდღიურად იზრდება.
ეს ნიშნავს ვიზიტორთა დაკვეთის გათვალისწინებას - ყველაზე საინტერესო, მნიშვნელოვან ინფორმაციაზე.
თქვენ შეგიძლიათ დაგვეხმაროთ საიტის დახვეწაში!
უკვე ათობით ადამიანმა შეავსო კითხვარი, რომელშიც არის შეკითხვები, თუ რამდენად მნიშვნელოვანია ასეთი საინფორმაციო პლატფორმა, რამდენად აქტიურად სარგებლობს ადამიანი ვებგვერდით, არის თუ არა განთავსებული ინფორმაცია სასარგებლო ოჯახში ძალადობის მსხვერპლი ქალებისთვის/პოტენციური მსხვერპლისთვის.
მშვიდობა, მშვიდობის მშენებლობა, სამშვიდობო მოლაპარაკებები - ამ საკითხებზე ზუგდიდის მუნიციპალიტეტის სოფელ დიდინეძის ახალგაზრდულ ჯგუფთან ტრენინგი გაიმართა. მონაწილეებმა ინტერაქციულ რეჟიმში, დისკუსიის ფონზე გაანალიზეს რა არის საჭირო მშვიდობის მისაღწევად და რა როლი აქვთ ახალგაზრდებს ამ პროცესებში. გაიგეს რა არის მოლაპარაკება, რა სეგმენტების გათვალისწინებაა აუცილებელი და მნიშვნელოვანი მოლაპარაკების პროცესის სწორად წარმართვისთვის. როლური თამაშების დახმარებით ტრენინგში მთელი ჯგუფი აქტიურად ჩაერთო.
ქალთა მიმართ ძალადობის წინააღმდეგ 16 დღიანი კამპანიის ფარგლებში ქალთა საინიციატივო ჯგუფის შეხვედრა გაიმართა. კამპანიის ფარგლებში დიდინეძის ქალთა და ახალგაზრდულმა ჯგუფებმა ბევრი ღონისძიება და აქცია ჩაატარეს. მომზადდა კედლის გაზეთები, სლოგანები, გადაიღეს ვიდეორგოლები, მოეწყო ფილმების ჩვენება ძალადობის თემაზე, ჩატარდა გამოკითხვა საზოგადოებრივ-პოლიტიკურ საქმიანობაში ქალის როლზე. აქციას მამაკაცებიც შეუერთდნენ. სკოლის მოსწავლეებმა, ფორუმ თეატრის წევრებმა, ძალადობის წინააღმდეგ მინი სპექტაკლები წარადგინეს. მიზანი ცნობიერების ამაღლება და ქალთა მიმართ ძალადობის შემცირებაა.
