შეხვედრები (642)
შეხვედრები – ამ კატეგორიაში განთავსებულია ცნობები საინფორმაციო შეხვედრების შესახებ ფონდი „სოხუმის“ პროექტების ფარგლებში - შეხვედრები ბენეფიციარებთან, სახელმწიფო სტრუქტურების, ადგილობრივი და საერთაშორისო არასამთავრობო ორგანიზაციების წარმომადგენლებთან.
4 ივლისს სენაკში ჩატარებულ საინფორმაციო შეხვედრას ესწრებოდნენ ჟიული შარტავას მუზეუმის, მხარეთმცოდნეობის მუზეუმის, სამხატვრო სკოლის და კულტურის სახლის წარმომადგენლები.
შეხვედრაში მონაწილეობა მიიღეს საკრებულოს დეპუტატმა ელისო ცაგურიამ და მუნიციპალიტეტის წარმომადგენელმა ეკა ყურაშვილმა.
კულტურის სამსახურის მუშაკები ადგილობრივი თვითმმართველობის დაფინანსებაზე არიან. მათ მოკრძალებით აღნიშნეს დაბალი ხელფასების შესახებ და ითხოვეს, რომ იფიქრონ მათ მომატებაზე.
გარდა ამისა, ისაუბრეს სოციალურ პრობლემებზე. ადგილობრივი თვითმმართველობის წარმომადგენლები მათ საკითხებში გარკვევას და, შეძლებისდაგვარად, დახმარებას შეპირდნენ.
პროექტის „ცოდნით ვძლიოთ ძალადობას“ ფარგლებში ჩატარებული ტრენინგის შემდეგ გამოვლინდა რამდენიმე აქტიური მონაწილე. ერთ-ერთმა მათგანმა დამოუკიდებლად ჩაატარა საინფორმაციო შეხვედრები სოფლის თემში.
ფოთის ქალთა მხარდაჭერის ცენტრი აქტიურად ემზადება პროექტის „ძალადობის პრევენცია ჯანსაღი ცხოვრების წესის პოპულარიზებით“ განხორციელებისთვის. დაგეგმილია სხვადასხვა სპორტული ღონისძიებები: შაშის და ნარდის თამაში, ხელბურთი გოგონების და ბიჭების მონაწილეობით, ჭიდაობა.
ღონისძიება დაიგეგმა 10 ივლისს, მალთაყვის სანაპიროზე.
ამ ეტაპზე შეხვედრები იმართება თვითმმართველობების სამსახურებში და განიხილება საორგანიზაციო საკითხები. ღონისძიებაში აქტიურად მონაწილეობს ფოთის მერიის ახალგაზრდული და სპორტის, სოციალური დაცვის და გენდერულ საკითხთა სამსახური.
დაიბეჭდა პოსტერები და საინფორმაციო ფურცლები, მომზადდა მაისურები სლოგანით „ჯანსაღი ცხოვრების წესი ძალადობის წინააღმდეგ!“
ფონდმა „სოხუმმა“ 29 ივნისს მოაწყო ქუთაისის, სენაკის, ოზურგეთის მუნიციპალიტეტების გენდერული საკონსულტაციო საბჭოების ქსელური შეხვედრა კომპლექს „გრანდპალასში“.
შეხვედრაზე მოსმენილ იქნა მოხსენებები გენდერული თანასწორობის კანონში მიღებულ ცვლილებებზე, გენდერული პოლიტიკის განვითარებაზე რეგიონებში, გენდერული საბჭოების მიღწევებსა და გამოცდილება, საზოგადოებასთან თანამშრომლობისა და მასმედიის როლზე.
შეხვედრის დასკვნით ნაწილში გაიმართა დისკუსია და შემუშავდა წინადადებები შემდგომი მუშაობისთვის.
ქუთაისის გენდერული საკონსულტაციო საბჭოს პროექტის ფარგლებში ქუთაისის უნივერსიტეტში გაიმართა სტუდენტური კონფერენცია თემაზე: „საზოგადოების სხვადასხვა სეგმენტი გენდერულ პრიზმაში - სტუდენტური მიდგომები, პრობლემების მოგვარების ეფექტური მექანიზმები“.
მოხსენებებში სტუდენტებმა სხვადასხვა მიმართულებით არსებულ გენდერულ დისკრიმინაციაზე გააკეთეს აქცენტი: ქვოტების სისტემა, საპენსიო ასაკი, დისბალანსი ქართულ პოლიტიკაში. კონფერენციაზე მოწვეულნი იყვნენ ადგილობრივი ხელისუფლების წარმომადგენლები, გენდერული საკონსულტაციო საბჭოს წევრები, უნივერსიტეტის ლექტორები...
კონფერენცია დისკუსიით გაგრძელდა. მონაწილეთა აზრით, გენდერული თემით სტუდენტების დაინტერესება მნიშვნელოვანია, რათა ის საკითხები, რომლებიც დღეს ასე მწვავედ დგას ჩვენს საზოგადოებაში, ახალგაზრდებისთვის პრიორიტეტული იყოს.
სენაკის გენდერული საკონსულტაციო საბჭოს მორიგი სხდომა გაიმართა საკრებულოს დარბაზში. საბჭოს წევრები გაეცნენ ადგილობრივი გენდერული საჭიროებების კვლევას, განიხილეს ანალიზის შედეგად შემუშავებული რეკომენდაციები 2017 წლის ბიუჯეტისთვის.
საბჭოს თავმჯდომარემ ნანა ალანიამ გააკეთა მოკლე ანგარიში მიმდინარე პროექტზე, რომლის ფარგლებშიც წარმატებით დასრულდა ვორკშოპების სერია გენდერისა და ოჯახში ძალადობის თემაზე სოფლის მოსახლეობის სხვადასხვა კატეგორიასთან: ახალგაზრდობა, მოსწავლეები, სკოლის და საბავშვო ბაღების პედაგოგები, ექიმები. სულ ჩატარდა 56 ვორკშოპი 600-ზე მეტი ადამიანის მონაწილეობით.
სხდომაზე იმსჯელეს საბჭოს ახალ პროექტზეც, რომლის დაწყება ივლისიდან იგეგმება - მისი ძირითადი სამიზნე ჯგუფია სოფლის საბავშვო ბაღების პედაგოგები და აღსაზრდელთა მშობლები. პროექტი ხელს შეუწყობს არაძალადობრივი საზოგადეობის ჩამოყალიბებას სენაკის მუნიციპალიტეტის საბავშვო ბაღებში გენდერული განათლების დანერგვით.
20 ივნისი ლტოლვილთა და იძულებით ადგილნაცვალ პირთა საერთაშორისო დღეა. ქუთაისში, თიბისი გალერეაში ამ დღეს ფონდ „სოხუმთან“ არსებულმა გაერთიანებამ „გოგონები და ქალები დემოკრატიის განვითარებისთვის“ მოაწყო არასამთავრობო ორგანიზაციების საქმიანობის პრეზენტაცია და მონაწილეთა ნამუშევრების გამოფენა.
ამ დღეს არასამთავრობო ორგანიზაციებთან, დევნილთა სტრუქტურებთან და საგანმანათლებლო დაწესებულებებთან ერთად სწორედ დევნილთა თემის წარმოჩენა მოხდა - მისი ყოველდღიურობით, მიღწევებით...
შეხვედრას ესწრებოდნენ ქუთაისის საკრებულოს დეპუტატები, პარტნიორი ორგანიზაციების და მასმედიის წარმომადგენლები.
ინფორმაციები მიმდინარე პროექტზე, კვლევის შედეგების ანალიზის გაცნობა, ახალი პროექტის განხილვა - ქუთაისის გენდერულმა საკონსულტაციო საბჭომ ამ საკითხებით მორიგი სხდომა გამართა.
გენდერული საკონსულტაციო საბჭოს პროექტის ფარგლებში სტუდენტებთან ვორკშოპების ციკლი ჩატარდა. რა გამოიკვეთა, როგორია სტუდენტთა ინფორმირება გენდერულ საკითხებზე, რა სახის საჭიროებები აქვთ და რა ტიპის რეკომენდაციებს გვთავაზობენ ახალგაზრდები - ეს საკითხები შეაფასეს იმ სტუდენტებმა, რომლებიც ვორკშოპებს ფასილიტაციას უწევდნენ.
საბჭოს წევრებმა მოისმინეს ასევე ინფორმაციები გენდერული კვლევის შედეგებზე, რომელიც მაისში ჩატარდა სხვადასხვა სამიზნე ჯგუფთან. რეკომენდაციებზე მსჯელობა მომდევნო სხდომაზეც გაგრძელდება და გენდერული პოლიტიკის დოკუმენტის შექმნით დამთავრდება.
სხდომის დასასრულს, მონაწილეებმა ახალი პროექტის სამუშაო ვარიანტი განიხილეს, რომელიც მიზნად ისახავს გენდერულ თემაზე სცენარის შექმნას თოჯინების თეატრისთვის.
პროექტის „თემთა მობილიზება ოჯაში ძალადობის პრევინციისთვის“ ფარგლებში შეხვედრა გაიმართა ხონის მუნიციპალიტეტის საკრებულოს თავმჯდომარესთან ვალერი ბახტაძესთან და თავმჯდომარის თანაშემწესთან ქეთევან ყუფარაძესთან. ისინი გაეცნენ სამოქმედო გეგმას, პროექტში შეტანილ იქნა კორექტივები - ივანდიდისა და ქუტირის ნაცვლად მუშაობა განხორციელდება ნახახულევში, კუხსა და მათხოჯში.
ოზურგეთის გენდერული საკონსულტაციო საბჭოს სხდომაზე განიხილეს ადგილობრივი საჭიროებების კვლევის ანალიზის ფარგლებში შემუშავებული რეკომენდაციები.
შეხვედრის მონაწილეებმა დააფიქსირეს მოსაზრება - მიუხედავად იმისა, რეკომენდაციების გათვალისწინება ამ ეტაპზე შეუძლია თუ არა ადგილობრივ თვითმმართველობას, მაინც ყველა უნდა აისახოს ოზურგეთის მუნიციპალიტეტის გენდერული პოლიტიკის გეგმაში, რომელსაც გენდერული საკონსულტაციო საბჭო შეიმუშავებს ადგილობრივი თვითმმართველობის წინაშე წარსადგენად. პროექტის დასრულების შემდეგ ადგილობრივ თვითმმართველობას დარჩება დოკუმენტი, რომელიც გაუმარტივებს გენდერული საჭიროებების ასახვის პროცესს ადგილობრივ ბიუჯეტში.