საჭიროება: სპორტულ მოედნებთან დამონტაჟდეს გარე განათების ბოძები და სკამები. კოკის ქალთა საინიციატივო ჯგუფი მუშაობს თემში გამოვლენილი პრობლემების მოგვარებისთვის. ჯგუფის წევრებმა იმსჯელეს, ადვოკატირების სამოქმედო გეგმაში რა ცვლილებები შეიტანონ, რა რესურსები ჩართონ.
ზუგდიდის ქალთა საინიციატივო ჯგუფიც განაგრძობს ადვოკატირებას. ჯგუფის წევრები დევნილთა ჩასახლების მიმდებარე ტერიტორიის დასუფთავებას ცდილობენ ეკალ-ბარდებისგან და გაწერილი გეგმის მიხეევით მოქმედებენ.
კოკის ახალგაზრდული საინიციატივო ჯგუფის წევრებმა მორიგ შეხვედრაზე ისაუბრეს პროექტზე „ჯანსაღი გარემო უკეთესი მომავლისთვის“ - როგორ მიმდინარეობდა, რა შედეგებს მიაღწიეს. ეს მათი საპროექტო დებიუტი იყო და ძალიან კმაყოფილები არიან.
„მსგავსი პროექტებით იწყება ახალგაზრდების წარმატება და გზა მწვერვალებამდე“, - აღნიშნა ჯგუფის ერთ-ერთმა წევრმა.
პროექტი ხორციელდება USAID-ის მხარდაჭერით
ეკოკლუბში ლიის ახალგაზრდული საინიციატივო ჯგუფის წევრებმა საპროექტო მუშაობა შეაჯამეს. პროექტის მონაწილეებმა ასეთი შეფასება გააკეთეს: ახალი გამოწვევა ყოველთვის სასარგებლო და ინფორმაციულია; გუნდური მუშაობა იძლევა კარგ შედეგს - ამაში პროექტზე მუშაობისას დავრწმუნდი; არაფორმალური განათლება ერთ-ერთი სასარგებლო ინსტრუმენტია ახალი ინიციატივების დანერგვითვის; მზად ვარ ახალი გამოწვევებისთვის.
ფახულანის ქალთა საინიციატივო ჯგუფმა გასულ თვეში დაწყებული ადვოკატირების პროცესი წარმატებით დაასრულა. მოამზადა წერილი მერის სახელზე, შეაგროვა ხელმოწერები, ჩართო სოფლის მაჟორიტარი დეპუტატი. საბოლოოდ პრობლემა მოგვარდა - სოფელში სანაგვე ურნები განთავსდა. ფონდი „სოხუმი“ მადლობას უხდის წალენჯიხის მერიას თანამშრომლობისა და მხარდაჭერისთვის.
პროექტი ხორციელდება USAID-ის მხარდაჭერით
ეს განსაკუთრებული სიახლეა ფახულანში!
ეს არის კონფლიქტის გამყოფ ხაზთან მცხოვრები ქალების საუკეთესო მხარდაჭერა, როგორც თვითონ აღნიშნავენ.
ფახულანში (წალენჯიხის მუნიციპალიტეტი) ბოლო წლების მანძილზე არ არსებობდა არანაირი სასწავლო კურსი, პრაქტიკულ შედეგზე გათვლილი თემატური ინტერაქცია, რომელიც ქალებს დამატებით რეალიზების საშუალებას ან კონკრეტული საქმიანობის პერსპექტივას გაუჩენდა.
ფონდმა „სოხუმმა“ გაითვალისწინა მათი საჭიროება და ფახულანის ქალთა მხარდაჭერის ცენტრში ჩამოაყალიბა ჭრა-კერვის კურსები. ფონდის ორგანიზებულ ტექნიკურ-მატერიალურ ბაზაზე ქალები უკვე შეუდგნენ სწავლებას -კურსი სამი თვის მანძილზე გაგრძელდება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ადგილობრივი თვითმმართველობის არჩევნებისთვის ზუგდიდის მუნიციპალიტეტში ფონდმა „სოხუმმა“ დანერგა ევროპაში წარმატებული მოდელი - ონლაინ „ხმის მრიცხველი“ - ამომრჩევლის რჩევის აპლიკაცია წინასაარჩევნოდ ამომრჩეველთა ინფორმირების მიზნით.
ფონდი „სოხუმის“ თბილისის წარმომადგენლობა აქტიურად თანამშრომლობს პოლიტიკურ პარტიებთან. აპლიკაციის შევსებაში მონაწილეობა მიიღეს შემდეგმა პოლიტიკურმა სუბიექტებმა: „შალვა ნათელაშვილი - საქართველოს ლეიბორისტული პარტია“, „გირჩი - მეტი თავისუფლება“, „ლელო საქართველოსთვის“, „გიორგი ვაშაძე - სტრატეგია აღმაშენებელი“, „ევროპული საქართველო“, მპგ „ქართული ოცნება - დემოკრატიული საქართველო“, „ერთიანი ნაციონალური მოძრაობა“.
პროექტი ხორციელდება ორგანიზაცია „ქალები ქალებისათვის“
(Kvinna till Kvinna) მხარდაჭერით (შვედეთი)
პროექტის „გურიის, იმერეთისა და რაჭა-ლეჩხუმის სამოქალაქო საზოგადოების ორგანიზაციების საერთო ფორუმი საჯარო მმართველობის რეფორმის საგზაო რუკის მონიტორინგის მიზნით“ ფარგლებში მომზადდა პუბლიკაცია - მეთოდური სახელმძღვანელო სამოქალაქო საზოგადოების ორგანიზაციებისთვის - ადგილობრივ დონეზე საჯარო მმართველობის რეფორმის (PAR) მონიტორინგისთვის და მასში მოცემულია სატრენინგო მასალები, რომლებიც გამოყენებული იყო პროექტის სამიზნე სამოქალაქო საზოგადოების ორგანიზაციებისთვის განხორციელებულ საგანმანათლებლო ღონისძიებებში.
პროექტი ხორციელდება ევროკავშირის მხარდაჭერით
პროექტის დასასრულს გამოვიდა ბოლო, მეოთხე ანგარიში „საჯარო მმართველობის რეფორმის საგზაო რუკის (PAR) მონიტორინგი დასავლეთ საქართველოს 8 მუნიციპალიტეტში“. პუბლიკაცია მოამზადა ფონდმა „სოხუმმა“ იმერეთის მეცნიერთა კავშირ „სპექტრთან“ და მეწარმე ქალთა ფონდთან პარტნიორობით.
ხონის, ბაღდათის, თერჯოლის, ვანის, ოზურგეთის, ლანჩხუთის, ცაგერის და ამბროლაურის მუნიციპალიტეტებში მონიტორინგის შედეგად მოხდა ადგილობრივი ხელისუფლების საქმიანობის ეფექტიანობის, გამჭვირვალობის და ინკლუზიურობის შეფასება.
ბოლო ანგარიშში ნაჩვენებია, რა გაკეთდა წინა სამი მონიტორინგის შემდეგ, როგორ შესრულდა რეკომენდაციები, რა ცვლილებებია მიღწეული და როგორია პროგრესი მუნიციპალიტეტებში ელექტრონული მომსახურების გაუმჯობესების კუთხით.
მუშაობა მიმდინარეობს პროექტის „გურიის, იმერეთისა და რაჭა-ლეჩხუმის სამოქალაქო საზოგადოების ორგანიზაციების საერთო ფორუმი საჯარო მმართველობის რეფორმის საგზაო რუკის მონიტორინგის მიზნით“ ფარგლებში.
პროექტი ხორციელდება ევროკავშირის მხარდაჭერით
მომზადდა პუბლიკაცია „ქალებისა და ახალგაზრდების საჭიროებების შეფასება ადრეული გაფრთხილების გენდერზე ორიენტირებული სისტემის (GREWS) მიხედვით“. ეს არის 6 მუნიციპალიტეტში (ქუთაისი, ხონი, წყალტუბო, სენაკი, წალენჯიხა, ზუგდიდი) ჩატარებული კვლევის ანალიზი.
ეს სისტემა მნიშვნელოვანი ინსტრუმენტია საზოგადოებაში არსებულ პრობლემებზე ადრეული რეაგირების, ადამიანური უსაფრთხოების ხარისხის გაუმჯობესების თვალსაზრისით.
საჭიროებათა კვლევის მიზანია 6 მუნიციპალიტეტში ქალებისა და ახალგაზრდების წინაშე არსებული პრობლემების და გამოწვევების იდენტიფიცირება, პრიორიტეტული საკითხების გამოკვეთა და პრობლემების ადვოკატირება ადგილობრივ და ცენტრალურ დონეზე.
პროექტი ხორციელდება USAID-ის მხარდაჭერით
სექტემბერი განსაკუთრებით დატვირთული აღმოჩნდა ახალგაზრდული საინიციატივო ჯგუფებისთვის. ქვესაგრანტო პროგრამის ფარგლებში წყალტუბოს მე-4 სკოლაში არსებულმა ახალგაზრდულმა კლუბმა განახორციელა პროექტი „BRAIN-ROOM - ახალგაზრდული სივრცე საზოგადოების ინფორმირებისათვის“.
პროექტის მონაწილეებმა შეიმუშავეს თემატური ნახატი ბანერისთვის, რომელიც BRAIN-ROOM მთავარი ატრიბუტი უნდა გახდეს. პროექტის ფარგლებში ჩატარდა საინფორმაციო შეხვედრები. სტუმრები იყვნენ იყვნენ წყალტუბოს მუნიციპალიტეტის მერიისა და საკრებულოს წარმომადგენლები. ახალგაზრდებმა მოისმინეს ინფორმაციები ახალგაზრდულ პროგრამებზე, გენდერულ საკითხებზე, მერიის სოციალურ პოლიტიკაზე. ახალგაზრდული კლუბის ბაზაზე შეიქმნა ინფო-ჯგუფები, რომლებმაც მასტერკლასები ჩაატარეს უფროსი ასაკის ადამიანებთან ინტერნეტთან მუშაობის უნარებზე. საპროექტო აქტივობები დასრულდა, თუმცა დარჩა სადისკუსიო სივრცე BRAIN-ROOM, რომელიც ახალი სტუმრების მოლოდინშია.
პროექტი ხორციელდება USAID-ის მხარდაჭერით
„ინტერაქცია „სთრით არტის“ ენაზე“ - ასე დაარქვეს სენაკის ახალგაზრდული საინიციატივო ჯგუფის წევრებმა ქვეგრანტის ფარგლებში განხორციელებულ პროექტს და საზოგადოებასთან ურთიერთობისთვის ქუჩის ხელოვნების ფორმატი გამოიყენეს. ჯგუფის წევრებმა შეიმუშავეს თემატური მაკეტი, შეარჩიეს ფრაზები. შემდეგ იდეამ სენაკის მე-7 სკოლის კედელზე გადაინაცვლა. ახალგაზრდული მესიჯები მშვიდობის, ლიდერობის, განათლების, აქტივიზმის აუცილებლობისკენ მოგვიწოდებენ.
ახალგაზრდებმა ჩაატარეს საჯარო ლექცია, ვორკშოპები, მოიწვიეს სენაკის სხვადასხვა სკოლის მოსწავლეები.
- რა ვიცით თვითმმართველობაზე, მის სტრუქტურაზე, პროგრამებზე, ბიუჯეტზე, რას ნიშნავს დეცენტრალიზაცია - ეს საკითხები მოექცა მონაწილეთა ინტერესის სფეროში.
პროექტი დასრულდა, თუმცა ახალგაზრდები საზოგადოებასთან ინტერაქციას კედელზე დარჩენილი გზავნილებით გააგრძელებენ.
პროექტი ხორციელდება USAID-ის მხარდაჭერით
