ხონის სათემო განათლების ცენტრის ბიბლიოთეკაში ჩატარდა საინფორმაციო შეხვედრა დევნილ ქალებთან და გოგონებთან. მათ მიეწოდა ინფორმაცია გზამკვლევზე „გენდერული ნიშნით ძალადობის პრევენცია და მასზე რეაგირება საომარ და ომის შემდგომ გარემოში - ქალთა არასამთავრობო ორგანიზაციების გამოცდილება და რეკომენდაციები“ (გამომცემელი - ევროპელ ქალთა ქსელი ძალადობის წინააღმდეგ - WAVE).
გზამკვლევში წარმოდგენილია ქალთა ორგანიზაციების მუშაობის წარმატებული პრაქტიკები, ომის დროს და ომის შემდგომ პერიოდში. განსაკუთრებული ყურადღება გამახვილდა ქალთა ფონდი „სოხუმის“ პრაქტიკაზე.
შეხვედრის მონაწილეები გაეცნენ ამ თემაზე შემუშავებულ სატრენინგო მოდულს, რომლის ფარგლებშიც ტარდება ტრენინგები და ხდება ქალთა ორგანიზაციების საუკეთესო პრაქტიკების და სტრატეგიების შესახებ საზოგადოების ინფორმირება.
შეხვედრა ჩატარდა პროექტის „კამპანიების ორგანიზება საზოგადოებაში და სოციალურ ქსელებში სსო-ის მუშაობის მნიშვნელობის ჩამოსაყალიბებლად“ ფარგლებში.
პროექტი ხორციელდება ქალთა უფლებების დაცვის სწრაფი რეაგირების ფონდის მხარდაჭერით
პროექტში „მშვიდობის ელჩი ქალებისა და ახალგაზრდა ქალების ქსელი“ ხუთი მუნიციპალიტეტია ჩართული - ქუთაისი, წყალტუბო, ხონი, ზუგდიდი და სენაკი. ამ მუნიციპალიტეტებში იმსჯელეს სამოქალაქო ინიციატივებზე და პროექტის ფარგლებში 12 განაცხადი წარმოადგინეს.
ქალთა ფონდი „სოხუმის“ ოფისში სამოქალაქო ინიციატივების განხილვა გაიმართა. კომისიამ შეარჩია ინიციატივები, რომლებიც პროექტის ფარგლებში დაფინანსდება. შემდეგ ეტაპზე ქალთა სამოქალაქო საინიციატივო ჯგუფები თავიანთი ინიციატივების განხორციელებას შეუდგებიან ხუთივე მუნიციპალიტეტში.
პროექტი ხორციელდება გაეროს ქალთა ორგანიზაციის
მხარდაჭერით
ფსიქოლოგი ეკატერინე ქვაჩაკიძე აგვისტოში ჩატარებულ მუშაობაზე გვიამბობს:
კოკის, წყალტუბოს, ხობის, ვანის და თერჯოლის ქალთა მხარდაჭერის ცენტრებში გავმართე შეხვედრები ჯგუფური და ინდივიდუალური ფორმატით. შეხვედრის თემა კვლავ ეხებოდა ზაფხულს, რადგან მცხუნვარე დღეებში გონება მიმართულია დასვენებისკენ.
ქალებმა ისაუბრეს იმ პრობლემების შესახებ, რაც ხელს უშლით ოჯახის წევრებთან ერთად დასვენებაში - ეს ზოგიერთისთვის წარმოუდგენელ ფუფუნებად იქცა. უმრავლესობამ დასვენების ნაცვლად შვილებთან ერთად იმუშავა თხილის პლანტაციებში. ბავშვებმა საუბარში აღნიშნეს, რომ ისინი სიხარულით ელოდნენ თხილის შეგროვების სეზონს, რაც მათ ფულის გამომუშავების საშუალებას აძლევთ.
ქალები აქედანვე ფიქრობენ სექტემბერზე, სკოლის დასაწყისზე, რაც დაკავშირებულია ბავშვების ჩაცმასთან და სასკოლო ნივთების შეძენასთან. ასეთია სოფლის მცხოვრებთა საზაფხულო არდადეგები.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ფონდ „სოხუმში“ ფრჩხილის მოწესრიგების ორთვიანი სრული საბაზისო კურსი დასრულდა. მონაწილეებს სერთიფიკატები გადაეცათ. სწავლების მთავარი მიზანი ქალების ეკონომიკური გაძლიერების რეალური პერსპექტივაა, რაშიც მათ ახალი პროფესიის ათვისება უწყობს ხელს.
მიუხედავად იმისა, რომ დღის სარეაბილიტაციო ცენტრს მსგავსი სასწავლო პრაქტიკის გამოცდილება აქვს, უკრაინელი ტრენერის მასტერკლასი მაინც საუკეთესო გამონაკლისი იყო. კურსდამთავრებულებმა აღნიშნეს:
„მანამდეც მისწავლია ფრჩხილის მოვლის ტექნიკა, მაგრამ შედარებაც არ შეიძლება ამ ხარისხთან, რაც თქვენთან ვნახე“.
„პედაგოგის საერთაშორისო სერთიფიკატი განაპირობებდა იმას, რომ ახალი პროფესია მეცნიერების დონეზე შევისწავლეთ.“
„მადლობა ქალთა ფონდს - საუკეთესოები ხართ!“
დემოკრატიის კვლევის ინსტიტუტმა (DRI) გამართა დისკუსია თემაზე: „ცხოვრება ენგურს მიღმა - ადამიანის უფლებების დაცვის მდგომარეობა გალში“. ქალთა ფონდი „სოხუმის“ წარმომადგენელმა - ეკატერინე გამახარიამ თავის მოხსენებაში დისკუსიის მონაწილებს გააცნო გამყოფი ზოლის ორივე მხარეს მცხოვრები კონფლიქტით დაზარალებული მოსახლეობის ადამიანური უსაფრთხოების ხარისხი, რაც დაეყრდნო ორგანიზაციის მიერ ჩატარებული კვლევის მიგნებებს. მან ასევე ისაუბრა ე.წ. „უცხოური აგენტების კანონის“ შესაძლო გავლენაზე კონფლიქტით დაზარალებული მოსახლეობის უფლებრივ მდგომარეობაზე. გარდა ამისა, დისკუსიის დროს განიხილეს გალში მცხოვრებთა გადაადგილების და განათლების უფლება, დევნილ ქალებთან დაკავშირებული პრობლემები.
ქალთა ფონდი „სოხუმის“ თბილისის ოფისის ხელმძღვანელი - ეკატერინე გამახარია ქალები, მშვიდობა, უსაფრთხოებისა და ჰუმანიტარული ქმედების კომპაქტის თემაზე (WPS-Compact) ტრენერთა რეგიონულ ტრენინგში მონაწილეობის მისაღებად შეირჩა. ტრენერთა ტრენინგმა, რომელიც ქალთა მშვიდობის მშენებელთა გლობალური ქსელის ორგანიზებით (GNWP) და ეუთოს WIN პროექტის მხარდაჭერით, 5-6 ივნისს სტამბოლში გაიმართა, გააერთიანა ცენტრალური აზიის, აღმოსავლეთ ევროპის და სამხრეთ კავკასიის მშვიდობის მშენებელი და მედიატორი ქალები.
ღონისძიების ფარგლებში, ეკატერინემ მონაწილეობა მიიღო სამხრეთ კავკასიის მშვიდობისმშენებელ ქალთა სუბრეგიონულ შეხვედრაში, სადაც ეუთოსა და GNWP-ის წარმომადგენელთა საყურადღებოდ განიხილა საქართველოში არსებული ვითარება. მან ყურადღება გაამახვილა „უცხოური აგენტის კანონის“ ნეგტიურ ზეგავლენაზე სამოქალაქო სექტორის ფუნქციონირებისთვის და განსაკუთრებით გაუსვა ხაზი მის შეუქცევად დამანგრეველ გავლენას ქალთა გადაწყვეტილების მიღების პროცესში მონაწილეობის თვალსაზრისით და იმ რისკებს, რომლებიც მშვიდობის მშენებელ ქალებს ემუქრებათ კანონის ამოქმედების შემდეგ.
6 ივნისს ჰიბრიდული ღონისძიების დროს „ქალთა ლიდერობის წინსვლა ქალებში, მშვიდობა და უსაფრთხოება და ჰუმანიტარული ქმედება: პროგრესის შეფასება და წინსვლის გზა“ ეკატერინემ, როგორც ერთ-ერთმა მომხსენებელმა, ისაუბრა, რეგიონულ კონტექსტში მიღწეულ პოზიტიურ ცვლილებებზე ქალთა გაძლიერების და მონაწილეობის თვალსაზრისით და იმ აუცილებელ სამომავლო სტრატეგიებზე, რაც პროცესის პროგრესს შეუწყობს ხელს.
ფორუმს ესწრებოდნენ ეუთოს, UN Women და ევროკავშირის ოფიციალური პირები.
ქალთა ფონდი „სოხუმის“ თბილისის ოფისის ხელმძღვანელმა - ეკატერინე გამახარიამ 5-6 სექტემბერს მონაწილეობა მიიღო კიშინიოვში (მოლდოვა) გამართულ „ღია კარის დღე 2024“ ქალების, მშვიდობისა და უსაფრთხოების საკითხებზე რეგიონულ დიალოგში, სადაც მოდერაცია გაუწია პანელურ დისკუსიას თემაზე: „ქალებისა და ახალგაზრდების როლის გაძლიერება სოციალური თანხმობისა და აღდგენისთვის“. პანელურ დისკუსიაში მონაწილეებმა განიხილეს ქალებისა და ახალგაზრდების წინაშე არსებული ძირითადი ბარიერები სოციალური გაერთიანებისა და აღდგენით პროცესში, ასევე ის სტრატეგიები, რომლებიც ხელს შეუწყობს მდგრადი მშვიდობისა და აღდგენის პროგრესის უზრუნველყოფას სომხეთში, აზერბაიჯანში, უკრაინასა და მოლდოვაში.
აღნიშნულმა ღონისძიებამ მშვიდობისმშენებელ ქალ-აქტივისტებს მნიშვნელოვანი პლატფორმა შესთავაზა, რომელიც გამოწვევებისა და გადაწყვეტილებების გაზიარების შესაძლებლობაა. ამასთან, მათ იმსჯელეს ქალების გაძლიერებასა და მშვიდობისა და უსაფრთხოების (WPS) დღის წესრიგის იმპლემენტაციაზე რეგიონში. მისი მიზანი იყო გაეროსა და სხვა საერთაშორისო პარტნიორებთან თანამშრომლობის გასაძლიერებლად მნიშვნელოვანი ქმედებებისა და გზავნილების გენერირება.
დღევანდელ, ციფრულ ეპოქაში, როცა დიდ ნაწილს ინტერნეტში ვატარებთ, აქაც იგივე პასუხისმგებლობა გვეკისრება ციფრულ მოქალაქეებს, რაც ფიზიკურ სივრცეში - არ დავარღვიოთ სხვისი უფლებები. ბოლო დროს ინტერნეტში ყველაზე მეტად გავრცელებულ მავნებლობებს შორისაა გენდერული დეზინფორმაცია. სწორედ ამიტომ, უკეთესად უნდა ვიცოდეთ გენდერული დეზინფორმაციის ამოცნობა, რათა არც ჩვენი უფლებები დაირღვეს და არც სხვისი უფლებები დავარღვიოთ. ჩვენი ახალი სოციალური ვიდეო კლიპიც ამაზე გვიყვება.
შეხვედრაზე იმსჯელეს დასახლებაში მოსაგვარებელ საკითხებზე: დაზიანებული ურნები, გაუმართავი სანიაღვრე სისტემა, გზაზე შემაკავებელი ბარიერების არარსებობა.
საინფორმაციო შეხვედრა ქუთაისში, ნიკეას ქუჩის პირველი შესახვევის №13-ში, მეორე კორპუსში მცხოვრებ ქალებთან გაიმართა.
საინიციატივო ჯგუფის წევრი, ტრენინგების აქტიური მონაწილე ლია გოლეთიანი თავის გამოცდილებას თამამად უზიარებს დასახლების მცხოვრებთ. შეხვედრის მონაწილეები აღნიშნავენ, რომ აქტიურად უნდა ჩაერთონ საკუთარი პრობლემების მოგვარებაში - ეს სამოქალაქო პასუხისმგებლობის ნიშანია.
საინიციატივო ჯგუფის წევრებმა წერილების მომზადება უკვე დაიწყეს და შემდგომი რეაგირებისთვის ქუთაისის მერიას გადასცემენ.
პროექტი ხორციელდება USAID-ის ადგილობრივი თვითმმართველობის პროგრამის ფარგლებში