შეხვედრები (642)
შეხვედრები – ამ კატეგორიაში განთავსებულია ცნობები საინფორმაციო შეხვედრების შესახებ ფონდი „სოხუმის“ პროექტების ფარგლებში - შეხვედრები ბენეფიციარებთან, სახელმწიფო სტრუქტურების, ადგილობრივი და საერთაშორისო არასამთავრობო ორგანიზაციების წარმომადგენლებთან.
ბათუმის გენდერული საკონსულტაციო საბჭოსა და ფონდი „სოხუმის“ სამუშაო ჯგუფმა საინფორმაციო შეხვედრა გამართა ქობულეთის საკრებულოსა და გამგეობის წარმომადგენლებთან. საუბრის თემა შეეხებოდა ახალ საკანონმდებლო ინიციატივებს, რომელთა მიხედვით ადგილობრივ ხელისუფლებაში ხდება გენდერული თანასწორობის საბჭოების ინსტიტუციონალიზაცია, ასევე - თვითმმართველობის უფლებამოსილების გაზრდა ოჯახში ძალადობის შემთხვევებზე რეაგირებისთვის. შეხვედრაზე ითქვა, რომ ეს თემა საკმაოდ აქტუალურია მუნიციპალიტეტში, გამოიკვეთა ძირითადი გამოწვევები, დაისახა სამომავლო თანამშრომლობის გეგმები - განსაკუთრებით მუნიციპალიტეტის სოფლებში საზოგადოების ინფორმირების, ქალთა ჯგუფების, ახალგაზრდების გააქტიურების კუთხით.
გაფართოებული ფორმატით გაიმართა სენაკის გენდერული საკონსულტაციო საბჭოს 23-ე სხდომა. პირველი ნაწილი მიეძღვნა ფონდი „სოხუმის“ კვლევის „ქალთა ადამიანური უსაფრთხოების ხარისხის შეფასება დასავლეთ საქართველოში“ პრეზენტაციას. თემიდან გამომდინარე, სხდომაზე საბჭოს წევრებთან ერთად მოწვეულნი იყვნენ საკრებულოს თავმჯდომარე და მისი მოადგილე, დეპუტატები, სოციალური სამსახურის, სურსათის უვნებლობის სამსახურის და ჯანდაცვის სფეროს წარმომადგენლები, პედაგოგები და სკოლის დირექტორები,საბავშვო ბაღის გამგეები. მათი მონაწილეობით გაიმართა კვლევის შედეგად გამოვლენილი უსაფრთხოების საკითხებზე მსჯელობა სენაკის მუნიციპალიტეტის კონტექსტში.
სხდომის მეორე ნაწილში მონაწილეობა მიიღეს მხოლოდ საბჭოს წევრებმა, რომელთაც დეტალურად განიხილეს ახალი პროექტი, რომელიც მიმართულია მუნიციპალიტეტის 14 ტერიტორიულ ერთეულში მუშაობისკენ გენდერისა და გენდერული ძალადობის საკითხებზე გამგებლის წარმომადგენლების, მაჟორიტარი დეპუტატების, პედაგოგების, სკოლის დირექტორების და აქტიური ახალგაზრდების ჩართვით.საბჭოს წევრებს პროექტის განხორციელებაში ადგილობრივი თვითმმართველობისა და ფონდი „სოხუმის“ მხარდაჭერის დიდი იმედი აქვთ.
სენაკის საკრებულოს სხდომათა დარბაზში ფონდი „სოხუმის“ მიერ ჩატარებული კვლევის - „ქალთა ადამიანური უსაფრთხოების ხარისხის შეფასება დასავლეთ საქართველოში“ - შედეგების ამსახველი პუბლიკაციის პრეზენტაცია გაიმართა.
შეხვედრას ესწრებოდნენ ფონდი „სოხუმის“ და ადგილობრივი თვითმმართველობის ხელმძღვანელები, სენაკის გენდერული საკონსულტაციო საბჭოს წევრები, სხვადასხვა ადგილობრივი სტრუქტურის, საგანმანათლებლო დაწესებულების, საზოგადოების წარმომადგენლები.
კვლევის შედეგებში გამოიკვეთა ის საფრთხეები, რომლებიც წარმოადგენს რისკებს ქალების სხვადასხვა სოციალური თუ ასაკობრივი ჯგუფისთვის. აქცენტი გაკეთდა ფონდის მიერ ორგანიზებული კვლევის უკუკავშირზე, რომლის შედეგად სენაკის ქალთა ჯგუფებმა გამოხატეს თავიანთი დამოკიდებულება საკუთარი უსაფრთხოების კუთხით არსებულ გამოწვევებზე.
პრეზენტაციაზე ითქვა, რომ ჩატარებული საქმიანობა იძლევა საშუალებას, გაკეთდეს რეკომენდაციები შესაბამისი სტრუქტურებისათვის, რათა ქალების მიერ გამოკვეთილ პრობლემებზე დროული რეაგირება მოხდეს და ამაღლდეს მათი ადამიანური უსაფრთხოების ხარისხი.
ოზურგეთის გენდერულმა საკონსულტაციო საბჭომ გურიის გუბერნიის მხრიდან მიიღო წინადადება, ხელი შეუწყოს საბჭოების შექმნას გურიის მასშტაბით, რადგან საბჭოსა და თვითმმართველობის ერთობლივი მუშაობით ბევრი სასიკეთო საქმე გაკეთდა ოზურგეთის მოსახლეობისთვის.
თებერვლის შეხვედრაზე გენდერული საკონსულტაციო საბჭოს გაერთიანებულ სხდომას ესწრებოდნენ ლანჩხუთის და ჩოხატაურის მუნიციპალიტეტის დეპუტატი ქალები.
შეხვედრაზე განხილულ იქნა საჭოს მუშაობის პრინციპები, დაიგეგმა შეხვედრები ორივე მუნიციპალიტეტში საბჭოების ოფიციალურად ფორმირების მიზნით. ლანჩხუთისა და ჩოხატაურის საკრებულოს წევრი ქალბატონები დიდი მოტივაციით მიუდგნენ სიახლეს, რომლის დანერგვასაც მათ მუნიციპალიტეტებში აპირებს გენდერული საკონსულტაციო საბჭო.
ქალთა მხარდაჭერის ცენტრების მობილიზატორები შეხვდნენ ადგილობრივი თვითმმართველობების წარმომადგენლებს - საკრებულოში, გამგეობასა და მერიაში.
შეხვედრების დროს ადგილობრივი თვითმმართველობის წარმომადგენლებმა გაიგეს ფონდი „სოხუმის“ უფასო სერვისების შესახებ, მობილიზატორები კი გაეცნენ ადგილებზე არსებულ პროგრამებს და სიახლეებს სოციალური მიმართულებით. ეს ინფორმაციები შემდგომში სამობილიზაციო და საინფორმაციო-საკონსულტაციო შეხვედრებზე ვრცელდება, რომ ქალებმა და მათი ოჯახის წევრებმა და, საჭიროების შემთხვევაში, ისარგებლოს.
ფონდი „სოხუმის“ ქალთა მხარდაჭერის ცენტრების მობილიზატორებმა ჩაატარეს 33 სამობილიზაციო შეხვედრა კოლექტიურ ცენტრებსა და სოფლებში. შეხვედრების თემა იყო ადვოკატირება - ადვოკატირების გზები და საშუალებები.
შეხვედრებზე ასევე მონაწილეებმა მიიღეს ინფორმაცია კიბოს წინააღმდეგ ბრძოლის საერთაშორისო დღესთან დაკავშირებით (აღინიშნება 4 თებერვალს) და უფასო გამოკვლევების შესახებ სკრინინგის პროგრამის ფარგლებში - რა ტიპის გამოკვლევის საშუალება აქვს საქართველოს თითოეულ მოქალაქეს და რატომ არის მნიშვნელოვანი ამ პროგრამების გამოყენება.
17 თებერვალს ქუთაისის გენდერული საკონსულტაციო საბჭოს სხდომა გაიმართა. სხდომას ესწრებოდნენ ამომრჩეველ ქალთა კლუბის წევრები. მათ იმ პრობლემებზე გააკეთეს აქცენტი, რომლებიც ქალთა კლუბზე არაერთხელ გაჟღერდა. პრობლემათა ადვოკატირების მიზნით გენდერულმა საბჭომ სხდომაზე მოიწვია მერიის ინფრასტრუქტურის, ტრანსპორტისა და დასუფთავების ხელძღვანელი მალხაზ ბასილაძე. მან იმ პროგრამებზე ისაუბრა, რომელთაც ქუთაისის ადგილობრივი ბიუჯეტი ითვალისწინებს. დაისახა ადვოკატირების სამოქმედო გეგმა, ამ პროცესში საბჭოს წევრებიც ჩაერთვებიან .
დღის წესრიგით, საკრებულოს დეპუტატებმა შეაფასეს ფონდი „სოხუმის“ მიერ გამართული ქსელური შეხვედრის შედეგები. მათი თქმით, ამ შეხვედრაზე მიიღეს ის ინფორმაცია, რაც ძალადობის წინააღმდეგ ადგილობრივი ხელისუფლების პასუხისმგებლობას და აქტიურ მუშაობას გულისხმობს.
17 თებერვალს თბილისში გაიმართა ფონდი „სოხუმის“ კვლევის „ქალთა ხმების გაძლიერება კონფლიქტის ტრანსფორმაციის პროცესში“ პრეზენტაცია, რომელსაც ესწრებოდნენ საზოგადოების სხვადასხვა ჯგუფის, მასმედიის, სახელისუფლებო სტრუქტურების, დიპლომატიური კორპუსის წარმომადგენლები.
ფორუმზე შეკრებილებმა მიიღეს დეტალური ინფორმაცია კვლევის შედეგად დაბეჭდილი ბროშურის „ქალთა მონაწილეობა ჟენევის მოლაპარაკებებში: პრობლემები, წარმატებები, პერსპექტივები“ შესახებ და ნახეს ამავე თემაზე გადაღებული დოკუმენტური ფილმი.
შეხვედრაზე მოხდა იმ საკითხების წამოწევა, რომლებიც აწუხებთ კონფლიქტის ზონაში მცხოვრებთ და რომელთა გარშემო კონსტრუქციულ მოლაპარაკებებსა და შეთანხმებებში ძალიან მნიშვნელოვანია ქალების მონაწილეობა, საკითხების მოგვარებაში მათი ხედვის გათვალისწინება.
გაიმართა დისკუსია კონფლიქტების სამშვიდობო მოგვარების პროცესში მეტი ქალის ჩართვის საკითხებზე. დაფიქსირდა უფრო მოქნილი ფორმატის არსებობის აუცილებლობაც, რომელში ჩართვის საშუალებაც ექნებათ საზოგადოებისა და არასამთავრობო სექტორის წარმომადგენლებს - მათ, ვისაც პრაქტიკული შეხება აქვს პრობლემასთან.
15 თებერვალს ჩატარდა შეხვედრა ქუთაისის ერთ-ერთ კოლექტიურ ცენტრში, სადაც შეკრებილებს მიეწოდა ინფორმაცია დევნილთა კანონის შესახებ. შეხვედრაზე გაზიარებულ იქნა ყველა ის პრობლემა, რაც დევნილებს აქვთ. ერთ-ერთი ქალბატონის პრობლემის მოსაგვარებლად კი, რომელიც უკიდურესად ავადმყოფია და დამოუკიდელად გადაადგილება არ შეუძლია, დაიწერა განცხადება იძულებით გაადგილებულ და განსახლების სამინისტროში, რასაც თან დაერთო სამედიცინო ცნობა.
ფონდი „სოხუმისა“ და ბათუმის გენდერული საკონსულტაციო საბჭოს წევრები აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭოს წევრებს შეხვდნენ. ფონდი „სოხუმის“ წარმომადგენლებმა ისაუბრეს ორგანიზაციის საქმიანობაზე გენდერული პერსპექტივების დამკვიდრების კუთხით, იმ პროექტებზე, რომლებიც ბათუმის გენდერულმა საკონსულტაციო საბჭომ ფონდი „სოხუმისა“ და ადგილობრივი თვითმმართველობის ხელშეწყობით განახორციელა.
შეხვედრაზე დასახელდა შედეგები, რომლებიც მეტყველებს გენდერული საბჭოს საქმიანობის ეფექტურობაზე. ყურადღება გამახვილდა ჩატარებულ კვლევებზე, ახალგაზრდებთან მუშაობაზე, გენდერული პოლიტიკის განხორციელების სამოქმედო გეგმაზე, რომელსაც საბჭო წარუდგენს თვითმმართველობას, როგორც სარეკომენდაციო დოკუმენტს.
როგორია აჭარის უმაღლესი საბჭოს სტრატეგია რეგიონში გენდერული პოლიტიკის დანერგვის კუთხით, რამდენად მნიშვნელოვნად მიიჩნევს თანამშრომლობას არასამთავრობო სექტორთან - გენდერული თანასწორობის საბჭოს თავმჯდომარემ, დეპუტატმა მედეა ვასაძემ საინტერესოდ ისაუბრა აღნიშნულ საკითხებზე. ითქვა, რომ სასარგებლო იქნება მემორანდუმის გაფორმება ერთობლივ საქმიანობაზე.
შეხვედრა გააშუქა ტელეკომპანია „აჭარამ“.