შეხვედრები (642)
შეხვედრები – ამ კატეგორიაში განთავსებულია ცნობები საინფორმაციო შეხვედრების შესახებ ფონდი „სოხუმის“ პროექტების ფარგლებში - შეხვედრები ბენეფიციარებთან, სახელმწიფო სტრუქტურების, ადგილობრივი და საერთაშორისო არასამთავრობო ორგანიზაციების წარმომადგენლებთან.
პროექტის „სოციალური დაცვის საკითხებზე მომუშავე არასამთავრობო ორგანიზაციების ჩართულობის გაძლიერება სტრატეგიულ დიალოგში საქართველოში“ ფარგლებში ხონის მუნიციპალიტეტის საკრებულოში ჩატარდა საინფორმაციო შეხვედრა დევნილთა რეფორმის პროექტის თემაზე.
შეხვედრას ესწრებოდნენ საკრებულოს თავმჯდომარის მოადგილე, საკრებულოს წევრები, გამგეობის სოციალური სამსახურის წარმომადგენლები და აპარატის თანამშრომლები. ადგილობრივი თვითმმართველობის წარმომადგენლები მიიჩნევენ, რომ რეფორმა დევნილთა საჭიროებებზე უნდა იყოს მორგებული, აუცილებელია ინდივიდუალური მიდგომა თითოეული ოჯახების მიმართ.
პროექტი ხორციელდება ჩეხური ორგანიზაცია „ადამიანი გაჭირვებაში“ PIN მხარდაჭერით
8-11 ივნისს სტამბულში გაიმართა პარტნიორი ორგანიზაციების სამუშაო შეხვედრა პროექტის „ქალთა შესაძლებლობების განვითარება კონფლიქტის ტრანსფორმაციაში ახალი მიდგომების გამოსამუშავებლად“ ფარგლებში. მონაწილეებმა ერთმანეთს გაუზიარეს ინფორმაცია პროექტის მიმდინარეობის შესახებ. შემუშავდა ახალი პროექტის სტრატეგია.
პროექტი ხორციელდება შვეიცარიის საგარეო საქმეთა ფედერალური დეპარტამენტის მხარდაჭერით
ფონდი „სოხუმის“ ორგანიზებით ქუთაისის გუბერნიის დარბაზში გამოცდილების გაცვლის მიზნით გაიმართა შეხვედრა იმერეთის ადგილობრივი თვითმმართველობების, ადგილობრივი და საერთაშორისო არასამთავრობო ორგანიზაციების წარმომადგენლებთან. საუბარი შეეხო ფონდი „სოხუმის“, საერთაშორისო ორგანიზაცია PIN-ის და სხვა ადგილობრივი და საერთაშორისო ორგანიზაციების და ადგილობრივი მუნიციპალიტეტების ერთობლივად განხორციელებულ პროექტებს; ორ სექტორს შორის თანამშრომლობის მნიშვნელობას მოქალაქეთა მეტი კეთილდღეობისათვის.
შეხვედრაზე ასევე გაიმართა დისკუსია მუნიციპალიტეტებში 2016 წლიდან დაკანონებული ახალი ინსტიტუციური რგოლის - გენდერული თანასწორობის საბჭოების როლისა და ფუნქციის შესახებ. გამოითქვა რწმენა, რომ საბჭოები გახდება მოქალაქეთა საჭიროებებზე ორიენტირებული, მოქნილი მექანიზმი და კარგი რესურსი ეფექტური ადგილობრივი მმართველობისთვის.
შეხვედრა განხორციელდა პროექტის „ვიშეგრადის ქვეყნების გამოცდილების შესწავლა ადგილობრივ დონეზე თანაბარი, ინკლუზიური და დემოკრატიული მმართველობის ადვოკატირებისათვის“ ფარგლებში.
ფონდი „სოხუმი“ აქტიური მონაწილეა პროექტისა „დავძლიოთ ომის შედეგები ერთად“. პროექტის ფარგლებში ყველა მონაწილე ქვეყნის ენაზე დაიბეჭდა ფლაერები. ფონდმა „სოხუმმა“ქართულ ენაზე თარგმნა ფლაერი, რომელშიც წარმოდგენილია მოკლე ინფორმაცია პროექტის შესახებ, პროექტის მიზნები, მონაწილეები და პარტნიორები.
ქართულ ენაზე ფლაერის გამოცემა ხელს უწყობს როგორც მონაწილეთა, ასევე დაინტერესებულ პირთა ინფორმირებას იმის თაობაზე, თუ როგორ ეხმარებიან საზოგადოებრივი ორგანიზაციები კონფლიქტის შედეგად დაზარალებულ ადამიანებს.
პროექტი ხორციელდება ორგანიზაცია DRA - ქართულ-რუსული გაცვლა - მხარდაჭერით (გერმანია)
ქალთა საინიციატივო ჯგუფი ფონდ „სოხუმში“ შეიკრიბა. ჯგუფის მოდერატორმა ისაუბრა, რა შედეგები აქვთ პრობლემათა ადვოკატირების თვალსაზრისით, რა გამოწვევების წინაშე დგანან.
-მოქალაქეთა აქტიურობის, მათი ჩართულობის გარეშე შეუძლებელია პრობლემების დროული მოგვარება. სამწუხაროდ, უმრავლესობა ფიქრობს, რომ ყველაფერი ხელისუფლებამ უნდა გააკეთოს და საკუთარ პასუხისმგებლობას ნაკლებად აცნობიერებს,- აღნიშნეს მონაწილეებმა.
მათიაზრით, განსაკუთრებით მნიშვნელოვანია არასამთავრობო ორგანიზაციის როლი - კონკრეტული ადამიანების ზარებზე რეაგირება ნაკლებია, ფონდი „სოხუმის “ სახელით პრობლემათა ადვოკატირება კი ეფექტურ შედეგებს იძლევა.
საინიციატივო ჯგუფი მიიჩნევს, რომ უნდა გაგრძელდეს საზოგადოებასთან კომუნიკაცია და მისი ინფორმირება.
ფონდი „სოხუმის“ ხონის ქალთა საინიციატივო ჯგუფის წევრებმა ექვსთვიანი მუშაობის შედეგების შეფასება-ანალიზი გააკეთეს.
- ყოველთვიური შეხვედრები საზოგადოების სხვადასხვა ჯგუფის წევრებთან, თანამშრომლობა ადგილობრივ ხელისუფლებასთან, პრობლემების ადვოკატირება - შეკრებილებმა ამ მიმართულებით შესრულებული აქტივობები შეაფასეს.
ჯგუფის წევრების შეფასებით, გაიზარდა იმ მოქალაქეთა მომართვიანობა, რომლებიც საინიციატივო ჯგუფის დახმარებით ცდილობენ ინდივიდუალური თუ კოლექტიური პრობლემების მოგვარებას. ხაზგასმით აღინიშნა, რომ ნებისმიერი მოგვარებული საკითხის უკან დგას ადგილობრივი მთავრობა, რომლის მხარდაჭერითაც მოხდა საზოგადოების ლოკალური თემების ინტერესთა გათვალისწინება.
თბილისის სახელმწიფო უნივერსიტეტის ქუთაისის სასწავლო ცენტრში პროექტის „ვიშეგრადის ქვეყნების გამოცდილების შესწავლა ადგილობრივ დონეზე თანაბარი, ინკლუზიური და დემოკრატიული მმართველობის ადვოკატირებისათვის“ ფარგლებში ახალგაზრდებთან შეხვედრა ჩატარდა. საინტერესო დისკუსიები გაიმართა გენდერული პოლიტიკის, სამოქალაქო ჩართულობის საკითხებზე. გამოიკვეთა არაერთი პოზიცია იმასთან დაკავშირებით, როგორ ხედავენ ახალგაზრდები საკუთარი ქალაქის ყოფას და მოქალაქეთა, განსაკუთრებით ახალგაზრდების კეთილდღეობის პერსპექტივებს, რამდენად არიან მზად, თვითონაც მიიღონ მონაწილეობა მათთვის სასურველი ცვლილებების განხორციელებაში.
პროექტი ხორციელდება ვიშეგრადის ფონდის მხარდაჭერით
19-26 მაისს პროექტის მონაწილეები, 4 ქვეყნის (უკრაინა, საქართველო, სომხეთი და ჩრდილოეთ კავკასია) წარმომადგენლები შეხვდნენ ერთმანეთს კიევში, რათა შეესწავლათ, როგორ მუშაობენ უკრაინაში მოქმედი არასამთავრობო ორგანიზაციები კონფლიქტური ადგილებიდან იძულებით გადაადგილებულ ადამიანებთან. ვიზიტში მონაწილეობდა 16 ძირითადი მონაწილე, 4 კოორდინატორი და პროექტის დირექტორი გერმანიიდან.
მონაწილეებმა შესაძლებლობა ჰქონდათ, გაცნობოდნენ უკრაინაში მოქმედი 11 ორგანიზაციის მუშაობას. მაღალ დონეზე იყო ორგანიზებული შეხვედრების როგორც სამუშაო, ისე კულტურულ-საგანმანათლებლო ნაწილი. ისინი ჰარმონიულად ავსებდნენ ერთმანეთს.
ინტეგრაცია, განსახლება, შემწეობისა და კომპენსაციის გაცემა, მშვიდობის მშენებლობის და ნდობის აღდგენის პროგრამები - ასეთი იყო შეხვედრებზე განხილული ძირითადი საკითხები.
საგანმანათლებლო ვიზიტმა აჩვენა თანამშრომლობის აუცილებლობა არა მარტო ადგილებზე, არამედ მსგავსი პრობლემების და ინტერესების მქონე ქვეყნებთან. ამ პროგრამის მეშვეობით მონაწილეებმა გაიგეს, რომ მშვიდობისა და ნდობის აღდგენა ერთ-ერთი უმთავრესი ამოცანაა და მის გადაწყვეტაში სამოქალაქო საზოგადოება აქტიურ მონაწილეობას უნდა იღებდეს.
პროექტი ხორციელდება ორგანიზაცია DRA - ქართულ-რუსული გაცვლა - მხარდაჭერით (გერმანია)
ქუთაისის, ხონის, წყალტუბოს, სენაკის, ფოთის და ზუგდიდის მუნიციპალიტეტის ქალთა მხარდაჭერის ცენტრების მობილიზატორები და აქტივისტები თვის მანძილზე შეხვდნენ ადგილობრივი თვითმმართველობის წარმომადგენლებს. ჩატარდა საინფორმაციო შეხვედრები: ქუთაისში - მერიის ინფასტრუქტურის სამსახურის უფროსთან, წყალტუბოში - სოციალური სამსახურის იურისტთან და სოციალურ მუშაკთან, ხონში - საკრებულოს სოციალური კომისიის თავმჯდომარესთან, ფოთში - მერიის სოციალური, ჯანდაცვის და გენდერული სამსახურის უფროსთან, სენაკში - სოფლის რწმუნებულებთან. გამორჩეული შეხვედრა იყო ზუგდიდში - ქალთა მხარდაჭერის ცენტრის მობილიზატორი და სათემო კავშირის წარმომადგენლები შეხვდნენ მუნიციპალიტეტის გამგებელს.
ყველა შეხვედრა მნიშვნელოვანი იყო თავისი შინაარსით და შედეგებით.
ქუთაისის, წყალტუბოს, ხონის ქალთა საინიციატივო ჯგუფებმა მაისში განსაკუთრებული ინტენსივობით იმუშავეს. სამუშაო გეგმა ითვალისწინებდა თანამშრომლობის გაფართოებას ადგილობრივ ხელისუფლებასთან და საზოგადოების ინფორმირებას საინიციატივო ჯგუფების მუშაობაზე.
სამივე ქალაქში ჩატარდა საინფორმაციო შეხვედრები, ადგილობრივი თვითმმართველობის სხვადასხვა სამსახურის წარმომადგენელთა ჩართულობით. გაჩნდა პრეცედენტი, როცა ხელისუფლების წარმომადგენლები შეხვედრაზევე იწყებდნენ აქტიურ ჩართვას პრობლემათა მოსაგვარებლად. მოქალაქეებს მიეცათ შესაძლებლობა, ესაუბრათ მათთვის აქტუალურ საკითხებზე.
ქალთა საინიციატივო ჯგუფები აქტიურად გააგრძელებენ მუშაობას ადგილობრივ ხელისუფლებასთან თანამშრომლობით - პრობლემათა ადვოკატირების მიზნით.