საზაფხულო არდადეგების მიუხედავად, აგვისტოში ჩატარდა ტრენინგები ახალგაზრდობის გაძლიერების ცენტრებში. დასრულდა მუშაობის ხუთი თვე - გაიმართა ხუთი ტრენინგი სხვადასხვა აქტუალურ თემაზე. მუშაობა ათივე ცენტრში წარიმართა მონაწილეთა აქტიური ჩართულობით, დისკუსიებით.
ახლა ახალგაზრდები ემზადებიან მეექვსე - შემაჯამებელი შეხვედრებისთვის, სადაც მათ სატრენინგო კურსის დროს მიღებული ცოდნა უნდა წარმოაჩინონ და გამოცდილება გაუზიარონ სხვა მონაწილეებს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
პროექტის „მშვიდობის ელჩი ქალებისა და ახალგაზრდა ქალების ქსელის“ ფარგლებში ონლაინ შეხვედრა ჩატარდა. შეხვედრას ქუთაისის, წყალტუბოს, ხონის, ზუგდიდისა და სენაკის მუნიციპალიტეტების ქალთა საინიციატივო ჯგუფის წევრები ესწრებოდნენ. მათ წარმოადგინეს ინფორმაცია დევნილთა თემებში გამოვლენილი საჭიროებების და შემუშავებული სამოქალაქო ინიციატივების შესახებ სამიზნე მუნიციპალიტეტების მიხედვით.
ჯგუფის წევრები მზად არიან სამოქალაქო ინიციატივების განსახორციელებლად. შესრულებული პროექტი ხელს შეუწყობს პრობლემებით გამოწვეული მოსალოდნელი რისკების შერბილებას.
პროექტი ხორციელდება გაეროს ქალთა ორგანიზაციის
მხარდაჭერით
პროექტის „იძულებით გადაადგილებული ქალები და გოგონები - საჭიროებაზე ორიენტირებული ადგილობრივი პოლიტიკის შემუშავების აქტორები ქუთაისში” ფარგლებში გრძელდება საინფორმაციო ხასიათის შეხვედრები დევნილთა თემში -სამოქალაქო ჩართულობის ფორმებზე.
პროექტის მონაწილემ ეკატერინა სილაგაძემ ტრენინგენზე მიღებული ცოდნა ზაქარიაძის 21-ში მცხოვრებ დევნილებს გაუზიარა.
დასახლების მთავარ პრობლემას დაზიანებული ფასადი წარმოადგენს, ასევე გამოიკვეთა ძელსკამების საჭიროება. პრობლემის აღმოსაფხვრელად საინიციატივო ჯგუფი წერილს შეიმუშავებს და შესაბამის ადგილობრივ სახელმწიფო სამსახურებს მიმართავს რეაგირებისთვის.
პროექტი ხორციელდება USAID-ის ადგილობრივი თვითმმართველობის პროგრამის ფარგლებში
ფსიქოლოგი ეკატერინე ქვაჩაკიძე აგვისტოში ჩატარებულ მუშაობაზე გვიამბობს:
კოკის, წყალტუბოს, ხობის, ვანის და თერჯოლის ქალთა მხარდაჭერის ცენტრებში გავმართე შეხვედრები ჯგუფური და ინდივიდუალური ფორმატით. შეხვედრის თემა კვლავ ეხებოდა ზაფხულს, რადგან მცხუნვარე დღეებში გონება მიმართულია დასვენებისკენ.
ქალებმა ისაუბრეს იმ პრობლემების შესახებ, რაც ხელს უშლით ოჯახის წევრებთან ერთად დასვენებაში - ეს ზოგიერთისთვის წარმოუდგენელ ფუფუნებად იქცა. უმრავლესობამ დასვენების ნაცვლად შვილებთან ერთად იმუშავა თხილის პლანტაციებში. ბავშვებმა საუბარში აღნიშნეს, რომ ისინი სიხარულით ელოდნენ თხილის შეგროვების სეზონს, რაც მათ ფულის გამომუშავების საშუალებას აძლევთ.
ქალები აქედანვე ფიქრობენ სექტემბერზე, სკოლის დასაწყისზე, რაც დაკავშირებულია ბავშვების ჩაცმასთან და სასკოლო ნივთების შეძენასთან. ასეთია სოფლის მცხოვრებთა საზაფხულო არდადეგები.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ჩატარდა ონლაინ შეხვედრა ხონის ქალთა ქსელის წევრებთან. შეკრებილებმა განიხილეს შერჩეული პრიორიტეტული პრობლემები, რომელთა გადასაჭრელად ფინანსური მხარდაჭერა პროექტის ფარგლებშია გათვალისწინებული. ქსელის წევრები გაეცნენ სამოქალაქო ინიციატივების დაფინანსებისთვის საჭირო დოკუმენტებს და განაცხადის წარდგენის ვადებს. განსაკუთრებული ყურადღება გამახვილდა განაცხადის ფორმაზე.
აღინიშნა, რომ პრობლემების გადაჭრა სამოქალაქო ინიციატივების კონკურსის ფარგლებში ხელს შეუწყობს უსაფრთხო გარემოს შექმნას ხონის თემის ორ კორპუსში მცხოვრებ დევნილთათვის.
პროექტი ხორციელდება გაეროს ქალთა ორგანიზაციის
მხარდაჭერით
სენაკში ქალთა სამუშაო ჯგუფის შეხვედრა გაიმართა. ჯგუფის წევრებმა ერთად იმსჯელეს იმ ინიციატივებზე, რომელთა განხორციელებაც მომდევნო თვიდან იგეგმება. მათი ინიციატივები შეარბილებს პრობლემებს, რომლებიც თემში მცხოვრები ქალების ადამიანურ უსაფრთხოებას არღვევს.
წყლით დატბორილი სარდაფები, ნესტი, სუნი, ქვეწარმავლები, სარეველა მცენარეებისგან წარმოქმნილი ჯანმრთელობის საფრთხეები - სენაკის დევნილთა დასახლებაში მცხოვრები ოჯახებისთვის სერიოზულ პრობლემებს ქმნის.
ჯგუფის წევრებს აქვთ სამოქალაქო ინიციატივების განხორციელების შესაძლებლობა - შეიძინონ წყლის ამოსაქაჩი ტუმბოები, ელექტროცელები და ასე გაუმკლავდნენ სხვადასხვა თემში გამოკვეთილ აქტუალურ პრობლემებს.
პროექტი ხორციელდება გაეროს ქალთა ორგანიზაციის
მხარდაჭერით
მოქალაქეთა ინფორმირება მსხვერპლთა დახმარების სერვისებზე, პრობლემათა იდენტიფიცირება და მართვა - ამ მიმართულებით აქტიური მუშაობა მიდის ქალთა მხარდაჭერის ცენტრებში.
- ინფორმაცია მსხვერპლთა დახმარების სერვისებზე ქალებს მისცემს საშუალებას, სწორი გადაწყვეტილება მიიღონ და არსებული სერვისებით ისარგებლონ, - ასე ფიქრობენ საინფორმაციო შეხვედრების მონაწილეები.
თვის განმავლობაში შეხვედრებში 150-ზე მეტი ქალი იყო ჩართული. 10-ზე მეტი კრიზისული ოჯახის იდენტიფიცირება მოხდა. მათთან მუშაობას ფსიქოლოგი და იურისტი აგრძელებენ.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ფორუმ-თეატრმა აგვისტოში გეგმით გათვალისწინებული შეხვედრები გამართა მაყურებლებთან. ერთი იყო ქუთაისის ლადო მესხიშვილის სახელობის სახელმწიფო თეატრის მცირე დარბაზში, მეორე კი - ქალაქის ცენტრალურ პარკებში.
შეკრებილებმა აღნიშნეს, რომ წარმოდგენები საინტერესოა, კარგი ფორმატით ხდება აქტუალური პრობლემების წარმოჩენა. თუმცა ისინი დისკუსიაში ნაკლებად იღებენ მონაწილეობას.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქუთაისში, ნიკეას 21-ში, საინფორმაციო შეხვედრა გაიმართა პრობლემების ადვოკატირების და სამოქალაქო ჩართულობის საკითხებზე.
საინიციატივო ჯგუფის წევრი მარიკა პაპავა, რომელმაც ქალთა ფონდ „სოხუმში“ გაიარა ტრენინგები, ცდილობს, თავის თემში არსებული პრობლემები განიხილოს და ყველა ბერკეტი გამოიყენოს მათ გადასაჭრელად.
დევნილთა თემში მთავარი პრობლემებია: სანიაღვრე სისტემის გაუმართაობა, დატბორილი სარდაფი და დანესტილი ფასადი.
საინიციატივო ჯგუფმა მოამზადა წერილი, რომელიც შესაბამის უწყებებს წარედგინება. რეაგირების შემდეგ უნდა მოგვარდეს პრობლემები, რომლებიც საფრთხის ქვეშ აყენებს მოსახლეობის ჯანმრთელობას.
პროექტი ხორციელდება USAID-ის ადგილობრივი თვითმმართველობის პროგრამის ფარგლებში
