შეხვედრები (642)
შეხვედრები – ამ კატეგორიაში განთავსებულია ცნობები საინფორმაციო შეხვედრების შესახებ ფონდი „სოხუმის“ პროექტების ფარგლებში - შეხვედრები ბენეფიციარებთან, სახელმწიფო სტრუქტურების, ადგილობრივი და საერთაშორისო არასამთავრობო ორგანიზაციების წარმომადგენლებთან.
ამ ბოლო ხანებში დევნილთა შემწეობის რეფორმა განხილვის საგნად იქცა. სწორედ ამ თემას მიეძღვნა ფოკუს-ჯგუფი, რომელიც 17 მაისს ჩატარდა ხონში დევნილ ქალებთან. მონაწილეებმა გამოხატეს თავიანთი დამოკიდებულება რეფორმის მიმართ. აღნიშნეს, რომ რეფორმები ხელს უნდა უწყობდეს დევნილთა მეტ მხარდაჭერას, მათ განვითარებას და სოციალურ-ეკონომიკური პირობების გაუმჯობესებას და არა პირიქით.
შეხვედრა ჩატარდა ორგანიზაცია PIN-ის პროექტის „სოციალური დაცვის საკითხებზე მომუშავე არასამთავრობო ორგანიზაციების ჩართულობის გაძლიერება სტრატეგიულ დიალოგში საქართველოში“ ფარგლებში. დაფინანსებულია ევროკავშირის და ჩეხეთის საგარეო საქმეთა სამინისტროს მიერ.
ხონის მთავარ ბიბლიოთეკაში ქალთა საინიციატივო ჯგუფის ორგანიზებით საინფორმაციო შეხვედრა გაიმართა. შეხვედრას ესწრებოდნენ საზოგადოების სხვადასხვა სპექტრის წარმომადგენლები. მოწვეულნი იყვნენ ხონის მუნიციპალიტეტის გამგეობის წარმომადგენლები: ინფრასტრუქტურის სამსახურის განყოფილების უფროსი მაყვალა ბახტაძე და სოციალური სამსახურის უფროსი ლეილა კინწურაშვილი.
მონაწილეებმა მოისმინეს ინფორმაციები, რა პროგრამები არსებობს ხონის მუნიციპალიტეტში, რა სახის სამუშაოები შესრულდა და რა იგეგმება.
თვითმმართველობის წარმომადგენლებთან შეხვედრა მოსახლეობის ინფორმირებას ისახავდა მიზნად.
11 მაისს სენაკის მუნიციპალიტეტში, ფონდი „სოხუმის“ მიერ განხორციელებული ოჯახში ძალადობის კანონის მონიტორინგის ფარგლებში ჩატარდა ჩაღრმავებული ინტერვიუ გამგეობის სოციალური სამსახურის ხელმძღვანელთან და ფოკუს-ჯგუფი ადგილობრივი თვითმმართველობის წარმომადგენლებთან.
ხონის დევნილთა დასახლებაში ჩატარდა ფოკუს-ჯგუფი დევნილი ახალგაზრდების მონაწილეობით. შეხვედრის თემა იყო დევნილთა შემწეობის რეფორმა. მონაწილეებმა გამოხატეს თავიანთი დამოკიდებულება რეფორმის მიმართ, დააფიქსირეს რეფორმის უარყოფითი შედეგები და აღნიშნეს საჭიროებათა კვლევის აუცილებლობა.
პროექტი ხორციელდება ჩეხური ორგანიზაცია „ადამიანი გაჭირვებაში“ მხარდაჭერით
ოჯახში ძალადობის აღმოფხვრის, ოჯახში ძალადობის მსხვერპლთა დაცვისა და დახმარების შესახებ საქართველოს კანონის იმპლემენტაციის მონიტორინგის ჯგუფმა 3 მაისს ზუგდიდის მუნიციპალიტეტში ჩაატარა ფოკუს-ჯგუფი ქალაქის მერიის წარმომადგენლებთან და ჩაღრმავებული ინტერვიუ გამგეობის სოციალური სამსახურის ხელმძღვანელთან.
ამ შეხვედრების მიზანია თვითმმართველობის მუშაობის შედეგების გამოვლენა ძალადობის მსხვერპლთა დაცვის კუთხით. გამოიკვეთა ფაქტორებ, რომლებიც ხელს უშლის ძალადობის პრევენციის პროცესს.
ქალთა მხარდაჭერის ცენტრის მობილიზატორებმა თვის განმავლობაში ტრადიციული საინფორმაციო შეხვედრები ჩაატარეს ადგილობრივი თვითმმართველობის წარმომადგენლებთან ქუთაისის, ხონის, წყალტუბოს, სენაკის, ფოთის და ზუგდიდის მუნიციპალიტეტებში. ისინი ასევე შეხვდნენ სოფლის ტერიტორიული ერთეულების წარმომადგენლებს, ჯანდაცვის და სოციალური სამსახურის თანამშრომლებს. შეხვედრების მიზანია, სამთავრობო სტრუქტურების წარმომადგენლებმა გაიგონ სიახლეები ფონდის მუშაობაში და ერთმანეთთან თანამშრომლობის შედეგად მოგვარდეს ადგილობრივი პრობლემები.
25 აპრილს სენაკის საკრებულოს სააქტო დარბაზში გაიმართა გენდერული თანასწორობის საბჭოს პირველი სხდომა. საბჭოს შექმნას უძღოდა ფონდი „სოხუმის“ გენდერული საკონსულტაციო საბჭოს აქტიური სამწლიანი მუშაობა (საბჭო ფუნქციონირებდა 2016 წლის აგვისტომდე).
სენაკის მუნიციპალიტეტი პირველია სამეგრელოს რეგიონში, რომელმაც საკრებულოს სტრუქტურაში შექმნა გენდერული თანასწორობის საბჭო, გენდერული თანასწორობის და ადგილობრივი თვითმმართველობის კანონებში შესული ცვლილებების თანახმად.
საკრებულოს თავმჯდომარემ ჯუმბერ ლაშქარავამ, რომელიც ამავდროულად გენდერული თანასწორობის საბჭოს თავმჯდომარეა, სხდომის მონაწილეებს გააცნო საბჭოს საბოლოო სია. საბჭოში შევიდნენ: თავმჯდომარის მოადგილე, კომისიების თავმჯდომარეები, დეპუტატები, გამგეობის და ადგილობრივი არასამთავრობო ორგანიზაციების წარმომადგენლები. აღინიშნა, რომ ძირითადი წევრების გარდა, სხდომებზე დასწრება შეუძლიათ ადგილობრივი ხელისუფლების და სამოქალაქო საზოგადოების სხვა წარმომადგენლებსაც, წინასწარი მოთხოვნის შესაბამისად.
საბჭოს შემადგენლობაში შევიდნენ სენაკის ამომრჩეველ ქალთა კლუბის წევრები. ფონდი „სოხუმი“, როგორც ერთ-ერთი წამყვანი და გამოცდილი არასამთავრობო ორგანიზაცია, მზადაა, კონსულტაცია გაუწიოს და დაეხმაროს გენდერული თანასწორობის ახალშექმნილ საბჭოს ხელშესახები შედეგების მიღწევაში.
პროექტი ხორციელდება აშშ საელჩოს მხარდაჭერით
ყოველთვიური სამობილიზაციო-საინფორმაციო შეხვედრები ჩაატარეს ფონდი „სოხუმის“ ქალთა მხარდაჭერის ცენტრების მობილიზატორებმა.
შეხვედრების თემა იყო - ადვოკატირება და ადვოკატირების მეთოდები. შეხვედრის დროს ასევე მონაწილეებს გააცნეს ფონდი „სოხუმის“ მონიტორინგის ჯგუფის მიერ ჩატარებული სამუშაოს ანგარიშები.
თვის განმავლობაში 33 შეხვედრა გაიმართა ქუთაისის, წყალტუბოს, ხონის, სენაკის, ფოთის და ზუგდიდის მუნიციპალიტეტებში (კოკი და ხურჩა).
თბილისში გაიმართა ხატვის საერთაშორისო კონკურსის „დამიხატე მშვიდობა“ დაჯილდოების ცერემონია.
კონკურსში მონაწილეობა მიიღო ფონდმა „სოხუმმა“ და წარმოადგინა ქუთაისის №6, №11, №15, №21, №30 სკოლების ნორჩ მხატვართა ნამუშევრები.
კონკურსის შედეგებით, გამარჯვებულები, №30 სკოლის მოსწავლეები ნინო ვასილჩიკოვა და გიორგი ზოსიშვილი დაჯილდოვდნენ დიპლომებით.
ხონის მრჩეველთა საბჭოს რიგით მე-10 სხდომაზე საბჭოს წევრებმა მოისმინეს ინფორმაცია ორგანიზაცია PIN-ის სოციალური პროექტების შესახებ. აღინიშნა, რომ ხონის მუნიციპალიტეტში ამოქმედდება ახალი სოციალური სერვისები, რომლებიც ორიენტირებული იქნება მოქალაქეთა სოციალური მდგომარეობის გაუმჯობესებაზე და ამავდროულად ხელს შეუწყობს მუნიციპალიტეტში გრძელვადიანი სოციალური სერვისების პრაქტიკის დანერგვას. პროექტების სიცოცხლისუნარიანობისთვის თანხა ადგილობრივი ბიუჯეტიდან გამოიყოფა.
პროექტი დაფინანსებულია ევროკავშირის და ჩეხეთის საგარეო საქმეთა სამინისტროს მიერ და ხორციელდება ხონის, ტყიბულის, ზუგდიდის და გორის მუნიციპალიტეტებში.