შეხვედრები (642)
შეხვედრები – ამ კატეგორიაში განთავსებულია ცნობები საინფორმაციო შეხვედრების შესახებ ფონდი „სოხუმის“ პროექტების ფარგლებში - შეხვედრები ბენეფიციარებთან, სახელმწიფო სტრუქტურების, ადგილობრივი და საერთაშორისო არასამთავრობო ორგანიზაციების წარმომადგენლებთან.
ჩეხეთის არასამთავრობო ორგანიზაცია „დამოუკიდებელი სოციალურ-ეკოლოგიური მოძრაობა“ ფონდი „სოხუმის“ საქმიანობის ერთ-ერთი აქტიური მხარდამჭერია. მისი დახმარებით ფონდმა არაერთი პროექტი განახორციელა. მოეწყო თანამშრომლების ვიზიტი ჩეხეთსა და ევროპის სხვა ქვეყნებში, სტაჟირების პროგრამები არასამთავრობო სექტორში.
ამ ორგანიზაციის მხარდაჭერით ახლახან დასრულდა პროექტი „ადგილობრივი ხელისუფლების პოლიტიკის შეცვლა გენდერულ ბიუჯეტირებასთან მიმართებაში“.
10 ნოემბერს ფონდ „სოხუმში“ ჩამობრძანდნენ ორგანიზაციის ხელმძღვანელები იარომირ ნემეცი, ირენა მარკოვა და მილან შტეფანეცი.
შეხვედრაზე შეჯამდა პროექტის ფარგლებში მიმდინარე აქტივობები. იყო საუბარი ადგილობრივ თვითმმართველობასთან თანამშრომლობაზე და სამომავლო გეგმებზე.
პროექტი ხორციელდება ჩეხეთის არასამთავრობო ორგანიზაცია
„დამოუკიდებელი სოციალურ-ეკოლოგიური მოძრაობის“ მხარდაჭერით
ბათუმის ხელოვნების სასწავლო უნივერსიტეტის საკონფერენციო დარბაზში საზოგადოებრივი განვითარების აკადემიამ გამართა პროექტის „სკოლამდელი განათლების სერვისის ხელშეწყობის“ პრეზენტაცია. პროექტი დაფინანსებულია ფონდი „სოხუმისა“ და ბათუმის მერიის მიერ და ემსახურება აღსაზრდელების მშობლებთან საბავშვო ბაღების თანამშრომელთა მუშაობის გაძლიერებას, ფსიქოლოგიური, სანიტარული და სხვა საკითხების გადაწყვეტას, აღსაზრდელთა შემოქმედებითი უნარების და გარემოსადმი ჯანსაღი დამოკიდებულების განვითარებას.
პროექტის ფარგლებში ჩატარდება ტრენინგები, სემინარები, საკონსულტაციო შეხვედრები. მოეწყობა „ეკო კუთხე“ და ფუნქციონირებას დაიწყებს მშობელთა კლუბი, რომელიც ხელს შეუწყობს მშობელთა მაქსიმალურ ჩართულობას სკოლამდელი განათლების პროცესში.
პრეზენტაციის ფარგლებში გაფორმდა სამმხრივი მემორანდუმი საზოგადოებრივი განვითარების აკადემიას, ბათუმის ბაღების გაერთიანებასა და ბათუმის გენდერულ საკონსულტაციო საბჭოს შორის, რომლის მიზანიცაა თანამშრომლობა განათლების სფეროში მიმდინარე რეფორმების წარმატებით განხორციელებაში, განსაკუთრებით, სკოლამდელი და არაფორმალური განათლების სფეროში.
პროექტს დადებითი შეფასება მისცეს ბათუმის სკოლამდელი დაწესებულებების ხელძღვანელებმა.
ფონდ „სოხუმში“ დაიწყო სამზადისი 16-დღიანი კამპანიისთვის ქალთა მიმართ ძალადობის წინააღმდეგ.
4 ნოემბერს გაიმართა გაფართოებული კრება, რომელსაც ესწრებოდნენ პროექტის „ქალთა უფლებების გაძლიერება დასავლეთ საქართველოში“ ხელმძღვანელები, ასისტენტები, იურისტები, ფსიქოლოგები და ქუთაისის, ხონის, წყალტუბოს, სენაკის, ფოთის, ხურჩა/კოკის (ზუგდიდის მუნიციპალიტეტი) ქალთა მხარდაჭერის ცენტრების მობილიზატორები.
შეკრებილებმა განიხილეს კამპანიის ჩატარების გეგმა, აქტივობები, შეიტანეს შესწორებები, გამოთქვეს იდეები და ინიციატივები.
გეგმის მიხედვით, გაწერილია 100-ზე მეტი ღონისძიება, რომელშიც მონაწილეობს ფონდი „სოხუმის“ ყველა რგოლი.
ერთიანი ძალისხმევით, დასავლეთ საქართველოს მასშტაბით კიდევ ერთხელ ჩატარდება მძლავრი საინფორმაციო კამპანია ძალადობის პრევენციისა და მსხვერპლის დაცვის მიზნით.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
ქ. ბათუმის N2 სკოლაში პროექტის „ბათუმის ახალგაზრდები არაძალადობრივი საზოგადოებისათვის“ ფარგლებში გაიმართა ახალგაზრდული სამოქალაქო ფორუმი. პროექტს ახორციელებდა ბათუმის გენდერულ საკონსულტაციო საბჭოსთან არსებული გაერთიანება „სამოქალაქო ინიციატივების ჯგუფი“ ბათუმის მერიისა და ფონდი „სოხუმის“ მხარდაჭერით.
ფორუმს ესწრებოდნენ ბათუმის სკოლების მოსწავლეები, პედაგოგ-მასწავლებლები, თვითმმართველობის, გენდერული საბჭოს, ადგილობრივი საზოგადოების წარმომადგენლები. ბათუმის 6 სკოლაში დაფუძნებულმა ახალგაზრდულმა ფორუმ-თეატრებმა პრობლემაზე რეაგირებისათვის მაყურებელს შესთავაზეს ხელოვნების ინოვაციური მეთოდი, რომლითაც ხდება რიგითი მოქალაქეების, განსაკუთრებით ახალგაზრდების ჩართვა პრობლემის მიზეზების, მისი გადაწყვეტის გზების ძიებაში. სკოლების მიერ მომზადებული ფორუმ-თეატრის წარმოდგენების შემდეგ გაიმართა დისკუსია, ჩამოყალიბდა წინადადებები და რეკომენდაციები ძალადობის პრევენციის, ჯანსაღი ცხოვრების წესის ხელშეწყობის მიმართულებით. ჯგუფური სამუშაოების დროს ახალგაზრდებმა განსაკუთრებით ხაზი გაუსვეს სოციალური ტოლერანტობის და ბულინგის პრობლემას. ასევე აღინიშნა აჭარის მაღალმთიან სოფლებში ძალადობის პრობლემაზე ინფორმირების კუთხით მუშაობის აუცილებლობა.
პროექტი ხელს შეუწყობს ძალადობის პრობლემის სწორ გააზრებას, მის მიმართ შეურიგებლობას, საზოგადოების გაერთიანებას ძალადობის პრევენციისა და მსხვერპლის დახმარებისათვის.
სასტუმრო „ხვამლის“ კოლექტიურ ცენტრში დევნილები რთულ და გაურკვეველ მდგომარეობაში ცხოვრობენ. ფონდი „სოხუმის“ წარმომადგენლებთან ერთად ისინი ცდილობენ თავიანთი პრობლემების ადვოკატირებას. გააგზავნეს წერილი ლტოლვილთა და განსახლების სამინისტროში, მაგრამ პასუხი ჯერაც არ მიუღიათ.
3 ნოემბერს ჩატარებულ საინფორმაციო შეხვედრაზე განცხადება თავიდან დაიწერა. კოლექტიურ ცენტრში მცხოვრები ოჯახები განცხადებას ხელს მოაწერენ და სამინისტროსგან ოფიციალურ პასუხს დაელოდებიან.
პროექტი ხორციელდება გაეროს ქალთა ორგანიზაციის
გენდერული თანასწორობის ფონდის მხარდაჭერით
2 ნოემბერს ჰააგაში, ნიდერლანდებში, გაიმართა WAVE-ის (ევროპელი ქალები ქალთა მიმართ ძალადობის წინააღმდეგ) ქსელის მე-17 კონფერენცია - „ქალების ერთიანი ძალა - ძალადობის შესაჩერებლად!“
ქსელი შედგება 92 წევრისგან - ევროპის ქვეყნების ქალთა ორგანიზაციები და ქსელები. კონფერენციაში მონაწილეობდნენ ორგანიზაციები 50 ქვეყნიდან. საქართველოს წარმოადგენდა ფონდი „სოხუმი“.
გაეროს სპეციალური მომხსენებელი ქალთა მიმართ ძალადობასთან დაკავშირებულ საკითხებზე დუბრავკა სიმონოვიჩი შეეხო ძალადობის მიზეზებსა და შედეგებს, ქალების დაცვის საერთაშორისო მექანიზმებს, მათ შორის - კონვენციას ქალთა მიმართ ყველა ფორმის დისკრიმინაციის ლიკვიდაციის შესახებ და სტამბულის კონვენციას.
წარმოდგენილი იყო მოკლე პრეზენტაციები რამდენიმე ორგანიზაციის მუშაობის შესახებ. გაიმართა დისკუსიები და ვორკშოპები, რის შემდეგაც შემუშავდა რეკომენდაციები. კონფერენციის მეორე ნაწილი მიეძღვნა საერთო კრებას, ქსელი წარსდგა ფინანსური ანგარიშით და ჩატარდა გამგეობის არჩევნები მომდევნო ორი წლით. ამას გარდა, მოხდა კორინა სეიფის სახელობის ჯილდოს მინიჭება - ეს არის არაჩვეულებრივი ქალი, ფემინისტი, ქალთა მიმართ ძალადობისა და გენდერთან დაკავშირებული საკითხების მკვლევარი.
თბილისში გაიმართა ორდღიანი კონფერენცია, რომელიც ადგილობრივ თვითმმართველობებში გენდერული თანასწორობის პრინციპების დანერგვას მიეძღვნა (ორგანიზატორები: გაეროს ქალთა ორგანიზაცია, ქალთა საინფორმაციო ცენტრი და ქალთა ფონდი „ტასო“).
მასში მონაწილეობა მიიღეს ფონდი „სოხუმის“ მიერ შექმნილმა გენდერულმა საკონსულტაციო საბჭოებმა.
პირველ დღეს მონაწილეებმა თვითმმართველობებში გენდერული თანასწორობისთვის აუცილებელ ინსტიტუციურ მექანიზმებზე იმსჯელეს და „ერთი ფანჯრის“ პრინციპის დანერგვისთვის ჩატარებული მუშაობის შედეგები შეაჯამეს.
კონფერენციის მეორე დღე გენდერულად მგრძნობიარე ბიუჯეტირების განხილვას დაეთმო. ქუთისის, სენაკის, ოზურგეთის და ბათუმის გენდერული საკონსულტაციო საბჭოების წარმომადგენლებმა კონფერენციის მონაწილეებს გაუზიარეს საკუთარი გამოცდილება, რომელიც ეხებოდა გენდერული ბიუჯეტირების პრინციპების დანერგვას, ადგილობრივი გენდერული პოლიტიკის სამოქმედო გეგმებს.
ითქვა, რომ არსებული გენდერული საბჭოების პრაქტიკა საუკეთესო დასაბუთებაა მომზადებული საკანონმდებლო ცვლილებების დროულად მისაღებად.
პროექტი ხორციელდება გაეროს ქალთა ორგანიზაციის
გენდერული თანასწორობის ფონდის მხარდაჭერით
ქალაქ ქუთაისის მერიის დარბაზში, ფონდი „სოხუმის“ ორგანიზებით, შეიკრიბნენ საკრებულოს დეპუტატები, სამართალდამცავი სტრუქტურებისა და არასამთავრობო ორგანიზაციების წარმომადგენლები, იურისტები, ფსიქოლოგები, სოციალური მუშაკები, პედაგოგები, ჟურნალისტები - ადამიანები, რომელთაც უშუალო შეხება აქვთ ოჯახში ძალადობასთან.
აქტიური დისკუსია გაიმართა ძალადობისაგან დაცვის ეროვნული ქსელის მიერ მომზადებულ ცვლილებებთან დაკავშირებით საქართველოს ორგანულ კანონში „ადგილობრივი თვითმმართველობის კოდექსი“ და საქართველოს კანონში „ოჯახში ძალადობის აღკვეთის, ოჯახში ძალადობის მსხვერპლთა დაცვისა და დახმარების შესახებ“.
შეხვედრა მიყავდათ ძალადობისაგან დაცვის ეროვნული ქსელის წარმომადგენლებს. დაფიქსირდა მონაწილეთა გამოცდილება, მათი გულშემატკივრული დამოკიდებულება, კონკრეტული მაგალითები და საერთო აზრი: ადგილობრივი თვითმმართველობა აუცილებლად უნდა ჩაერთოს ოჯახში ძალადობის პრევენციის და მსხვერპლთა დაცვის საქმეში. ეს მნიშვნელოვანია პრობლემის მოგვარებისათვის.
პროექტი ხორციელდება ძალადობისაგან დაცვის ეროვნული ქსელის მხარდაჭერით
ოჯახში ძალადობის წინააღმდეგ გასატარებელ ღონისძიებებში ადგილობრივი თვითმმართველობის ორგანოების ჩართვის უზრუნველყოფის მიზნით, ძალადობისაგან დაცვის ეროვნულმა ქსელმა მოამზადა ცვლილებები საქართველოს ორგანულ კანონში „ადგილობრივი თვითმმართველობის კოდექსი“ და საქართველოს კანონში „ოჯახში ძალადობის აღკვეთის, ოჯახში ძალადობის მსხვერპლთა დაცვისა და დახმარების შესახებ“.
28 ოქტომბერს ფონდ„სოხუმში“ ჩატარდა სამოქალაქო დებატები, სადაც აქტივისტი ქალბატონები გაეცნენ კანონპროექტებს. მათ აღნიშნეს, რომ ადგილობრივი თვითმმართველობის ჩართვა ოჯახში ძალადობის პრევენციის და მსხვერპლთა დაცვის კუთხით ძალიან მნიშვნელოვანია, ვინაიდან ადგილობრივი თვითმმართველობა დეტალურად ფლობს ინფორმაციასადგილზე არსებული საჭიროებების შესახებ.
პროექტი ხორციელდება ძალადობისაგან დაცვის ეროვნული ქსელის მხარდაჭერით
ოქტომბრის მეორე ნახევარში ჩატარდა ჯგუფური ფსიქოლოგიური შეხვედრები ქუთაისის 5 კოლექტიურ ცენტრში 42 ქალბატონის მონაწილეობით (მათი ასაკი 23-დან 65 წლამდე). მათგან 4 პირველად ესწრებოდა მსგავს შეხვედრას. გაიმართა აგრეთვე ინდივიდუალური კონსულტაციები კონფლიქტური სიტუაციების საკითხებზე. შეხვედრების ძირითადი თემა იყო საუბარი ოჯახურ კრიზისებზე და მათი დაძლევის გზებზე.
ერთ-ერთმა მონაწილემ აღნიშნა, რომ ეს არის გულითადი საუბრების, ფინჯანი ყავის ერთად დალევის და საჭირბოროტო პრობლემებისგან განტვირთვის შესაძლებლობა. ეს არის იმის შეხსენება, რომ ქალს აქვს უფლება, იფიქროს თავის სულიერ სიმშვიდეზე ოჯახის კეთილდღეობისათვის.
პროექტი ხორციელდება ორგანიზაცია
BrotfürdieWelt – Evangelischer Entwicklunsdienst მხარდაჭერით (გერმანია)