ქალთა ფონდმა ,,სოხუმი,, ახალგაზრდული პარკის მშვიდობის ხეივანში მშვიდობის საერთაშორისო დღე აღნიშნა .
საერთო ინიციატივების ფარგლებში, ქალთა და ახალგაზრდულმა საინიციატივო ჯგუფებმა ქართული, აფხაზური და ოსური სამზარეულო წარმოადგინეს, აღწერეს თითოეული კერძის შემადგენლობა და აღნიშნეს, რომ მოამზადეს სიყვარულით.
კერძების დაგემოვნებასთან ერთად სიამოვნებით მიირთვეს ქვიშაზე მოდუღებული სოხუმური ყავა.
ასევე, მოეწყო თემატური ნახატების, ფოტოების გამოფენა და კონცერტი - ლექსები და სიმღერები სამშობლოზე. ჩატარდა ვიქტორინა - რა ვიცით აფხაზეთის შესახებ და გამოვლინდა გამარჯვებულიც.
წალენჯიხის მუნიციპალიტეტის სოფელ ფახულანის ქალთა საინიციატივო ჯგუფმა მშვიდობის საერთაშორისო დღესთან დაკავშირებით შეხვედრა გამართა.ბენეფიციარების თხოვნით მოწვეულმა სტუმარმა , ფონდ "სოხუმის"იურისტმა თამარ ფაჩულიამ, მათ კითხვებს უპასუხა.ჯგუფის წევრებმა მიწის საკუთრებაში მიღებასთან დაკავშირებით კონსულტაციები გაიარეს;განიხილეს სკოლის მშენებლობის პროცესის შეჩერების თემა;მიიღეს ინფორმაცია ,თუ როგორ შეიძლება კანონის ფარგლებში,მოსახლეობამ მონაწილეობა მიიღოს იმ საკითხების მოგვარების პროცესში,რაც ყველაზე მეტად აწუხებს.
მშვიდობის საერთაშორისო დღესთან დაკავშირებით, ფონდი „სოხუმის“ ინიციატივით სენაკში ქართული, აფხაზური და ოსური სამზარეულოს დღე აღინიშნა. ღონისძიება მრავალფეროვანი და საინტერესო გამოვიდა. არაფორმალური ურთიერთობის ფონზე, კერძების დაგემოვნებასთან ერთად მონაწილეები იხსენებდნენ პოზიტიურ ისტორიებსა და საერთო ტრადიციულ ელემენტებს ქართულ-აფხაზური ურთიერთობებიდან. ჯგუფის წევრებმა კერძების ისტორიასა და შემადგენლობაზეც ისაუბრეს. ღონისძიებამ კიდევ ერთხელ დაადასტურა, რომ ქართველებს, აფხაზებსა და ოსებს სხვა ყველაფერთან ერთად სამზარეულოც საერთო გვქონდა. შეხვედრას ქალთა საინიციატივო ჯგუფის წევრები, ახალგაზრდები, დევნილი ქალები და სამოქალაქო აქტივისტები ესწრებოდნენ. ღონისძიება რომელიც ფონდი „სოხუმის“ მიერ შემუშავებული სამშვიდობო სტრატეგიის ფარგლებში ჩატარდა, მიზნად ისახავს ქართულ-აფხაზურ-ოსურ საზოგადოებას შორის ნდობის აღდგენას.
ზუგდიდის მუნიციპალიტეტის სოფელ დიდინეძის ქალთა და ახალგაზრდული საინიციატივო ჯგუფის წევრებმა მშვიდობის საერთაშორისო დღესთან დაკავშირებით ,შეხვედრა განსხვავებული ფორმატით გამართეს.სამშვიდობო სტრატეგიიდან გამომდინარე ,ახალგაზრდების მიერ შესრულებული ნახატების გამოფენა გაიმართა.მომზადდა ბანერები,სადაც დატანილი იყო მესიჯები თემასთან დაკავშირებით.აღინიშნა,რომ მსგავსი ინიციატივები ხელს უწყობს სამშვიდობო პროცესების დარეგულირებას და ურთიერთობების აღდგენას.
ფონდი „სოხუმის“ ოფისში სამუშაო შეხვედრა ჩატარდა პროექტში ჩართული საინიციატივო ჯგუფის (ქუთაისის ყოფილი კოოპერაციული ტექნიკუმის და კლინიკური საავადმყოფოს შენობაში მცხოვრები დევნილი ქალები და გოგონები) წევრებთან.
შეხვედრის მონაწილეებმა ისაუბრეს პრობლემების ადვოკატირების პროცესზე, გავლენასა და ცვლილებებზე, შესრულებული და ჯერ კიდევ შეუსრულებელი სამუშაოების შესახებ. დაასახელეს ახალი პრობლემები, რომელთა მოგვარებასაც პროექტის ფარგლებში გეგმავენ.
პროექტი ხორციელდება USAID-ის ადგილობრივი თვითმმართველობის პროგრამის ფარგლებში
ქუთაისის აკაკი წერეთლის სახელმწიფო უნივერსიტეტში ქალთა ფონდი „სოხუმის“ ორგანიზებით კონფერენცია გაიმართა თემაზე: „ჟურნალისტების როლი გენდერული დეზინფორმაციის აღმოფხვრასა და ქალთა მიმართ გენდერული ძალადობის საკითხების ეთიკურ და პასუხისმგებლიან გაშუქებაში“. კონფერენციის მიზანი იყო სტუდენტების, განსაკუთრებით კი - ჟურნალისტიკის ფაკულტეტის წარმომადგენლების, ინფორმირებულობის გაზრდა გენდერული დეზინფორმაციის გამოვლენისა და ქალთა მიმართ ძალადობის საკითხების ეთიკურ გაშუქებაზე. ღონისძიებამ ხელი შეუწყო ახალგაზრდების ჩართულობას, სადაც ყურადღება გამახვილდა ჟურნალისტების როლზე საზოგადოების არაძალადობრივი და ჯანსაღი გარემოს დამკვიდრებაში.
„დიდი მადლობა ამ თემის ჩვენამდე მოტანისთვის. ვისურვებდი, რომ მსგავს ღონისძიებას უფრო ფართო აუდიტორია ჰყავდეს და მხოლოდ ჟურნალისტიკის ფაკულტეტის სტუდენტებისათვის კი არა, არამედ ყველასთვის იყოს მისი მოსმენა შესაძლებელი. იმედს ვიტოვებ, რომ ჩემი თაობა შეძლებს ქალთა მიმართ ძალადობის აღმოფხვრას და გენდერული თანასწორობის მიღწევას ჩვენს ქვეყანაში,“ - საკუთარი მოსაზრება დააფიქსირა კონფერენციაში მონაწილე ერთ-ერთმა სტუდენტმა.
ქობულეთის ქალთა ურთიერთდახმარების ჯგუფში ახალი წევრები არიან. პირველ შეხვედრაზე მათ ისაუბრეს ქალების საჭიროებებსა და პრობლემებზე. ახალი წევრები არიან ვანშიც. თერჯოლაში კი ის ქალები შეიკრიბნენ, რომლებმაც ურთიერთდახმარების ჯგუფის მუშაობის შედეგად შეძლეს თავიანთი ცხოვრების შეცვლა.
10 მუნიციპალიტეტში შექმნილ ყველა ჯგუფში არიან ახალი წევრები და, შესაბამისად, გაჩნდა ახალი გამოწვევები. შეხვედრებზე ქალები მსჯელობენ ძალადობასთან დაკავშირებულ პრობლემებზე და ცდილობენ, ერთობლივად მოაგვარონ ისინი.
პროექტი ხორციელდება გენდერული თანასწორობის ფონდის მხარდაჭერით (კანადა)
პროექტის „კამპანიების ორგანიზება საზოგადოებაში და სოციალურ ქსელებში სსო-ის მუშაობის მნიშვნელობის ჩამოსაყალიბებლად“ ფარგლებში გაიმართა საინფორმაციო შეხვედრა წალენჯიხაში. შეხვედრის მონაწილეები გაეცნენ გზამკვლევს „გენდერული ნიშნით ძალადობის პრევენცია და მასზე რეაგირება საომარ და ომის შემდგომ გარემოში - ქალთა არასამთავრობო ორგანიზაციების გამოცდილება და რეკომენდაციები“ (მოამზადა და გამოსცა ევროპელ ქალთა ქსელმა - WAVE).
მასში საუბარია ქალთა ორგანიზაციების წარმატებულ მუშაობაზე. ერთ-ერთ მაგალითად წარმოდგენილია ქალთა ფონდი „სოხუმის“ პრაქტიკა.
შეკრებილებმა ასევე ინფორმაცია მიიღეს იმაზე, რომ შემუშავებული სატრენინგო მოდულის მიხედვით საზოგადოების სხვადასხვა ჯგუფი ეცნობა ქალთა ორგანიზაციების წარმატებულ გამოცდილებას.
პროექტი ხორციელდება ქალთა უფლებების დაცვის სწრაფი რეაგირების ფონდის მხარდაჭერით
„გენდერული ნიშნით ძალადობის პრევენცია და მასზე რეაგირება საომარ და ომის შემდგომ გარემოში - ქალთა არასამთავრობო ორგანიზაციების გამოცდილება და რეკომენდაციები“- ამ საკითხზე გაიმართა საინფორმაციო შეხვედრები წალენჯიხის, წყალტუბოს, სენაკის, ვანის და ზუგდიდის მუნიციპალიტეტში სხვადასხვა სამიზნე ჯგუფებთან.
მონაწილეებმა მოისმინეს ქალთა ორგანიზაციების და მათ შორის ფონდი „სოხუმის“ საუკეთესო პრაქტიკა, რომელიც ომის შემდგომ პერიოდში ქალთა მხარდაჭერას და მათ გაძლიერებას ითვალისწინებს .
შეხვედრა ჩატარდა პროექტის „კამპანიების ორგანიზება საზოგადოებაში და სოციალურ ქსელებში სსო-ის მუშაობის მნიშვნელობის ჩამოსაყალიბებლად“ ფარგლებში.
პროექტი ხორციელდება ქალთა უფლებების დაცვის სწრაფი რეაგირების ფონდის მხარდაჭერით
ევროპელ ქალთა ქსელმა ძალადობის წინააღმდეგ (WAVE) ორი წლის წინ გამოსცა გზამკვლევი „გენდერული ნიშნით ძალადობის პრევენცია და მასზე რეაგირება საომარ და ომის შემდგომ გარემოში - ქალთა არასამთავრობო ორგანიზაციების გამოცდილება და რეკომენდაციები“ (ხელმისაწვდომია აქ: https://www.fsokhumi.ge/index.php/ka/publikacia/informatia-zaladobis-tsinaagmdeg/item/13404-2023-03-17-07-47-05).
პუბლიკაცია დღესაც არ კარგავს აქტუალობას, რადგან მასში წარმოდგენილია საუკეთესო პრაქტიკები და ერთ-ერთი ორგანიზაცია არის ქალთა ფონდი „სოხუმი“.
ჩვენმა ორგანიზაციამ პროექტის „კამპანიების ორგანიზება საზოგადოებაში და სოციალურ ქსელებში სსო-ის მუშაობის მნიშვნელობის ჩამოსაყალიბებლად“ ფარგლებში საინფორმაციო შეხვედრები მოაწყო მუნიციპალიტეტებში. შეხვედრა გაიმართა თერჯოლაშიც, სადაც ფონდი „სოხუმი“ წლებია, მუშაობს.
შეხვედრის მონაწილეები ინტერესით გაეცნენ ქალთა ორგანიზაციების და მათ შორის ფონდი „სოხუმის“ წარმატებულ გამოცდილებას და აღნიშნეს, რომ ორგანიზაცია მეტად საჭირო საქმეს აკეთებს ქალებისა და მათი ოჯახებისთვის.
პროექტი ხორციელდება ქალთა უფლებების დაცვის სწრაფი რეაგირების ფონდის მხარდაჭერით