ფონდი „სოხუმის“ თბილისის წარმომადგენლობის ხელმძღვანელმა ეკატერინე გამახარიამ მონაწილეობა მიიღო ეუთოს კონფლიქტის ციკლის უმაღლესი დონის სემინარის მორიგ სესიაზე.
შეხვედრის მთავარი საკითხი იყო, თუ როგორ მუშაობს ეუთო კონფლიქტის სრული ციკლის განმავლობაში ინკლუზიური და გენდერული სამართლიანობის მისაღწევად.
ღონისძიება გახსნა პეტრა ტატერმან ადორფმა, ფონდი Kvinna till Kvinna-ს გენერალურმა მდივანმა (შვედეთი).
პანელური დისკუსიისას სიტყვით გამოვიდნენ: ლილიანა პალიხოვიჩი (ეუთოს მოქმედი თავმჯდომარის სპეციალური წარმომადგენელი გენდერულ საკითხებში), ნინა პოტარსკაია (ეროვნული კოორდინატორი უკრაინიდან, ქალთა საერთაშორისო ლიგა მშვიდობისა და თავისუფლებისთვის), იგო როგოვა (კოსოვოს ქალთა ქსელის აღმასრულებელი დირექტორი) და ეკატერინე გამახარია (კულტურულ-ჰუმანიტარული ფონდი „სოხუმის“ თბილისის წარმომადგენლობის ხელმძღვანელი).
„ტოლერანტობა და კონფლიქტი“ – ეს თემა განიხილეს სოფელ ლიის (წალენჯიხის მუნიციპალიტეტი) ახალგაზრდულ საინიციატივო ჯგუფში.
შეხვედრის მონაწილეთა საერთო განწყობა ბოლოს ასეთი იყო: მოექეცი სხვებს ისე, როგორც გინდა მოგექცნენ შენ, ამ სიტყვებს დიდი მნიშვნელობა აქვს, ჩვენ პატივი უნდა ვცეთ ერთმანეთს! ჩვენ შეგვიძლია შევქმნათ ტოლერანტული სახელმწიფო...
მეორე შეხვედრა გაიმართა ფახულანის (წალენჯიხის მუნიციპალიტეტი) ქალთა საინიციატივო ჯგუფთან. შეფასდა ქალთა საჭიროებების კვლევის ტექნიკური მხარე. ჯგუფის წევრებმა, რომლებიც კვლევაში მონაწილეობდნენ, ისაუბრეს ჩატარების პროცესზე, ხელის შემშლელ ფაქტორებზე და იმაზე, რამ შეუწყო ხელი მუშაობის დროს.
შეხვედრების მონაწილეები გეგმებსაც შეეხნენ. აღინიშნა, რომ ჯგუფების მუშაობა საკმაოდ კარგი ეფექტის მომცემია.
14 ახალი ორგანიზაცია შეიქმნა პროექტის ფარგლებში. პროექტმა ხელი შეუწყო არა მარტო მათ რეგისტრაციას, არამედ წარმატებულ სტარტსაც: პირველი პროექტების დაწერაც შეძლეს და პირველი გრანტებიც მიიღეს.
მათთვის განსაკუთრებული მნიშვნელობა აქვს სწავლებას. წყალტუბოში ჩატარებულ ორდღიან შეხვედრაზე ამ ორგანიზაციების წარმომადგენლებმა განიხილეს შესაძლებლობების განვითარებისა და პროექტების მართვის საკითხები (ორგანიზატორი - იმერეთის მხარის მეცნიერთა კავშირის „სპექტრი“).
განსაკუთრებული ყურადღება დაეთმო სამოქალაქო საზოგადოების ორგანიზაციების ინსტიტუციურ განვითარებას, ფონდების მოძიებას, ორგანიზაციულ და ფინანსურ მართვას, პროექტების შემუშავებასა და განხორციელებას.
ლანჩხუთში საკონსულტაციო შეხვედრა შედგა. იმერეთის მხარის მეცნიერთა კავშირ „სპექტრის“ წარმომადგენელი შეხვდა ადგილობრივი პარტნიორი ორგანიზაციების: „საქართველოს სასოფლო დარბაზისა“ და „ლანჩხუთის საინფორმაციო ცენტრის“ წევრებს. შეხვედრაზე განიხილეს პროექტის მიმდინარეობასთან დაკავშირებული საკითხები. განსაკუთრებული ყურადღება გამახვილდა ადგილობრივი მოსახლეობის საჭიროებების კვლევებზე, რაც ახლა დაიწყო რვავე მუნიციპალიტეტში, სადაც ხორციელდება პროექტი „გურიის, იმერეთისა და რაჭა-ლეჩხუმის სამოქალაქო საზოგადოების ორგანიზაციების საერთო ფორუმი სახელმწიფო მმართველობის რეფორმის საგზაო რუკის მონიტორინგისთვის.“
პროექტი ხორციელდება ევროკავშირის მხარდაჭერით
ორი შეხვედრა გაიმართა მაისში საინიციატივო ჯგუფის წევრებთან. 18 მაისს ქალთა ჯგუფი შეიკრიბა, 21 მაისს კი - ახალგაზრდები. მოხდა ახალგაზრდული ჯგუფის ხელახალი ფორმირება და გაიმართა პროექტის პრეზენტაცია.
ქალთა საინიციატივო ჯგუფში ისაუბრეს ქალთა საჭიროებების კვლევაზე, რომელშიც ჯგუფის წევრები იყვნენ ჩართულები. აღნიშნეს, რომ გაეცნენ ქალაქში მცხოვრებ ქალთა პრობლემებს და დაინახეს, თუ რამდენ ოჯახს და ბავშვს სჭირდება რეალურად დახმარება. კვლევის დროს გამოყენებული იყო ფოკუს-ჯგუფის, ჩაღრმავებული ინტერვიუს და ანკეტირების ფორმატი.
„ადგილობრივ თვითმმართველობებში ელექტრონული სერვისების განვითარება მოქალაქეთათვის ელექტრონული სერვისების ხელმისაწვდომობის გაუმჯობესების მიზნით“ – ამ თემაზე გაიმართა მრგვალი მაგიდა ლანჩხუთის მუნიციპალიტეტის მერიაში. შეხვედრაში მონაწილეობა მიიღეს ადგილობრივი თვითმმართველობის, არასამთავრობო სექტორის, მასმედიის, სასწავლო დაწესებულებების წარმომადგენლებმა.
პროექტის კურატორი ორგანიზაციის „იმერეთის მხარის მეცნიერთა კავშირ „სპექტრის“ ასისტენტმა თამარ მოსეშვილმა ხაზი გაუსვა სამოქალაქო საზოგადოების ჩართულობის მნიშვნელობას საჯარო მმართველობის რეფორმის საგზაო რუკის მონიტორინგში. პროექტის პარტნიორი ორგანიზაციის - „საქართველოს სასოფლო დარბაზის“ ხელმძღვანელმა ამირან გიგინეიშვილმა ყურადღება გაამახვილა პროექტის ფარგლებში შემუშავებულ „ელექტრონულ მენეჯერზე“. მეორე პარტნიორი ორგანიზაციის - „ლანჩხუთის საინფორმაციო ცენტრის“ ხელმძღვანელმა დავით გოგიჩაიშვილმა, ადგილობრივი თვითმმართველობის წარმომადგენლებმა და მონაწილე სტეიქჰოლდერებმა კი ისაუბრეს მოქალაქეთათვის ელექტრონული სერვისების ხელმისაწვდომობის ეტაპობრივი განვითარების მნიშვნელობაზე.
ქალთა საჭიროებების კვლევის ტექნიკური მხარე შეაფასეს ზუგდიდში, ქალთა საინიციატივო ჯგუფების შეხვედრებზე. მონაწილეებმა ისაუბრეს, როგორ დაგეგმეს კვლევის ჩატარების პროცესი, რა გამოუვიდათ, რა პრობლემებს წააწყდნენ მუშაობის პროცესში, რა ხელის შემშლელი და ხელის შემწყობი ფაქტორები დაინახეს მუშაობისას.
თითოეული გამომსვლელი საუბრობდა კონკრეტული მაგალითებით: ჯგუფებთან მუშაობის სირთულეებზე, ინტერვიუს ჩაწერაზე, რესპონდენტთან პირისპირ საუბარზე. ჯგუფის წევრებმა მიიღეს რჩევები ფასილიტაციის ძირითად პრინციპებზე და განიხილეს სამომავლო გეგმები.
გაზეთ „ხონელში“ სტატია დაიბეჭდა პროექტის „განხეთქილების დაძლევა - ხალხთაშორისი ინიციატივები კონფლიქტის მოგვარებისთვის“ ფარგლებში წარმართულ აქტიურ მუშაობაზე ხონის მუნიციპალიტეტში.
ხონში სამი საინიციატივო ჯგუფია - ორში ქალები არიან გაერთიანებულნი, ერთი კი ახალგაზრდულია. სტატიის ავტორია ქალთა ერთ-ერთი ჯგუფის წევრი, ჟურნალისტი გურანდა ცაგურია, რომელიც აქტიურადაა ჩართული სამუშაო პროცესში.
ჯგუფები მარტში ჩამოყალიბდნენ და მას მერე მთელი ძალისხმევით მუშაობენ. ასე იყო მაისშიც: ახალგაზრდებს ონლაინ ტრენინგი ჩაუტარდათ აფხაზეთის კონფლიქტის წარმოშობის მიზეზებზე. ქალებთან კი საინფორმაციო შეხვედრები გაიმართა. შეკრებილებმა ისაუბრეს საჭიროებების კვლევაზე - როგორ დაგეგმეს საქმიანობა, რა გამოუვიდათ, მუშაობისას რა აღმოჩნდა რთული და ა.შ. ეს ქალთა ჯგუფების მიერ ჩატარებული პირველი კვლევა იყო, მათ კარგი გამოცდილება მიიღეს და, რაც მთავარია, მომზადდება დოკუმენტი, შეფასდება ქალთა საჭიროებები, შემუშავდება რეკომენდაციები და წარედგინება ადგილობრივ თვითმმართველობას.
ფონდი „სოხუმის“ თბილისის წარმომადგენლობის ხელმძღვანელი ეკატერინე გამახარია მონაწილეობდა ეუთოს კონფლიქტის ციკლის უმაღლესი დონის სემინარის (კონფერენციის) გახსნაში - ჰელგა შმიდთან (შვედეთის საგარეო საქმეთა მინისტრი), ენ ლინდესთან (ეუთოს გენერალური მდივანი), მარჩინ პრჟიდაცთან (სახელმწიფო უსაფრთხოების მინისტრის მოადგილე ამერიკის, აზიისა და აღმოსავლეთის პოლიტიკის საკითხებში) და მიროსლავ ჯენთასთან (გენერალური მდივნის თანაშემწე ევროპაში, ცენტრალურ აზიასა და ამერიკაში) ერთად სიტყვით გამოვიდა თემაზე: „ინკლუზიური პროცესების ძირითადი გამოწვევები, შესაძლებლობები და მასში ქალთა სამოქალაქო საზოგადოების ჩართულობა“.
ეკატერინე გამახარიამ მოკლედ ისაუბრა მშვიდობის მშენებლობის განხორციელების პროცესში ქალთა ორგანიზაციების როლსა და წვლილზე, ხაზი გაუსვა სამშვიდობო პროცესებში ქალთა მონაწილეობის რამდენიმე მნიშვნელოვან ფაქტორს. ამასთან, მან აქცენტი გააკეთა არსებულ გამოწვევებსა და ბარიერებზე, რომლებიც სათანადო ყურადღებას და რეაგირებას საჭიროებს.
