ქალთა მხარდაჭერის ცენტრები (533)
ქალთა მხარდაჭერის ცენტრი – ეს არის ფონდი „სოხუმის“ ფილიალები ქუთაისში, წყალტუბოში, ხონში, თერჯოლაში, სენაკში, ფოთში, ხურჩა/კოკში (ზუგდიდის მუნიციპალიტეტი), ლანჩხუთში, ოზურგეთში - შეიქმნა 2009 წლიდან. ცენტრების დანიშნულებაა ქალთა გაძლიერება, სოციალური, ფსიქოლოგიური, იურიდიული დახმარების გაწევა ძალადობის მსხვერპლი ქალებისთვის და კრიზისული ოჯახებისათვის, რომლებიც რთულ ცხოვრებისეულ მდგომარეობაში აღმოჩნდნენ. ქალთა მხარდაჭერის ცენტრები ხელს უწყობს ქალთა უფლებების დაცვას და მათ სოციალურ-ფსიქოლოგიურ რეაბილიტაციას.
დასრულდა კვლევა, რომელიც გენდერული საკონსულტაციო საბჭოს მიერ განხორციელდა ადგილობრივი გენდერული საჭიროებების გამოვლენის მიზნით. ამ ეტაპზე კვლევამ მოიცვა ოზურგეთის მუნიციპალიტეტის სოფლები.
გაიმართა 4 ფოკუს-ჯგუფი და 4 ჩაღრმავებული ინტერვიუ. გამოიკითხა 200 ადამიანი. ჯგუფების შერჩევა მოხდა ადგილობრივი ინტერესებიდან გამომდინარე. ფოკუს-ჯგუფები ჩატარდა საბავშვო ბაღისა და სკოლის პედაგოგებთან, სოფლის რწმუნებულებთან, ახალგაზრდებთან, დევნილ და სოციალურად დაუცველ ქალბატონებთან.
ჩაღრმავებული ინტერვიუს რესპონდენტებად შერჩეულ იქნა ადგილობრივი თვითმმართველობის წარმომადგენელი, ასევე ექსპერტები ჯანდაცვის, განათლების და სოფლის მეურნეობის სფეროდან. გამოკითხვა ჩატარდა დევნილებთან, ეთნიკურ უმცირესობებთან, სოციალურად დაუცველ ქალბატონებთან და ახალგაზრდებთან.
კვლევის ანგარიშების ანალიზის საფუძველზე მომზადდება რეკომენდაციები ადგილობრივი თვითმმართველობისათვის წარსადგენად, რათა 2016 წლის ბიუჯეტი მაქსიმალურად იქნეს მორგებული მოსახლეობის საჭიროებებზე.
პროექტი ხორციელდება გაეროს ქალთა ორგანიზაციის
გენდერული თანასწორობის ფონდის მხარდაჭერით
ივნისში გაიმართა ჯგუფური შეხვედრები სენაკისა და ხურჩის (ზუგდიდის მუნიციპალიტეტი) ქალთა მხარდაჭერის ცენტრებში. ესწრებოდა 21 ადამიანი 28-დან 65 წლამდე.
ფსიქოლოგის კონსულტაციები ეხებოდა პრობლემურ საკითხებს: დედის ურთიერთობა ჰიპერაქტიურ ვაჟთან, ემოციების კონტროლი, დაძაბულობა ოჯახში მცხოვრებ ორ რძალს შორის, აყვანილი გოგონა.
მონაწილეებისთვის საინტერესო აღმოჩნდა საუბრის თემა „როგორ გავუგოთ საკუთარ თავს და სხვებს“. შეხვედრისთვის მომზადდა ტესტი „როგორ განვავითაროთ ადამიანების გაგების ნიჭი“, დასარიგებელი მასალა „ურთიერთობის 12 წესი“ და რჩევები, რომ უკეთ გავუგოთ ერთმანეთს.
მონაწილეებმა გააცნობიერეს, რომ საკუთარი თავის და სხვების გაგება ხელს უწყობს პიროვნებათშორისი კონფლიქტების მოგვარებას და ოჯახში ძალადობის პრევენციას.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
ფსიქოლოგის კონსულტაციები გაიმართა წყალტუბოს და ფოთის ქალთა მხარდაჭერის ცენტრებში. მესამე შეხვედრა კი ჩატარდა ხონის მუნიციპალიტეტის სოფელ ივანდიდის გამგეობაში, სადაც ქალბატონებთან ერთად დაესწრნენ მამაკაცებიც.
ბენეფიციართა საერთო რაოდენობა იყო 28 ადამიანი, შეხვედრების თემა კი საერთო: ოჯახში ძალადობის ნეგატიური გავლენა მცირეწლოვან ბავშვებსა და მოზარდებზე.
მონაწილეებს მიეწოდათ ინფორმაცია, გაანალიზდა მშობლების კომპეტენციის გაუმჯობესება ბავშვის აღზრდის სფეროში, რომ თავიდან იყოს აცილებული მათი ანტისოციალური, აგრესიული, დეზადაპტაციური და ფსიქიკურ-სომატური პრობლემები. განხილულ იქნა პრევენციული ზომებიც.
მონაწილენი დაინტერესდნენ თემით. აქტიურად ჩაერთნენ დისკუსიაში მამაკაცებიც და შემდგომი თანამშრომლობის სურვილი გამოთქვეს.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
10 ივნისს ჩატარდა იურისტის საინფორმაციო-საკონსულტაციო შეხვედრა ქუთაისში, ხარებავას ქუჩაზე მცხოვრებ დევნილებთან. შეხვედრის ათი მონაწილე გაეცნო სხვადასხვა სახის ინფორმაციას, რომელიც პრობლემათა სამართლებრივ რეგულაციას ეხება. ამ კორპუსში ისინი 10 წლის წინ ჩაასახლეს, თუმცა ამბობდნენ, რომ შენობა ავარიული და საცხოვრებლად უვარგისი იყო.
კორპუსის ბოლო სართულზე ჭერი ჩამოწეულია და დღითი დღე საშიშია იქ ყოფნა. არის კანალიზაციის, სარდაფის და გზის საფარის პრობლემა. იურისტმა გასცა კონსულტაცია, თუ რა პროგრამები არსებობს ადგილობრივი ბიუჯეტიდან გამომდინარე, ვის უნდა მიმართონ და რა სახით. დამსწრეებმა აღნიშნეს, რომ მოამზადებენ განცხადებას და დაიწყებენ პრობლემების ადვოკატირებას.
პროექტი ხორციელდება გაეროს ქალთა ორგანიზაციის
გენდერული თანასწორობის ფონდის მხარდაჭერით
8 ივნისს ფონდი „სოხუმის“ იურისტი შეხვდა სენაკში, ყოფილი პროფსასწავლებელის კოლექტიურ ცენტრში მცხოვრებ დევნილებს, გააცნო მათ ფონდის და სენაკის გენდერული საკონსულტაციო საბჭოს საქმიანობა.
რადგან მათ მთავარ პრობლემას განსახლება წარმოადგენს, დამსწრეთა თხოვნით, მათ მიიღეს იურისტისგან ინფორმაცია ამ საკითხის და დევნილთა კანონის შესახებ. შეხვედრის შედეგად მონაწილეებმა გაიგეს აპლიკაციის შევსების და სოფლად სახლის ყიდვის პროგრამის არსებობის შესახებ. ასევე გაიცა ინდივიდუალური კონსულტაციები საკითხებზე: სოციალურად დაუცველი პირის კრიტერიუმები, ქულების შეჯამების წესები, იგპ სტატუსის აღდგენა, ომის ვეტერანის დოკუმენტის აღდგენის აუცილებლობა და მისი პროცედურები...
პროექტი ხორციელდება გაეროს ქალთა ორგანიზაციის
გენდერული თანასწორობის ფონდის მხარდაჭერით
ოზურგეთის მუნიციპალიტეტის სოფელ კვირიკეთში გენდერული საკონსულტაციო საბჭოს იურისტმა პირველად ჩაატარა შეხვედრა. მოსახლეობის პრობლემას წარმოადგენს გზის საფარი, რომელიც ბუნებრივი აირის შეყვანის დროს დაზიანდა და დღემდე უყურადღებოდ არის მიტოვებული.
არის წყლის პრობლემაც. მოსახლეობის 80%-ს სახლში ჭა აქვს, მაგრამ უმეტესობა ზაფხულის სიცხეების დროს შრება. დასახლებასთან მიყვანილია წყლის მილები და საჭიროა მცირედი სამუშაოს ჩატარება, რათა ეს პრობლემა მოიხსნას.
დასახლებაში მცხოვრებ ორ პირს სასამართლოში წარსადგენად იურისტმა მოუმზადა სარჩელი, რომელიც ეხება სოციალური და საოჯახო სამართლის სფეროს.
პროექტი ხორციელდება გაეროს ქალთა ორგანიზაციის
გენდერული თანასწორობის ფონდის მხარდაჭერით
ფონდი „სოხუმის“ იურისტმა მაისში 7 საინფორმაციო შეხვედრა ჩაატარა დევნილთა ჩასახლებებში. შეხვედრებს ესწრებოდა 51 მოქალაქე. მათი მთავარი პრობლემებია: უმუშევრობა, ეკონომიკური სიდუხჭირე, განსახლება, ფართებით დაკმაყოფილება, გაზიფიცირება, ფართების დაკანონება, ჯანმრთელობისა და სოციალური საკითხები.
შეხვედრის დამსწრეების ინტერესებიდან გამომდინარე, იურისტმა მიაწოდა მათ ინფორმაცია სხვადასხვა სამართლებრივ საკითხზე. გაიცა ინდივიდუალური კონსულტაციები ძალადობის მსხვერპლთა და მათი შვილების უფლებებზე.
იურისტმა ასევე განცხადება მოუმზადა ერთ სოციალურად დაუცველ ქალბატონს ჯანმრთელობის გამოკვლევისა და მედიკამენტების დაფინანსების თხოვნით.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
7 საინფორმაციო-საკონსულტაციო ჯგუფური ფსიქოლოგიური შეხვედრა გაიმართა ქუთაისში, დევნილთა კომპაქტური ჩასახლების ცენტრებში. ესწრებოდა 51 ქალი 20-დან 68 წლამდე.
საუბრის ძირითადი თემა იყო „ოჯახური კომუნიკაციის მოდელები“, აგრეთვე მუშაობა იმაზე, როგორი თანამოსაუბრეები არიან შეხვედრის მონაწილეები.
მათ გაიგეს სწორი მოსმენის ძირითადი პრინციპები:
- არ გააწყვეტინოთ მოსაუბრეს ლაპარაკი.
- მოერიდეთ გამაღიზიანებლებს - გადადეთ წიგნი ან გამორთეთ ტელევიზორი.
- შექმენით მხედველობითი კონტაქტი.
- ვერბალურად და არავერბალურად უპასუხეთ თანამოსაუბრეს. აჩვენეთ, რომ აქტიურად უსმენთ და თქვენთვის სულერთი არ არის, რას ლაპარაკობს.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
იურისტის საინფორმაციო შეხვედრას ქუთაისში, ყოფილი კოოპერაციული სასწავლებლის კოლექტიურ ცენტრში ესწრებოდნენ აფხაზეთიდან დევნილი ქალები და მამაკაცები. შეხვედრის მთავარ მიზანს წარმოადგენდა მათი ინფორმირებულობა სხვადასხვა იურიდიულ საკითხზე, მათი პრობლემების გამოვლენა და მოგვარების გზების ერთობლივი ძებნა.
კოლექტიური ცენტრის მთავარი პრობლემები: არ არის დაგებული კორპუსამდე მისასვლელი გზის საფარი, არ არის გასართობი ატრაქციონები ბავშვებისთვის. გადაწყდა, მომზადდეს ერთობლივი განცხადება ადგილობრივი ხელისუფლების სახელზე.
ასევე გაიცა ინდივიდუალური კონსულტაცია მრავალშვილიან ოჯახზე, მათთვის განკუთვნილი პროგრამების შესახებ.
პროექტი ხორციელდება გაეროს ქალთა ორგანიზაციის
გენდერული თანასწორობის ფონდის მხარდაჭერით
ტრადიციულად, იურიდიული კონსულტაციები და საინფორმაციო შეხვედრები გაიმართა ქუთაისის, სენაკის, ხონის, წყალტუბოს, ფოთის და ხურჩის ქალთა მხარდაჭერის ცენტრებში. შეხვედრები სხვადასხვა თემას მიეძღვნა: როგორია სასამართლო სისტემა, როგორ დაიცვას თავი მოქალაქემ, სესხი, სესხის ვალდებულება, ოჯახში ძალადობის კანონი, განქორწინება, ალიმენტის დანიშვნის პროცედურები.
დეტალური კონსულტაციების შედეგად, მონაწილეებმა იურისტების დახმარებით შეაგროვეს საბუთები განქორწინების გასაფორმებლად, ალიმენტის დანიშვნის თაობაზე, მოამზადეს შენობის იჯარის ხელშეკრულება, წერილი სესხის რესტრუქტურიზაციასთან დაკავშირებით და სხვა მისთ.
მონაწილეთა თქმით, ასეთი შეხვედრები ხელს უწყობს მათი სამართლებრივი დონის ამაღლებას.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)