თერჯოლის ქალთა დღის ცენტრში წარმატებით დასრულდა ჭრა-კერვის სასწავლო კურსი. ჩვენს ნიჭიერ ბენეფიციარებს მისალოცად მუნიციპალიტეტის მერი მანუჩარ რობაქიძე და საკრებულოს თავმჯდომარის მოადგილე დავით გოგბერაშვილი ესტუმრნენ. ისინი თავიდანვე გულშემატკივრობდნენ ქალთა ფონდი „სოხუმის“ ამ კეთილ საქმეს და ხელს უწყობდნენ, რომ სწავლება კომფორტულ სივრცეში წარმართულიყო.
კურსდამთავრებულებმა თავიანთი ნაშრომები წარმოადგინეს. მათ საზეიმოდ გადაეცათ სერტიფიკატები. იყო მადლიერება და სიხარული. ბენეფიციარებმა ახალ პროფესიასთან ერთად შეიძინეს ერთმანეთი, მეგობრები, მხარდამჭერები და ახალი სურვილები და მიზნები გაუჩნდათ.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ურთიერთდახმარების ჯგუფები პრობლემების იდენტიფიცირებას ცდილობენ ყველა მუნიციპალიტეტში. ჯგუფებმა ბაღდათში, ქობულეთში, ჩოხატაურში, სამტრედიაში რამდენიმე პრობლემა გამოავლინეს და ადვოკატირებაც დაიწყეს.
ორ ქეისზე მუშაობს აქტიურად სენაკის ქალთა ურთიერთდახმარების ჯგუფი. ჯგუფის წევრები არიან არა მარტო ქალაქში, არამედ სოფლებში მცხოვრები ქალებიც.
ვანის და თერჯოლის მოტივირებული ჯგუფები პრობლემების ადვოკატირებით სხვებს აძლევენ მაგალითს, როგორ შეიძლება საკუთარი პრობლემების მოგვარება.
წყალტუბოს ურთიერთდახმარების ჯგუფი ერთადერთი ჯგუფია, რომელიც დევნილი ქალებით დაკომპლექტდა. ჯგუფის წევრების მიერ იდენტიფიცირებულია სამი პრობლემა და მათი მოგვარებისთვის ისინი ადგილობრივ თვითმმართველობასთან თანამშრომლობენ.
ასე აქტიურად მიილია ზაფხული...
პროექტი ხორციელდება გენდერული თანასწორობის ფონდის მხარდაჭერით (კანადა)
დაიწყო ახალი პანელის შექმნა ვებგვერდზე „ძალადობის მსხვერპლთა სერვისების ციფრული რესურსცენტრი“ https://sosfsokhumi.ge/map
ეს ითვალისწინებს საპილოტე მუნიციპალიტეტებში ოჯახში და ქალთა მიმართ ძალადობისა და უსაფრთხოების რისკის ინდიკატორების განსაზღვრას, ქალთა წინაშე არსებულ საფრთხეებზე დროული რეაგირების მოხდენისა და შესაბამისი ადვოკატირების გაწევის მიზნით.
ოჯახში და ქალთა მიმართ ძალადობის რისკების შეფასება იგეგმება ფონდი „სოხუმის“ 10 სამიზნე მუნიციპალიტეტში: ზუგდიდი, წალენჯიხა, სენაკი, წყალტუბო, ხონი, ქუთაისი, ბაღდათი, ჩოხატაური, სამტრედია, ქობულეთი.
პროექტი ხორციელდება გენდერული თანასწორობის ფონდის მხარდაჭერით (კანადა)
აგვისტოში ქალთა მხარდაჭერის ცენტრების ორგანიზებით 15 შეხვედრა ჩატარდა და 150-ზე მეტ ადამიანს მიეწოდა ინფორმაცია მსხვერპლთა დახმარების კუთხით არსებულ სერვისებზე.
მუშაობა აქტიურად მიმდინარეობდა ათივე ცენტრში: ბაღდათის, ვანის, თერჯოლის, სამტრედიის, სენაკის, ხურჩის (ზუგდიდის მუნიციპალიტეტი), წალენჯიხის, ხობის, ქობულეთის და ჩოხატაურის ცენტრებში.
შეხვედრების მონაწილეებმა ისაუბრეს იმაზე, ძალადობის პრობლემის პრევენციისთვის რა მიმართულებით არის მუშაობა გასაძლიერებელი. გამოიკვეთა, რომ პერიფერიებში უნდა გაფართოვდეს მოსახლეობის ინფორმირების არეალი და გაიზარდოს არასამთავრობო ორგანიზაციების როლი ამ მხრივ.
გამოწვევებში გამოჩნდა ისიც, რომ მნიშვნელოვანია ქალთა მომზადება და ჩართვა ეკონომიკური გაძლიერების პროგრამებში.
ქალთა მხარდაჭერის ცენტრებში აღნიშნული გამოწვევების გათვალისწინებით გაგრძელდება მუშაობა. თვის განმავლობაში ოთხი ახალი შემთხვევის იდენტიფიცირება მოხდა. ქეისების ანალიზის შემდეგ პროცესში ფსიქოლოგი და იურისტი ჩაერთვებიან.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
წალენჯიხის ურთიერთდახმარების ჯგუფს აქვს იდენტიფიცირებული პრობლემები, აპირებს მათ გადაჭრას და ამისთვის უკვე დაიწყო კომუნიკაცია სოციალურ სააგენტოსთან.
ზუგდიდის ურთიერთდახმარების ჯგუფი სოფელ კოკში იკრიბება და ჯგუფში, ძირითადად, ამ სოფლის ქალები არიან გაერთიანებულები. სექტემბრიდან ჯგუფს სხვადასხვა სოფლიდან შემოუერთდებიან მოწყვლადი ჯგუფები. შეხვედრებს დაესწრება თვითმმართველობის წარმომადგენელი - ეს გააადვილებს სახელმწიფო სტრუქტურებთან თანამშრომლობას და ადვოკატირების პროცესს.
აგვისტოში შეხვედრები წალენჯიხის და ზუგდიდის ჯგუფებთან ონლაინ გაიმართა. ზუგდიდის ჯგუფთან შეხვედრაში ქალთა ფონდი „სოხუმის“ ფსიქოლოგიც მონაწილეობდა.
სექტემბრიდან ორივე ჯგუფში მეტი აქტიურობაა მოსალოდნელი, რაც პრობლემების მოგვარებაზე მუშაობას გულისხმობს.
პროექტი ხორციელდება გენდერული თანასწორობის ფონდის მხარდაჭერით (კანადა)
ფონდი „სოხუმის“ ფსიქოლოგი ვანის, ქობულეთის და ფახულანის (წალენჯიხის მუნიციპალიტეტი) ქალთა მხარდაჭერის ცენტრებს სტუმრობდა. შეხვედრის სამიზნე ჯგუფებს წარმოადგენდა სხვადასხვა კატეგორიის ქალები. სამი შეხვედრა ჩატარდა ჯგუფური ფორმატით თემაზე „აგრესია და ოჯახური ძალადობა“. შეკრებილებმა ისაუბრეს ოჯახში აგრესიის გამომწვევ მიზეზებზე და შედეგებზე. ასევე იმაზე, რა განაპირობებს აგრესიის შემცირებას.
ორ შეხვედრას ინდივიდუალური ხასიათი ჰქონდა და ეხებოდა შიშებს და ფობიებს. მონაწილეებს მიეცა რეკომენდაციები, როგორ დაძლიონ შიშები.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ბაღების გაერთიანების ხელძღვანელობა, ადმინისტრაცია, ქალაქის ბაღების მენეჯერები, აღმზრდელები, ფსიქოლოგები, მეთოდისტები, გენდერული საბჭოს წევრები და მერიის წარმომადგენლები - 25 მონაწილე ესწრებოდა საინფორმაციო შეხვედრას ვანის მუნიციპალიტეტის საკრებულოს სააქტო დარბაზში.
მონაწილეები გაეცნენ გზამკვლევს „გენდერული ნიშნით ძალადობის პრევენცია და მასზე რეაგირება საომარ და ომის შემდგომ გარემოში - ქალთა არასამთავრობო ორგანიზაციების გამოცდილება და რეკომენდაციები“ https://wave-network. org/wp.../uploads/Toolkit-Georgian.pdf.
ეს სახელმძღვანელო ქალთა ევროპულმა ქსელმა WAVE-მა მოამზადა და მასში წარმოდგენილია ქალთა ორგანიზაციების მუშაობის წარმატებული პრაქტიკები. ამ პრაქტიკებს შორის ერთ-ერთია ქალთა ფონდი „სოხუმის“ წარმატებული მუშაობის შედეგები.
პროექტი ხორციელდება ქალთა უფლებების დაცვის სწრაფი რეაგირების ფონდის მხარდაჭერით
ქალთა ფონდი „სოხუმის“ ადვოკატირების ჯგუფის ორგანიზებით, თერჯოლის მოსწავლე-ახალგაზრდობის მუნიციპალური ცენტრში ჩატარდა შეხვედრა, რომელსაც ესწრებოდნენ ადგილობრივი თემის წარმომადგენელი ქალები. მათ მიეწოდათ ინფორმაცია ჩვენი ორგანიზაციის მიერ ჩატარებული მონიტორინგის „მუნიციპალიტეტების მიერ ქალთა მიმართ ოჯახში ძალადობის საკითხებზე პრევენციული ღონისძიებების განხორციელების ეფექტიანობის შეფასება“ შედეგებზე.
აქცენტები გაკეთდა დოკუმენტში ასახულ მნიშვნელოვან გამოწვევებზე, რომლებიც ადგილობრივი თვითმმართველობების, სკოლების და ბაღების გაერთიანების მუშაობას გააუმჯობესებს ძალადობის პრევენციისთვის.
მონაწილეებმა ასევე მიიღეს ინფორმაცია მერიის ბავშვთა უფლებების დაცვის განყოფილების პროგრამის შესახებ, თუ რა სერვისებით შეუძლიათ სარგებლობის მიღება ბენეფიციარებს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ხობის მუნიციპალიტეტის მერიის სხდომათა დარბაზში ჩატარდა მრგვალი მაგიდა ადგილობრივი რეფერირების სუბიექტების - საკრებულოს გენდერული თანასწორობის საბჭოს წევრები, ადგილობრივი თვითმმართველობის, პოლიციის და სოციალური სფეროს წარმომადგენლები, სკოლის პედაგოგები და სამედიცინო პერსონალის -მონაწილეობით.
შეხვედრაზე საუბარი შეეხო ოჯახში ძალადობის პრობლემას და ადგილობრივ სტრუქტურებთან თანამშრომლობის მნიშვნელობას. ისაუბრეს მუნიციპალიტეტის მასშტაბით არსებულ სტატისტიკაზე, ძალადობის იდენტიფიკაციასა და მსხვერპლის დახმარებაზე. ყურადღება გამახვილდა რეფერირების გზებზე და უწყებებს შორის თანამშრომლობაზე, რაც ხელს შეუწყობს ძალადობის პრევენციას.
შეხვედრაზე გაკეთდა პრეზენტაცია „ქალთა მიმართ ძალადობის ან/და ოჯახში ძალადობის მსხვერპლთა გამოვლენის, მათი დაცვის, დახმარებისა და რეაბილიტაციის ეროვნული რეფერირების პროცედურები (ეროვნული რეფერალური მექანიზმი)“.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
