ქალთა მხარდაჭერის ცენტრები (533)
ქალთა მხარდაჭერის ცენტრი – ეს არის ფონდი „სოხუმის“ ფილიალები ქუთაისში, წყალტუბოში, ხონში, თერჯოლაში, სენაკში, ფოთში, ხურჩა/კოკში (ზუგდიდის მუნიციპალიტეტი), ლანჩხუთში, ოზურგეთში - შეიქმნა 2009 წლიდან. ცენტრების დანიშნულებაა ქალთა გაძლიერება, სოციალური, ფსიქოლოგიური, იურიდიული დახმარების გაწევა ძალადობის მსხვერპლი ქალებისთვის და კრიზისული ოჯახებისათვის, რომლებიც რთულ ცხოვრებისეულ მდგომარეობაში აღმოჩნდნენ. ქალთა მხარდაჭერის ცენტრები ხელს უწყობს ქალთა უფლებების დაცვას და მათ სოციალურ-ფსიქოლოგიურ რეაბილიტაციას.
ფონდი „სოხუმის“ იურისტებმა ექვსი შეხვედრა გამართეს ქალთა მხარდაჭერის ცენტრებში.
შეხვედრებზე ძირითადი თემა იყო ცვლილებები კანონში ოჯახში ძალადობის შესახებ, რომელიც დამტკიცდა 24 იანვარს. მონაწილეებს მიეწოდათ ინფორმაცია კანონში შესულ 4 ცვლილებაზე:
1. ადევნება დასჯადი ქმედება გახდა და 2 წლამდე თავისუფლების აღკვეთას ითვალისწინებს
2. ქალთა წინადაცვეთა ან ქალის იძულება-დაყოლიება ამ რიტუალის ჩასატარებლად რელიგიური, რიტუალური, ეროვნული, ეთნიკური ან სხვა ტრადიციების გავლენით ან მის გარეშე სისხლის სამართლის წესით ისჯება
3. გაფართოვდა „ოჯახში ძალადობის აღკვეთის, ოჯახში ძალადობის მსხვერპლთა დაცვისა და დახმარების შესახებ“ საქართველოს კანონის მოქმედების სფერო
4. გაიზარდა ქალთა მიმართ ძალადობრივი დანაშაულის დამამძიმებელ გარემოებათა ჩამონათვალი.
ქუთაისის ქალთა მხარდაჭერის ცენტრმა შეხვედრა ჩაატარა #15 სკოლაში, სადაც ესწრებოდა 35 მოსწავლე - ისაუბრეს ნაადრევი ქორწინების სამართლებრივ ასპექტებზე.
გარდა ამისა, გაიცა ინდივიდუალური კონსულტაციები. ბორჯომში ძალადობის მსხვერპლ ქალს გაეწია სატელეფონო კონსულტაცია და მუშაობა შემდეგომ თვეებშიც გაგრძელდება, გამომდინარე საქმის სირთულიდან. ხონში გამოვლინდა ქალი, რომელიც მიეკუთვნება ძალადობის მსხვერპლის რისკ ჯგუფს.
სამი შეხვედრა გაიმართა ფსიქოლოგთან წყალტუბოში, ხონსა და ფოთში.
წყალტუბოს ქალთა მხარდაჭერის ცენტრში კონსულტაცია მიეძღვნა თემას: მოტივაცია და ადამიანის შესაძლებლობების ზღვარი - ქალთა მიმართ გენდერული ძალადობის პრევენციისათვის. შეხვედრის მიზანი იყო ქალთა ინფორმირებულობა, უნარ-ჩვევების სწავლება და პრაქტიკული რეკომენდაციები საკუთარი პოტენციალის უკეთ წარმოჩენისთვის.
ბენეფიციარების სურვილით, ხონისა და ფოთის ქალთა მხარდაჭერის ცენტრებში წინასწარ დაიგეგმა შეხვედრების თემა: სუიციდის პრევენცია. ეს გამოწვეული იყო ამ ქალაქებში სუიციდის შემთხვევების გამო. შეხვედრებზე ისაუბრეს სტატისტიკაზე, მიზეზებზე და, რაც მთავარია, პრევენციის ზომებზე. დაისვა შეკითხვები. მონაწილეებმა მიიღეს პასუხები, რჩევები, რომელთაც გამოიყენებენ მოზარდებთან ურთიერთობაში.
თებერვალში ფსიქოლოგიური კონსულტაციები, ჯგუფების ინტერესებიდან გამომდინარე, სხვადასხვა თემაზე გაიმართა. სენაკის და ხურჩის (ზუგდიდის მუნიციპალიტეტი) ქალთა მხარდაჭერის ცენტრებში საუბარი შეეხო თემას „როგორ გავუგოთ საკუთარ თავს და სხვებს“. ამ აქტუალურმა საკითხმა ურთიერთობის უამრავი დეტალი შეითავსა: როგორ ვუსმინოთ საკუთარ თავს, ემოციებს, როგორ გავიგოთ სხვების გრძნობები, როგორ დავაკვირდეთ საკუთარ აზრებს. ყველაფერი ეს - ოჯახში კონფლიქტების და საზოგადოების პრევენციის გზებია.
ქუთაისში შეხვედრა გაიმართა მე-15 საჯარო სკოლის უფროსკლასელებთან და, ლოგიკურად, საუბარი მიეძღვნა ნაადრევ ქორწინებას და მის ნეგატიურ შედეგებს.
კონსულტაციები ინტერაქტიურ რეჟიმში გაიმართა. მონაწილეები ინტერესდებოდნენ სხვადასხვა პრობლემით, შეკითხვებს უსვამდნენ ფსიქოლოგს, კამათობდნენ და იღებდნენ რჩევებს, რომლებიც ყოველდღიურ ცხოვრებაში გამოადგებათ.
იანვარში ჩატარდა 7 იურიდიული საინფორმაციო-საკონსულტაციო შეხვედრა ადგილობრივ და დევნილ მოსახლეობასთან და 2 ინდივიდუალური კონსულტაცია.
შეხვედრების ძირითადი თემა იყო მსხვერპლთა დაცვის სამართლებრივი მექანიზმები. ინდივიდუალური კონსულტაცია გაეწია ბენეფიციარს, რომელმაც მოგვმართა ქუთაისის ოჯახში ძალადობის მსხვერპლთა მომსახურების დაწესებულებიდან (თავშესაფრიდან) და გვთხოვა, დავხმარებოდით მსხვერპლის სტატუსის მინიჭებაში. შეივსო ანკეტა, რომელიც სხვა საჭირო დოკუმენტებთან ერთად გაეგზავნა მსხვერპლის სტატუსის განმსაზღვრელ ჯგუფს. ქეისზე მუშაობა მიმდინარეობს და უახლოეს დღეებში დასრულდება.
9 ფსიქოლოგიური ჯგუფური და 3 ინდივიდუალური შეხვედრა გაიმართა ქუთაისში დევნილებთან იანვარში. მონაწილეობდა 58 ქალი 19-დან 67 წლამდე, პირველად მიიღო მონაწილეობა 7-მა ქალმა.
საუბრობდნენ სტრესზე, ოჯახურ კონფლიქტებზე, დაბალ თვითშეფასებაზე... ფონდი „სოხუმის“ ფსიქოლოგის თქმით, სტრესთან გამკლავების ერთადერთი გზა აქტიურობაა. მუდმივი ყურადღების კონცენტრაცია ცხოვრების ნათელ მხარეებზე და ქმედებებზე, რომლებიც უკეთესობისკენ ცვლის მდგომარეობას, დაგეხმარებათ არა მხოლოდ შეინარჩუნოთ ჯანმრთელობა, არამედ ხელს უწყობს წარმატების მიღწევას.
სენაკის, ქუთაისის და ხურჩის (ზუგდიდის მუნიციპალიტეტი) ქალთა მხარდაჭერის ცენტრებში იანვარში გაიმართა ჯგუფური ფსიქოლოგიური კონსულტაციები თემაზე „ნეგატიური ემოციების და სტრესის დაძლევა და კონტროლი“. ეს ოჯახში ძალადობის ერთ-ერთი პრევენციული ზომაა.
სტრესის გამომწვევი მიზეზი ბევრია: წინააღმდეგობები პირად ცხოვრებაში, პრობლემები სამსახურში, კონფლიქტები ახლობელ ადამიანებთან, გადაუხდელი კრედიტი, კომპლექსები და ფობიები... ფსიქოლოგის რჩევით, ამ მიზეზების ანალიზის გარეშე შეუძლებელია სტრესის დაძლევა.
12, 18 და 20 იანვარს წყალტუბოს, ფოთისა და ხონის ქალთა მხარდაჭერის ცენტრებში ჩატარდა ფსიქოლოგის ინდივიდუალური და ჯგუფური კონსულტაციები. ინდივიდუალური ფსიქოკონსულტირების გაწევა მოხდა 4 ადამიანთან პირად ფსიქოლოგიურ პრობლემებთან დაკავშირებით, რომელთაგან ერთ-ერთი მძიმე დეპრესიით გამოიხატება.
ჯგუფური შეხვედრის თემა იყო „თვითშეფასების ამაღლება ოჯახში ძალადობის პრევენციისთვის“.
- საკუთარი პიროვნების და მე-კონცეფციის სუბიექტური შეფასება მნიშვნელოვანია, რადგან დაბალი თვითშეფასება უმრავლეს შემთხვევაში კონფლიქტური ქცევის საფუძველს წარმოადგენს, - აღნიშნა ფონდი „სოხუმის“ ფსიქოლოგმა. როგორც ითქვა, ქალები გაითვალისწინებენ მის რჩევებს.
ქუთაისის დევნილთა კომპაქტური ჩასახლების ადგილებში დეკემბერში მოეწყო 12 ფსიქოლოგიური ჯგუფური შეხვედრა. მონაწილეობა მიიღო 20-დან 67 წლამდე ასაკის 70 ქალმა. ამასთანავე გაიმართა 5 ინდივიდუალური კონსულტაცია დაძაბული ურთიერთობების, კომპლექსებისგან გათავისუფლების და დაბალი თვითშეფასების პრობლემებზე.
ჯგუფური შეხვედრების საუბრის თემა იყო ინფორმაცია 16-დღიანი კამპანიის შესახებ ქალთა მიმართ ძალადობის წინააღმდეგ, აგრეთვე ჰარმონიულ ურთიერთობებზე ოჯახში.
ფსიქოლოგის რჩევა: - ყოველი ჩვენგანი ოჯახის ნაწილია. რაც უფრო მყარი და თბილია შიგნითა კავშირები, მით უფრო ადვილად ვუმკლავდებით გარეგან წინააღმდეგობებს, შიგა კავშირების გაძლიერებით ჩვენ ვდგამთ ნაბიჯს ოჯახური ჰარმონიისკენ.
დეკემბრის განმავლობაში ქუთაისში ჩატარდა 12 იურიდიული საინფორმაციო-საკონსულტაციო შეხვედრა ადგილობრივ და დევნილ მოსახლეობასთან. შეხვედრებს ესწრებოდა 73 ქალი. მათ მიეწოდათ ინფორმაცია ოჯახში ძალადობის წინააღმდეგ მიმართულ კანონზე და მასში სამომავლოდ შესატან ცვლილებებზე. გაიცა ერთი ინდივიდუალური კონსულტაცია ალიმენტის შესახებ კანონზე და ადვოკატირებისთვის ბენეფიციარის გადამისამართება მოხდა საიაში.
მონიტორინგის შედეგად ფონდი „სოხუმის“ იურისტმა გაიგო, რომ ორმა ოჯახმა განსახლებასთან დაკავშირებით გაგზავნილ განცხადებაზე მიიღო დადებითი პასუხი და მოხდა მათი ალტერნატიული ფართით დაკმაყოფილება.
გეგმით გათვალისწინებული იურიდიული საინფორმაციო-საკონსულტაციო შეხვედრები ჩატარდა ქალებთან და მამაკაცებთან ქუთაისის, ხონის, წყალტუბოს, სენაკის, ფოთის და ხურჩის (ზუგდიდის მუნიციპალიტეტი) ქალთა მხარდაჭერის ცენტრებში.
შეხვედრებზე განხილულ იქნა სხვადასხვა აქტუალური საკითხი - ოჯახში ძალადობა, კანონი ძალადობის წინააღმდეგ, კონფლიქტების გამომწვევი მიზეზები, განქორწინება.
შეხვედრის მონაწილეებმა მიიღეს ინდივიდუალური კონსულტაციებიც. მაგალითად, ერთმა ქალმა, რომელსაც აქვს კონფლიქტი ოჯახში, მიმართა ახალგაზრდა იურისტთა ასოციაციის ფილიალს და ამჟამად თავს უფრო დაცულად გრძნობს.