ვორკშოპები (87)
ვორკშოპები – (თარგმანში - „სამუშაო სახელოსნო“) ეს არის სასწავლო ღონისძიება (სემინარების, კურსების მსგავსი), რომელზეც მონაწილეები დამოუკიდებლად იღებენ ცოდნას. ვორკშოპები ტარდება ქალებთან და ახალგაზრდებთან სხვადასხვა თემაზე. ხშირად ვორკშოპებს თვითონ მონაწილეები ატარებენ.
საინტერესო დისკუსიის ფონზე წარიმართა ვორკშოპები კონფლიქტოლოგიაში ქალების ჯგუფთან სენაკში, წყალტუბოში და სოფელ კუხში (ხონის მუნიციპალიტეტი). მონაწილეთა დაინტერესება გამოიწვია განსახილველმა თემამ: „ქალთა მიგრაცია, ოჯახური კონფლიქტების მიზეზი თუ მართვის მექანიზმი“.
დასაწყისშივე გამოიკვეთა, რომ მიგრაციის საკითხი საკმაოდ აქტუალურია, რადგან ბევრ ოჯახს ეხება. ხშირად ოჯახური კონფლიქტების მიზეზი მცირე შემოსავალია და ქალები სამუშაოს საზღვარგარეთ ეძებენ, მაგრამ არის შემთხვევები, როცა გამოგზავნილ ფულს ქმრები სასმელში ფლანგავენ და ახალი კონფლიქტები იქმნება. თითქოს შეკრული წრეა, საიდანაც თავის დაღწევა ძნელია. მონაწილეების აზრით, სახელმწიფო პასუხისმგებლობა უნდა გაიზარდოს, ქალებს მეტი მხარდაჭერა სჭირდებათ დასაქმების კუთხით, რათა ამ პრობლემის პრევენცია მოხდეს.
5 მაისს სენაკის გენდერული საკონსულტაციო საბჭოს წევრები შეუდგნენ ვორკშოპების ციკლის ჩატარებას გენდერისა და ძალადობის თემაზე პროექტის „ოჯახში ძალადობის პრევენცია სენაკის მუნიციპალიტეტში“.
ვორკშოპები უკვე გაიმართა 6 სასოფლო თემში (ახალსოფელი, ნოქალაქევი, ეკი, ზანა, ნოსირი, გეჯეთი) იქ ჩამოყალიბებული გენდერული საინიციატივო ჯგუფებისთვის. მონაწილეთა რაოდენობამ 100-ს გადააჭარბა. პროექტი დაფინანსებულია სენაკის მუნიციპალიტეტის ადგილობრივი თვითმმართველობისა და ფონდი „სოხუმის“ მიერ. მასში აქტიურად არიან ჩართულები გამგებლის წარმომადგენელები სენაკის ყველა სასოფლო თემში და მაჟორიტარი დეპუტატები. მსგავსი ვორკშოპები კიდევ რვა თემში გაიმართება.
წყალტუბოს მუნიციპალიტეტის ააიპ ბაღების გაერთიანებასთან თანამშრომლობით ფონდმა „სოხუმმა“ ჩაატარა ვორკშოპი თემაზე „გენდერი და გენდერული მიდგომა სკოლამდელი ასაკის ბავშვების აღზრდისა და განათლების სფეროში“.
ვორკშოპს ესწრებოდა 33 ადამიანი - 16 საბავშვო ბაღის მენეჯერები და პედაგოგები. განხილულ იქნა შემდეგი თემები: გენდერი, გენდერული მიდგომა, გენდერული მიდგომის მაჩვენებლები, გენდერული მოდელები ბაღებსა და სკოლებში. მუშაობა წარიმართა სხვადასხვა მეთოდით, აქტიური დისკუსიით.
6 მაისს წყალტუბოში, სანატორიუმ „მეგობრობის“ კოლექტიურ ცენტრში ჩატარდა ვორკშოპი დევნილთა უფლებებზე და ადვოკატირებაზე. 7 მაისს ამავე თემას მიეძღვნა ვორკშოპი სანატორიუმ „მედეას“ კოლექტიურ ცენტრში.
შეხვედრას ატარებდნენ ახალგაზრდები, რომლებმაც შესაბამისი ტრენინგები გაიარეს და გამოიმუშავეს უნარ-ჩვევები, თუ როგორ ხდება ადვოკატირება და რა ეტაპები უნდა გაიარონ ადვოკატირებისათვის.
სანატორიუმ „მეგობრობაში“ შეხვედრის დროს დასახელდა შემდეგი პრობლემები: მოუწესრიგებელი გზა, ახლომდებარე ტერიტორიის დასუფთავება, განათების და კანალიზაციის პრობლემა. აღინიშნა, რომ წყლის ონკანის მხოლოდ 1-ლ სართულზეა, აუცილებელია ქვეწარმავლების და მწერების სადეზინფექციო სამუშაოების ჩატარება.
სანატორიუმ „მედეას“ კოლექტიურ ცენტრში მონაწილეებმა დააფიქსირეს, რომ კორპუსი არის ნგრევადი და საცხოვრებლად საშიში, არის სახურავის და განათების პრობლემა, ხშირია სოციალურად დაუცველის სტატუსის მოხსნის ფაქტები, არის სკოლებსა და ბაღებში ბავშვების ტრანსპორტირების პრობლემა.
ახალგაზრდებთან ჩატარებულ ვორკშოპზე პიროვნული კონფლიქტების ანალიზი ფსიქოლოგიური ტესტით დაიწყო, რამაც საშუალება მისცა მონაწილეებს დაედგინათ, ხასიათის მიხედვით რომელ ტიპებს მიეკუთვნებიან და რა მახასიათებლებით გამოირჩევიან.
ამ დავალებას მოჰყვა ოჯახური სცენების იმიტაცია. მონაწილეებმა კარგად მოირგეს აგრესიული ქმრისა და მორჩილი ცოლის როლები, გაითვალისწინეს ხელშემწყობი გარემოებები და კონფლიქტების განვითარების დინამიკა ასახეს. წარმოდგენებში კარგად გამოჩნდა, რომ ოჯახში კონფლიქტების ესკალაცია ხშირად ადამიანის ხასიათზეა დამოკიდებული.
როგორ ვმართოთ კონფლიქტები, ისე რომ არ გავხდეთ არც მსხვერპლი და არც მოძალადე - ამ საკითხზე ინტერაქტიული მუშაობა წარიმართა.
სხვადასხვა მოსაზრების დაფიქსირების შემდეგ საერთო შეფასებაც გაჩნდა: უნდა შეგვეძლოს კონფლიქტის ანალიზი, ემოციის მართვა, რათა სწორად ვიმოქმედოთ და სიტუაციის განეიტრალება შევძლოთ.
მოვდივართ თუ არა წინააღმდეგობაში საკუთარ თავთან, როგორია ჩვენი ხასიათის ტიპები, ვინ როგორ მართავს საკუთარ ემოციებს - ეს საკითხები საინტერესოდ განიხილეს ქალთა ჯგუფებმა ხონში, სენაკში, ხურჩაში.
მონაწილეთა უმრავლესობამ აღნიშნა, რომ არასოდეს შეუფასებიათ საკუთარი თავი, არ უფიქრიათ იმაზე, რომ მათი ხასიათი ხშირად ხელს უწყობს ოჯახური კონფლიქტების განვითარებას.
- იმპულსური ადამიანი ვარ, ემოციების მართვა არ შემიძლია, ვაღიარებ, რომ ხშირად ვერ ვახერხებ ოჯახური კონფლიქტების შეჩერებას. მერე ვნანობ ჩემს საქციელს, მაგრამ უკვე გვიანია - ასეთი გულახდილი მონოლოგის ფონზე საწინააღმდეგო მოსაზრებებიც დაფიქსირდა: გაწონასწორებული ხასიათის ადამიანებიც ვერ ახერხებენ კონფლიქტის მართვას. შესაძლოა მუდმივად ითმინონ, მაგრამ პრობლემა ვერ გადაჭრან.
მონაწილეთა საერთო შეფასებით, ქალებთან მეტია სასაუბრო, რათა საკუთარი თავი შეისწავლონ, რაც დაეხმარება მათ ოჯახური კონფლიქტების მართვაში.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
საინტერესო ისტორიების გაანალიზებით წარიმართა ვორშოპები ქალთა ჯუფებთან, თემაზე „ქალთა სოლიდარობა - ოჯახური კონფლიქტების მართვის ერთ-ერთი მექანიზმი“.
- ძალადობის პრევენცია, მსხვერპლის დახმარება ქალთა სოლიდარობის და მხარდაჭერის გარეშე შეუძლებელია, ოჯახური კონფლიქტების დროს ეს განსაკუთრებით კარგად ჩანს. თუ შვილი ძალადობის მსხვერპლია, მან იცის, რომ პირველ რიგში დედისგან ვერ მიიღებს მხარდაჭერას, - მიიჩნევენ მონაწილეები. დასახელდა რეალური ისტორია, როცა ქმრისგან ნაცემი გოგო ტვინის შერყევით საავადმყოფოში აღმოჩნდა, დედა ექიმებს „უსაბუთებდა“, რომ მას კარადიდან გადმოვარდნილი ყუთი დაეცა.
შეხვედრის მონაწილე ქალებმა აღნიშნეს, რომ ბოლო პერიოდში ბევრი რამ უკეთესობისკენ შეიცვალა, მაგრამ ქალთა ერთიანობის, სოლიდარობის დეფიციტი მაინც არსებობს და მსგავსი ღონისძიებები დაეხმარება ქალებს, მხარდაჭერა გამოხატონ მსხვერპლის მიმართ.
ვორკშოპები ჩატარდა ხურჩაში, სენაკში, ქუთაისში.
რამდენად მნიშვნელოვანია სოლიდარობა ქალთა უფლებების დასაცავად, ხშირად რატომ არ თანაუგრძნობენ ქალები ძალადობის მსხვერპლს - ამ საკითხებზე გაიმართა დისკუსიები ახალგაზრდებთან წყალტუბოში, ფოთსა და ხონში ჩატარებულ ვორკშოპებზე.
გამოყენებული იყო იმიტირებული წარმოდგენები ოჯახური კონფლიქტების თემაზე, რამაც მონაწილეებს გაუადვილა ანალიზი განსახილველ საკითხზე.
- სოლიდარობის დეფიციტი ნამდვილად არსებობს. ძალიან ხშირად ოჯახური კონფლიქტების დროს ქალები არათუ გამოხატავენ მხარდაჭერას დაზარალებულის მიმართ - პირიქით, ნებისმიერ შემთხვევაში ქალში ეძებენ დამნაშავეს.
მიზეზებზე საუბრისას მონაწილეებმა აქცენტი ქართულ მენტალიტეტზე და არასწორ აღზრდაზე გააკეთეს. მათი თქმით, მეტი ინფორმაცია სჭირდება ქალებს, რათა კარგად დაინახონ ქალთა სოლიდარობის მნიშვნელობა ძალადობის პრევენციაში.
ბათუმსა და ქობულეთში პროექტის „თაობათა კულტურული დიალოგი, როგორც პოზიტიური გამოცდილების ციკლი“ ფარგლებში უფროსკლასელებთან და სტუდენტებთან გენდერული განათლების ვორკშოპების მომდევნო ციკლი ჩატარდა. ვორკშოპების თემატიკა მრავალფეროვანი იყო: „ქალთა და გოგონათა უფლებები“; „ოჯახში ძალადობა და მისი სოციალური შედეგები“; „შშმ პირები - მათთან დაკავშირებული ტერმინები და საზოგადოებრივი სტერეოტიპები“; „თაობათა გადასახედიდან - პიროვნებათშორისი კომუნიკაციები ოჯახსა და საზოგადოებაში“.
ახალგაზრდების დიდმა ინტერესმა და ჩართულობამ მსგავსი საქმიანობის საჭიროებას კიდევ ერთხელ გაუსვა ხაზი. მაღალი შეფასება მისცეს ჩატარებულ შეხვედრებს მშობლებმა და პედაგოგებმა. მათი ნაწილი სიამოვნებით ჩაერთო ახალგაზრდებთან დიალოგში და მომავალი თანამშრომლობის სურვილი გამოხატა.
ბევრი ცოცხალი ისტორია გაიხსენეს ქალებმა კონფლიქტოლოგიის ვორკშოპზე. გამოიკვეთა, რომ არაერთხელ ჰქონიათ წარმატებული და წარუმატებელი მოლაპარაკების მაგალითი. იყვნენ ისეთებიც, რომელთაც ამ მიმართულებით გარკვეული გამოცდილება დაუგროვდათ:
- ჩავრეულვარ მეზობლებს შორის კონფლიქტში, გამოცდილებამ ბევრი რამ მასწავლა. დღემდე ვსწავლობ. ფასილიტატორობა ყველას არ შეუძლია, იმპულსური ადამიანი თუ ხარ, ჯობია არ ჩაერიო. შეიძლება კიდევ უფრო დაძაბო სიტუაცია.
მონაწილეებმა მიიღეს ინფორმაცია, რას ნიშნავს ფასილიტაცია, მედიატორობა. როდის უნდა ჩაერიო, როგორ ჩაერიო, რომ კონფლიქტი დაარეგულირო. ერთობლივად ჩამოყალიბდა ეფექტური ფასილიტაციისთვის საჭირო პირობები.
ქალების შეფასებით, ვორკშოპზე მიღებული ინფორმაცია მათ უფრო მეტ სითამამეს შესძენს, რომ ჩაერიონ ოჯახურ კონფლიქტებში და საქმე ძალადობამდე არ მიიყვანონ.
ვორკშოპები ჩატარდა ქუთაისში, ხურჩასა და ხონში.