ვორკშოპები (87)
ვორკშოპები – (თარგმანში - „სამუშაო სახელოსნო“) ეს არის სასწავლო ღონისძიება (სემინარების, კურსების მსგავსი), რომელზეც მონაწილეები დამოუკიდებლად იღებენ ცოდნას. ვორკშოპები ტარდება ქალებთან და ახალგაზრდებთან სხვადასხვა თემაზე. ხშირად ვორკშოპებს თვითონ მონაწილეები ატარებენ.
თაობათა კონფლიქტები: მშობლები, შვილები და მათი ურთიერთობები - ამ საკითხებზე იმსჯელეს ახალგაზრდებმა ხონში, ფოთში, წყალტუბოში გამართულ ვორკშოპებზე.
მათი მოსაზრებით, მარადიული თემაა თაობებს შორის კონფლიქტი, რასაც ხშირად განაპირობებს განსხვავებული შეხედულებები.
კონფლიქტის მოგვარების გზებში ახალგაზრდებმა დააფიქსირეს, რომ მშობლები განსაკუთრებით ფრთხილად უნდა მოქმედებდნენ შვილებთან ურთიერთობისას გარდატეხის ასაკში, უნდა გაითვალისწინონ, რომ ყველა ბავშვი ინდივიდუალურია და ის მეთოდი, რომელიც ვთქვათ, უფროს შვილთან გამოუყენებიათ, შესაძლოა მეორესთან ეფექტური არ გამოდგეს.
გამოსავალზე საუბრისას ხაზგასმით აღინიშნა, რომ შვილებმა უნდა გააუმჯობესონ კომუნიკაცია უფროს თაობასთან, მათ კარგად უნდა გააცნობიერონ, რომ მშობლები მათთვის ყველაზე ახლობელი ადამიანები არიან და მათგან წამოსულ წინააღმდეგობას პროტესტით არ უნდა ხვდებოდნენ.
ფსიქიკური ჯანმრთელობის საერთაშორისო დღეს მიეძღვნა ფონდ „სოხუმში“ ქალთა მხარდაჭერის ცენტრის მობილიზატორებისათვის ჩატარებული ვორკშოპი თემაზე „კრიზისული ოჯახების იდენტიფიკაცია და შემდგომი ინტერვენცია“. ვორკშოპს უძღვებოდა ფონდი „სოხუმის“ ფსიქოლოგი. მობილიზატორებს მიეწოდათ ინფორმაცია, თუ როგორ მოახდინონ კრიზისული ოჯახების იდენტიფიკაცია, როგორ დაძლიონ შესაძლო სირთულეები, როგორ მოიქცნენ, თუ ქალი ან ბავშვი ძალადობის მსხვერპლია? მობილიზატორებისათვის სპეციალურად მომზადდა გზამკვლევი და რჩევები.
მენტალიტეტი, პიროვნული ფასეულობები და მათი გავლენა ოჯახური კონფლიქტების განვითარებაზე - ამ თემაზე იმსჯელეს ფოთში, ქუთაისში და კოკში (ზუგდიდის მუნიციპალიტეტი) გამართულ კონფლიქტოლოგიის ვორკშოპზე.
მონაწილეები - ახალგაზრდები - როლური თამაშით შეეცადნენ თემის გაანალიზებას: წარმოდგენილი სცენარით ქმარს ხშირად ავიწყდება ქორწინების დღე, მით უმეტეს იცის, რომ ამ თარიღს მისი მეუღლე განსაკუთრებულ მნიშვნელობას ანიჭებს. დაპირისპირებაც სწორედ აქედან იწყება.
ახალგაზრდების აზრით, ადამიანებს განსხვავებული ფასეულობები გააჩნიათ, რაც ხშირად ხდება ოჯახში კონფლიქტების განვითარების მიზეზი. დისკუსიისას დაფიქსირდა, რომ ოჯახური ურთიერთობები ძირითადად ეფუძნება ურთიერთპატივისცემას, ამიტომ ის, რაც ერთი მხარისთვის უმნიშვნელო დეტალია, მეორისთვის შესაძლოა განსაკუთრებულად ღირებული იყოს. ამ თემაზე დისკუსია ეხმარება ახალგაზრდებს, სწორად იაზროვნონ და გაითვალისწინონ დეტალები, რომლებიც კონფლიქტების მართვას ხელს შეუწყობს პრაქტიკაში.
„ჩემი მშობლები და მეც, მორწმუნეები ვართ და მარხვას ვიცავდით. ახალ წელს სამარხვო კერძებს ვამზადებდით. როცა გავთხოვდი, ჩემი ქმრის ოჯახში რადიკალური სიტუაცია დამხვდა. გამომიცხადეს, რომ ახალი წელი მათთვის განსაკუთრებული მნიშვნელობის იყო და სუფრაზე აუცილებლად უნდა ყოფილიყო გოჭი, ინდაური, მწვადები და ასე შემდეგ. როცა მოკრძალებით გამოვაცხადე, რომ ამდენი სურსათი არ იყო საჭირო, შეურაცხმყოფელი სიტყვები მომაყარეს. ახლა მივხვდი, რომ არასწორი პოზიცია მქონდა. სხვის ფასეულობებს პატივი უნდა სცე,“ - მსგავსი რეალური ისტორიების ანალიზის ფონზე გაიმართა ვორკშოპები ქალების ჯგუფთან წყალტუბოში, სენაკში, ხონში.
მონაწილები მიიჩნევენ, რომ კონფლიქტების მართვაში განსაკუთრებით მნიშვნელოვანია სხვების ფასეულობების გათვალისწინება, რომ ეს დაპირისპირების მიზეზად არ იქცეს.
საინტერესო დისკუსიის ფონზე მიმდინარეობდა ვორკშოპი წყალტუბოში, საკრებულოს სხდომათა დარბაზში, სამოქალაქო საზოგადოების აქტივისტებთან.
პრობლემებზე განსაკუთრებული ემოციით ლაპარაკობდა თითოეული გამომსვლელი, მათ შორის დევნილი ქალები - სანატორიუმების კოლექტიურ ცენტრებში არსებულ უმძიმეს პირობებზე.
ადგილობრივ დონეზე გადასაჭრელ პრობლემებს შორის დასახელდა ის, რომ ქალაქში არ არსებობს საპირფარეშო და „სოკო“ წყლის დასალევად. მიუხედავად იმისა, რომ ქალაქში არის ძალიან კარგი სპორტული სკოლა, ყველა სახეობა მხოლოდ ბიჭებისთვისაა. სასურველია დაემატოს ტანვარჯიში, რადგან მსურველები საკმარისად არიან. ქალები შეეხნენ არაინფორმირებულობის საკითხსაც, მათ არაფერი იციან იმ სახელმწიფო პროგრამებზე, რომელიც ბიზნესის ხელშეწყობას ემსახურება.
მონაწილეებს შორის გამოიყო საინიციატივო ჯგუფი, რომელიც პრობლემათა ადვოკატირებას შეეცდება ადგილობრივ ხელისუფლებასთან თანამშრომლობით.
ფონდი „სოხუმის“ ორგანიზებით ხონის მთავარ ბიბლიოთეკაში გაიმართა ვორკშოპი, რომელსაც აქტივისტი ქალები ესწრებოდნენ. მონაწილეები გაეცნენ ინკლუზიური უსაფრთხოების კონცეფციას. იმსჯელეს იმ პრობლემებზე, რომლებიც საზოგადოების სხვადასხვა ჯგუფებს საფრთხეს უქმნის. ჩამონათვალში გლობალურთან ერთად ისეთი პრობლემებიც მოხვდა, რომელთა გადაჭრა ადგილობრივად შესაძლებელია.
მონაწილეებმა გამოთქვეს მზადყოფნა, აქტიურად ჩაერთონ იმ პროცესში, რომელიც პრობლემათა ადვოკატირების მიზნით იგეგემება.
ვორკშოპები ქალების ჯგუფთან გაიმართა ხონში, სენაკში, ხურჩაში. ოჯახური კონფლიქტების მაგალითების გარჩევის შემდეგ მუშაობა ინტერაქტიულად წარიმართა. მონაწილეებმა აღიარეს, რომ საკუთარი თავისთვის „გარედან“ არასოდეს შეუხედავთ და აღმოაჩინეს, რომ ხშირად თვითონვე ყოფილან ოჯახში კონფლიქტების ინიციატორები.
-ძნელია, საკუთარ თავს გაუბრაზდე, სამაგიეროდ სხვებზე გაბრაზება ადვილია.
-ხშირად,როცა ვინმეზე ნაწყენი ვარ, ბრაზს ოჯახში ვანთხევ, იმიტომ რომ საკუთარ თავთან ყოველთვის რთულია წინააღმდეგობების დაძლევა.
- თუ ყველა ადამიანი შეძლებს პიროვნული, შიდა კონფლიქტების მართვას, ნაკლები იქნება ოჯახური კონფლიქტები, - ასეთი იყო მონაწილეთა მოსაზრება.
ვორკშოპებზე აღინიშნა, რომ სკოლებში უნდა ისწავლებოდეს კონფლიქტოლოგია, როგორც საგანი, განსაკუთრებით ბოლო კლასებში, რადგან ახალგაზრდები უკეთ შეისწავლიან საკუთარ თავს და უფრო ადვილად შეძლებენ სხვადასხვა ტიპის კონფლიქტების დარეგულირებას.
პიროვნული კონფლიქტების გარჩევა საინტერესო გამოდგა ახალგაზრდებისთვის. მათ მიერ გამოთქმულ მოსაზრებებში გამოიკვეთა, რომ ხშირად ჰქონიათ დაპირისპირება საკუთარ თავთან: როცა ბოლომდე არააქვთ გარკვეული, რა უნდათ, რა მიზანი აქვთ. პიროვნული კონფლიქტები ხშირად გამოაქვთ გარეთ, რაც სხვებთან ურთიერთობაში ნეგატიურად აისახება.
საინტერესო იყო ცალკეული ჯგუფების მიერ წარმოდგენილი იმიტირებული ოჯახურისცენები. ახალგაზრდები საერთო დასკვნამდეც მივიდნენ: თუ გვინდა კონფლიქტების მოგვარება, ჯერ საკუთარ თავში მიმდინარე კონფლიქტები უნდა მოვაგვაროთ, შემდეგ უფრო ადვილია ოჯახური კონფლიქტების მართვა.
ვორკშოპები გაიმართა წყალტუბოში, ფოთში, ქუთაისში.
სენაკის მუნიციპალიტეტის სოფლებში მიმდინარეობს ვორკშოპების სერია გენდერსა და ოჯახში ძალადობის თემაზე გენდერული საკონსულტაციო საბჭოს პროექტის „ოჯახში ძალადობის პრევენცია სენაკის მუნიციპალიტეტში“ ფარგლებში (ფონდი ,,სოხუმის“ და ადგილობრივი ხელისუფლების მხარდაჭერით).
ვორკშოპებს ატარებენ მწვრთნელები, რომლებმაც ივნისის დასაწყისში გაიარეს ტრენინგი. მწვრთნელთათვის საჭირო უნარ-ჩვევების დაუფლების შემდეგ საზოგადოების წარმომადგენლები თავიანთ ცოდნას გადასცემენ სოფლის მოსახლეობის სხვადასხვა ჯგუფს: მისწავლეებს, საბავშვო ბაღებისა და სკოლების პედაგოგებს, სოფლის მცხოვრებლებს...
ვორკშოპები კონფლიქტოლოგიაში გაიმართა წყალტუბოში, სენაკში, ხონში. მასში სხვადასხვა ასაკის ქალებმა მიიღეს მონაწილეობა.
როგორ გამოვიყენოთ კომუნიკაცია ოჯახური კონფლიქტების მართვისას, რატომ ვერ ვახერხებთ ეფექტურ ურთიერთობას ერთმანეთთან - ამ საკითხებზე გაიმართა დისკუსია.
მონაწილეებმა ცხოვრებისეული მაგალითები გააანალიზეს. ისაუბრეს პრობლემებზე, რომლებიც კომუნიკაციის დამყარებას ხელს უშლის, ან პირიქით - ეხმარება.
ვორკშოპის მონაწილე ქალების აზრით, დისკუსიები ამ საკითხზე უნდა გაგრძელდეს, რადგან კომუნიკაციის როლი კონფლიქტების მართვაში მნიშვნელოვანია. რაც მეტი ადამიანი გაეცნობა ეფექტური კომუნიკაციის ტექნიკას, უფრო მეტად შემცირდება ოჯახური კონფლიქტების განვითარების რისკი.