ვორკშოპები (87)
ვორკშოპები – (თარგმანში - „სამუშაო სახელოსნო“) ეს არის სასწავლო ღონისძიება (სემინარების, კურსების მსგავსი), რომელზეც მონაწილეები დამოუკიდებლად იღებენ ცოდნას. ვორკშოპები ტარდება ქალებთან და ახალგაზრდებთან სხვადასხვა თემაზე. ხშირად ვორკშოპებს თვითონ მონაწილეები ატარებენ.
როგორ უნდა ჩატარდეს საჯარო დისკუსიები? რა ინფორმაცია უნდა მიეწოდოს შეხვედრის მონაწილეებს ონლაინ მრიცხველზე, მის მნიშვნელობაზე? ამის თაობაზე ფონდი „სოხუმის“ ოფისში ჩატარდა შეხვედრა მობილიზატორებთან, რომლებიც ჩართულნი არიან პროექტში.
მათ დეტალურად განიხილეს დაგეგმილი საინფორმაციო შეხვედრების მიმდინარეობა.
მუშაობა მიმდინარეობს პროექტის „ონლაინ ხმის ელექტრონული მრიცხველი 2020 წლის საპარლამენტო არჩევნებისთვის“ ფარგლებში.
პროექტი ხორციელდება ვიშეგრადის ფონდის მხარდაჭერით
10 ივლისს გაიმართა ვორკშოპი პროექტის „ონლაინ ხმის ელექტრონული მრიცხველი 2020 წლის საპარლამენტო არჩევნებისთვის“ ფარგლებში - საჯარო დისკუსიების მოწყობა/მართვასთან დაკავშირებით. ვორკშოპი მიმდინარეობდა შერეული ფორმატით - მონაწილეთა ნაწილი ფონდი „სოხუმის“ ოფისში იმყოფებოდა, ნაწილი კი სხვადასხვა რეგიონიდან ჩაერთო ონლაინ ზუმის პლატფორმის მეშვეობით. მათ ისაუბრეს არსებულ გამოწვევებსა და პერსპექტივებზე, შექმნეს სამუშაო გეგმების მონახაზი და გაწერეს სამომავლო საქმიანობა. ვორკშოპს უძღვებოდა ეკატერინე გამახარია - ფონდი „სოხუმის“ თბილისის წარმომადგენლობის ხელმძღვანელი.
პროექტი ხორციელდება ვიშეგრადის ფონდის მხარდაჭერით
ორდღიან ვორკშოპზე კლარა კოზლოვამ ქართველ პარტნიორებს გაუზიარა თავისი ქვეყნის - ჩეხეთის გამოცდილება საარჩევნო ონლაინ მრიცხველის დანერგვასთან დაკავშირებით. შემუშავდა ადვოკატირების გეგმა, გაიწერა სამუშაო სტრატეგია.
ვორკშოპი გაიმართა ფონდი „სოხუმის“ თბილისის წარმომადგენლობის ოფისში პროექტის „საქართველოში 2020 წლის საპარლამენტო არჩევნებზე ხმების ონლაინ მრიცხველი“ ფარგლებში, რომელიც ხორციელდება ვიშეგრადის საერთაშორისო ფონდის მხარდაჭერით.
პროექტი ხორციელდება ვიშეგრადის ფონდის მხარდაჭერით
24-25 ნოემბერს ფონდი „სოხუმის“ ოფისში ჩატარდა ორდღიანი ვორკშოპი. ექსპერტებმა ვიშეგრადის ქვეყნებიდან და საქართველოდან ისაუბრეს პოლიტიკური სიტუაციის შესახებ თავიანთ ქვეყნებში, განიხილეს სამოქალაქო საზოგადოებისა და პოლიტიკური პარტიების დამოკიდებულება ხმების ონლაინ-მრიცხველის აპლიკაციასთან მიმართებაში, შემუშავდა მომავალი კითხვარის სამუშაო ვერსია. მუშაობა წარმატებით და ნაყოფიერად ჩატარდა.
ფონდი „სოხუმის“ ოფისში ორი დღის განმავლობაში - 11 და 12 აპრილს მიმდინარეობდა სტრატეგიული ვორკშოპი, რომელზეც პრაქტიკული საკითხები განიხილეს მონაწილეებმა - კოალიცია „ქალი და მშვიდობის“ რამდენიმე ორგანიზაციის წევრებმა. ვორკშოპი ჩაატარა ფასილიტატორმა ფელიპ დაზა სიერამ საერთაშორისო ორგანიზაცია Kvinna till Kvinna-ს მოწვევით.
კონფლიქტოლოგიის კურსდამთავრებულებმა 4 ვორკშოპი ჩაატარეს ფოთისა და ქუთაისის საჯარო სკოლებში თემებზე: „მასკულინურობისა და ფემინურობის კონცეფციები“ და „კონფლიქტის ტიპები, სახეები და მოგვარების მეთოდები“. ასევე ჩატარდა ფორუმ-თეატრის წარმოდგენები და დისკუსიები ქუთაისის და ხონის საჯარო სკოლებში.
ეს მუშაობა მომდინარეობს ფონდი „სოხუმის“ პროექტის „ახალგაზრდებს შორის კონფლიქტის არაძალადობრივად მოგვარების ხელშეწყობა ტრენინგების მეშვეობით დასავლეთ საქართველოში“ ფარგლებში.
პროექტი ხორციელდება კანადის ადგილობრივი ინიციატივების ფონდის -CFLI (კანადის საელჩო თურქეთში) მხარდაჭერით
წყალტუბოს N1 საჯარო სკოლაში პროექტის „ახალი ხედვები ქართულ-აფხაზური კონფლიქტის მშვიდობიანი ტრანსფორმაციისათვის“ ფარგლებში ფონდი „სოხუმის“ აქტივისტმა გოგონებმა ვორკშოპი გამართეს, სადაც პროდუქტიულად გამოიყენეს ფონდის მიერ ორგანიზებულ კონფლიქტოლოგიის ტრენინგზე მიღებული ცოდნა და უნარები.
ვორკშოპის მონაწილეები, ორგანიზატორები პოზიტიურ შეფასებას აძლევენ ღონისძიებას: „ძალიან მნიშვნელოვანია ის, რაც აქ ხდება. სწორედ ახალგაზრდები უნდა იყვნენ ჩართული კონფლიქტის მოგვარებაში. მახარებს ის, რომ ჩემი თანატოლები კონფლიქტის მოგვარებისთვის მხოლოდ მშვიდობიან ფორმებს აღიარებენ. მათ დიდი სურვილი აქვთ, დაამყარონ კონტაქტები ახალგაზრდა აფხაზებთან“.
პროექტი ხორციელდება შვეიცარიის საგარეო საქმეთა ფედერალური დეპარტამენტის მხარდაჭერით
კიდევ ორი ვორკშოპი ჩატარდა პროექტის „ქალთა შესაძლებლობების განვითარება კონფლიქტის ტრანსფორმაციაში ახალი მიდგომების გამოსამუშავებლად“ ფარგლებში.
9 ივნისს ნინო ხუბულავამ აკაკი წერეთლის უნივერსიტეტში შეკრებილ ახალგაზრდებთან ერთად იმუშავა კონფლიქტის ანალიზისა და ტრანსფორმაციის თემაზე. დაინტერესება ქართულ-აფხაზურ კონფლიქტთან დაკავშირებით დიდი იყო. მონაწილეებმა დააფიქსირეს სამშვიდობო ინიციატივები.
27 ივნისს ვორკშოპი გაიმართა ხონის 1-ლ საჯარო სკოლაში. თემა აქტუალური აღმოჩნდა მონაწილეებისთვის. ფასილიტატორმა მარი ჩარგალეიშვილმა ისაუბრა კონფლიქტის მიზეზებზე, ისტორიულ ფაქტებზე, დინამიკაზე.
ორივე ვორკშოპზე ახალგაზრდები აქტიურად ჩაერთნენ ჯგუფურ მუშაობაში. საინტერესო იყო მათი პრეზენტაციები, დისკუსია, კონფლიქტის მოგვარების გზების ძიება.
- ბულინგი ძალიან მტკივნეული საკითხია. უმრავლესობამ არც კი იცის, რა შედეგები შეიძლება მოჰყვეს მოზარდთა შორის განვითარებულ კონფლიქტს. ყველას ერთნაირი ფსიქიკა არ აქვს, შესაძლოა საქმე სუიციდამდე მივიდეს. ამიტომ პედაგოგებმა უფრო მეტი ყურადღება უნდა მიაქციონ ამ საკითხს.
- მშობლები ხშირად ხელს უწყობენ ბულინგის განვითარებას. მაგალითად, საკუთარ შვილებს წინასწარ აპროგრამებენ, ვისთან იმეგობრონ, ვის მიანიჭონ უპირატესობა, რაც არასწორია.
ასეთი პოზიციები ჰქონდათ ვორკშოპის მონაწილე ქალებს ფოთში, სენაკსა და ქუთაისში.
დისკუსიისას აღინიშნა, რომ ბულინგის თემა პირდაპირ კავშირშია ოჯახურ კონფლიქტებთან. ბავშვები, რომლებიც კრიზისულ ოჯახებში იზრდებიან, ხშირად აგრესიას ავლენენ თანატოლების მიმართ, შეურაცხმყოფელი სიტყვებით მიმართავენ მათ და ასე ცდილობენ ნეგატიური ემოციებისგან გათავისუფლებას. ან პირიქით, არასრულფასოვნების შეგრძნება აწუხებთ და თავად ხდებიან ბულინგის მსხვერპლნი.
ვორკშოპების დროს ქალებმა მიიღეს რჩევები, როგორ გამოიცნონ ბულინგი, როგორ დაეხმარონ ბავშვს, თუკი ის ბულინგის ობიექტი ხდება, ან თავად იწყებს ძალადობას.
რატომ ძალადობენ მოზარდები ერთმანეთში, რა ვიცით ბულინგზე და რა კავშირშია ის ოჯახურ კონფლიქტებთან - ამ თემაზე გაიმართა დისკუსიები წყალტუბოში, ხონსა და კოკში (ზუგდიდის მუნიციპალიტეტი) გამართულ ვორკშოპებზე.
მონაწილეებს მიეწოდათ სტატისტიკა, სადაც კარგად ჩანს, რამდენად მაღალია სკოლებში ბულინგის მაჩვენებელი. მიზეზებზე საუბრისას მათ ბულინგი ოჯახურ კონფლიქტებთან დააკავშირეს:
- კონფლიქტური ოჯახებიდან გამოსული ბავშვები ხშირად ხდებიან ბულინგის მსხვერპლნი, რადგან მათ არასრულფასოვნების კომპლექსი აქვთ, უჭირთ გარემოში ადაპტირება.
მათი აზრით, გამოსავალი იმაში მდგომარეობს, რომ მშობლებმა, სკოლამ ერთობლივად, კოორდინირებულად იმუშაონ ბავშვებთან, მოზარდებთან და შეძლონ ბულინგის თავიდან აცილება.